Matthew 26

1Nteyu kowo kunetis Yesu okoy kuwany ŋalecutecu tokol, kumwoci konomikyi kule, 2“Oŋnket akwek kule om pesyosyek oyeny ce kwoni, mosukwek sakwetap Yutayek nye cekure Keytayet. Kunyo mosicenäm Weritap cito oŋnkyikoyito wocewuyitoci murtowontet.’’ 3Yoto kutuyo tisik cewoyec oko poyikap Yutayek korurukyikey kaytap Tisintet nyewo nye cekure Kayafa, 4oŋnkurwoc ŋomnonet kule cenäm Yesu nye puryo konkete ci oŋnkyepakäc kume. 5Kumwoy cek kule, “Puryo kot kurok cenäm acek neto ye pesyet nyepo sakwet, omnye muce kwiy piko pararet.’’ 6Nteye kimite Yesu kotap Simon citap mutyenkenik om Pesaniya. 7Yoto kuco korket ake wule mite neto nye kipontonu mwayta nye poŋu topon nye nyitat cupet nye kyole mwayata pesan ce caŋ. Kunäm mwayata oŋnkuroŋnkyi metitap Yesu ye kimite kukepur kwomisyi. 8Nteye kotoköse konomik kuyunyo, kunyer cek kutep kumwoy kule, “Kociwurtoci ne mwayi tokol? 9Omnye kocimuce kyalya mwayi oŋnkyenyor pesan oŋnkyikoci pononik!’’ 10Kunket Yesu ŋalecato kimwowu cekto, kumwoci kule, “Omne sayim akwek Cepyosyani? Kokwiwo ani neto ŋolyo nye nyolunot koromun. 11Omnye opontekey okokoy oko pononik, ntene puryo kot opuri ani okokoy oko akwek. 12Kito nye kakwiy neto kunyi koroŋnkyi pormwani mwayi poŋu topon kuyiytowo ani muyisyet. 13Kunyo komwowok ani akwek ŋalek cepo manta kule! Om wulyo tokol wule mocemwayte lokoywecu toponec, mosiceŋolole mpo ŋolyontoni kokwiwo ani cepyosyani cisote neto.’’ 14Yoto kuwo akenke om konomik taman ok oyeny nye cekure Yuta Isikaryoti wule mite tisik cewoyec, 15oŋnkuwo kumwoci kule; “Mosokono ani akwek ne ye kakonok ani Yesu okoy onäm?’’ Yoto kuyit tisik silinkinek sosom oŋnkukoci neto. 16Kuceke yoto, kuceny Yuta poroyinto nye topon nye mokuŋomnte Yesu. 17Nteye pesyet nyepo tayta nyepo sakwetap mukatyantet nye mokutunat, kukwa konomik ye kimite Yesu oŋnkutepe kumwoci kule, “Ono wule möce nyi kule woceyiytowuŋ acek wule meyomisye omikap kosoleny cepo sakwetap Keytayet?’’ 18Kumwoci Yesu cek kule, “Ape wule mite citake nye minye moŋet, womwoci kule, ‘Komwoy konetintet kule, kakwitita pesyemwani nye kicekwey. Kunyo mosoyomisye ani kaŋuŋyi oko konomikwani sekwetap Keytayet.’ ’’ 19Yoto kuyiyta konomik omik cepo kosoleny cepo sakwetap Keytayet kuyu wulo komwocini Yesu. 20Ntowo kupunto kosoleny, kopur Yesu kwomis oko konomikyi taman ok oyeny. 21Nteye kimite kwomisyi, kumwoy kule, “Komwowok ani akwek kule, mosukuŋomnto ani akenke om akwek.’’ 22Yoto kunerekis konomik oŋnkucec kutep ci ake tokol om cek kumwoy kule, “Mokoryontet, ani nyoto?’’ 23Kuwec Yesu kumwoy kule, “Akenke om akwek nye mite kunoknoktoy mukatyantet nyenyi sanit akenke oko ani kunye mosukuŋomnto. 24Mosukume Weritap cito kuyu wulo mwowu silutekap Yiyintet ŋalek ce nöme neto, ntene mite kwapi koromun cito nyo mosukuŋomnto Weritap cito! Kitopon nto kipuryo kot ceyi cico mpo kisic!’’ 25Yoto kuŋalal ŋomntoyintet Yuta kumwoy kule, “Konetintet, ani nyoto mwowu nyi?’’ Kuwekyi Yesu kumwoci neto kule, “Kemwowu nyi nkit.’’ 26Nteye kimite cek tokwomisyi, kunäm Yesu mukatyantet oŋnkusomnci kukasta Yiyintet, oŋnkukoci konomikyi oŋnkumwoy kule, “Onäm oyam, nyitenyi kunye pormwani.’’ 27Oŋnkunäm cikompet oŋnkusomnci kukasta Yiyintet, oŋnkukoci cek oŋnkumwoy kule, 28“Oye akwek tokol cutecu, omnye korotikwani cutecu cepo kirotyet nyelel, ce citotocini piko ce caŋ sukuŋet kunum miyotyonik. 