Matthew 25

1“Om pesyonoto, mosukukerkeyit poytoyisyetap torot oko tipik taman ce mwenik ce kinäm tarinekwa oŋnkupa kutorokta cito nye kemütis. 2Tipicoto taman, kiperper mutu kuŋomec mutu. 3Kunämat co perper tarinekwa pate nye puryo kot kunämat mwaninek alak. 4Ntene kunämat ce ŋomec tarinekwa oko mwaninek alak ce kimite cupanik. 5Yoto kulilennkey cito nye kemütisyi okoy kunukis tipicoto kot kuruy. 6“Ntowo kupunto komoy kwen, yoto kusesew polotet cemwoy kule, ‘Oŋyin kaco cito nyo kemütisyi! Ape atorokte!’ 7Kuŋetyo tipikey mwenik tokol oŋnkusat tarinekwa. 8Yoto kumwoci tipik ce perper ce ŋomec kule, ‘Okonec mpo acek mwaninek cikwok omnye kapekune mwayta tarinek cico.’ 9Ntene kuwekyi ce ŋomec kumwoci cut kule, ‘Yunye puryo kot kuyemec cepcicine oko akwek, kunyo ape pate wule kyole wayal cikwok nkit.’ 10Kunomen yoto tipik mutu ce perper wokwolis, nteye kimite cek aran kupeti, kupun cito nyo kemütisyi. Yoto kupetakey tipik mwenik co kakayiytakey cito nyo kemütisyi wokwam sakwet, ceker kurket. 11“Nto om letut kupun mpecek tipik cokey oŋnkwokukursyo kumwoy kule, ‘Mokoryontet, Mokoryontet, yotwec mpöcek kurket!’ 12Kuwekyi cito nyo kemütisyi kumwoci cek kule, ‘Komwowok ŋalek cepo manta kule, puryo kot oŋnketok ani akwek!’ 13Kuwaŋnta Yesu kumwoy kule, möce oripkey omnye puryo kot oŋnketi akwek pesyet nto sawet. 14“Mosukukerkeyit poytoyisyetap torot oko ci nye karik kunomen kuwo toyek koret ake. Yoto kukur mutworikyi oŋnkukoci kupayta tukukyi. 15Kukoci ci ake tokol om picoto kuyu wule kimuktoy yisyet. Kukoci ake silinkinek elifunek mut, nto ake kukoci nyo silinkinek elifunek oyeny, oŋnkukoci ake silinkinek elifut akenke, oŋnkunomen kuwo toyek koret ake. 16Yoto pakenke kuwo mutworintet nyo kicikoci silinkinek elifunek mut oŋnkuwokwiyisye kamonkesyantit okoy kunyor latik silinkinek alak elifunek mut. 17Kuyunyoto kwiyisye mutworintet nyo kicikoci silinkinek elifunek oyeny okoy kunyor latik silinkinek alak elifunek oyeny. 18Ntene kuwo mutworintet nyo kicikoci silinkinek elifut akenke oŋnkupal mwenet oŋnkutupci kuwuny pesanikap mokoryontenyi. 19“Nto om letut nyepo pesyosyek ce caŋ, kuweckey mokoryontetap mutworicoto oŋnkucokoyitis kusat pesanik oko picoto. 20Kuco yoto mutworintet nyo kicikocini silinkinek elifunek mut oŋnkuco kukon oko latik silinkinek alak elifunek mut oŋnkumwoy kule, ‘Mokoryontet, kikono ani nyi silinkinek elifunek mut, kunyo käs pa, kyoyiyisye kot onyoru silinkinek alak elifunek mut.’ 21Kumwoy mokoryontenyi kule, ‘Kiyiy topon, yiku nyi mutworin nye topon nye cikenekey! Omnye cikeneninkey nyi om tukuk ce tukusic, kunyo mokoniŋ ani payte tukuk ce caŋ, co ceyemnte ŋerekwekwani tukway oko nyi.’ 22Kuco mpene mutworintet nyo kicikocini silinkinek elifunek oyeny, oŋnkuco kumwoy kule, ‘Mokoryontet, kikono ani nyi silinkinek elifunek oyeny, kunyo käs pa, kyoyiyisye kot anyoru latik silinkinek alak elifunek oyeny.’ 23Kumwoci mokoryontenyi neto nyoto kule, ‘Kiyiy topon, yiku nyi mutworin nye topon nye cikeneninkey! Omnye cikeneninkey nyi om tukuk ce tukusic, kunyo mosokoniŋ ani nyi payte tukuk ce caŋ, co ceyemnte ŋerekwekwani tukway oko nyi!’ 24Ntene kuco mpene mutworintet nyo kicikocini silinkinek elifut akenke, oŋnkuco kumwoy kule, ‘Mokoryontet, kyonket ani kule yiku nyi ci nye wuy; kise nyi mpo mparet nye kipuryo kot kol, oŋnkiruruce omik wule kipuryo kot kol nyi kupuswek. 