Matthew 14

1Pesyosyecoto kuye kilime Erote poytoyintetap Kalilaya ŋalek ce kicemwowu ce nöme Yesu. 2Kumwoci neto mokorenikyi kule, “Yowana potisonintet nyitenyi kupoyit manta nye kuŋet kotutune met, kunyi mite yawut kwiyisyi swamet nye ponto kwiye ŋalecu.’’ 3Omnye Erote kunye kimwoytoy cenäm Yowana oŋnkyerate nyororonik oŋnkyekerta mopusi, omnye kisac Erotiya korketap mutakwam Filipo. 4Kunyo kimwocini Yowana Erote kuwany pesyos ce caŋ kule, “Puryo kot kucöme ntarastinek kot müt nyi neto!’’ 5Kimöce Erote kule apakäc Yowana kume, ntene kuywey piko omnye kicöme piko kule workoyo Yowana. 6Nteye kipesyet nyewo nye kiceye Erote, kutum ceptap Erotiya om taytap toyek tokol. Yoto kuŋerec Erote koromun. 7Kuwalkey kukurtoci cepoto kumwoy kule, “Kawalkey kule mosokoniŋ ani nyi kiy ake tokol nye kesomo.’’ 8Om ŋomnonet nye kikoci kamet, yoto kusom cepoto kumwoy kule, “Kono ani om yuteyu pakenke metitap Yowana potisonintet nye mite sanit!’’ 9Kunerec kinko koromun yu kowo kulim ŋalecato, ntene om kawalet nye kokomwoy om taytap toyekyi, yoto kumwayta kule roke ceyiytoci ŋalekyi. 10Kumwayta ceyep metitap Yowana om mopusi. 11Cesut metit nye mite sanit oŋnkwocikoci cepoto, kunäm nyo oŋnkusutyi kamet. 12Kukwa konomikap Yowana oŋnkwokusut musyontet wokumuy; nto kapok kupa cekto wokumwoci Yesu. 13Ntowo kulim Yesu ŋalecato, kulany rapet oŋnkuwo okoy surukwenet kwine nkit. Yoto kulim piko, kunomene moŋosyekwa kupete kerenkok kurup cekto neto. 14Kurekune Yesu rapet om tampayayet tapan, ntowo kukäs neto luket nyepo piko ce caŋ, kurire kukalya om mukuleynyi, oŋnkusop pikwa ce kimnyontos. 15Ntowo kuponto pesyonoto kosoleny, kukwa konomik ye kimite Yesu oŋnkumwoci kule, “Nteyu kokwimen koret, kunyi surukwen wuli ce mite, kunyo yomis piko kupecikey wule mite kestonik sukuŋet wokwalat nkit omik ce mokwam.’’ 16Kuwekyi Yesu kumwoci cek kule, “Puryo kot kuroke kot kupa, okoci akwek nkit kiye mokwam.’’ 17Kuwec cek kumwoy kule, “Ceponte acek om yu mukatinek mut oko purpurunek oyeny pate.’’ 18Kumwoy Yesu kule, “Osutu pa akwek kukwa yu omite ani.’’ 19Yoto kumwoci Yesu piko kupor ŋony om yepo suswek, oŋnkunäm mukatinekey mut oko purpurunek oyeny oŋnkunyal torot oŋnkukasta kusomnci Yiyintet oŋnkupetec mukatinekey oŋnkukoci konomik, kunäm co oŋnkupcici piko. 20Kwomis piko tokol okoy kupiyoŋis. Yoto koruruc konomik omik ce kakyam kot kuŋet kunyiw kisok taman ok oyeny. 21Nto piko ce kikwomis kuce kirice kupunto moronik elifunek mut nye mneyitite koruk oko lekok. 22Yoto kumwoci Yesu konomik kulany rapet kupa kuntowonu kway tampayayet pitonin ye kimite neto tokuyomise piko kupecikey. 23Nteyu kowo kuyomis piko okoy kupa, kunomen kwine nkit kuwo lakam wokusom. Ntowo kupunto kosoleny kimite neto yoto wuloto kwine nkit. 24Kimite rapet yoto kukopunto wule low kuceke koret. Kimite yoto rapet kuwulye peko ce kiwosekey omnye kiwuse yomet kuketu kuco let. 25Ntowo kupunto komoy karik kuyec koret, kuco Yesu wule mite cekto kutyikonu peko parak. 26Nteye kotoköse konomik neto kuconi kutyikonu peko parak, kumuyo koromun oŋnkupol kumwoy kule, “Oyinot nyi!’’ 27Yoto pakenke kuŋololyi Yesu cek kumwoci kule, “Otitir! Ani nyo, monte cemuye!’’ 28Kuwekyi Petero kumwoci kule, “Mokoryontet, ye nyi nyo, mwowo ani aco wuloto atyikanu peko parak.’’ 29Kuwekyi Yesu kumwoci kule, “Co!’’ Yoto kurekto Petero om rapet oŋnkucec kutyikat peko parak kuwo wule mite Yesu. 30Nteye kotoköse Petero yomet kumuy oŋnkucec kolum peko neto. Yoto kukursyo kupol kumwoy kule, “Mokoryontet, Sorwo!’’ 31Yoto pakenke kuyokoyto Yesu yewunyi oŋnkunäm, oŋnkumwoci kule, “Ponte nyi koyenot nye kisic! Omne semun nyi?’’ 32Nteyu kowo kulany cek tukway rapet orit, yoto kusis yomet. 33Kukutuny konomik yoto om rapet oŋnkusay Yesu kumwoy kule, “Yiku nyi manta Weritap Yiyintet!’’ 34Kway cekto tampayayet okoy kupunto koretap Kenesaret. 35Kunket piko cepo wuloto Yesu. Yoto kuyokto cek cekwer piko ce kimnyontos ce kilekite koronoto kukwa wule mite Yesu. 36Kusom picoto Yesu kule kucömnci piko ce mnyontos kutwa mpo pate kototyetap sirenyi. Yoto kusopco piko tokol ce kimnyontos ce kitwa sirenyi.

will be added

X\