Matthew 18

1Yoto pakenke kukwa konomik ye mite Yesu oŋnkutepe kule, “Ŋo nyewo kupëlis om poytoyisyetap torot?’’ 2Kukur Yesu lekwa nye miniŋ oŋnkukoci kuyoŋe taymwacek oŋnkumwoy kule, 3“Komwowok ani akwek ŋalek cepo manta kule, ye puryo kot aweckey akwek akerkeyitu oko lekoy, kupuryo kot omuci mpo kisic kot owut poytoyisyetap torot. 4Cito nyewo kupëlis om poytoyisyetap torot kunye cito nye sutekey nkit ŋony kukerkeyit oko lekwani. 5Nto cito nye katoroc kuŋerekyi lekwa akenke nye yunyi om kaynemwani kukatoroca kuŋerekyo ani cito nyoto.’’ 6“Nteye kamas kuwec ci ake tokol lekoy ce minkec ce yucu yeno ani kot kwiy lelisto, kuroke cerotyi katitap cicoto rwantetap paka nyewo oŋnkyewirci ruretyet orit kusir ye ketewurtoy lekocu. 7Mite kwapi koret nyi mite tukuk ce wece piko kwiy miyotyet! Mosukwiyokis tukuk ceyucoto, ntene mite kwapi cito nyo sutu kwiyokis tukucoto! 8“Ye yewuŋuŋ nto kerenkeŋuŋ nye sokyiŋ nyi ye sewurte, yepte kulot oŋnkiwirte! Omnye kaykay ye kewo nyi wule mite soponto nye meponte yewut ake nto kerenket ake kusir ye kerip yewuniyek tukway oko kerenkok tukway oŋnkyewirciŋ wule mite mata nye momise. 9Nteye koŋnta nyeŋuŋ nye sokyiŋ nyi ye sewurte, lotu kulot oŋnkiwirte! Omnye kaykay om wule mite nyi ye kewut wule mite soponto ponte koŋnta akenke pate kusir ye ponte konyek tukway oŋnkyewirciŋ wule mite mata nye momise.’’ 10“Möce okäs kule monte cenyil mpo akenke om lekok ce minkec ceyucu, omnye komwowok ani akwek kule, mite malaykanikwa om torot cepure okokoy taytap Papamwani. 11[Omnye kico Weritap cito kule cosoru osop piko ce kipotyo.] 12“Osoti akwek kulene? Mosukwiy kulene citake nye ponto kecirek pokol akenke oŋnkupot akenke om coto? Puryo kot kupokoktoy neto cut tomonwokik sokol ok sokol kupokokyi lakamet komos oŋnkuwo kuceŋat nyoto akenke nye potot? 13Komwowok ani akwek kule, nteye kanyor kuŋerekyini keciryet nyoto akenke kupël cut tomonwokik sokol ok sokol co puryo kupotyo. 14Kunyo om aret nye yunyoto kunye poru kule puryo kot kucöme Papamwoŋ nye mite torot kule kupot mpo akenke om lekok ce minkec ceyucu. 15“Ye kokwiwuŋ yeyaŋuŋ miyotyet, roke iwo wule mite neto oŋnkiporci lelisnyi, ntene ayiy kuyunyoto om wule wuŋat ye akwek nkit. Nteye kolimuŋ ŋalek kukewec yoto yeyaŋuŋ. 16Ntene ye katay molimuŋ, roke kwer opetekey citake nto piko alak oyeny sukuŋet kuporkey kutok ŋolyo ake tokol nyepo manta cepo piko muncururwanik oyeny nto somok, kuyu wulo mwoytoy silutekap Yiyintet. 17Ntene nteye katay neto molimnci picoto ŋalek, roke mwoci ŋalecato tokol pikap Yiyintet. Nteye kotepe kot kutay molimnci mpo ŋalek pikap Yiyintet, roke sut nyi neto kwek ci nye lomin, nto kwek ci nye korurukintetap mosoret nye kicetay. 18“Kunyo komwowok ani akwek tokol kule, ŋalek tokol ce korat akwek om wuli po koret ŋony, mosicerat ŋalek coto om wulin po torot. Nto ŋalek tokol ce kotyac akwek om wuli po koret ŋony, mosicityac coto om wulin po torot. 19“Komwowok ani akwek yec kule, ye kocömncine piko oyenku om ŋolyo ake tokol nye kosom om wuli po koret, mosukwiwok Papamwani om torot. 20Omnye om wulyo ake tokol wule keyomekey piko oyenku nto somok om kaynemwani omite ani yoto po kwenumwa.’’ 21Yoto kuco Petero ye kimite Yesu oŋnkutepe kule, “Mokoryontet, omuci akalye yeyamwani aret cetya ye kalel om wule omite ani? Omuci akalye aret tisap?’’ 22Kuwekyi Yesu kumwoci kule, “Puryo kot omwowuŋ kule aret tisap, omwowuŋ kule aret tomonwokik tisap aret tisap. 23Omnye kerkey poytoyisyetap torot oko kinko nye kamac kule oyit pesenutekyi ce ponto mutworikyi. 24Nteye kimite kuyitisyi, cekwerci neto cito akenke om picoto nye kiponto pesento nyepo pesanik ce caŋ koromun. 25Kipuryo kot kuponto cicoto pesanik ce yeme ce mokuyokune pesento. Kumwayta yoto mokoryontenyi kule kyalya cicoto kwek mutworin oko korkenyi oko lekokyi oko tukuk tokol ce kiponto sukuŋet kuyok pesento. 26Kukutuny mutworintonoto om taytap mokoryontenyi oŋnkusaysay kumwoci kule, ‘Muytowo ani kuminiŋ, mosoyokuŋ tukuk tokol!’ 27Yoto kurire Mokoryontet cicoto okoy kukalya pesento, oŋnkwasta kuwecikey. 28“Kuwo mutworintonoto okoy wokunyor mutworintet ake nye kiyoce neto pesan ce ŋeri pate. Kurotyi kunäm nyin katit oŋnkuket oŋnkumwoci kule, ‘Yokwo ani pesennyu nye ponte!’ 29Kukutuny mutworintet nyin oŋnkusaysay kumwoci kule, ‘Muytowo ani kuminiŋ, mosoyokuŋ pesenŋuŋ!’ 30Ntene kutoyis nyin, kunäm nyin oŋnkukoyito cekwer wecerotyi mopusi kule okoy kuyok pesento. 31Ntowo kukäs mutworik cut alake ŋalek ce kokwiyokis, kunerekis kunyer koromun oŋnkupa wokumwoci mokoryontemwa ŋalek tokol. 32Yoto kukur mokoryontet mutworintonoto oŋnkumwoci kule, ‘Yiku nyi mutworin nye miyat! Kyakalyiŋ pesentye tokol yo kisoysoyo ani nyi. 33Kunyo puryo kot kurokeniŋ rire kalye mutworintet nyin kuyu wulo kyokolyiŋ ani nyi?’ 34Kunyer mokoryontenyi yoto, kunäm oŋnkukoyito mutworintonoto wocerat citaŋany okoy kuyok pesento tokol.’’ 35Kumwoy Yesu kule, “Kunyo yunyoto wule mosukwiytak akwek Papamwani nyepo torot, ye puryo kot kukolyoy ci ake tokol om akwek yeyanyi om mukuleynyi.’’

will be added

X\