Matthew 2

1Kiceyici Yesu moŋetap Peselekem om koretap Yuteya ye ki kinko Erote. Yoto kukwane koŋasis piko alake ce muswokikap kokelik okoy kupun Yerusalem, 2oŋnkwokutep kumwoy kule, “Koceyici ono Kinko nyelel nyepo Yutayek? Omnye kucekäs acek kokelyenyi nye kutok om koŋasis, kunyo kacekwa kule kwocesay.’’ 3Nteye kotolime Kinko Erote ŋalecato, kumuy kupotpoten wanak oko piko tokol cepo Yerusalem. 4Kukur Erote yoto koruruc tisik cewoyec tokol oko konetikap ntarastinek oŋnkutepe kule, “Mosiceyici ono Kristo nye Ŋapanet?’’ 5Kuwekyi cek kumwoci kule, “Ceyicini moŋetap Peselekem om koretap Yuteya, omnye kisil workoyontet ŋalecu kumwoy kule: 6‘Nyi Peselekem om koretap Yuta, puryo kot yiku nyi miniŋ koromun om kwenutap poytoyikap Yuta, omnye mosukucone poytoyintet wule mite nyi, nye mosukupayta pikwani cepo Israel.’ ’’ 7Yoto kukur Erote muswokikap kokelik kukwa oŋnkurwoke wule wuŋat okoy kunket neto topon sawet nye kutoku kokelyet. 8Kuyokto neto picoto kupa Peselekem, oŋnkuyomise kunkolontyi kumwoci kule, “Ape waceny lekwet topon, nteye konyoru kwomwowo, saŋet awo mpo ani wasay neto.’’ 9Nteyu kowo kulim cek ŋalekap Kinko, kunomen kupa. Nteye kimite kupeti om aran, kukäs kokelyet nyo kiköse cek om koŋasis. Kuntoci kokelyet cekto okoy wokuyoŋe yepo parak om ye kimite lekwet. 10Ntowo kukäs cek kokelyet kuŋerec ŋerekwek ce caŋ. 11Kupa koto orit, yoto kukäs cek lekwet oko kamet Mariyam. Kukutuny oŋnkusay lekwet, oŋnkutyac lolonikwa oŋnkukoci lekwet kokotutek cepo sapunek oko pupaninek oko miranik. 12Kusow Yiyintet cek om kirwotik kumwoci mente kuketitakey kupa wule mite Erote. Yoto kunomen kupa koremwa kupunte aret ake. 13Nto om letut yu kowo kupecikey muswwokik, yoto kucontyi malayketap Mokoryontet Yosep om kirwotik kumwoci kule, “Ŋet näm lekwet oko kamet oŋnkimwey iwo Misiri, oŋnkiwepur wuloto okoy omwowuŋ ani nyi, omnye möce Erote kule aceny lekwet sapakäc kume.’’ 14Kuŋet Yosep oŋnkunäm lekwet oko kamet oŋnkunomen komoy kuwo Misiri, 15wule kiwokopur okoy kume Erote. Kikwiyokis ŋalecu sukuŋet kwitita kupoyit manta ŋalek ce kikimwoy Mokoryontet kupunune wule mite workoyontet kumwoy kule: “Kyokur ani werinyu kucone Misiri.’’ 16Ntowo kukäs Erote kule kweperpera muswokik, kunyer koromun. Yoto kumwayta cepakäc lekok tokol ce werin kuceke ce ponto kenyisyek oyeny okoy nye koceyi pate om Peselekem oko wule lekite wuloto. Kiyoyeke pesyosyecoto oko pesyosyek co kimwocini muswokik neto kule kicekäs kokelyet. 17Om ŋalecutecu, kuye kwitita kupoyit manta ŋalek ce kimwoy workoyontet Yeremiya kule: 18“Kicelim polotet om moŋetap Rama, lokik cepo mesyet nyewo, kurire Racel lekokyi, rire neto, oŋnkupuryo kot kumöce kule ciŋereca, omnye kipok tokol.’’ 19Nto om letut yu kowo kume Erote, kucontyi malayketap Mokoryontet Yosep om kirwotik om Misiri, 20oŋnkumwoci kule, “Ŋet näm lekwet oko kamet oŋnkinomen ketitekey koretap Israel, omnye kipok piko co kimöce kule cepakäc lekwet.’’ 21Yoto kuŋet Yosep oŋnkunäm lekwet oko kamet oŋnkunomen kuketitakey kuwo koretap Israel. 22Ntowo kulim Yosep kule Arkelaus kunye kiker kwan Erote kwek Kinko nyepo Yuteya, yoto kunyokorit ye mowokumiŋis wuloto. Cetosyi yec cisow neto om kirwotik, yoto kuwo koretap Kalilaya, 23oŋnkuwo kuminy moŋetap Nasaret sukuŋet kwitita kupoyit manta ŋalek ce kikiŋalale workoyik kumwoy kule: “Mosicekure neto citap Nasaretin.’’

will be added

X\