1 Kukur Yesu konomikyi korurukyi ye kimite neto oŋnkukoci kamukeywek ce muce kukwet oyik ce miyotec oŋnkusop porwonik wok tokol oko syenunot ake tokol. 2 Kaynokap kiyokik tokol taman ok oyeny kucu: Nyepo tayta ku Simon nye cekure kaynet ake Petero, oko mutakwam Antereya; Yakopo oko mutakwam Yowana werikap Sepetayo tukway. 3 Filipo oko Paturumayo, oko Tomas oko Matayo nye kikorurukintetap mosoret, oko Yakopo weritap Alufayo; oko Setayo, 4 Simon nyikanet nye poryecini korenyi; oko Yuta Isikaryoti nyo kiŋomntoy Yesu. 5 Kuyokto Yesu picutecu taman ok oyeny oŋnkuyomis kumwoci ŋalecu kule, “Monte kot ape koretap lamek, monte mpo ciwut moŋosyekap Samariyek. 6 Ntene ape pate wule mite kecirek cepo kotap Israel ce kipotyo. 7 Ape wamwaytate kule, ‘Kucontyok akwek poytoyisyetap torot!’ Wosop piko ce mnyontos, wosop kotutune met piko ce kipok. 8 Wosop piko ceponto mutyenkenik oŋnkakwet oyik. Kicekonok akwek puc pate nye puryo kot ayal, kunyi okoyite mpo akwek puc pate nye puryo kiy nye cekonok. 9 Monte cenämate sapunek nto pesan om lolonikwok. 10 Monte cenämate om poninekwok munyenkutap somik, nto mpo siret nyepo oyeny, nto mpo kweyonik, nto mpo korokto nye otepenoti. Omnye misyini cito nye yiyisyi kunyor musyarenyi. 11 “Nteye kowut moŋet ake tokol nto saŋnta ake tokol, aceŋate ci ake tokol nye topon nye muce kuŋerekyok, oŋnkopur oko cicoto okoy onomene wuloto. 12 Nteye kowut koto ake orit, asupay omwoci kule, ‘Purte nyi kalyet.’ 13 Ye koŋerekyok akwek pikap koyoto, ayaste kunyor cek kasupoyisyet nyepo kalyemwoŋ. Ntene ye puryo kot kuŋerekyok picoto, oketu kuketkey kasupoyisyet nyepo kalyemwoŋ. 14 Nteye puryo kot kuŋerekyok akwek citake tokol nto kutay molimwok ŋalek ce komwowu, aŋete moŋonoto nto koyoto oŋnkopukyi tertitap kerenkokwok. 15 Komwowok ani akwek ŋalek cepo manta kule, om pesyetap musankut mosukukalya Yiyintet pikap koretap Siton oko cepo Komora kusir piko cepo moŋonoto!’’ 16 Alim pa! Koyoktok ani akwek kuyu kecir ce kapa kwenutap suyik. Kunyo roke oŋomekitu kuyu erenoy; oŋnkotoloyitu kuyu swororok. 17 Oripkey omnye mite piko ce mosukunämak akwek oŋnkukwerok wokuwosontyok om korikapkokwonikwa. 18 Mosicekwerok wocewosontyok om taytap poytoyik oko kinkonik omnye ocömo ani akwek, sukuŋet omwoci akwek cekto oko lamek lokoywek ce toponec. 19 Ye kocekwerok wocewosontyok, monte cisot kule moceŋalal ŋal ne, nto kule ceŋololi kulene, ye kopunto pesyonoto, mosicekonok ŋalek ce momwowu om yoto. 20 Omnye puryo kot kucikwakwek ŋalek ce moŋalal, ntene mosukukwane wule mite Muyet Nyetilil nyepo Papamwoŋ nye mitowune wule omite akwek nye ŋolole yoto. 21 “Mosukuŋomnto piko mpo mutakwam cepakäc kupok, oŋnkuŋomnto mpo kwan lekokwa cepakäc kuyunyoto. Mosukuŋetŋet lekok oŋnkuporye kamwa oŋnkuŋomnto cepakäc kupok. 22 Mosukusenkerak kutayak akwek piko tokol omnye kocäm ani. Ntene ci ake tokol nye kasyem kutitir okoy pesyet nyepo letut kunye mosukusop nyoto. 