Matthew 23

1Yoto kuŋololyi Yesu luket nyepo piko ce caŋ wanak oko konomikyi, 2kumwoci kule, “Konetikap ntarastinek oko Farasayek kuce kicikoci kamukeywek kunet piko topon wule yunto ntarastinekap Moses. 3Kunyo misyini oywey oŋnkorup ŋalek tokol ce komwowok akwek kule ayiy, ntene monte ceyiye kuyu wulo yiytoy cek, omnye ŋolole pate ntene oŋnkupuryo kot kwiye ŋalek co nete cekto. 4Rote terekok ce nyikisec oŋnkutorci metewokap piko, ntene oŋnkupuryo kot kutwoye terekocoto mornet. 5Yiye cekto kiy ake tokol kule sukuŋet kukäsec piko. Akäs pa lolonik cewoyec cepo silutekap Yiyintet ce nömote tokoywekwa oko yewuniyek! Akäs pa koyinto nyepo kototokap sirokwa ce loce! 6Cöme oteputek ce toponec ce toku om sokwonutek oko ŋecerok ce kweyotin om korikapkok. 7Cöme kule ciyweyec cisupayec topon om moteponik oŋnkucäm kule kukurec piko kule, ‘Konetin.’ 8Ntene puryo kot kumisyini cekurok akwek kule, ‘Konetin.’ Omnye oponte akwek konetintet akenke, oŋnkotupce akwek tokol. 9Kunyo puryo kot kumisyini kot okure akwek citake nye mite koret kule, ‘Papa,’ omnye oponte akwek Papa akenke pate nye mite torot. 10Puryo kot kumisyini kot cekurenok akwek kule, ‘Kantoyin,’ omnye akenke pate kantoyintet nyimwoŋ, nyoto ku Kristo nye Ŋapanet. 11Ci nyewo kupëlis om wule omite akwek kunye roke kwek nyoto mutworintemwoŋ. 12Ci ake tokol nye sutekey parak, mosicirekune nyoto, nto ci ake tokol nye sutekey ŋony, mosicilaŋnta nyoto kwek nyewo nye mokupëlis.’’ 13“Omite kwapi koromun konetikap ntarastinek oko Farasayek! Oyiku kaperperot! Okere akwek kurket nyepo poytoyisyetap torot sukuŋet mente kowut piko, ntene oŋnkupuryo kot owuti akwek nkit orit, oŋnkoyete mpo piko alak ce syeme kule ciwut orit! 14[“Omite akwek kwapi koromun konetikap ntarastinek oko Farasayek! Oyiku koperperot! Onyoponi korikap musukik, oŋnkosilkey osome sayutek ce caŋ. Mosicemutwok akwek musankut nyewo om ŋalecutecu!] 15“Omite akwek kwapi koromun konetikap ntarastinek oko Farasayek! Oyiku kaperperot! Opesetoti ayay omutu ruretyet oŋnkopunte koret tokol omöce kule cewec cito akenke, nteye kowec cito nyoto, awurte yec kuwur cicoto kumiyatit aret oyeny kupëlok akwek, oŋnkuwo wule mite mata nye momise kuyu wule oyunte akwek nkit! 16“Omite akwek kwapi koromun kantoyik ce koryotin! Onetisyi omwowu kule, ‘Ye kewalkey cito om kaynetap kotap Yiyintet, kupuryo kot ku ŋolyo nyewo koromun kawalenyi, ntene ye kewalkey cito om kaynetap saput nye mite kotap Yiyintet kupoyitu kawalenyi manta.’ 17Oyiku akwek pkoratis ce solontoy! Oŋnkono kito nyewo nyepo manta? Saput nto kotap Yiyintet nye wece saput kutililit? 18Onetisyi akwek yec omwowu kule, ‘Ye kewalkey cito om kaynetap otepto nye cepele korosek om kotap Yiyintet, kupuryo kot ku ŋolyo nyewo koromun kawalenyi, ntene nteye kewalkey cito om kaynetap kokotutyet nye mite otepto nye cepele korosek om kotap Yiyintet, kupoyitu kawalenyi manta.’ 19Oyiku akwek pkoratis koromun! Oŋnkono kito nyewo nyepo manta, kokotutyet nto otepto nye pele korosek nye wece kokotutyet kutililit? 