Matthew 12

1Kuwo Yesu om pesyosyecoto kupunte mparosyekap nkanuk ye kipesyetap Sapat. Yoto kwam konomikyi rupet, kucec cekto kuput nkanuk oŋnkwam. 2Nteye kotoköse Farasayek kuyunyoto, kumwoci cek Yesu kule, “Käs pa, yiye konomikuk yisyet nye yirye ntarastinek cepo pesyetap Sapat!’’ 3Kuwekyi Yesu kumwoci cek kule, “Tompo kot asuman akwek mpo kisic ŋalek ce kikwiy Tauti yo kipontokey oko pikyi yo kyome rupet? 4Kiwo neto kotap Yiyintet orit oŋnkunum mukatyantet nye kicesoci kupoyit Yiyintet oŋnkwam oko pikyi, nka kot kipuryo kot kucömncini ntarastinek neto oko picoto kwam, ntene tisik pate ce kicecömncini. 5Nto tompo kot asuman akwek om ntarastinekap Moses kule tisik kuce yirye okokoy ntarastinek cepo Sapat om kotap Yiyintet oŋnkupuryo kot kuponto cek lelis? 6Komwowok ani kule, mite yuteyu citake nye pële kotap Yiyintet. 7Nto yunye kwonket akwek kupoyit manta kule poru ne silutekap Yiyintet cu mwowu kule, ‘Puryo kot omoce ani korosek cepo tyoŋik, ntene omoce tolosyet.’ Nto puryo kot omutyini akwek musanku piko alak co puryo kot kuponto lelis. 8Omnye Weritap cito kunye Mokoryontet nyewo nyepo pesyetap Sapat.’’ 9Kunomen Yesu kuwete yoto okoy kupunto kotapkokwemwacek ake. 10Kimite citake yoto nye kime yewut. Kimite yoto piko alake ce kimöce kule cewosontyi Yesu om ŋalek ce kalel kumwoy. Kutepe cek Yesu kule, “Cöme ra ntarastinekyo cisopsi ye pesyetap Sapat?’’ 11Kuwekyi Yesu kumwoci cek kule, “Nteye ponto citake om akwek keciryet nye kesuci mwenet ye pesyetap Sapat, puryo kot konumu kocut kucone mwenet? 12Kunyo ponto cito latik ce caŋ kupël keciryet! Kunyo comwec acek ntarastinekyo ce yiy yisyet nye topon ye pesyetap Sapat!’’ 13Yoto kumwoci Yesu cicoto kule, “Yite yewuŋuŋ.’’ Kuyito cicoto yewunyi, kusop yewut kunyol kukerkeyit oko yewut nyin ake. 14Kumiŋnto Farasayek kupa saŋ wokurwoc aret nye mosukupakäce cek Yesu kume. 15Ntowo Kulim Yesu ŋalecato, kunomen kuwete yoto. Kupa piko ce caŋ kurup neto. Kusop Yesu piko tokol ce kimnyontos, 16oŋnkumwoci kunkolontyi kule monte cemwoci piko alak ŋalek ce nöme neto. 17Sukuŋet kwitita kupoyit manta ŋalek ce kimwoy workoyontet Isaya kule: 18“Mwowu Mokoryontet kule, Okäs oŋyi mutworintemwani nye kwakwey, nye akenke pate nye cämanemwani nye ŋerekyini soponmwani, mosokoci ani neto Muyemwani Nyetilil, mosukumwoy musankunek om wule mite piko cepo yemosyek tokol, 19Ntene puryo kot kutintene, nto mpo kupol. oŋnkupuryo kot kuŋolole kupol om orustunwek cepo moŋet, 20Puryo kot kwirye tekantet nye muryony, nto mpo kot komis mata nye ŋwenyŋwenye. Mosukutitir okoy kupëlis mutisyet nyepo musankunek cepo manta. 21Mosukukenekey piko cepo yemosyek tokol neto.’’ 22Yoto kukwer piko alake citake nye korat nye kipuryo kot kuŋolole omnye kiponto oyik kuco wule mite Yesu. Kusop Yesu cicoto okoy komuc kot kuŋalal oŋnkukästa. 23Kokite piko tokol koromun, oŋnkutep kumwoy kule, “Ara Weritap Tauti cici!’’ 24Ntowo kulim Farasayek ŋalecato, kuwec kumwoy kule, “Yiyisye cici pate swametap Pelsepul nyewo nyepo oyik sukuŋet kukwet oyik.’’ 25Konket Yesu ŋalek ce kisote cekto, yoto kumwoci kule, “Poytoyisyo ake tokol nye kapciykey kwek oyeny oŋnkuporyekey nkit kupote kwaran. Nteye kapciykey moŋet nto pikap koto ake kwek oyeny oŋnkuporyekey nkit, kupote nyo kwaran. 26Kunyo nteye poryekey Setani om poytoyisyenyi, kuporkey kule pciyat Setaninato, kunyo muce kulene kuyo poytoyisyenyi! 27Nteye oyiyisye ani Pelsepul ye saŋet akwet oyik, kwiyisye ŋo konomik cikwakwek ye kwete oyik? Kunyo konomik cikwakwek nkit ce nkete ŋalek cepo manta kule puryo kot opoye akwek manta! 28Ntene ye Muyetap Yiyintet nye kono ani swamet ye saŋet akwet oyik, kuporukey kupoyit manta kule kucontyok akwek poytoyisyetap Yiyintet. 