Matthew 22

1Kuŋololyi Yesu yec piko kwiyisye tyonkocok kumwoy kule, 2“Kerkey poytoyisyetap torot oko kinko nye kikwici werinyi sakwet nye kemütisye. 3Yoto kuyokto mutworikyi kupa wokukur toyek ce kucekur kukwa sakwet, ntene kutoyis makwa. 4Yoto kuyokto mutworik alak kumwoci kule, ‘Womwoci toyek kule, akäs pa kayiyte ani yawut sakwemwani, kaceyeny yeyikwani oko tuka ce yokwoyec kunyo keceyiyta tukuk tokol, akwa sakwet.’ 5Ntene kukwes pate piko co kucekure oŋnkunomen kupa yisyonutekwa, kuwo ake kamonkesyantinyi. 6Kunäm ce kiŋetune yoto mutworikap cicoto kokursyi, oŋnkupir kupakäc kupok. 7Yoto kunyer Kinko koromun, kuyokto sikarekyi kupa wokupar kupok poricoto oŋnkupel moŋemwa. 8Nto kopok kukur mutworikyi oŋnkumwoci kule, ‘Kaceyiyta sakwemwani, ntene puryo kot kucäm kukwa piko co kwokur ani. 9Kunyo ape yawut wulo po orustunwekap moŋet, oŋnkokur piko tokol ce komuc kot onyoru kukwa sakwet.’ 10Kunomen mutworik kupa orustunwekap moŋet, wokoruruc piko tokol ce kimuc cekto kot kunyor; ce miyotec oko ce toponec, yoto kunyiw piko koto nyepo sakwetap komütisyet. 11Kuwo kinko koto orit wokukäs toyek, yoto kukäs cito nye kipuryo kot kuloce sirok cepo sakwetap kamütisyet. 12Kutepe kinko cicoto kule, ‘Corwenyu, kewut nyi koyi kulene yu meponte sirok cepo sakwetap komütisyet?’ Ntene kusis cicoto nye puryo kot kuwec ŋolyo. 13Kumwoci kinko mutworik kule, ‘Arat cici yewuniyek oko kerenkok oŋnkuwunukte kuwo saŋ wule mite menonet, wule mowokurire oŋnkunyiy kelakyi.’ ’’ 14Kumwoy Yesu kule, “Omnye caŋ piko ce cekure, ntene ŋeri pate piko ce cekweye.’’ 15Kupa Farasayek oŋnkuwokurwoc ŋomnonet wule muce cekto kot kulot Yesu om tintenotet kutepe teputek. 16Kuyokto cek konomikwa alak oko piko alak cepo luketap Erote kupa wule mite Yesu. Kumwoy picoto kule, “Konetintet, cinket acek kule yiku nyi ci nyepo manta, oŋnkineti ŋalekap Yiyintet nyepo manta om wule mite piko tokol, nye puryo kot soti wule yunto piko wulo po porto saŋ. 17Kunyo, mwowec acek, soti nyi kulene? Comwec acek ra ntarastinekyo cekweci mosoret Kinko nyewo nto puryo?’’ 18Yoto kunket Yesu kasoteywekwa ce miyotec kumwoy kule, “Akwek kaperperoticu! Omne sasyem akwek kule celotwo ceteca ani? 19Oporwo pa pesyantet nye cekweye mosoret?’’ Kusutyi cek neto yoto silinkit. 20Kutepe Yesu cek kule, “Po ŋo metit nyi oko kaynet nyi silot silinkit?’’ 21Kuwec cek kumwoy kule, “Po Kinko nyewo.’’ Kumwoci Yesu cek kule, “Kunyo okocini kinko tukuk cepo Kinko, okocini Yiyintet tukuk cepo Yiyintet.’’ 22Ntowo kulim cek ŋalecato, kokite koromun oŋnkunomen kupecikey kupakakta neto. 23Om pesyonoto akenke, kukwa Satusayek wule mite Yesu. (Coto ku piko co mwowu kule puryo kot komuce kot kotutune met piko ce kipok.) 