Matthew 15

1Yoto kukwa Farasayek oko konetikap ntarastinek ce kikwone Yerusalem okoy wule mite Yesu oŋnkwokutepe kule, 2“Omne sukwirye konomikuk ntarastinek ce kikonec acek mpo kukonyo, omnye puryo kot kowune yewuniyek ye mokwomis?’’ 3Kuwekyi Yesu kumwoci cek kule, “Omne soyirye mpo akwek ntarastinekap Yiyintet aŋnkawoke arup ntarastinekwok cepo keny? 4Omnye mwowu Yiyintet kule, ‘Misyini ywey kon oko komet, nto ci ake tokol nye kaŋalale kwapi kwan nto kamet, kumisyini cepakäc cicoto kume.’ 5Ntene onetisyi akwek omwowu kule, ye komwoci citake kwan nto kamet kule, ‘Kwokoyte ani kwek kokotutek cepo Yiyintet pesanik tokol ce kotoyiyisye akalyak akwek.’ 6Kupuryo kot kurok kuywey cicoto kwan. Ŋalek ceyucutecu ce oyirye akwek ŋolyontetap Yiyintet saŋet arup ntarastinekwok cepo keny. 7Oyiku kaperperot! Po manta Isaya yo kiŋore ŋalek ce nömok akwek kumwoy kule: 8‘Mwowu Yiyintet kule, Yweyo ani picu om kutuwakwa pate, ntene mitowune mukuleywekwa wule low om wule omite ani. 9Puryo kot kuponto cek latik kusaya ani, omnye nete cekto ntarastinek ce kikwiye piko kuyunye po ntarastinek coto Yiyintet!’ ’’ 10Yoto kukur Yesu piko tokol kukwa ye mite neto oŋnkumwoci kule, “Olimnte, oŋnkonket! 11Puryo kot ku kito nyo wute kutitap cito nye wurtoy cito kumiyatit; ntene kito nye cone kutinyi orit nye wurtoy cito kumiyatit.’’ 12Yoto kukwa konomik ye kimite oŋnkumwoci kule, “Puryo kot nket nyi kule konyer Farasayek om ŋalek co kemwowu nyi?’’ 13Kuwec Yesu kumwoy kule, “Mosicikor ket ake tokol nye kipuryo kot kutor Papamwani nyepo torot. 14Ayaste kwiyat nkit! Kantoyik cekto ce koryotin ce ntocini piko ce koryotin. Nteye kentoci cito nye korat citake nye korat, mosukosuci tukway mwenet.’’ 15Kuwekyi Petero kumwoci neto kule, “Mwowec acek, poru ne tyonkoconi?’’ 16Kumwoci Yesu cek kule, “Tompo kot osowu mpo akwek opël piko alak? 17Puryo kot oŋnket akwek kule kiy ake tokol nye kewut kutitap cito kunye weti moyet orit oŋnkupunte porto kupa saŋ? 18Ntene tukuk ce kwone kutit kukwa saŋ kuce kwone coto mukuleyto orit. Tukuk ceyucoto kuce wurtoy cito kumiyatit. 19Omnye kwone mukuleytap cito orit kasoteywek ce miyotec sukuŋet kuporis, kwiy sakwayanat, oŋnkwiy ŋalek alak tokol ce miyotec, kuyu nyoponisyet, oko mwiynanet, oko ŋomset. 20Tukuk ceyucutecu ce wurtoy cito kumiyatit, ntene puryo kot kowurtoy cito ye komisye yewuniyek ce puryo kot ciwun.’’ 21Kunomene Yesu wuloto oŋnkuwo okoy kupunto koret nye lekite moŋosyekap Tiro oko Siton. 22Yoto kuco korko nyepo koretap Kanan nye kiminye wuloto wule mite Yesu, oŋnkupol kumwoy kule, “Mokoryontet, Weritap Tauti! Kalya rirena ani! Ponto cepnyu oyinot nye kinäm, kunyo mite kwapi koromun.’’ 23Ntene kusis Yesu nye monowekyi ŋolyo. Kukwa konomikyi ye kimite Yesu oŋnkumwoci kule, “Kwet korkoni kuwecikey, omnye kenamatec oŋnkupolcec kuyunyi!’’ 24Yoto kuwec Yesu kumwoy kule, “Kiciyokwo ani aco pate wule mite kecirek cepo kotap Israel ce kipotyo.’’ 25Yoto pakenke kuco korkonoto oŋnkukutuŋe yepo kerenkokap Yesu oŋnkumwoy kule, “Mokoryontet, kalya ani!’’ 26Kuwec Yesu kumwoy kule, “Puryo kot kutopon ye kacenäm omikap lekok oŋnkyewirci ŋokik.’’ 27Kuwec korkonoto kumwoy kule, “Mokoryontet, yunyoto manta, ntene nka mpo ŋokik kwome omik ce koŋet ce lelektoy om mesetap mokoryontemwa.’’ 28Kuwekyi Yesu kumwoci korkonoto kule, “Cepyosyani ponte nyi koyenot nyewo koromun! Kunyo mokwiyokis kuyu wulo moktoy nyi.’’ Kusop cepnyi yoto pakenke. 29Kunomene Yesu wuloto oŋnkuwo kurup tampayayet Kalilaya tapan. Yoto kulany lakamet parak oŋnkupur ŋony. 30Kukwa luket nyepo piko ce caŋ wule kimite neto ce kikweru piko ce mwolyos, oko ce kikoryo, oko ce kipok kerenkok, oko ce kimiŋitu, oko piko alak ce caŋ ce kimnyontos, oŋnkwokutore yepo kerenkokap Yesu. Kusop Yesu picoto tokol. 31Kokite piko koromun yu kowo kukäs kuŋolole piko ce kimiŋitu, oŋnkusopco piko ce kikipok kerenkok. Kupesetoti piko ce kimwolyos, oŋnkukästa piko ce kikikoryo konyek. Yoto kukasta cek Yiyintetap Israel. 32Kukur Yesu konomik kukwa ye kimite neto, oŋnkumwoy kule, “Orire ani akalye picu tokol, omnye pesyet nyepo somok nyi opontekey oko cekto, kunyo puryo kot kuponto omik ce mokwam. Puryo kot omöce kule omwoci kupecikey kuponto rupet, omnye muce kumistot om aran ye mite kupeti.’’ 33Kutepe konomik Yesu kule, “Mocenyorte acek ono omik ce mocepaye picu tecu tokol om surukwenoni?’’ 34Kutepe Yesu cek kule, “Oponte akwek mukatinek ata?’’ Kuwekyi cek kumwoci kule, “Ceponte mukatinek tisap oko purpurunek tukusic ce minkec.’’ 35Kumwoci Yesu piko tokol kopur ŋony, 36oŋnkunäm mukatinekey tisap oko purpurunekey, oŋnkuosomnci kukasta Yiyintet, oŋnkupetec oŋnkukoci konomik, kunäm co oŋnkupcici piko. 37Kwomis piko tokol okoy kupiyoŋis. Yoto kururuc konomik omik ce koŋet okoy konyit kisok tisap. 38Nto coŋintap piko ce kyomis kuce piko moronik elifunek amwan nye mneyitite koruk oko lekok. 39Ntowo kupok, kuyomis Yesu piko kupecikey, oŋnkulany rapet kunomen okoy koretap Makatan.

will be added

X\