23 Nteye kacitaŋanyak akwek om moŋet ake, omwey ape moŋet ake. Komwowok ani kule, puryo kot owonyi akwek yisyonutekwok om moŋosyekap Israel tokol kutompo kot kuco Weritap cito. 24 “Puryo kot kupële cito nye cinete konetintenyi, oŋnkupuryo kot kupële mutworintet mokoryontenyi. 25 Kunyo roke kuyem cito nyo cinete kukerkeyit oko konetintenyi, oŋnkuyem mutworintet kukerkeyit oko mokoryontenyi. Nteye kocekure cito nyewo nyepo kayta kule, ‘Pelsepul’ nyewo nyepo oyik, kuporkey kule mosicetoci mpo pikap kayata kaynok ce miyotec ce pëlisyi!’’ 26 “Kunyo monte ciywey piko. Puryo kiy nye yelat yawut nye puryo kot ceŋonye koyin kutok, oŋnkupuryo kiy nye wuŋat yawut nye puryo kot ciporu koyin kutok. 27 Ŋalek cu omwowok ani om wule wuŋat kuce roke wotosyikey wamwayte ŋalecato ye pet kwen. Nto ŋalek ce kwalime wule wuŋat kuce roke wamwayte okurte ŋalecato korik kisyek. 28 Monte ciywey piko co poköce porto pate, ntene oŋnkupuryo kot komuce kot kupakäc soponto; ntene aywey Yiyintet nye muce kupakäc tukway porto oko soponto om wule mite mata nye momise. 29 Puryo kot kyole cek titiyinek oyeny tampuret? Ntene oŋnkupuryo kot komuce kot kosuci mpo akenke ŋony, ye tompo kot kucämnta Papamwoŋ. 30 Nto wule omite akwek, nka mpo putekap metewokwok kiciyit tokol. 31 Kunyo monte cemuye; omnye oponte akwek latik kupël titiyinek!’’ 32 “Kunyo ci ake tokol nye kaŋalal kutor om wule mite piko kule oyiku nyimwani, kunye mosaparte otoru ani cicoto om wule mite Papamwani om torot. 33 Ntene ci ake tokol nye katay meparta kutor om wule mite piko, kunye mosatay ani maparte cicoto om wule mite Papamwani om torot.’’ 34 “Monte cisot kule kyaco ani osutu kalyet kuco koret, puryo kot osutu kalyet, ntene kyosutu rotwetap cok. 35 Omnye kyaco ani capciy, sukuŋet kutay werit kwan, kutay cepto kamet, kutay korketap werit kametitap santenyi. 36 Mosukwek pikap kayta ake punik cepo citap kayata. 37 “Ci ake tokol nye kacäm kwan nto kamet kupëlo ani, kunye puryo kot kuponto cito nyoto latik om wule omite ani. Ci ake tokol nye kacäm werinyi nto cepnyi kupëlo ani, kunye puryo kot kuponto cito nyoto latik om wule omite ani. 38 Ci ake tokol nye puryo kot kukesene murtowontenyi oŋnkuco kutyikyo ani let, kunye puryo kot kuponto nyoto latik om wule omite ani. 39 Ci ake tokol nye syeme kule osoru sopon nyi, mosukupot cito nyoto sopon nyi. Nto ci ake tokol nye kepot sopon nyi omnye kacäma ani, kunye mosukusor nyoto sopon nyi.’’ 40 “Ci ake tokol nye koŋerekyok kutorocak akwek, kukoŋerekyo kutoroca ani cito nyoto, nto ci ake tokol nye koŋerekyo kutoroca ani, kukoŋerekyi kutoroc cicoto neto nyo kiyokwo ani. 41 Ci ake tokol nye koŋerekyi kiyokintetap Yiyintet omnye kiyokintet, mosukupcicin cicoto kokotutyet oko workoyontet. Nto ci ake tokol nye koŋerekyi kutoroc ci nye topon omnye ci nye topon, mosukunyor cicoto kokotutyetap cicoto topon. 42 Komwowok ani akwek ŋalek cepo manta kule, ci ake tokol nye kekoci peko ce koyititec akenke om konomikwani ce minkec ceyucu omnye konomikwani, mosukunyor nyoto kokotutyenyi nye kocikoci.’’