25Kyanyokoritu ani, kunyo kyowo wopolyi pesanikuk ŋony. Käs okyu pesanikuk.’ 26Kumwoy mokoryontenyi kule, ‘Yiku nyi mutworin nye puren! Ye kinket nyi kule okise ani omik wule kipuryo kot akol, oŋnkoruruce omik wule kipuryo kot akol kupuswek. 27Kunyo ye yunyo, kimisyiniŋ nyi konore pesanikwani Penki. Nto kwaconi kwocekono tokol oko latik. 28Kunyo onumune neto silinkinek co ponto oŋnkokoci cito nyo ponto silinkinek elifunek mut. 29Omnye ci ake tokol nye ponto tukuk, mosicetosyi kutosyikey tukukyi, nto cito nyo puryo kot kuponto tukuk, mosicinumune neto nyoto mpo tukusic co ponto. 30Nto mutworintoni nyi moponto latik, owunukte kuwo saŋ wule mite menonet, wule mite rirek oŋnkyenyiy kelak.’ ’’ 31“Pesyet nye coni Weritap cito om woyinto kuyu Kinko, kupontonukey oko malaykanik tokol, mosucokopure yoto ŋecerenyi nyepo woyinto. 32Mosiciruruc kukwa taynyi piko cepo koret tokol kumukul. Mosukukwey neto yoto cekto kupciwune oyeny kuyu wulo kweytoy mesewontet warek oko kecirek. 33Mosukukoci kopurune kecirek yewunyi nyepo tay, oŋnkukoci kopurune warek yewunyi nyepo let. 34Mosukumwoci Kinko yoto piko ce mitowune yewunyi nyepo tay kule, ‘Akwa! Kikonok akwek Papamwani kupeyok, akwa kwonyoru poytoyisyet nye kiceyiytowok keny kuceke ye kicitany koret. 35Omnye kyoponte ani rupet, apaya akwek, kyoponte melelya, okono akwek peko, kyoyiku to, ntene atoroca ani akwek okwero korikwok. 36Kyoweti pöc nye moponte sira, alaca ani akwek. Kyomnyoni, anyaya ani akwek, ye kyomite mopusi, akwa akwek kwakäsa ani.’ 37Mosukuwekyi yoto piko ce toponec kumwoci neto kule, ‘Mokoryontet, pesyo ne ye kicekösiŋ acek kwomiŋ rupet cepayiŋ, nto ye kyomiŋ melelya cekoniŋ peko iye? 38Pesyo ne ye kicekösiŋ acek yiku to, cetorociŋ acek cekweriŋ korikyo, nto ye kimite pöc nye meponte sira cilaciŋ acek nyi? 39Pesyo ne ye kicekosiŋ acek nyi mnyoni, nto ye kimite mopusi cekwa kwocekäsiŋ?’ 40Mosukuwekyi Kinko kumwoci picoto kule, ‘Kiy ake tokol nye kyoyici akwek akenke om mpo yeyamwani cutecu minkec kupëlis, kuce kyoyiwo ani akwek!’ 41“Mosukumwoci Kinko yoto mpo piko co mitowune yewutap let kule, ‘Aŋete yu omite ani akwek cu kicupok Yiyintet! Ape wule mite mata nye momise nye kiceyiytoci Setani nyewo nyepo oyik oko malaykanikyi! 42Omnye kyoponte rupet, ntene otay akwek mopaya ani, kyoponte melelya, ntene oyetena mokono peko; 43kyoyiku to; ntene otay akwek motoroca okwero ani korikwok, kyoweti ani pöc nye moponte sira, ntene otay akwek molaca ani; kyomnyoni ani, oko ye kyomite mopusi, ntene otay akwek monyaya ani.’ 44Mosukuwekyi mpecek picoto kumwoci neto kule, ‘Mokoryontet, pesyo ne ye kicekösiŋ acek nyi ponte rupet oŋnkyetay mocepayiŋ, nto ye kikwomiŋ melelya, nto ye kiyiku to, nto ye kiweti pöc nye meponte sira, nto ye kimnyoni, nto ye kimite mopusi oŋnkyetay acek mocikalyiŋ nyi?’ 45Mosukuwekyi Kinko kumwoci picoto kule, ‘Kiy ake tokol nye kyotay akwek mokalye akenke om piko ce minkec ceyucu, kunye kipuryo kot oyiwo ani akwek yoto yisyet.’ 46Mosukupa picoto wule mite toŋoŋutek cepo kenyis nye mopoku, ntene kupa piko ce toponec wule mite soponto nye mopoku.’’

will be added

X\