Matthew 21

1Nteyu kowo kurik cek Yerusalem, kukwa okoy kupun Pesepake om tulwetap ketik ce cekure Seituninek. Yoto kuyokto Yesu konomikyi oyeny kupa tay 2oŋnkumwoci ŋalecu kule, “Ape okoy opunte kayin nyin mite taymwoŋ, mosonyoru pakenke sikiryet nye ratat nye pontokey oko moyinyi. Atyac oŋnkokweru okoy yu omite ani. 3Nteye katepenak citake ŋolyo, omwoci kule, ‘Möce Mokoryontet,’ mosukuketwok lakwar.’’ 4Kikwiyokis ŋalecu sukuŋet kwitita kupoyit manta ŋalek ce kimwoy workoyontet kule: 5“Omwoci pikap Siyon, käs coni yawut kinko nyeŋuŋ wule mite nyi, nye tala nye kalany sikiryet, cone moytap sikiryet, nkaryantet nye kotoceye.’’ 6Yoto kupa konomik kuntoye oŋnkuwokwiy kuyu wulo kokomwoci Yesu. 7Kukwer cek sikiryet oko moyita oŋnkuyitoci sirokwa potoyikap sikirok, oŋnkukoci Yesu kulany parak. 8Kuyitoci luket nyepo piko ce caŋ sirokwa aran. 9Kucec luket nyepo piko ce kipeti om taytap Yesu oko ce kikwone letut kupol kumwoy kule, “Cikaste Weritap Tauti; Kukoci Yiyintet kupeyok neto nyi coni om kaynetap Mokoryontet! Cikaste Yiyintet!’’ 10Ntowo kupunto Yesu Yerusalem orit, kunäm polotet moŋet tokol kumukul, Kutep piko kumwoy kule, “Ŋo cici?’’ Kuwec luket nyepo piko kumwoy kule, 11“Workoyontet Yesu nyi nyepo Nasaret om koretap Kalilaya.’’ 12Kowut Yesu kotap Yiyintet oŋnkukwetune orit piko ce kyolyoyisyi oko ce kyolisyi; kumil mesanikap piko co wöle pesanik, oko ŋecerok cepo piko co olyoy swororok, 13oŋnkumwoci cek kule, “Kicesil om silutekap Yiyintet kule, ‘Mosicekure komwani koto nye cesome.’ Ntene kunyi kwawec akwek kwek kepenet nye wuŋeke corik!’’ 14Kukwa piko ce kikoryo oko ce kikomwolis okoy ye mite Yesu om kotap Yiyintet. Kusop Yesu cekto kusopco. 15Yoto kunyer tisik cewoyec oko konetikap ntarastinek ye kotoköse tukuk cepo kakitat ce kikwiye neto oko lekok ce kipole oŋnkurirtos om kotap Yiyintet kumwowu kule, “Cikasta Weritap Tauti.’’ 16Kumwoci cek Yesu kule, “Lime nyi ŋalek cu mwowu lekocu?’’ Kuwekyi Yesu kumwoci kule, “Olime manta, ntene tompo kot asuman akwek mpo kisic silutekap Yiyintet ce mwowu kule, ‘Kyonet akwek lekok ce minkec oko ce rerye kukon kakastayeŋuŋ nye yeme!’ ’’ 17Kuwo yoto kupakakta cek oŋnkuwete moŋet okoy kupunto Pesaniya wule kiwo kuru. 18Ntowo kuyekune kororn ye kimite Yesu kuweti moŋet, kwam neto rupet. 19Yoto kukäs mokoywet nye kimite aret tapan, kuwo yepo ketoto ntene puryo kot wokunyorta kiy; sokek pate ce kimite. Kumwoci Yesu ketoto kule, “Kime yiye nyi kenyis omit!’’ Kuyam mokoywet yoto pakenke. 20Kukäs konomik ŋalecato, kukite cek koromun oŋnkutep kumwoy kule, “Kayam mokoywet pakenke lakwar kulene?’’ 21Kuwekyi Yesu kumwoci cek kule, “Komwowok ani akwek ŋalek cepo manta kule, ye oponte akwek koyenet nye puryo kot oponte yec kasoteywek alak, nto omuci kot omwoci tulwoni kule, ‘Ŋeyakisye oŋnkiwircikey ruretyet,’ Kwiyakay kuyunyoto. 22Ye koyen akwek mosonyoru kiy ake tokol nye kosom om somsemwoŋ.’’ 23Ntowo kuco Yesu okoy kotap Yiyintet, nteye kimite kunetisyi, kukwa tisik cewoyec oko poyikap Yutayek ye kimite neto oŋnkutepe kule, “Po ŋo kamukeywek cu yiye nyi tukucu? Ŋo nyi kikoniŋ kamukeywecu?’’ 24Kuwekyi Yesu kumwoci cek kule, “Mosatepenak ani akwek teputyet akenke, nteye kowekwo ani akwek nyitenyi, mpo ani mosowekwok omwowok wule onyortoy ani kamukeywek ce oyiye tukucu. 25Kicone potisonisyetap Yowana wulin po torot nto kicone wule mite piko?’’ Yoto kurwoke cek kwicek nkit kumwoy kule, “Mocemwowu kulene? Ye kocemwowu kule, ‘Kicone torot,’ Mosukuwekwec kumwoy kule, omne satay akwek moyen ŋalekyi? 26Nteye kocemwowu kule, ‘Kicone wule mite piko,’ Ciku acek yec nyokorec ŋalek ce muce kwiy piko, omnye cöme piko tokol kule kiworkoyo Yowana manta.’’ 27Yoto kuwekyi cek Yesu kumwoci kule, “Puryo kot cinket.’’ Kumwoci Yesu cek kule, “Mpo ani puryo kot omuci kot omwowok akwek wule onyortoy ani kamukeywek ce oyiye tukucu.’’ 28“Kunyo osoti akwek kulene? Kimite citake nye kiponto werik oyeny. Kuweci kwan werit nyewo oŋnkumwoci kule, ‘Wenyo, iwo pesyoni weyiyisye mparetap ketik ce cekure Sapipunek.’ 29Kuwekyi weroto kumwoci kwan kule, ‘Puryo kot oweti.’ Ntene om letut kuwec kasoteywekyi oŋnkunomen wokwiyis mparetap Sapipunek. 30Yoto kuweci kwan werit nyin ake oŋnkumwoci kuyunyoto. Kuwec nyo kumwoy kule, ‘Mokoryontet kacäm.’ Ntene oŋnkutay mowo. 31Kunyo oŋnkono om wericoto oyeny nye kikwiy kito nye kimöce kwan?’’ Kuwec cek kumwoy kule, “Werit nyewo.’’ Kumwoci Yesu cek kule, “Komwowok ani akwek ŋalek cepo manta kule, mite yawut korurukikap mosoret oko koruk cemoronisyek kupeti kunyosyenok akwek kupa wule mite poytoyisyetap Yiyintet. 32Omnye kico Yowana potisonintet cokuporwok akwek aret nyepo manta nye misyini arup, ntene otay moyen ŋalekyi. Ntene kucäm korurukikap mosoret oko koruk cemoronisyek ŋalekyi. Nka mpo yu kowokäs akwek ŋalecato, kipuryo kot awec kasoteywekwok om letut oŋnkocäm ŋalekyi.’’ 33Kumwoy Yesu kule, “Alimnte pa tyonkocet ake. Kimite citake nye kiponto mparenyi nye kiwu ketik ce cekure sapipunek, oŋnkuker tuyita komut, oŋnkupal mwenet nye cirurunye matuntanik, oŋnkutec kitarit nye ceripse. Yoto kukoci kopotik kukotesan mparanato, oŋnkunomen kuwo toyek. 34Nteyu kowo kupunto pesyosyek ce rurye omikap sapipunek, kuyok cicoto mutworikyi kukwa wule mite kopotik kule sukuŋet kukoci sapipunek kererya ce kiciyoyekyin. 35Yoto kunäm kopoticoto mutworikap cicoto, kupir ake, kupakäc ake kume, oŋnkuwire ake rwontok. 36Kuyok cicoto mutworik alak ce caŋ kusir ce kipo tay. Kutaŋany yec kopoticoto mutworik coto kuyu ce kipo tay. 37Nto om letut kuyokto cicoto werinyi nkit kumwoy kule, ‘Mosukuywey cekto werimwani kupoyit manta!’ 38Nteye kotoköse kopotik werit, kurwoc cek kwicek nkit kumwoy kule, ‘Nyitenyi kunye kontiyintet, akany cepakäc kume, sukuŋet kwek nyinyacek kontiyisyet!’ 39Yoto kunäm cek neto oŋnkuwunuk kucone mparetap sapipunek oŋnkupakäc kume.’’ 40Kutepe Yesu cek kule, “Kunyo ye kaco citap mparet, mosukwiye ne kapoticoto?’’ 41Kuwec cek kumwoy kule, “Mosukupakäc kopoticoto miyotec, oŋnkukoci kopotik alak kukotesan mparetap sapipunek, ce mosukukoci neto sapipunek kererya ye koruryo.’’ 42Kumwoci Yesu cek kule, “Tompo kot asuman akwek mpo kisic silutekap Yiyintet co mwowu kule, ‘Rwantet nyo kitoye tekik kule puryo kot kuponto latik. kunye kiweckey kwek rwantet nye pële tokol nye tiye koto tapan. Mokoryontet nye kikwiye cutecu, kunyo po kakitat om konyekyacek!’ ’’ 43Kutosyikey Yesu kumwoy kule, “Kunyo komwowok ani kule, mosicinumunenok akwek poytoyisyetap Yiyintet oŋnkyikoci piko ce muce kwiy yisyet nyepo poytoyisyonoto. 44[Ci ake tokol nye kowircikey rwantanato kutirtiroktos cito nyoto, nteye kowircikey rwantanato citake, kunyirnyire cicoto.]’’ 45Yoto kulim tisik cewoyec oko Farasayek tyonkocokap Yesu oŋnkunket kule koŋolole neto ŋalek ce nöme cekto. 46Kusyem yoto kule cenäm neto. Ntene kuywey piko ce caŋ ce kinkete kule workoyo Yesu.

will be added

X\