20Kunyo ye kewalkey cito om kaynetap otepto nye cepele korosek, kukewalkey neto om kaynetap otepto nye cepele korosek wanak oko tukuk tokol ce mite orit. 21Nteye kewalkey cito om kuynetap kotap Yiyintet kukewalkey om kaynetap Yiyintet nye minye koyoto. 22Nteye kewalkey cito om kaynetap torot, kukewalkey neto om kaynet nyepo ŋeceretap Yiyintet oko neto nyo pure ŋeceranato. 23“Omite akwek kwapi koromun konetikap ntarastinek oko Farasayek! Oyiku kaperperot! Okocini Yiyintet akenke nyepo taman cepo nkuyek alak tokol kuyu cepsoconik, oko lapotik, oko mutunkurunek, oŋnkotay moywey ntarastinek ce pëlisyi, kuyu amut musankunek om aret nyepo manta oko tolosyet oko koyenet. Möce kule oyiye cutecu, ntene nye puryo kot oyostoy cut alak. 24Akwek kaperperotik ce koryotin! Onumu akwek kolyomwet nye mite tukuk ce omöce kule ceye, ntene oŋnkolukuy Nkamiyet! 25“Omite akwek kwapi koromun konetikap ntarastinek oko Farasayek! Oyiku kaperperot! Osite cikompet oko sanit saŋ oŋnkurok kumite kinyiy orit tukuk ce kyonyapan oko soynonet. 26Nyi Farasoyintet nye korat! Nyosye sit kunyo cikompet orit sukuŋet kunyol mpo wulo po saŋ. 27“Omite akwek kwapi koromun konetikap ntarastinek oko Farasayek! Oyiku kaperperot! Akerkeyekey mwenon ce kicetupci piko ce kiciyil kulelakitu ce toku topon wulo po saŋ oŋnkurok kinyiy orit koyekap piko ce kipok oko tukuk tokol ce kinun. 28Kunyo oporukey akwek wulo po saŋ kuyu pic ce toponec oŋnkurok kukinyiy montuwokwok orit mwiynanet oko miyotyonik. 29“Omite akwek kwapi koromun konetikap ntarastinek oko Farasayek! Oyiku kaperperot! Otece akwek topon mwenonik co kicetupci workoyik oŋnkosat okararan mwenonik cepo piko ce tililec ce kipur kopurto nye topon, 30oŋnkomwowu kule, ‘Nto kiceyiyec acek om kenyisyek co kipo mpo kukonyo, nto kipuryo kot kyiy acek ŋalek ce kikwiy cekto kupakäc workoyik.’ 31Kunyo ocöme akwek nkit kule ciku kesenisyekap piko co kipakäc workoyik! 32Otosyikey nyun ape tay awaŋnte ayiy miyotyet nye kicece mpo kukomwoŋ. 33Akwek erenoy! Lekokap erenoy! Osoti akwek kule cimuci kot cecilile mata nye momise? 34Kunyo komwowok kule, mosoyoku ani kukwa wule omite akwek workoyik oko piko ce ŋomec oko konetik, mosopar akwek kupok alak, owuyitoci alak murtowontet, oŋnkopas alak om korikapkokwonikwok, okwet alak kupete moŋet ake okoy moŋet ake. 35Kunyo om ŋalecutecu kuce mosonyoru akwek musankut nyepo piko co kicepar kupok ce kimoponto lelis, kuceke korotikap Apel nye kimoponto lelis nye kicepar kume, okoy porisyet nyo kicepore Sakariya weritap Parakiya nyo kyoporci akwek kwenutap otepto nye cepele korosek oko meset. 36Komwowok ani akwek ŋalek cepo manta kule, mosukunyor piko cepo pinta nyepo pesyosyecu toŋoŋutek om ŋalecoto.’’ 37“Opo! Yerusalem! Yerusalem! Nyi nyo poköci workoyik, oŋnkiwire rwontok piko ce kiciyok kukwa wule mite nyi! Aret cetya ye kyamac ani kule oruruc lekokuk kukwa wule omite ani kuyu wulo ruruktoy nkokyet lekokyi koruruky kopopokyi orit, ntene toyisye nyi! 38Akäs pa, mocepokokwok komwoŋ kwek kiratya. 39Komwowuŋ kule, kuceke yawut kuwo tay, kemetekoso ani yec okoy ye mocemwowu kule, ‘Kukoci Yiyintet kupeyok neto nye coni om kaynetap Mokoryontet.’ ’’

will be added

X\