Matthew 13

1Om pesyonoto akenke kunomene Yesu koyoto oŋnkuwo okoy kupunto tampayayet tapan. Wokopur kunetis. 2Yoto korurukyikey luket nyepo piko ce caŋ ye kimite neto okoy kulany Yesu rapet oŋnkopure. Kuyoŋe piko tokol tampayayet tapan. 3Kwiyisye Yesu tyonkocok kumwoci piko ŋalek ce caŋ. Kumwoy kule, “Kiwo citake wokukolsyo, 4Nteye kimite kukolsyi, kusuci kupuswek alake aret tapan, yoto kuterer toritek oŋnkwam. 5Kosuci kupuswek alake yepo kitawet parak ye kimite teŋek ce ŋeri, kutur lakwar omnye kipuryo kot kumite teŋek ce kipa ŋony. 6Nteye ketelucini asista kupël kuyom kupotyo omnye kipuryo kot kuponto tikityek ce kipa ŋony. 7Kosuci kupuswek alake yepo kotok orit, kupityo kotok oŋnkwam kupotyo. 8Ntene kosuci kupuswek alake yepo teŋek ce toponec, kupityo okoy kwiy kupuswontet akenke kupuswek pokol, nto ake kwiy kupuswek tomonwokik lö, nto ake kwiy kupuswek sosom.’’ 9Oŋnkumwoy Yesu kule, “Kunyo, ye oponte yitik ce olimnte, roke olimnte!’’ 10Yoto kukwa konomik ye kimite Yesu oŋnkutepe kule, “Omnye seyiyisye nyi tyonkocok ye ŋololyini piko?’’ 11Kuwekyi Yesu kumwoci cek kule, “Kicekonok akwek oŋnket ŋomnonet nye wuŋat nyepo poytoyisyetap torot, ntene puryo kot cikoci cekto. 12Omnye ci nye ponto kitake, mosicetosyi cikoci kucaŋit sukuŋet kunyor ce caŋ, ntene cito nyo puryo kot kuponto kiy, mosicinumune mpo tukusic ce ponto. 13Kuyunyoto omne soyiyisye ani tyonkocok ye oŋololyini cekto, omnye köstoy cek oŋnkurok yec kupuryo kot kuköse kiy, oŋnkulimntoy, oŋnkurok yec kupuryo kot kusowu kunket kiy.’’ 14Omnye mite kwititoy kupoyitu manta om wule mite cekto ŋolyontetap Isaya nye kiŋor kumwoy kule: “Mosolimnte akwek oŋnkolimnte, ntene oŋnkupuryo kot osowu oŋnket, mosokäste oŋnkokäste, ntene oŋnkupuryo kot oŋnketi, 15Omnye koliliyotin kasoteywekap picu; kiker cek yitikwa, oŋnkomis konyekwa. Nto kopuryo kot kumite cekto kuyunyoto, nto kwemuce kukäste cek konyekwa, oŋnkulimnte yitikwa, oŋnkusowu kunket kasoteywekwa, sukuŋet kuweckey kukwa wule omite ani. Mwowu Yiyintet kuyunyoto. Saŋet ani osop cekto kusopco.’’ 16“Ntene oponte akwek kupeyoy koromun omnye kostoy konyekwok, oŋnkulimntoy yitikwok! 17Komwowok ani akwek ŋalek cepo manta kule, caŋ workoyik oko pikap Yiyintet ce kimöce kule nto cekäs tukuk cu oköse akwek, ntene kipuryo kot komuc kot kukäs, oŋnkimöce kule nto celim ŋalecu olime akwek, ntene kipuryo kot kulim cekto.’’ 18“Kunyo alimnte oŋnkonket kule poru ne tyonkocetap kolintet. 19Piko co kalim lokoywek cepo poytoyisyetap Yiyintet oŋnkupuryo kot kunkete topon, kukerkey piko co oko kupuswek co kisuci aret tapan, omnye mosukuco Setani nye miyat oŋnkuŋey kunum ŋalek co kicekol mukuleywekwa. 20Kupuswek co kisuci kitawet parak, kukerkey co oko piko co lime lokoywek oŋnkuŋerekyi kucäm lakwar. 