Matthew 11

1Nteyu kowo kumwoci Yesu konomikyi taman ok oyeny ŋalecu okoy kuwany, kunomene yoto kuwo kunetisyot oŋnkumwaytat ŋalek om moŋosyek ce kilekite wuloto. 2Kulim Yowana om mopusi yisyonutek ce kikwiye Kristo. Kuyok konomikyi alak kwokutepe Yesu kumwoci kule, 3“Nyi cito nyo kimwowu Yowana kule mokuco, nto mocekany acek citake?’’ 4Kuwekyi Yesu kumwoci cek kule, “Ape aketitekey womwoci Yowana ŋalek ce oköse oko ce olime akwek, 5Kukästa piko ce kikoryo, pesetoti piko ce kimwolyos, cisope piko ce kiponto mutyenkenik, kuciŋet kotutune met piko ce kipok oŋnkyemwocini pononik lokoywek ce toponec. 6Kunyo ŋerekat kuponto kupeyoy ci ake tokol nye puryo kot kunyoruneno ani konokut!’’ 7Nteye kiketitoykey piko co keyoku Yowana, kuŋalal Yesu ŋalek ce nöme Yowana kumwoci piko kule, “Kyopeti akwek kitela wulo kimite Yowana kule wocekäs ne? Rostit nye kitimtime yomet? 8Ntene kyopeti akwek kule wocekäs ne? Kyopere wocekäs cito nye kelac sirok ce toponec ce kintus? Minye piko co loce sirok ce toponec ce kintus korikap mokorenik. 9Ntene omwowo ani pa akwek, kyopeti akwek kule wocekäs ne? Kyopere wocekäs Workoyo? Komwowok ani kule, kyokäs akwek yoto ci nye pële workoyo. 10Omnye Yowana kunye cito nyo mwowu silutekap Yiyintet ŋalek ce nöme neto kule, ‘Mosoyoku ani kiyokintenyu, nye mosukusatuŋ aret om tayŋuŋ.’ 11Komwowok ani akwek ŋalek cepo manta kule, om ci ake tokol nye kiyi korko, puryo mpo akenke nyewo kupël Yowana potisonitent. Ntene yec, ci nye miniŋ om poytoyisyetap torot kunye cito nyoto nyewo kupël neto. 12Kuceke pesyosyek co kimwoytoy Yowana lokoywekyi okoy pesyoni, kiceporye citaŋany poytoyisyetap torot, kunyo syeme piko co kiwuryo kule cenäm poytoyisyet. 13Kiŋalal workoyik tokol oko ntarastinekap Moses ŋalek ce nöme poytoyisyet okoy pesyosyek co kitoku Yowana. 14Nteye omöce akwek kule cecäm ŋalekwa, Yowana kunye Eriya nyo kicemwowu kule mosukuco. 15Kunyo ye oponte akwek yitik ce olimnte roke olimnte. 16“Kunyo mosoyuyite ne ani yawut piko cepo pintap pesyosyecu? Kerkey cekto oko lekoy ce mite kepur yepo motepo, sukupole alake kukurcini alak 17kumwowu kule: ‘Kicekutwok acek kurerunek, ntene atay akwek motum! Kicerirye acek kyam mnyat, ntene atay akwek morirye!’ 18Omnye kico Yowana oŋnkuco kukir omik nye puryo kot kwomisyi oŋnkupuryo kot kuye finyonik kumwoy piko kule, ‘Ponto nyi oyinot!’ 19Kuco Weritap cito oŋnkuco kwomis oŋnkuyesyo, kumwoy piko kule, ‘Akäs pa cemoyetyontet yeyintetap finyonik oŋnkucorwetap piko co ruruce mosoret oko piko ce kicetay!’ Kunyo kucinket kule po manta ŋomnonetap Yiyintet om yisyonutek cepo ŋalek ce tokunotin.’’ 20Yoto kupolyi Yesu kulel moŋosyek ce kikwiye neto ŋalekyi ce caŋ cepo kakitat omnye kitompo kot kurenynkey kwasta miyotyonik, kumwoy kule, 21“Oyey! Mite kwapi koromun nyi Korasin! Oyey! Mite kwapi koromun mpenyi Pesusayita! Omnye nto kitukuk ce kipo kakitat co kiciye wule mite nyi kuce kiciye coto Tiro oko Siton, nto kirenynkey keny piko cepo wuloto kulac sirok sarkatinek oŋnkuwastekey arek kupor kule kacerenynkey om miyotyonikwa. 22Kunyo komwowok ani akwek kule, mosukukaykay Yiyintet toŋoŋutek cepo pikap Tiro oko Siton om pesyetap musankut kupëlok akwek. 23Nto mpenyi Kapernaum! Kimöce nyi kule alaŋntekey osutkey torot? Mosicewirciŋ ŋony wule mite manta nye momise! Omnye nto kitukuk cepo kakitat co kiciwuŋ nyi kuce kicici coto Siton nto mite kutoku okoy pesyoni! 24Kunyo komwowok ani akwek kule, mosukukaykay Yiyintet toŋoŋutek cepo pikap Sotom om pesyetap musankut kupëliŋ nyi.’’ 25Yoto kuŋalal Yesu kumwoy kule, “Okostiŋ ani nyi Papa, Mokoryontet nyepo torot oko ŋony, omnye kweporci nyi ŋalecu piko ce puryo kot kuŋomec ce kanetan. 26Yunyoto Papa, omnye kiyiy nyi kwey nkit kuyunyoto om cömisyeŋuŋ. 27“Kikono Papamwani tukuk tokol. Puryo ci nye nkete kule werit ku ŋo, tos Papa pate nkit nye nkete, oŋnkupuryo ci nye nkete kule Papa ku ŋo, tos werit pate nkit nye nkete oko piko ce kacäm werit kule oŋoŋu oporci Papa. 28“Akwa wule mite ani akwek piko tokol co kyocosye kunyikisyok terekok, mosomuŋwok ani. 29Onumu mucokimwani oŋnkuwutekey oŋnkanetkey arupa ani, omnye oyiku ani tala, oŋnkutopon mukuleyto, mosonyoru kamuŋnto. 30Omnye Kuskus mucokit nye mokonok ani oŋnkukuskusec terekok ce motorwok ani.’’

will be added

X\