29“Muce kulene cito kot kuput kowut kotap cito nye nyikan nye ponto swama oŋnkunyapan tukukyi, tos pate ye kanyosyo kurat cicoto sukuŋet kunyapan tukuk cepo kanyi. 30“Ci ake tokol nye puryo kot ku nyimwani kunye toyo ani cicoto, nto ci ake tokol nye puryo kot kukolyo cirurukisye kecirekwani tukway, kunye cito nyoto nye serete kuseret. 31Om ŋolyontoni, omwowok ani kule, mosicikalya piko miyotyonik alak tokol oko ŋalek ce miyotec ce kaŋalal; ntene puryo kot cimuce kot cikalya ci ake tokol nye kaŋalale kwapi Muyet Nyetilil. 32Mosicikalya ci ake tokol nye kaŋalal ŋolyo nye miyat om wule mite Weritap cito. Ntene puryo kot cimuce mpo kisic kot cikalya ci ake tokol nye kaŋalale kwapi Muyet Nyetilil om pesyosyecu nto om kenyisyek ce mokukwa.’’ 33“Ye senyoru omik ce toponec, kumöce ponte ketit nye topon, nteye ponte ketit nye miyat mesenyoru omik ce miyotec, omnye cinkete ket ake tokol omikyi ce yiye. 34Akwek Erenocu! Omuce akwek kulene kot aŋalal ŋalek ce toponec oŋnkurok yec oyiku akwek miyotec. Omnye ŋolole kutit ŋalek ce nyitotin mukuleyto orit. 35Konu cito nye topon ŋalek ce toponec cekwone konorutyenyi nye topon nye mitowune wule mite neto orit, kukonu cito nye miyat ŋalek ce miyotec cekwone konorutyenyi nye miyat nye mitowune wule mite neto orit. 36“Kunyo komwowok ani kule, om pesyetap musankut mosukuŋalal ci ake tokol ŋolyo ake tokol nye miyat nye kiŋalal. 37Omnye mosiciyisye ŋalekuk nkit cemutuŋ musankut kule ponte lelis nto meponte lelis.’’ 38Yoto kuŋalal konetikap ntarastinek alake Farasayek kumwoci Yesu kule, “Konetintet, ce möce acek kule cekäsiŋ ye yiye pelutyet nyepo kakitat.’’ 39Kumwoy Yesu kule, “Pic ce miyotec ce menket Yiyintet piko cepo pintap pesyosyecu! Tepeno cekto pelutyet nyepo kakitat? Ntene pelutyet nyepo kakitat nye mocikoci pate ku pelutyet nyepo kakitat nyepo Workoyontet Yona. 40Kuyu wulo kipur Yona moyetap tyonyntap ruretyet kuwany pesyosyek somok cepo pet oko pesyosyek somok cepo komoy, kuyunyoto mosukopur Weritap cito mwenet kuwany pesyosyek somok cepo pet oko pesyosyek somok cepo komoy. 41Mosukuyoŋ koyin pikap Nenefi om pesyetap musankut oŋnkuwosontyok akwek piko cepo pinta nyepo pesyosyecu, omnye kirenynkey cek kulim ŋalek ce kimwoci Yona. Kunyo komwowok ani akwek kule, mite yuteyu kitake nyewo kupël Yona! 42Mosukuyo koyin korko nye Kinko nyepo makentany om pesyetap musankut oŋnkuwosontyok kumutwok musankut akwek piko cepo pinta nyepo pesyosyecu, omnye kicone neto wule low oŋnkuco cokulim ŋomnonetap Solomon. Kunyo mite yuteyu kitake nyewo kupël Solomon!’’ 43“Ye kowete oyinoto nye miyat cito, mosukuwesetot kupunte koret wule puryo peko kuceŋoti wule möce kule komuŋe, nteye mnonyor, 44Mosukuketkey kuco, nteye kaco cokunyor puryo ci nye minye, oŋnkicipuc oŋnkyesat topon. 45Yoto mosukuwo wokukwer oyik alak tisap ce miyotec kupël neto, kukwa yoto oŋnkwokowut orit kumiŋis wuloto. Mosukuwur yoto kopurtap cicoto kupël wule kiyunto kopurnyi nye kipo kunyo. Kunyo mosukuyuyit nyoto om wule mite piko ce miyotec cepo pinta nyepo pesyosyecu.’’ 46Nteye kimite Yesu tokuŋololyini piko, yoto kupun kamet oko mpo mutakwam kwokuyoŋe saŋ oŋnkutep kule ceŋololyi neto. 47Kumwoci citake nye kimite yoto Yesu kule, “Käs pa, mite komet oko mpo mutokwomet keyoŋ saŋ kumöce kule ceŋololuŋ.’’ 48Kuwekyi Yesu kumwoci cicoto kule, “Ŋo nye yeyomwani ŋo ce mpo yeyamwani?’’ Oŋnkumwoy kule, “Käs pa! Okyu mpo yeyomwani oko mpo yeyamwani!’’ 49Yoto kumwelyel Yesu konomikyi oŋnkumwoy kule, “Käs pa! Okyu mpo yeyomwani oko mpo yeyamwani! 50Omnye piko tokol ce yiye ŋalek ce möce Papamwani om torot kuce mpo yeyamwani oŋnku mpo yeyomwani coto.’’

will be added

X\