Matthew 19

1Yoto ntowo kuŋalal Yesu okoy kuwany ŋalecato, kunomene Kalilaya oŋnkuwo kuketitakey okoy kupunto koretap Yuteya om oyinetap Yortan pitonin. 2Kurup luket nyepo piko ce caŋ neto. Kusop Yesu cekto om wuloto. 3Kukwa Farasayek alake wule mite Yesu oŋnkwokusyem kulot kutepe kule, “Cömncini ra ntarastinekyo cito kukwet korkenyi om ŋolyo ake tokol?’’ 4Kuwec Yesu kumwoci cek kule, “Tompo kot asuman akwek silutekap Yiyintet co mwowu kule: ‘Kitany Yiyintet om towunot moron oko korko?’ 5Oŋnkumwoy kule, ‘Om ŋolyontoni, kuye sukuŋet kupakakta cito kwan oko kamet oŋnkuyomokey oko korkenyi, kwek picoto oyenku porto akenke.’ 6Kunyo komo ku pic oyeny, ntene kokwek porto akenke. Kunyo puryo kot kumisyini kupciy cito piko ce kikoyomo Yiyintet.’’ 7Kutepe Farasayek neto kule, “Kunyo omne sukukon Moses ntarastit nye muce kusil cito parwet nye kwetisye oŋnkukwet korket kuwecikey?’’ 8Kuwekyi Yesu kumwoci cek kule, “Kicömwok Moses akwet korukwok omnye oyiku wuyec koromun ye mocinetak. Ntene kipuryo kot kuyunyo ikye kunyo ye kicitonye koret. 9Kunyo komwowok kule, ye kakwet citake tokol korkenyi, tos pate ye kasakwayan, oŋnkomüt ake kakwiy cicoto sakwayanat.’’ 10Kumwoci konomikyi neto kule, “Kunyo ye yunyo kopurto nyepo moron oko korkenyi, kupuryo kot kumisyini cekesyi koruk!’’ 11Kuwec Yesu kumwoy kule, “Puryo kot kunöme ŋolyontoni ci tokol, ntene po piko pate co kikokoci Yiyintet. 12Omnye mite ŋalek wok ce caŋ omne simokesyi ci tokol. Mite piko alake ce kiceyi kuyunyoto, kumite piko alake ce kikwiy piko sukuŋet kopur kuyunyoto, kumite piko alake ce puryo kot kukesyi omnye kicäm nkit om toponiyet nyepo poytoyisyetap torot. Kunyo möce kucäm ŋolyontoni cito nye cöme nkit.’’ 13Kukwer piko alake lekok kukwa wule mite Yesu kule sukuŋet kukemer neto yewuniyekyi metewokap lekocoto oŋnkusomnci, ntene kupolyi konomik kukerekta picoto. 14Kumwoy Yesu kule, “Ayaste lekok kukwa wule omite ani, monte cekerekte omnye po poytoyisyetap torot lekok ceyucutecu.’’ 15Kukemer Yesu yewuniyekyi metewokap lekocoto, oŋnkunomen kuwecikey. 16Yoto kuco citake oŋnkutepe kumwoy kule, “Konetintet, mosayiy ne ani ye sanyoru soponto nye mopoku?’’ 17Kuwekyi Yesu kumwoci neto kule, “Omne setepena ani nyi ŋolyo nye nöme toponiyet? Mite cito akenke pate nye topon. Rip ntarastinek ye möce kule sonyoru soponto nye mopoku.’’ 18Kutepe cicoto Yesu kule, “Ntarastinek oŋnkoco?’’ Kuwekyi Yesu kule, “Mente oporisye, mente asakwayan, mente acorsye, mente operperisye, 19ywey kon oko komet, oŋnkicäm latyeŋuŋ kuyu wulo cömntoykey nyi nkit.’’ 20Kuwekyi oyiperyontonoto kumwoci neto kule, “Kyorip ntarastinek coto tokol, kiy ne ake yec nye potwo ani?’’ 21Kumwoci Yesu neto kule, “Ye möce kule onyolu, iwo weyalye tukuk tokol ce ponte oŋnkikoci pesanik pononik; mesenyoru mokoryontit om torot, oŋnkico cenäma cepetekey oko ani.’’ 22Ntowo kulim oyiperyontonoto ŋalecato, kunomen kunerekat kuwecikey omnye kimokoryo nye kiponto tukuk ce caŋ. 23Kumwoci Yesu konomikyi kule, “Komwowok ani akwek ŋalek cepo manta kule, mosukuwuyit koromun yemo kowut cito nye mokoryo poytoyisyetap torot. 24Komwowok ani akwek yec kule, lekit kupunte nkamiyet koŋntap sintanit kusir ye mokowut cito nye mokoryo nye ponto tukuk ce caŋ poytoyisyetap Yiyintet.’’ 25Nteye kotolime konomik ŋalecato, kokite koromun oŋnkutep kumwoy kule, “Ku ŋo nyun cito nye cimuce kot cisop?’’ 26Kurotot Yesu cek, oŋnkuwec kumwoy kule, “Puryo kot komukoktos om wule mite piko, ntene mukoktos kiy ake tokol om wule mite Yiyintet.’’ 27Yoto kuwekyi Petero kumwoci neto kule, “Käs pa, kicepakakte acek tukuk tokol oŋnkyinamiŋ nyi. Mosicenyoru acek ne?’’ 28Kumwoci Yesu cek kule, “Komwowok ani akwek ŋalek cepo manta kule, om pesyosyek cepo kenyit nyelel, ye mosukopure Weritap cito ŋecerenyi nyewo nyepo woyinto, yoto ye mosopure mpo akwek konomikwani cu taman ok oyeny ŋecerok oŋnkomutyi musankunek arosyek taman ok oyeny cepo pikap Israel. 29Nto om wule citake tokol nye kapakakta korik, nto mpo mutakwam, nto mpo cekwam, nto mpo kwan nto kamet, nto lekok, nto mosonok, omnye kacäm kaynemwani, mosukunyor cito nyoto cetosyi aret pokolwokik ce caŋ, oŋnkyikoci soponto nye mopoku. 30Ntene piko ce caŋ ce mite yawut tayta, kuce mosukwokupoyit coto letut, nto piko ce mite yewut letut, kuce mosukwokupoyit coto tayta.’’

will be added

X\