21Ntene oŋnkupuryo kot kowute mukuleywekwa orit, kunyo puryo kot kopure kuloyit nteye kaco wuyinto nto toŋoŋutek ce nöme lokoywek, mosukutoyis cek lakwar. 22Nto kupuswek co kisuci kotok orit, kukerkey co oko piko co kalim lokoywek, ntene kwam kowurta lokoywecoto kasoteywekap pesyosyecu oko cömisyet nyepo mokoryontit, kupuryo kot kwiye kupuswek. 23Nto kupuswek co kisuci teŋek ce toponec kukerkey co oko piko co kalim lokoywek oŋnkunket topon, oŋnkwiy kupuswontet akenke kupuswek alak pokol, kwiy ake kupuswek tomonwokik lö, kwiy ake kupuswek sosom.’’ 24Kumwoci Yesu cek tyonkocet ake kule; “Kerkey poytoyisyetap torot oko cito nye kikol mparenyi kupuswek ce toponec. 25Nto mite pesyet ake komoy ye kimite kukoruy piko tokol; kuco puniyontet oŋnkuco kukol wancet wule mite nkanuk oŋnkunomen kuwecikey. 26Nteyu kowo kupityo nkanuk oŋnkucec kwiy omik, yoto kutok mpo wancet. 27Kukwa mutworik wule mite cicoto oŋnkwokumwoci kule, ‘Mokoryontet, nteyu kikol nyi mpareŋuŋ kupuswek ce toponec! Kicone ono wancet?’ 28Kuwekyi cicoto kumwoci cek kule, ‘Puniyontet nye kikwiy kuyunyi.’ Kuwekyi mutworik kumwoci kule, ‘Möce nyi kule cipe acek woceŋey wancet?’ 29Kuwec cicoto kule, ‘Puryo!’ Omnye ye kaŋey akwek wancet omuci waŋeyte mpo nkanuk. 30Ayaste kupityo tokol okoy cekäs, nteye pesyet nyo cekisisyi mosomwoci ani piko co kisisyi kule, ‘Anyosye kunyo oruruc wancet oŋnkorat oŋnkopël kuloy, oŋnkoruruc nkanuk oŋnkokoci cokenikwani.’ ’’ 31Kumwoci Yesu yec cek tyonkocet ake kule, “Kerkey poytoyisyetap torot oko kupuswontet nyepo ketit nye cekure kalitarit, nye kisic kusir kupuswek alak tokol, 32nye kinäm citake oŋnkukol mparenyi, nteye kotopite kuwoyit kweku ket nyewo kupël ketik alak tokol, sukuŋet kukwa toritek kwokutec korikwa sarisyekap ketoto.’’ 33Kumwoci Yesu cek tyonkocet ake yec kule, “Kerkey poytoyisyetap torot oko mumarek ce nöme korket ake oŋnkutankwar oko pusyekap nkanuk cepo tepenik somok, kukut kuwoyit.’’ 34Kwiyisye Yesu tyonkocok kumwoci piko ŋalecutecu tokol. Kipuryo ŋolyo mpo akenke nye kimwoci neto cekto nye puryo kot kwiyisye tyonkocok. 35Kikwiy kuyunyoto sukuŋet kwitita kupoyit manta ŋalek ce kimwoy workoyontet kule, “Mosoyiyisye ani tyonkocok ye oŋololyini cek, mosomwoci ŋalek ce kiwuŋotin kuceke ye kicitany koret.’’ 36Kunomen Yesu kupakakta piko oŋnkuwo koto orit. Kukwa konomikyi ye kimite neto oŋnkumwoci kule, “Mwowec acek, poru ne tyonkocetap samiyitap mparen?’’ 37Kuwekyi Yesu kumwoci cek kule, “Cito nyo kole kupuswontet ku Weritap cito nyoto, 38nto mparet ku koret, nto kupuswek co toponec kukerkey co oko piko cepo poytoyisyetap Yiyintet, nto wancet kukerkey co oko piko cepo Setani nye miyat. 