24Kumwoy cek kule, “Konetintet, kimwoy Moses kule, ‘Ye kame citake nye puryo kot kuyi lekok, kumisyini konti mutakwam korket nyo musuk, sukuŋet kuyici mutakwam nyo kime lekok.’ 25Kunyo kimite piko alake tisapu ce kitupco ce kiceminye acek tokol. Kukesyo nyewo komüt korket, kume nye puryo kot kuyi lekok. Yoto kupakakta korket nye kimüt mutakwam. 26Kuyuyit nyoto kume mpo mutakwam nyepo oyeny, oko nyepo somok, okoy kuwoŋnkey kupok picoto tokol ku tisap. 27Nto om letut kume mpene korket. 28Kunyo om pesyet nyo citutune met, mosukupoyit ŋo korket? Omnye kikikomüt picoto tokol ku tisap!’’ 29Kuwekyi Yesu kumwoci cek kule, “Oyiku akwek mosotin koromun! Omnye puryo kot oŋnket silutekap Yiyintet, oŋnkupuryo mpo kot oŋnket swametap Yiyintet. 30Omnye pesyet nyo ciŋete kotutune met piko kuye mosukukerkeyitu cek oko Malaykanik ce mite torot, nye puryo kot komütisyi moronik oŋnkupuryo kot cimüte koruk. 31Nto ŋalek ce nöme kotutunetap met, tompo so kot asuman akwek mpo kisic ŋalek ce kimwowok akwek Yiyintet? Omnye kimwoy kule, 32‘Oyiku ani Yiyintetap Apram, oŋnku Yiyintet Isaka, oŋnku Yiyintetap Yakopo.’ Poru ŋalecu kule neto kunye Yiyintet nyepo ce soptos, ntene puryo kot ku Yiyintet nyepo piko ce kipok.’’ 33Ntowo kulim piko ŋalecato, kokite koromun konetisyenyi. 34Ntowo kulim Farasayek kule koŋololyi Yesu Satusayek okoy komukta kusisio, yoto koruruckey mpecek. 35Kusyem akenke om cekto nye konetintetap ntarastinek kule olotu Yesu om teputyoni kule, 36“Konetintet, ntarastit oŋnkono nyewo nye pëlisyi?’’ 37Kuwekyi Yesu kumwoci kule, “Misyini cäm Mokoryontet Yiyinteŋuŋ om mukuleyŋuŋ tokol, oko soponŋuŋ tokol, oko kasoteywekuk tokol. 38Ntarastit nyitenyi kunye po tayta nye pëlisyi. 39Nto nyepo oyeny nye kerkey nyitenyi kunyi kule, ‘Misyini cäm latyeŋuŋ kuyu wulo cömntoykey nyi nkit.’ 40Yoŋune ntarastinekap Moses tokol oko konetisyetap workoyik ntarastinecutecu oyeny.’’ 41Nteyu kowo koruruckey Farasayek, kutepe Yesu cek kule, 42“Osoti akwek kulene ce nöme Kristo nye Ŋapanet? Mosukwek keseniyantetap ŋo?’’ Kuwec cek kumwoy kule, “Yiku keseniyantetap Tauti.’’ 43Kutepe Yesu cek kule, “Kunyo omne sukuŋoŋnkyi Muyet Nyetilil Tauti kukure neto Mokoryontet?’’ Omnye kimwoy Tauti kule: 44“Kimwoci Mokoryontet Mokoryontenyu kule, pure yu po yewumwani nyepo tay okoy okoci ani punikuk kwek ŋecerok cepo kerenkokuk. 45“Kunyo ye kure Tauti neto, ‘Mokoryontet’, komuce kulene yec Ŋapanet kwek keseniyantetap Tauti?’’ 46Kipuryo yoto ci nye kitokomuc kot kuwekyi Yesu ŋolyo mpo akenke. Nto kuceke pesyonoto kuwo tay, kipuryo yec mpo ci nye kitokusyem kule atepe neto teputek alak.

will be added

X\