Mark 7

1Korurukyikey ye kimite Yesu Farasayek oko konetikap ntarastinek ce kikwone Yerusalem. 2Yoto kukäs cek kule omisye konomikyi yewuniyek ce murwonec, coto kuce yewuniyek ce puryo kot ciwun. 3Omnye kirupe Farasayek oko Yutayek tokol ntarastinek ce kinet cek mpo kukomwa nye puryo kot kwomisyi okoy ye kakowun topon yewuniyek om aret nye roke. 4Oŋnkupuryo kot kwome kiy nye kocesutune motepo okoy ye keciwon kunyo. Kirupe cek mpo ntarastinek alak ce caŋ ce kicinet. Kuyu, ciwun topon cikomponik oko terenik oko sapuryanikap tayok oko kwiririnek. 5Yoto kutepe Farasayek oko konetikap ntarastinek Yesu kule, “Omne yu puryo kot kurupe konomikuk ntarastinekap keny ce kikonec mpo kukonyo, omnye omisye yewuniyek ce murwonec ce puryo kot ciwun?’’ 6Kuwekyi Yesu kumwoci cek kule, “Po manta ŋalek ce kiŋor Isaya ce nömok akwek! Oyiku kaperperot, kuyu wulo kisilyo kumwoy kule, ‘Mwowu Yiyintet kule, Yweyo ani picu om kutuwakwa pate, ntene mitowune mukuleywekwa wule low om wule omite ani. 7Puryo kot kuponto cek latik kusaya ani, omnye nete cek ntarastinek ce kikwiye piko kuyunye po ntarastinekyoto Yiyintet!’ ’’ 8Kumwoy Yesu kule, “Otoye akwek mayiy ntarastinekap Yiyintet, oŋnkorup oywey ntarastinek cepo pikap keny.’’ 9Kutosyikey Yesu kumwoci cek kule, “Oponte akwek ŋomnonet nyewo om wule otoytoy ntarastinekap Yiyintet, kule siceŋet cerup ŋalekwok cepo keny! 10Omnye kimwoy Moses kule, ‘Ywey kon oko komet. Nto ci nye cupe kwan oko kamet, kumisyini nyoto kume.’ 11Ntene onetisyi akwek omwowu kule, ye ponto cito kito nye muce kwiyisye kukalya kwan oko kamet, ntene oŋnkumwoy kule, ‘Karupon nyi’ (nye poru kule po Yiyintet nyi). 12Kunye cikolyoy cicoto mente kukalya kwan oko kamet. 13Om ŋalek ceyucoto kuye owurtoy akwek ŋolyontetap Yiyintet om ŋalekwok cepo keny ce oneti piko alak. Oŋnkumite mpo ŋalek alake ce caŋ ceyucutecu ce oyiye akwek.’’ 14Kukur Yesu yec piko kukwa ye mite neto, oŋnkumwoci kule, “Olimwo ani pa akwek piko tokol oŋnkonäme ŋalecu mukuleywekwok. 15Puryo kot ku kito nye cone saŋ nye kam cito nye muce kot kowurta cito kumiyatit. Ntene kito nye cone mukuleyto orit kunye wurtoy cicoto kumiyatit. 16[Kunyo roke olimnte ye oponte yitik ce olimnte!]’’ 17Nteyu kowo kuwete Yesu ye kimite piko oŋnkuwo okoy koto orit, kutepe konomikyi neto ŋalek ce poru tyonkoconoto. 18Kumwoci Yesu cek kule, “Tompo kot osowu mpo akwek okoy kunyi kuyu piko alak? Kule puryo kot ku kito nyo cone saŋ kwam cito nye muce kot kowurta cito kumiyatit. 19Omnye puryo kot kowute mukuleynyi orit, ntene wute moyenyi oŋnkupa kumiŋnto saŋ.’’ (Yoto kumwoy Yesu kule toponec omik tokol.) 20Kutosyikey Yesu yec kumwoy kule, “Ŋolyo nye cone mukuleytap cito nye wurtoy cito kumiyatit, 21omnye kwone kasoteywek ce miyotec mukuleytap cito orit, kuyu corokyinotetap koruk, corsyet, porisyet, sakwayanat, 22corokyinot, ŋomset, kaperperisyo, makatet nye miyat, koŋ nye miyat, ŋalek ce miyotec, menon, silotet, perperyet. 23Ŋalecutecu tokol miyotec kuce kwone mukuleytap cito orit oŋnkowurtoy cito.’’ 24Yoto kunomen Yesu om wuloto okoy kupunto koret nye lekite moŋetap Tiro. Kuwo koto ake orit, nye kipuryo kot kumöce kule konket citake tokol kule mite neto wuloto, ntene kipuryo komuc kot kuwunynkey. 25Yoto pakenke kulim korket ake nye kiponto cepnyi nye kiponto oyinot nye miyat kule mite neto wuloto. Kuco pakenke oŋnkoputyi kukutuŋe yepo kerenkokap Yesu. 26Korkonoto kunye Kirikin nyepo Foyinisiya om koretap Siriya. Kusom korkonoto Yesu kule kukwetyi cepnyi oyinot nye kiponto. 27Kuwekyi Yesu kumwoci kule, “Kany cenyosye cepay kupiyoŋ lekok kunyo, omnye puryo kot kuroke cinum omikap lekok oŋnkyewirci ŋokik.’’ 28Kuwec korkonoto kumwoy kule, “Mokoryontet, yunyoto, ntene nka mpo ŋokik ce mite meset ŋony kwome omikap lekok ce lelektoy!’’ 29Yoto kumwoci Yesu kule, “Om ŋolyontoni kewec nyi mwowu, nomen iwo koŋuŋ, kaŋet oyinoto kuwete cepŋuŋ’’ 30Kunomen korkonoto kuwo ka, wokunyor lekwet kumite koru kwiriri kukosop kuwete oyinoto cepoto. 31Kunomene Yesu koretap Tiro oŋnkuwo kupunte Siton okoy kupunto tampayayetap Kalilaya oŋnkuwo kupunte aretap kwenutap Tekapoli (moŋosyek taman). 32Yoto kusut piko alake wule mite Yesu citake nye kiminy kunämakay kutit nye puryo kot komuce kuŋalal, kusaysay picoto kusom neto kule kukemer yewuniyekyi cicoto. 33Kunäm Yesu cicoto oŋnkukwer tapan kwine nkit, oŋnkowute mornenyi yititap cicoto kuŋutyi oŋnkutwa ŋelyepta. 34Kunyal Yesu torot oŋnkumuny komuŋnto nyewo, oŋnkumwoci cicoto kule, “Epapata.’’ (Nye mwowu kule, “Kuyotokis yitik.’’) 35Yoto pakenke kuyotokis yitikap cicoto, oŋnkutyak ŋelyepnyi kucec kuŋalal topon. 36Kumwoci Yesu kunkolontyi cek tokol mente kumwoci citake tokol ŋolyontoni. Nteyu kowo kutosyikey Yesu kumwoci kunkolontyi kuket cekto, mpecek kutosyikey kumwaytat. 37Kukite koromun piko tokol ce kilime oŋnkuŋalale kumwoy kule, “Kakwiy tukuk ce toponec, kokusop kot kulimnta piko ce kimiŋitu, oŋnkuŋalal piko ce kinomokis kutuwak.’’

will be added

X\