1 Nto om letutap pesyos ce ŋeri, koruruckey yec piko alake ce caŋ koromun okoy komokuponto omik ce mokwam. Kukur Yesu konomikyi oŋnkumwoci kule, 2 “Orire ani okolyoy picu, omnye pesyosyek somok yawut opontekey oko cekto kunyo puryo kot kuponto omik ce mokwam. 3 Kunyi ye komwoci kupecikey nye puryo kot apay, mosukumistot ye peti om aran, omnye kwone alake wule low.’’ 4 Kuwekyi konomikyi kumwoci kule, “Nyortoy ono citake omit ce muce kot kupaye picu tokol om surukwenoni?’’ 5 Kutepe Yesu cek kule, “Oponte akwek mukatinek ata?’’ Kuwec konomik kumwoy kule, “Ceponte mukatinek tisap.’’ 6 Kumwoci Yesu piko tokol kopur ŋony, oŋnkunäm, mukatinekey tisap, oŋnkusomnci kukasta Yiyintet oŋnkupetec oŋnkukoci konomikyi kupcici piko, kunäm co oŋnkupcici piko tokol. 7 Kiponto cek mpo purpurunek tukusic ce minkec. Yoto kusomnci Yesu mpo purpurunekey kukasta Yiyintet oŋnkumwoci konomik kupcici piko purpurunek. 8 Yoto kwomis piko tokol okoy kupiyoŋis. Ntowo kupok koruruc cek kisok cewoyec tisap ce nyitotin omik ce koŋet. 9 Kipuntoy piko tokol ce kyomis ce kirice elifunek amwan. Ntowo kupok, kuyomis Yesu piko kupecikey. 10 Yoto pakenke kulany Yesu rapet oko konomikyi oŋnkupa okoy koretap Talmanusa. 11 Yoto kukwa Farasayek alake, oŋnkucec kutintentyin oko Yesu. Kusyem cek kule celotu neto kumwoci kule kwiy pelutyet nyepo kakitat nye cone torot nye poru swametap Yiyintet. 12 Komuny Yesu komuŋnto nyewo, oŋnkumwoy kule, “Omne sukumoce piko cepo pintap pesyosyecu pelutyet nyepo kakitat? Komwowok ani akwek ŋalek cepo manta kule, puryo pelut nyepo kakitat nye cimuce kot ciporci piko cepo pintap pesyosyecu.’’ 13 Yoto kulany Yesu yec rapet kuwo kway tampayayet pitonin oŋnkupokokyi cek yoto. 14 Kuyutye konomik manäm mukatinek, ntene kiponto mukatyantet akenke pate om rapet. 15 Yoto kucec Yesu kusow cek kumwoci kule, “Oripkey akwek mumarekap Farasayek oko mumarekap Erote.’’ 16 Kucec konomik kurwoc kwicek nkit kumwoy kule, “Komwoy kuyunyi so omnye moceponte acek mukatya?’’ 17 Kunket Yesu ŋalek ce kiŋolole cekto, yoto kutepe kule, “Omne saŋalal akwek nkit omwowu kule moceponte mukatya? Tompo so kot osowu akwek okoy kunyi? Kerotiŋ kasoteywekwok? 18 Oponte akwek konyek ntene puryo kot oköste? Oponte yitik ntene puryo kot olimnte? Ntene puryo kot osoti akwek, 19 yo kyopeteci ani mukatinek mut aŋnkapaye piko elifunek mut? Kyoruruc akwek yoto kisok ata ce nyitotin omik ce koŋet?’’ Kuwec konomik kumwoy kule, “Kiciruruc kisok taman ok oyeny.’’ 20 “Nteyo kyopeteci ani mukatinek tisap aŋnkapaye piko elifunek amwan? Kyoruruc akwek yoto kisok ata cewoyec cepo omik ce koŋet?’’ Kuwec konomik kumwoci kule, “Kiciruruc kisok tisap?’’ 21 Kutepe Yesu cekto kule, “Kunyo tompo kot osowu akwek so okoy kunyi?’’ 