Matthew 24

1Kunomen Yesu kumiŋnte kotap Yiyintet, nteye kiweti kukwa konomik kwokuporci neto wule kicetekta kotap Yiyintet. 2Kuwekyi Yesu kumwoci cek kule, “Komwowok ani kule, kokäs akwek rwontocu tokol cu mite yu, puryo rwantet mpo akenke nye mokuŋetune yu mite yawut, mosiciturpup tokol oŋnkyewirci ŋony.’’ 3Nteye kimite Yesu kukepur ŋony om tulwetap ketik ce cekure Seituninek, kukwa konomik ye kimite neto oŋnkutepe möt kumwoci kule, “Mwowec acek, mosukwiyokis ŋalecutecu pesyo ne? Oŋnkukiy ne pelutyet nye yiyoktos sukupor kule kopunto pesyet nyo cone nyi oko ye ŋete koret.’’ 4Kuwekyi Yesu kumwoci cek kule, “Oripkey koromun, monte kot kuperperak kumasak citake. 5Omnye mosukukwa piko ce caŋ om kaynemwani oŋnkwokumwoy kule, ‘Oyiku ani Kristo nye Ŋapanet.’ Mosukuperperis kumas piko ce caŋ. 6Mosolim akwek kancoyto nyepo poryosyek ce lekitec oko ce mite wule low; ntene monte cemuye, mosukwiyokis tukuk ceyucoto, ntene kupuryo kot kuporu kule kopunto pesyet nyepo letut. 7Omnye mosukusetyi kuporye koret ake koret ake, kuporye poytoyisyet ake poytoyisyet ake; mosukuco rupet, oŋnkuriŋriŋ koret wulyo tokol. 8Ntene poru ŋalecutecu yoto kule kacec mwonintap toŋoŋutek kuyu korko nye kaŋet moyet. 9“Yoto kuye mosukunämak akwek piko oŋnkukoytok wocitaŋanyak, mosiceparak opoku. Mosukusenkerak piko cepo koret tokol omnye kocäm kaynemwani. 10Pesyosyecoto kuye mosukutay piko ce caŋ koyenet nye kweyene. Mosukuŋomntokey cek nkit oŋnkusenkerkey kwicek nkit. 11Mosukutok yoto workoyik cepo mwiynanet oŋnkuperper kumas piko ce caŋ. 12Kutosyikey yoto kuwoyit miyotyet oŋnkuminiŋit koyenet nyepo piko ce caŋ. 13Ntene ci ake tokol nye kotitir kuyo okoy pesyet nyepo letut kunye mosicesor kusop nyoto. 14Mocemwayta lokoywecutecu toponec ce nöme poytoyisyetap torot kupunto koret tokol kumukul sukwek kasowunot om wule mite piko cepo koret tokol. Nteye kapok, kuye kupunto pesyet nyepo letut.’’ 15“Kunyo ye kokäs akwek, ‘Kiy nye miyat nyo kiŋolole Taniel kumite keyoŋe otepto nyetilil.’ (Möce kunket cito nye sumone kule mwowu ne ŋalecu!) 16Misyini yoto kumwey piko ce mite Yuteya kupa lakomosyek. 17Ye mite cito konyi kisyek, kupuryo kot kumisyini kurek oŋnkuwo wokunum tukukyi ce mite koto orit. 18Nteye mite cito mparen, kupuryo kot kumisyini kuweckey wokunum sirenyi nye mite koto orit. 19Mite kwapi koromun pesyosyecoto koruk ce koyotin oko ce rerisyi lekok! 20Osom akwek Yiyintet sukuŋet mente kot kupoyit mweyotemwoŋ ye pesyosyek cepo peŋat ye kayitit koret, nto ye pesyetap Sapat! 21Omnye mosukutok yoto toŋoŋutek cewoyec kupël alak tokol ce kikikwiyokis kuceke ye kicitany koret okoy pesyoni, oŋnkupuryo kot kwiyoktos yec kenyis kitake nye yunyoto. 22Ntomo nye kikwiri Yiyintet kuŋerinitu pesyosyecoto, nto puryo ci mpo akenke nye cimuce kot cesor cisop, ntene kikwiri Yiyintet kuŋerinitu pesyosyecoto om toponiyetap pikyi ce kweyotin. 23“Kunyo ye komwowok akwek citake pesyosyecoto kule, ‘Akäs oŋyi Kristo nye Ŋapanet’, nto, ‘Oŋyin mite yun’, monte ciyen ŋalekyi. 24Omnye mosukutok piko ce kurekey kule ciku ŋapanik, oko piko ce kurekey kule ciku workoyik. Mosukwiy picoto pelutok cewoyec oko tukuk cepo kakitat kule ye kemukakay ciperper cemas piko cepo Yiyintet ce kicekwey. 25Kunyo alimnte omnye komwowok ani kutompo kot kupunto pesyonoto. 26“Nto mpo ye komwowok akwek piko kule, ‘Akäs, oŋyin mite kitela!’ Monte cipe wuloto; nto mpo ye komwowok kule, ‘Oŋyi kewuŋekey yu!’ Monte ciyen. 27Omnye mosukuco Weritap cito kuyu kaweket nyepo ilat nyo wece kupunte koret parak kuceke koŋasis okoy raraktay. 28“Wule mitowune musto ku wuloto wule rurukyinikey motomwek.’’ 29“Yoto pakenke om letutap toŋoŋutek cepo pesyosyecoto, mosukuweckey asista kutuyit, kutay arawet meluwu, mosukosuwune kokelik torot, oŋnkutimtimnkey swamet nyepo torot. 30Mosukuporkey yoto pelutyet nyepo Weritap cito om torot, kuriryo kusyekey montuwek piko cepo koret tokol kumukul oŋnkukäs cekto Weritap cito kucone polyet nyepo torot kuponto swamet oko woyinto nyewo. 31Mosukuciy kontit nyewo, mosukuyokto neto malaykanikyi kupa okoy toponutek amwan cepo koret. Mosukoruruc cek pikyi ce kweyanik kuceke koret tapanta ake okoy tapanta ake.’’ 32“Roke okäse akwek ketit mokoywet. Ye keŋot sokek ceci ce ŋorŋor, oŋnket yoto kule karik kuŋotyen kuropen koret. 33Kuyunyoto ye kokäs akwek kwiyoktos ŋalecutecu kuye oŋnket kule karik kurkat poytoyisyetap Weritap cito. 34Komwowok ani akwek ŋalek cepo manta kule, mosukwiyokis ŋalecutecu tokol kutompo kot kupok kuwoŋnkey piko tokol cepo pinta nyepo pesyosyecu ce soptos yawut. 35Poku wulin po torot oko koret ŋony, ntene puryo kot kupoku ŋalekwani mpo kisic.’’ 36“Ntene puryo ci mpo akenke nye nkete kule coni pesyo ne pesyonoto, nto mpo kule sawet oŋnkono. Nka mpo Malaykanik om torot, nka mpo Werit. Papa nkit pate nye nkete. 37Omnye kuyu wulo kiyunto tukuk ce kikwiyoktos om pesyosyek co kipo Nuwa, kuyunyoto wule mosukwiytakey om pesyet nyo coni Weritap cito. 38Omnye om pesyosyecoto, ye kitompo kot kolum peko koret, kikwomisyi piko oŋnkuyesyi, komütisyi moronik, oŋnkyimüte koruk okoy pesyet nyo kilonye Nuwa kowute rapet. 39Ntene kipuryo kot konkete piko kito nye kikwiyoktos okoy kunyiw peko koret oŋnkolum piko tokol. Kunyo yunyoto wule mosukwiytakey om pesyet nye cone Weritap cito. 40Om pesyosyecoto, ye mite piko oyenku kwiyisyi om mparen, mosicesut ake cepakakta ake. 41Ye mite koruk oyenku kuŋosye rwantetap paka akenke, mosicesut ake cepakakta ake. 42Kunyo oripkey, omnye puryo kot oŋnketi akwek kule pesyo ne nye coni Mokoryontemwoŋ. 43Komwowok ani akwek ŋalek cepo manta kule, nto yunye nkete citap koto sawet nye cone corintet, nto kösu nye puryo kot kurwe kot kwosyi corintet kuput konyi. 44Kunyo misyini oyiytekey mpo akwek okoŋisye okokoy, omnye musukuco Weritap cito om sawet nye puryo kot oyityini kule coni neto.’’ 45“Kunyo omwowo ani pa akwek, ŋo mutworin nye cikenekey oŋnkuŋom? Nyoto kunye ye kokukoci mokoryontenyi kupayta mutworik alak, kupcicini cut omik om sawet nye cemokyini. 46Ŋerekat koromun mutworintonoto nye ye kaco mokoryontenyi cokunyoru neto kwiyisyi kuyunyoto. 47Komwowok ani ŋalek cepo manta kule, mosukukoci mokoryontet mutworintonoto kupayta tukukyi tokol. 48Ntene ye mutworin nye miyat, mosukuŋalal kwine nkit kumwoy kule, ‘Tokulow ye mosukuco mokoryontemwani.’ 49Oŋnkucec kupir mutworik cut alak, oŋnkwomis oŋnkuyesyo oko pokitisyek. 50Mosukuweckey kuco yoto mokoryontetap mutworintonoto om pesyet ake nye puryo kot koyityini kule coni oko om sawet nyo puryo kot kunkete. 51Mosukuyepayep mokoryontet neto oŋnkukoyito kupot wanak oko koperperotik om wule mite rirek oŋnkyenyiy kelak.’’

will be added

X\