Mark 6

1Kunomene Yesu wuloto kuwo kuketitakey okoy kupunto moŋetap koremwa Nasaret, kurup konomikyi neto. 2Nteye kipesyetap Sapat kucec Yesu kunetis om kotapkok. Kimite yoto piko ce caŋ, ntowo kulim cekto ŋalek ce kimwowu; kukite tokol oŋnkutep kumwoy kule, “Kinyorta ono cici ŋalecu? Kinyor ŋomnononi kulene? Oŋnkwiye kulene ŋalecu po kakitat? 3Puryo kot ku koswetintetap pawunek neto nyitenyi nye weritap Mariyam, nto mpo mutakwam ku Yakopo oko Yose oko Yuta oko Simon? Puryo kot ku mpo cekwam cek cu cepontekey acek ceminye tokol?’’ Yoto kutay cek Yesu. 4Kumwoci Yesu cek kule, “Ciyweye workoyo om wulyo ake tokol, ntene puryo kot ciyweye om moŋenyi, oŋnkupuryo kot kuyweye pikap arenyi oko cepo kamwa.’’ 5Kipuryo yoto kot kwiy Yesu tukuk cepo kakitat om wuloto, ntene kukemer yewuniyekyi piko ce ŋeri ce kimnyontos kusop kusopco. 6Kokite Yesu koromun, omnye kipuryo kot kuponto cek koyenotet. Yoto kuwo Yesu kunetat piko kupunte kestonik tokol ce kilekite wuloto. 7Kukur Yesu konomik taman ok oyeny kukwa koruruckey wanak, oŋnkuyokto cek kupa saŋ kupetate oyeny oyeny. Kukoci kamukeywek kupayta oyik ce miyotec, 8Oŋnkumwoci kunkolontyi kule, “Monte cenäm mukatya, nto mpo lolonik cepo pesanik. 9Alac kweyonik ntene monte cilac sirok oyeny.’’ 10Kumwoci yec kule, “Ye kowut kotake kuyu tö, opurune koyoto pate okoy onomene moŋonoto. 11Nteye kopunte wule puryo kot kuŋerekyok nto kutay molimwok pikap wuloto ŋalek, onomen apete moŋonoto oŋnkupukyi tertit nyepo kerenkokwok, sukuŋet kwek kasowunot om wule mite picoto.’’ 12Yoto kunomen cekto kupa wokwomnci piko lokoywek kule, misyini kurenynkey piko kwasta miyotyonikwa. 13Kukwet cek oyik oŋnkuŋape mwayta piko ce caŋ ce kimnyontos kusop kusopco. 14Yoto kilim kinko Erote ŋalecato tokol, omnye kitok kaynetap Yesu ceŋalale om koret wulyo tokol. Kumwoy piko alak kule, “Kuŋet kotutune met Yowana potisonintet kunyi mite kwiyiyis swamet nye ponto kwiye ŋalecu.’’ 15Kumwoy mpo piko alake kule, “Eriya nyitenyi.’’ Kumwoy alake kule, “Workoyo nyi nye kerkey oko workoyikap keny.’’ 16Nteye kotolime Erote ŋalecato, kumwoy kule, “Yowana Potisonintet nyitenyi nyo kyomwoytoy ani ceyep katit nye kokotutune met yec!’’ 17Omnye Erote nyitenyi kunyo kimwoytoy cenäm Yowana oŋnkyerat cekerta mopusi. Kikwiy Erote kuyunyoto omnye kisac ŋalekap Erotiya nye kikorketap mutakwam Filipo nye kimut neto kwek korkenyi. 18Kunyo kimwocini Yowana Erote kwak okokoy kule, “Puryo kot kumisyini kot müt nyi korketap mutokwomet!’’ 19Kunyo kisenkere Erotiya Yowana koromun, kusyeme kule apar neto kume, ntene kipuryo kot komuce. 20Omnye kiyweye Erote Yowana omnye kinkete kule neto kunye ci nye topon nyepo manta nyetilil, kunyo kiripe topon koromun, kilimntoy Erote ŋalekap Yowana ce kimwowu nka kot kimuye ye kalim ŋalekyi. 21Nto mite pesyet ake, kunyor Erotiya poroyinto. Omnye kikwiy Erote sakwet nyepo pesyenyi nye kiceye kwici pikyi poytoyik ce woyec oko sikarek ce woyec cepo poryet oko piko ce woyec kantoyik cepo Kalilaya. 22Yoto kuco ceptap Erotiya koto orit oŋnkutum, okoy kuŋerec Erote oko toyekyi ce kimite kukepur tokol. Kumwoci kinko Erote cepoto kule, “Möce kule akoniŋ ani kiy ne? 23Mosokoniŋ kiy ake tokol nye kesomo ani.’’ Kuwalkey aret ce caŋ kumwoci cepoto kule, “Kokurtowuŋ kule mosokoniŋ kiy ake tokol nye kesomo nka mpo kwenutap kereryantetap koret nye opoytoy ani.’’ 24Yoto kumiŋnto cepoto kuwo wokutepe kamet kule, “Mosom kiy ne?’’ Kuwekyi kamet kumwoci kule, “Som cekoniŋ metitap Yowana Potisonintet.’’ 25Kuwo cepoto kusartakey lakwar okoy wule mite kinko oŋnkusom kumwoci kule, “Omöce kono ani nyi yawut pakenke om yuteyu sanit nye mite orit metit nyepo Yowana potisonintet!’’ 26Kunyer kinko kumwontyi ŋalecato korumun, ntene kipuryo kot komuce kot kuyete cepoto, omnye kikikowalkey om konyekap toyekyi tokol. 