22 Yoto kuwo Yesu oko konomik okoy kupunto Pesusayita. Kureton piko alake cito nye korat okoy ye kimite neto; oŋnkusom picoto neto kunäm kutwa cicoto. 23 Kunäm Yesu cicoto yewut oŋnkukwer kuwo moŋet saŋ. Nteyu kowo kuŋutyi neto konyekap cicoto, kunam konyek oŋnkutepe kule, “Kekäs nyi kitake?’’ 24 Kukästa cicoto kunyal parak oŋnkumwoy kule, “Oköse piko ce pesetoti ce kerkey oko ketik.’’ 25 Yoto kunäme Yesu yec yewuniyekyi konyekap cicoto, kutitir cicoto kuŋany konyekyi, yoto kusopco konyekyi kukästa topon okoy kukäs mpo kiy nye mite wule low. 26 Kumwoci Yesu cicoto kuwo ka oŋnkunkolontyi kumwoci kule, “Mente kot aketitekey awo moŋet yec.’’ 27 Yoto kunomen Yesu oko konomikyi kupa kupunte soŋwek ce kimut koretap Kayisariya nyepo Filipi. Nteye kimite cekto kupeti om aran, kutepe Yesu konomik kumwoci kule, “Mwowu piko kule oyiku ani ŋo?’’ 28 Kuwekyi konomik kumwoci kule, “Mwowu piko alake kule yiku nyi Yowana potisonintet. Kumwowu piko alake kule, yiku nyi Eriya. Nto alak kumwowu kule yiku nyi akenke om workoyikap keny nye kokotutune met!’’ 29 Kutepe Yesu cek kule, “Nto akwek, omwowu akwek kule oyiku ani ŋo?’’ Kuwec Petero kumwoy kule, “Yiku nyi Kristo nye ŋapanet.’’ 30 Yoto kumwoci Yesu kunkolontyi cek kule, “Monte cemwoci citake tokol kule neto ku ŋo.’’ 31 Kucec Yesu kunet konomik kumwoci kule, “Mosukutaŋany weritap cito toŋoŋutek ce caŋ koromun, oŋnkutay poyik oko tisik cewoyec oko konetikap ntarastinek. Mosicepakäc kume, nteye pesyet nyepo somok ciŋet kotutune met.’’ 32 Kumwoy Yesu ŋalecato kutor kulim cek tokol. Yoto kunäm Petero Yesu yewut oŋnkukwer tapan oŋnkusow kupolyi kumwoci kule, “Mente taŋalale ŋalecu.’’ 33 Ntene kuwekyikey Yesu kukäs konomikyi; oŋnkupolyi Petero kumwoci kule, “Wete yu omite ani nyi Setani: Puryo kot kupo kasoteywek cekuk Yiyintet, ntene po piko!’’ 34 Yoto kukur Yesu piko tokol wanak oko konomikyi kukwa ye mite neto oŋnkumwoci kule, “Ye möce citake tokol kule anama cepetekey ani, kumisyini kunyilkey nkit oŋnkutor murtowontenyi oŋnkuco cokunama cepetekey ani. 35 Omnye ci ake tokol nye möce kule osop soponnyi, kupote cito nyoto soponnyi, nto ci ake tokol nye kepot soponnyi omnye kacäm ani oŋnkucäm lokoywek ce toponec, kunye mosukusop cito nyoto soponnyi. 36 Nyoru ra cito latik ne ye keyum tukuk ce mite koret tokol kumukul oŋnkwarantakey nkit? Puryo kot kuyunyo mpo kisic! 37 Puryo kot kumite kiy nye muce kukon cito kwale soponnyi. 38 Kunyo ye kelilan ci ake tokol om wule omite ani oŋnkulilontyi ŋalekwani om pesyosyecu po piko cepo pinta nye puryo kot kuponto koyenot oŋnkupic ce ponto miyotyonik, mosukulilontyi mpo Weritap cito cicoto ye kaco om woyintap Papanyi, ye contoykey malaykanik ce tililec.’’