29Komwowok ani kule, komo toye ani nfinyonicu okoy pesyet nye mosaye nfinyonik ce lelac oko akwek om wulin po poytoyisyetap Papamwani.’’ 30Yoto kutum cek tumnto oŋnkunomen kupa okoy tulwetap ketik ce cekure Seituninek. 31Yoto kumwoci Yesu cek kule, “Mosomwey akwek tokol om kwomuwutap pesyoni oŋnkopakakta ani nkit, omnye mwowu silutekap Yiyintet kule, ‘Mosukupar Yiyintet mesewontet, yoto kuseret kecirek.’ 32Ntene om letut ye kaciŋeta ani atutune met, mosontowok anyosye awo Kalilaya.’’ 33Kuwekyi Petero kumwoci Yesu kule, “Nka kot komwey piko alak tokol, puryo kot oyostiŋ ani nyi mpo kisic!’’ 34Kumwoci Yesu neto kule, “Oŋnkisot ŋalecu! Kutompo kot koncur kurkonkit aret somok om kwomowutap pesyoni, mesetuckey nyi aret somok mwowu kule monketo ani.’’ 35Kuwekyi Petero kumwoci kule, “Puryo kot omuci ani mpo kisic kot atuckey omwowu kule monketiŋ nyi, nka kot koyek met cepoku mpo tukway.’’ Kumwoy konomik cut alake tokol kuyunyoto. 36Yoto kuwo Yesu oko konomikyi okoy kupunto mparet ake nye cekure Kesesemane oŋnkumwoci konomikyi kule, “Opur yuteyu awo ani wosom om yun.’’ 37Kuwetokey neto Petero oko werikap Sepetayo oyeny. Yoto kucec Yesu kunerec kumuy oŋnkusot koromun. 38Kumwoci neto cek kule, “Oponte nerekwek ce caŋ koromun om mukuleymwani kot karik kupakäca. Opur yuteyu, oŋnkokany cekösu oko ani monte ceruye.’’ 39Kuwo neto kunata tay kuminiŋ oŋnkuyim kukutuny, oŋnkusom kumwoy kule, “Papanyu, numuneno ani toŋoŋutecu ye mukoktos, ntene puryo kot kuyu wule omoktoy ani, ntene kuyu wulo moktoy nyi!’’ 40Yoto kuweckey kuco ye kimite konomik somoku, cokunyor kumite kukoruy. Kumwoci neto Petero kule, “Puryo so kot omuc akwek kot okösu oko ani awany mpo sawet akenke? 41Kunyo okösu, oŋnkosom sukuŋet monte osuci syemutok. Cöme mukuleyto, ntene puren porto.’’ 42Kuwo Yesu yec nyepo oyeny oŋnkuwo kusom kumwoy kule, “Papanyu, ye puryo kot komukoktos kukeytena ani toŋoŋutecu, ntene möce nyi kule opunte ani, kante kwiyokis ce möce nyi.’’ 43Kuweckey yec kuco cokunyor konomik kumite kukoruy omnye kikinäm rwonto nyewo. 44Kuwo Yesu yec kupakakta cek oŋnkuwo wokusom aret nyepo somok kumwoy ŋalek ce kerkey cokey co komwowu om panta nyepo tay. 45Oŋnkuweckey kuco ye kimite konomik oŋnkuco kumwoci cek kule, “Tomite akwek oruytosi omunyi? Akäs! Karik sawet nye ce nöme Weritap cito oŋnkyikoyito kunäm piko co ponto miyotyonik. 46Oŋetye cipe! Akäs oŋyi cito nyo ŋomnto ani!’’ 47Nteye kimite Yesu tokuŋolole, kupun Yuta akenke om konomik taman ok oyeny kupontonukey oko luket nyepo piko ce caŋ ce kiponto rotokap cok oko korokonik. Picoto kuce kiyoku tisik cewoyec oko poyikap Yutayek. 48Kikikoporci Yuta picoto pelutyet kumwoci kule, “Cito nye katoroc ani aŋatut kunye cito nyoto, anäm nyoto!’’ 49Ntowo kupun Yuta, yoto kuwo pakenke okoy ye kimite Yesu, oŋnkusupay kule, “Konetintet, purte nyi kalyet.’’ Oŋnkuŋatut. 50Kuwekyi Yesu kumwoci neto kule, “Corwenyu! Sorci lakwar yiy kito nye möce kule ayiy.’’ Yoto kukwa piko cut kwokunäm Yesu oŋnkurat topon. 51Kocut cito akenke nye kipontokey Yesu rotwetap cok oŋnkuyep kulot yitit nyepo mutworintetap tisintet nyewo. 52Kumwoci Yesu cicoto kule, “Ketyi cokiŋuŋ ye komite! Omnye piko ce yiyisye rotokap cok kuce pore picoto rotokap cok. 53Puryo kot nket nyi kule omuci ani kot okur kokolyoyisyet kucone wule mite Papamwani oŋnkuyokwo ani lakwar sikarek cepo Malaykanik ce keyite lukosyek taman ok oyeny? 