Matthew 16

1Kukwa Farasayek oko Satusayek wule mite Yesu ce kimöce kule cesyem celotu Yesu. Yoto kusom cekto neto kwici cekto pelutyet nyepo kakitat nye cone torot nye poru swametap Yiyintet. 2Ntene kuwekyi Yesu kumwoci cek kule, “Ye roroktoy asista, omwowu akwek kule, ‘Mosukunyol koret omnye kararnit koret.’ 3Nteye kayec korir koret, omwowu akwek kule, ‘Mosukuropen koret omnye katuyit oŋnkumite polyet nyewo, koret.’ Oŋnket akwek aŋor tukuk ce mokwiyokis ye kokäs koret parak, oŋnkurok kupuryo kot omuci kot aŋor pelutok ce yiyoktos om pesyosyecu.’’ 4Kutosyi Yesu kumwoy kule, “Piko cepo pinta nyepo pesyosyecu kuce piko ce miyotec, oŋnkupuryo kot kuponto koyenot! Osomo ani akwek pelutyet nyepo kakitat? Ntene puryo pelutyet ake nyepo kakitat nye mociporci tos pate pelutyet nyepo kakitat nyepo Yona.’’ Yoto kupakakta Yesu cekto oŋnkunomen kuwecikey. 5Kukwa konomik okoy kwoy tampayayet pitoni. Yoto kuyutye cek manamat mukatya mpo akenke. 6Kumwoci Yesu cek kule, “Oripkey wule mite mumarekap Farasayek oko mumarek cepo Satusayek.’’ 7Yoto kucec konomik kurwoc kwicek nkit kumwoy kule, “Komwoy kuyunyi so, omnye mnacekwante acek mukatinek?’’ 8Konket Yesu ŋalek ce kiŋolole cek. Yoto kutepe kule, “Omne sorwoc akwek nkit omwowu kule moceponte mukatinek? Oponte akwek so koyenet nye miniŋ! 9Tompo kot osowu akwek okoy kunyi oŋnket? Puryo kot osoti akwek yo kyopeteci ani mukatinek mut oŋnkopcici akwek piko elifunek mut. Kyoruruc yoto kunyiw kisok ata? 10Nto mpo mukatinek tisap co kyopcicini akwek piko elifunek amwan? Kyoruruc akwek yoto kunyiw kisok ata? 11Omne sumosowu oŋnket kule kopuryo kot oŋololwok ani ŋalek ce nöme mukatinek? Oripkey wule mite mumarekap Farasayek oko mumarek cepo Satusayek!’’ 12Kusow konomik yoto kunket kule kopuryo kot kumwocini Yesu cekto kuripkey om wule mite mumarek co cetonkwortoy mukatinek, ntene komwocini kuripkey cek wule mite konetisyetap Farasayek oko Satusayek. 13Yoto kuwo Yesu okoy kupunto koret nye lekite moŋetap Kaysariya nyepo Filipi, kutepe neto konomikyi om wuloto kule, “Mwowu piko kule Weritap cito ku ŋo?’’ 14Kuwec cek kumwoy kule, “Mwowu piko alak kule, ‘Yiku nyi Yowana potisonintet,’ kumwowu alake kule, ‘Yiku nyi Eriya.’ Nto alak kumwowu kule, ‘Yiku nyi Yeremiya’ nto workoyontet ake.’’ 15Kutepe Yesu cekto kule, “Nto akwek, omwowu akwek kule oyiku ani ŋo?’’ 16Kuwec Simon Petero kumwoy kule, “Yiku nyi Ŋapanet Weritap Yiyintet nye sopot.’’ 17Kuwekyi Yesu kumwoci neto kule, “Ponte nyi kupeyok Simon weritap Yona! Omnye puryo kot ku ci nye koŋoŋuŋ nyi ŋaleca, ntene Papamwani nye mite torot nye koŋoŋuŋ. 18Komwowuŋ ani kule, yiku nyi Petero (nye poru kule kitawet) kunyo mosatec ani kitawani komwani, coto kuce pikap Yiyintet, nye puryo kot komuce met kenyis. 19Mosokoniŋ ani nyi funkuwonok cepo poytoyisyetap torot, kunyo kiy ake tokol nye kerat nyi tay om wuli po koret ŋony, mosicetay kuratakay kiyoto om wulin po torot, nto kiy ake tokol nye ketyac nyi om wuli po koret ŋony, mosicityac kiyoto om wulin po torot.’’ 20Yoto kumwoci Yesu konomik kunkolontyi kule puryo kot kuroke kumwoci citake tokol kule neto kunye Ŋapanet. 21Kuceke pesyonoto kuwo tay, kucec Yesu kumwoci kutorci konomik kule, “Misyino ani awo Yerusalem oŋnkuwataŋany toŋoŋutek ce caŋ om wule mite poyik oko tisik cewoyec oko konetikap ntarastinek. Mosicepakäca, nto ye pesyet nyepo somok, mosiciŋeta otutune met.’’ 22Kukwer Petero Yesu kuwo tapan oŋnkupolyi kumwoci kule, “Mokoryontet, yaste, puryo kot kuroke kwiyokis ŋolyo nye yunyo om wule mite nyi mpo kisic!’’ 23Kuwekyikey Yesu oŋnkumwoci kule, “Wete yu omite ani Setani! Yiku konokut nye kerektoy aremwani, omnye puryo kot kupo kasoteywek cekuk Yiyintet, ntene po piko!’’ 24Yoto kumwoci Yesu konomikyi kule, “Ye möce citake tokol kule cepetekey oko ani, kumöce kunyilkey cicoto nkit, oŋnkunäm kutor murtowontenyi oŋnkuco cokunama cepetekey oko ani. 25Omnye ci ake tokol nye möce kule osoru sopon nyi, mosukupot cito nyoto sopon nyi, ntene ci ake tokol nye kepot soponnyi omnye kacäma ani, mosukusor cito nyoto sopon nyi. 26Muce ra kunyor cito latik ne ye keyum koret tokol kumukul, ntene oŋnkupot sopon nyi. Nto muce cito kwalya kiy ne sukuŋet kwale soponto. 27Omnye mosukuco Weritap cito kucontoy woyintap Papanyi oko nyepo malaykanikyi, oŋnkuco cokuyokyi citake tokol kuyu wule yunto yisyonutekyi ce kikwiy! 28Komwowok ani akwek ŋalek cepo manta kule, mite piko ce keyoŋ yuteyu ce puryo kot kupoku kutompo kot kukäs cekto Weritap cito kuconi om poytoyisyenyi.’’

will be added

X\