Matthew 17

1Nto om letut nyepo pesyosyek lö, kukwer Yesu Petero oko Yakopo oko mutakwam Yowana kupa tulwet nye koy kwicek nkit. 2Nteye kimite cek kuköse om konyekwa, kuwälkey tontap Yesu om taymwacek, kulekecec tokoyta nyenyi kukerkeyit asista, oŋnkulekececis sirokyi koromun. 3Yoto kukäs konomik coto somoku kuŋolole Yesu oko Eriya. 4Kuŋalal Petero kumwoci Yesu kule, “Mokoryontet, kiy nye topon omnye ce mite acek yuteyu, ye kecäm nyi, mosatec ani kisarinek somok, mokwek ake nyeŋuŋ, kupoyit ake Moses, kupoyit ake Eriya.’’ 5Nteye kimite Petero tokuŋolole, kuco polyet nyelel koromun oŋnkulum cek, yoto kucone kutit polyet orit kuŋalal kumwoy kule, “Nyi kunye Werimwani nkit Camanet nye oŋerekyini ani koromun, olimnci neto!’’ 6Ntowo kulim konomik kutit, kumuyo koromun okoy koputyi ŋony kukutuny kuwec metewokwa kukäs ŋony. 7Kuco Yesu okoy ye kimite cekto oŋnkunäm kumwoci kule, “Oŋetye, monte cemuye!’’ 8Yoto kukästa cek ntene kipuryo kot kukäs citake tokol, wokwek Yesu nkit pate nye kikäs cekto. 9Nteye kimite kukwoni kurekune tulwet; kumwoci Yesu kunkolontyi cek kule, “Monte cemwoci citake tokol ŋolyontoni kokäs akwek okoy ye kaciŋet Weritap cito kotutune met.’’ 10Kutepe konomik Yesu kule, “Omne sukumwowu konetikap ntarastinek kule, Eriya nye mosukunyosyo kuco kunyo?’’ 11Kuwekyi Yesu kumwoci cek kule, “Manta, Eriya kunye mosukunyosyo kuco kunyo cokusat tukuk tokol kunyol topon. 12Ntene komwowok ani akwek kule, kico Eriya keny, ntene kipuryo kot kusow piko konket neto, ntene kwici cek neto ŋalek pate kuyu wule kimoktoy.’’ 13Kusow konomik yoto konket kule ŋololyini Yesu ŋalek ce nöme Yowana potisonintet. 14Ntowo kukwa cek okoy kupun ye kimite piko ce caŋ, yoto kuco citake ye kimite Yesu oŋnkukutuŋe yepo taynyi, 15oŋnkumwoy kule, “Mokoryontet rire kalye werimwani nye me mewuŋ, nye kikotaŋany koromun, wircini mata okokoy oko peko orit. 16Kokweru mpo kuco wule mite konomikuk, ntene puryo kot komuc cek kot kusop.’’ 17Kuwec Yesu kumwoy kule, “Oyiku akwek pic ce puryo kot kucömisyi oŋnkoyiku mosotin, mosamuyte ani opur okoy pesyo ne? Kweru werit kuco yu omite ani!’’ 18Kupolyi Yesu oyinot, yoto kuŋet kuwo, kusop weroto om yoto pakenke. 19Yoto kukwa konomik ye kimite Yesu om wule wuŋat oŋnkutepe kule, “Omne simo cimuc acek kot cekwet oyinot kuwo?’’ 20Kuwekyi Yesu kumwoci cek kule, “Omnye puryo kot oponte akwek koyenot nye yeme. Komwowok ani akwek kule, nto kwoponte akwek koyenotet nyewo nye kerkey oko kupuswontetap ketit nye cekure Kalitarit, nto omuci kot omwoci tulwoni kule, ‘Ŋeyakisye oŋnkiwo wulin! Mosukuŋet kuwo wuloto! Kunyo nto omuci akwek kot ayiy kiy ake tokol.’ 21[Puryo aret ake tokol nye cimuce cekwete oyinot nye yunyi, ntene om somet oko kirisyetap omik pate nye muce.] ’’ 22Nteyu kowo kutuyo konomik tokol om Kalilaya, kumwoci Yesu cek kule, “Karik cenäm Weritap cito oŋnkyikoci kunäm piko. 23Mosicepakäc kume, nteye pesyet nyepo somok ciŋet kotutune met.’’ Kunyer konomik koromun. 24Ntowo kuco Yesu oko konomikyi okoy kupun Kapernaum, kukwa piko co ruruce mosoret nyepo kotap Yiyintet ye kimite Petero oŋnkutepe kule, “Kweye ra konetintemwoŋ mosoret nyepo kotap Yiyintet?’’ 25Kuwekyi Petero kumwoci cek kule, “Kweye’’. Nteyu kowo kuwo Petero koto orit, kunyosye Yesu kuŋololyi neto kumwoci kule, “Simon, soti kulene? Piko oŋnkoco ce kwecini mosoret kinkonik cepo koret? Pikap koret nto piko co toyek?’’ 26Ntowo kuwec Petero kumwoy kule, “Toyek’’ Kumwoci Yesu neto kule, “Kunyo porukey kule puryo kot kukweye pikap koret mosoret. 27Ntene puryo kot ce möce acek kule kunyer picu, kunyo näm rapanet oŋnkiwo tampayayet wenömisye, nto purpuryontet nye kenyosye näm kuco saŋ, ŋany kutit, mesenyorte pesyantet nye yeme mosoret nyimwani nyepo kotap Yiyintet oko nyeŋuŋ. Sutyi cek wekwewec mosorenyo.’’

will be added

X\