54Ntene ye yunyo, komuce kulene kwitita kupoyit manta silutekap Yiyintet co mwowu kule, musukwitita ŋalecutecu om aret nye yunyitenyi?’’ 55Yoto kuŋololyi Yesu luket nyepo piko kumwoci kule, “Kakwa akwek kuyunye omöce kule cenäm corin? Omnye kakwante rotokap cok oko runkunek. Nteyu kwopuri ani pesyosyek tokol onetisyi om kotap Yiyintet, ntene puryo kot anäma ani akwek yoto. 56Ntene kokwiyokis ŋalecutecu tokol sukuŋet kwitita kupoyit manta ŋalek co kisil workoyik om silutekap Yiyintet.’’ Yoto kumwey konomik tokol kupakakta Yesu. 57Kunäm cek Yesu oŋnkukwer okoy kupunto kaytap Kayafa Tisintet nyewo, wule kikikorurukyikey konetikap ntarastinek oko poyik. 58Kurup Petero cekto let kuloyityi kuminiŋ okoy kupunto saŋntap kaytap Tisintet nyewo. Yoto kuwo Petero kayta orit oŋnkopur ŋony wanak oko sikarek ce kiripsi kule sakas wule mukupeta ŋalek tokol. 59Yoto kusyem yoto tisik cewoyec poyik oko piko cepo kokwet kule ceceny piko muncururwanik ce komwoy lelisto nye nöme Yesu kule sukuŋet cepakäc kume, 60Ntene kipuryo kot kunyor ŋolyo nyepo lelis mpo akenke, nka kot kiyoŋ piko alake ce caŋ oŋnkumwoy ŋalek cepo mwiynan ce nöme neto. Nto om letut kukwa piko alake oyenku oŋnkwokuyoŋ tay, 61oŋnkumwoy kule, “Kumwoy cici kule, ‘Omuci oturpup kotap Yiyintet oŋnkatec yec om pesyos somok pate.’ ’’ 62Kuyo Tisintet nyewo oŋnkumwoci Yesu kule, “Puryo kot ŋololi wec ŋalekyu cewosontyiŋ nyi?’’ 63Ntene kusis Yesu tokol. Kuŋalal Tisintet nyewo yec kumwoci kule, “Omöce ani kule walkey nyi yawut om kaynetap Yiyintet nye sopot! Mwowec acek, yiku nyi Ŋapanet Weritap Yiyintet?’’ 64Kuwekyi Yesu kumwoci kule, “Kemwowu nyi, Ntene komwowok ani akwek tokol kule kuceke yawut kuwo tay, mosokäs Weritap cito kumite kepure komostap yewut nyepo tay nyepo Yiyintet nyepo kamukeywek tokol, oŋnkucone polik cepo torot!’’ 65Om ŋalecato, kuye kupac Tisintet nyewo sirokyi oŋnkumwoy kule, “Kanyil Yiyintet? Komo cemöce acek yec piko muncururwanik alak! Kunyo kalim akwek om yuteyu ŋalekyi ce miyotec. 66Osoti akwek kulene?’’ Kuwec piko kumwoy kule, “Lelat, kunyo misyini cepakäc kume.’’ 67Yoto kuŋutyi cek neto oŋnkutuluc, oŋnkusyec alake, 68Kumwowu kule, “Nyi Ŋapanet, ŋor mwowec acek ŋo nyi kopiriŋ nyi!’’ 69Kimite Petero yoto kukepur yepo kayta saŋ, yoto kuco korko nye mutworin nyepo Tisintet nyewo ye kimite neto oŋnkumwoy kule, “Kepontekey mpenyi Yesu nyepo Kalilaya.’’ 70Ntene kutuckey kutoyis Petero om taytap piko tokol kuwec kumwoy kule, “Puryo kot oŋnket ani ŋalek ce mwowu nyi.’’ 71Kunomen Petero kuwo yepo kurket nyepo kayta saŋ. Yoto kukäs cepto ake nye mutworin Petero, kumwoci cepto piko ce kimite yoto kule, “Kopontokey cici oko Yesu nyepo Nasaret.’’ 72Kutuckey Petero yec kuwalkey kumwoy kule, “Puryo kot oŋnket ani cico.’’ 73Nto om letut yec kuminiŋ kukwa piko ce kimite keyoŋ om yoto kimite Petero oŋnkumwoci kule, “Yiku nyi manta akenke om cekto, omnye poru ŋalaleŋuŋ.’’ 74Yoto kuwalkey Petero kucupkey kumwoy kule, “Kupar asis! Puryo kot oŋnket ani cico.’’ Yoto pakenke koncur kurkonkit, 75kusot Petero ŋalek co kumwowu Yesu, “Kutompo kot koncur kurkonkit aret somok, mesetuckey nyi taya ani aret somok mwowu kule monketo ani.’’ Yoto kuwo saŋ oŋnkurir lokik ce caŋ koromun.

will be added

X\