27Kuyokto yoto pakenke Erote sikorintet nye ripsi kuwo wokusut metitap Yowana. Kuwo sikorintet okoy mopusi oŋnkuwo kuyep metitap Yowana, 28oŋnkusut metit nye mite sanit oŋnkuco kukoci cepoto, kunäm nyo oŋnkukoci kamet. 29Ntowo kulim konomikap Yowana ŋalecato, kukwa kwokusut musyontetap Yowana wokumuci mwenet. 30Kuweckey kiyokik okoy kwokutuyo oko Yesu, oŋnkwokumwoci tukuk tokol ce kukwiy oko ŋalek ce kukunet cekto. 31Kimite yoto piko ce caŋ ce kikwoni cut kupeti cut okoy kupotyi Yesu oko konomikyi poroyinto ye mokwomis. Kumwoci Yesu konomik kule, “Akany cipe acek nkit wule po surukwenet sukuŋet womuny akwek kuminiŋ.’’ 32Kulany cekto rapet kwicek nkit oŋnkupa okoy surukwenet. 33Ntene kukäs piko ce caŋ ye kipeti cek oŋnkunket wule kotokyikey. Yoto kupete piko kerenkok, ce kikwone moŋosyek tokol kusartakey okoy wokunyosyo kupunto kutompo kot kupunto Yesu oko konomik. 34Ntowo kurekune Yesu rapet, yoto kukäs neto luket nyepo piko ce caŋ, nteye kotoköse kurire kukalya omnye kikerkey picoto kecir ce puryo kot kuponto mesewo. Yoto kucec Yesu kunet cek kumwoci ŋalek ce caŋ. 35Nteyu kowo kwimen koret, kukwa konomik ye mite Yesu oŋnkumwoci kule, “Nteyu kokwimen koret, kunyi surukwen wuli ce mite. 36Yomis mwoci piko kupecikey, kupa kestonik oko soŋwek ce lekitec sukuŋet wokuceŋat kwalat nkit omik ce mosukwam.’’ 37Kuwekyi Yesu kumwoci cek kule, “Okoci akwek nkit kiye mokwam.’’ Kutepe cek Yesu kule, “Moce nyi kule cipe acek wokyal mukatinek ce muce kyale silinkinek pokolwokik amwan oŋnkyepaye picu?’’ 38Kutepe Yesu cek kule, “Oponte akwek mukatinek ata? Ape ra wakäs.’’ Nteyu kowo kunket wule tento, kumwoy kule, “Ceponte mukatinek mut oko purpurunek oyeny.’’ 39Kumwoci Yesu konomik kuyiyta koruruckey piko tokol oŋnkopure suswek nye nyolilec. 40Yoto kopur piko kutetkey kupetate alake pokol nto alak konom. 41Kunäm Yesu mukatinekey mut oko purpurunek oyeny oŋnkunyal torot oŋnkusomnci kukasta Yiyintet, oŋnkupetec mukatinek oŋnkukoci konomikyi kupcici piko. Yoto kupciyta neto purpurunek kuyem piko tokol. 42Kwomis piko tokol okoy kupiyoŋis. 43Yoto koruruc konomik mukatinek oko purpurunek ce koŋet okoy kunyiy kisok taman ok oyeny. 44Nto coŋinto nyepo piko ce kikwam mukatinek oko purpurunek kuce piko moronik ce kipuntoy elifunek mut. 45Yoto pakenke kumwoci Yesu konomikyi kulany rapet kway tampayayet pitonin kontowonu kupa okoy moŋetap Pesusayita ye tokumite neto kuyomise piko kupecikey. 46Nteyu kowo kuyomis konomik, kunomen kwine nkit kuwo kulaŋnta lakam wokusom. 47Ntowo kupunto komoy, kimite yoto rapet kukopunto kwenutap tampayayet, kumite Yesu kwine nkit wule po koret. 48Yoto kukäs neto kule mite konomikyi kataŋany kuwulye kukwonye rapet omnye kiwuse yomet kuketu cekto kukwa let. Ntowo kupunto komoy karik kuyec koret, kuco Yesu wule mite cek kutyikonu peko parak, yoto kutil kukeyte cekto. 49Ntene kukäs cek kutyikoti peko parak, kusot oŋnkupol kuncoy kule, “Oyinot nyi!’’ 50Omnye kimuyo cek tokol yu kowo kukäs Yesu. Kuŋololyi Yesu pakenke cek kumwoci kule, “Otitir! Ani nyo, monte cemuye!’’ 51Kulany Yesu rapet nye kimite cekto; yoto pakenke kusis yomet. Kokite konomik oŋnkumuyo koromun kupotpotenis. 52Kipuryo kot kusow cek konket ŋalek ce nöme ŋalekap mukatinek kule poru ne. Kipuryo kot konket mpo kisic kule poru ne. 53Kupete cek rapet kway tampayayet okoy kupunto koretap Kenesaret wule kiwo kurotyi rapet. 54Nteye kimite kurekune rapet, yoto pakenke kunket piko Yesu. 55Kurway piko kupunte koronoto tokol kupa wokukonopune kwiririnek piko ce mnyontos okoy kupun wule mite Yesu om wulyo tokol wule kalim cek kule mite Yesu wuloto. 56Nto om wulyo tokol wule kiwo Yesu, soŋwek oko moŋosyek oko kestonik. Yoto kukwer piko pikwa ce mnyontos okoy motaponik oŋnkusom cekto Yesu kule kucömnci piko ce mnyontos kunäm mpo pate kototyetap sirenyi. Kusopco piko tokol ce kinäm kutwa sirenyi.

will be added

X\