39Nto puniyontet nyo kikole wancet ku Setani nyewo nyepo oyik nyo nkit. Nto pesyet nye cekisisyi pesyet nyoto nyepo ye ŋete koret. Nto piko co kisisyi ku Malaykanik coto. 40Kuyu wulo ciruruktoy samiyita nyepo wancet oŋnkyepël kuloy, mosukukerkeyit nyoto om pesyet nyo ŋete koret. 41Mosukuyok Weritap cito Malaykanikyi, kunyo mosukoruruc konum kukwane poytoyisyenyi piko tokol co nete piko kwiy miyotyet, oko piko tokol co yiye miyotyonik, 42oŋnkuwirci wule mite oŋoŋtit nyepo mata nye loye, wule mowokuriryo om wuloto oŋnkunyiy kelekwa. 43Yoto kuye mosukuporkey pikap Yiyintet ce kelackey kulekececis topon kuyu asista om poytoyisyetap Papamwa. Kunyo olimnte ye oponte yitik ce olimnte, roke olimnte.’’ 44“Kerkey poytoyisyetap torot oko mokoryonti nye kicewuŋe mparen, nye kinyor citake, nteyu kowo kunyor kuwuny yec topon, Kuwo om ŋerekwek ce kiponto wokwalya tukuk tokol ce kiponto oŋnkwale mparanato.’’ 45“Kerkey mpo yec poytoyisyetap torot oko ci nye kamonkesintet nye ceŋoti karin nye piciy koromun. 46Nteye koto wokunyoru akenke nye piciy kusir karik alak cepo kwak, kuwo wokwalya tukuk tokol ce kiponto oŋnkwale karnanato piciy.’’ 47“Kerkey mpo yec poytoyisyetap torot oko porok ce cenöme purpurunek ce kocewirci tampayayet orit oŋnkunäm purpurunek wok tokol. 48Nteyu kowo kunyiw, kocut piko co nöme purpurunek kuco tampayayet tapan oŋnkopur ŋony kulekwel ce toponec oŋnkukoci ntepenikwa oŋnkuwirta co moponto latik. 49Kunyo mosukuyuyit nyoto om pesyet nyo ŋete koret. Mosukupa Malaykanik saŋ oŋnkoruruc piko ce miyotec kulekwene kwenutap piko ce toponec, 50oŋnkuwirci piko ce miyotec wule mite oŋoŋtit nyepo mata nye loye, wule mosukuriryo cek om wuloto oŋnkunyiy kelekwa.’’ 51Kutepe Yesu kumwoci cek kule, “Konket akwek ra ŋalecutecu tokol?’’ Kuwekyi cek kumwoci kule, “Ee, Kacinket.’’ 52Kuwec Yesu kumwoci kule, “Kunyo poru ŋalecu kule, konetintetap ntarastinek ake tokol nye koweckey kwek konomintet nyepo poytoyisyetap torot kunye kerkey oko ci nyepo kanyi nye kewut konyi nyo konore tukukyi oŋnkunum kukwa saŋ tukuk ce lelac oko ce yoswakik.’’ 53Nteyu kowo kumwoy Yesu tyonkococutecu okoy kuwany, kunomene wuloto, 54kuketitakey kuwo okoy kupunto moŋetap korenyi. Kunetisye kotapkokwemwa okoy kukite piko koromun ce kilim ŋelekyi, kutep cek kumwoy kule, “Kinyorta ono cici ŋomnononi? Nto mpo ŋalecu po kakitat? 55Puryo kot ku weritap koswetintetap pawunek ne nyitenyi? Puryo kot ku weritap Mariyam ne nyitenyi? Nto mpo mutakwam ku mpo Yakopo oko Yosep oko Simon oko Yuta? 56Puryo kot cepontekey acek ce minye tokol oko mpo cekwam? Kinyorta ono ne ŋalecu?’’ 57Yoto kutay cekto Yesu. Kumwoci Yesu cek kule, “Ciyweye workoyo om wulyo ake tokol, ntene puryo kot ciyweye korenyi, oŋnkupuryo kot kuyweye piko cepo kamwa.’’ 58Kipuryo kot kwiy Yesu om wuloto pelutok cepo kakitat ce caŋ, omnye kipuryo kuponto piko cepo wuloto koyenotet.

will be added

X\