Mark 5

1Yoto kupa cek kway tampayayet pitonin okoy koretap Kerasenik. 2Yoto pakenke ntowo kurekune Yesu rapet, kutuye cito nye kicone wule cemucini piko. 3Kiponto cicoto oyik ce miyotec kunyo kiminye wule cemucini piko. Kipuryo kot kumite ci nye kimuce kot kurat cicoto, nka mpo ye kacerate nyororonik. 4Omnye kikicerate nyororonik oko pinkonok aret ce caŋ ntene kuŋetye nyororonik oŋnkupirto kwiri pinkonok. Kunyo kipuryo kot kumite ci yec nye kiponto swamet kupël cicoto. 5Kipurune cicoto komoy oko pet wule cemucini piko oko lakomosyek, sukuncoyoti oŋnkupakeke rwontok. 6Nteye kimite cicoto kutokulow kisic, kukäs neto Yesu, yoto kulapat oŋnkoputyi yepo kerenkokyi kukutuŋnkyi; 7oŋnkupol om kutit nyewo kumwoy kule, “Penteno ani ne nyi Yesu Weritap Yiyintet nyepo torot! Owolikey om kaynetap Yiyintet osomiŋ kule, mente kot ataŋanya!’’ 8Kimwoy kuyunyoto omnye kikimwoci Yesu neto kule, “Oyinot nye miyat, cone wule mite cici!’’ 9Yoto kutepe Yesu kule, “Cekure ne kayneŋuŋ.’’ Kuwec cicoto kumwoy kule, “Cekure kaynemwani, ‘Luket’ omnye ciku caŋ!’’ 10Yoto kusom cicoto kusaysay Yesu kumwoci kule mente kukwet oyik kupete koronoto. 11Kimite ye kilekite yoto yeceytap nkururwenik ce kimite kwokete lakamet komos. 12Kusom oyik ce miyotec kumwoci Yesu kule, “Kwetec cipe wociwut nkururwenik orit.’’ 13Kucömnci Yesu oyik kupa. Yoto kuŋete oyik ce miyotec cicoto oŋnkupa wokowut yeceytap nkururwenik ce kirice kupunto tokol elifunek oyeny. Kumwey kurway tokol wokoŋirte lakam wokosuci tampayayet, kupakäc peko kupok tokol. 14Yoto kumwey kurway mesewek ce kyokisyi oŋnkupa wokumwaytat ŋalecato kumwoci piko cepo moŋet oko piko cepo soŋwek. Kukwa piko kwokukäs ŋalecato kakwiyokis. 15Kukwa picoto okoy ye kimite Yesu, kwokunyor cicoto kiponto oyik ce caŋ kukepur ŋony kulakat nye kanyol kuŋomit topon. Yoto kumuyo piko tokol. 16Kumwoci piko co koköse om konyekwa piko co kokwoni ŋalek ce kokwiyokis om wule mite cito nyo kiponto oyik oko ŋalek cepo nkururwenik. 17Yoto kucec piko kusom kumwoci Yesu kuŋet kuwete koremwa. 18Nteye kimite Yesu kulonye rapet kule onomen owecikey, kusom cicoto kiponto oyik kumwoci Yesu kule, “Kany cepetekey tukway!’’ 19Ntene kuyete kumwoci kule, “Iwo kaŋuŋ wule mite pikwok wemwoci ŋalek ce woyec ce kakwiwuŋ nyi Mokoryontet, oko kuyu wule karireniŋ kukalyiŋ.’’ 20Yoto kunomen cicoto kuwo wokupunte Tekapoli (moŋosyek taman) oŋnkuwo wokumwaytat ŋalek ce kokwici Yesu neto. Kukite koromun piko tokol ce kilim ŋalecato. 21Kulany Yesu rapet kuco kwoy okoy kupun tampayayet pitoni. Yoto kukwa piko ce caŋ kwokorurukyikey ye kimite neto om yepo tampayayet tapan. 22Kuco citake nye kipoytoy kotapkok nye kicekure Yairo. Nteye kotoköse cicoto Yesu, kukutuŋe yepo kerenkokyi, 23oŋnkusom kusaysay kumwoci kule, “Mite cepnyu nye mnyone kasat karik kume; co cekemer yewuniyekuk sukuŋet kusop mente kume!’’ 24Yoto kunomen Yesu kupetakey cicoto. Kurup piko ce caŋ Yesu ce kikicoti neto om komoswokik tokol. 25Kimite yoto korket ake nye kimnyan kusyen koromun kukwone korotik kuwany kenyisyek taman ok oyeny; 26nye kikikuwoŋnkyi tukukyi tokol ce kiponto kukocini cepsakitisyek kule kunyaya; ntene puryo mpo akenke nye kimuc kot kukalya, ntene kutosyinikey pate porto okokoy. 27Kikilim korkonoto yoto ŋalek ce nöme Yesu. Yoto kurup letutap Yesu, 28oŋnkumwoy om moyenyi nkit kule, “Mpo ye katwaya ani pate sirenyi, mososop.’’ 29Yoto kunäm kutwa siretap Yesu. Kusop pakenke kusisio nye komokukwoni korotik, okoy kukäs neto nkit kule kosope porto nyo kwomnyoni. 30Kunket Yesu pakenke om pornyi nkit kule kaweteno swamet. Kuwekyikey kukäs piko oŋnkumwoy kule, “Ŋo nyi kanäma kutwa siremwani?’’ 31Kumwoci konomikyi kule, “Puryo kot köse nyi piko cu kekiciŋ, kunyi mite yec tepe kule, ‘Ŋo nyi kanama kutwaya ani?’ ’’ 32Ntene kutosyikey Yesu kukäsakästa kule akäs ŋo nyi kakwiy ŋolyontoni. 33Kunket yoto korkonoto ŋolyontet nye kakwiyakay om wule mite neto, kuco tay kupotanan nye komuy oŋnkoputyi kukutuŋe yepo kerenkokap Yesu oŋnkumwoci ŋalek tokol cepo manta. 34Kumwoci Yesu korkonoto kule, “Cepnyu, kokusopiŋ nyi koyeneŋuŋ; kunyo wecikey om kalya oŋnkuwesop okokoy.’’ 35Nteye kimite Yesu tokuŋolole, kukwa piko alake ce kikwone kotap poytoyintet nyepo kotapkok oŋnkwokumwoci cicoto kule, “Kame cepŋuŋ Kunyo mente tayim yec konetintet.’’ 36Ntene kukwes Yesu ŋalecato komwowu picoto, oŋnkumwoci Yairo kule, “Mente omuy, yen pate.’’ 37Yoto kuyete Yesu piko alak tokol mapetakey neto, ntene kupetakey pate Petero oko Yakopo oko mutakwam Yowana. 38Kupunto cekto kotap cicoto kinyewo nyepo kotapkok. Yoto kukäs Yesu rirek cepo piko ce kincoytos kwome mnyat koromun. 39Kuwo Yesu koto orit oŋnkumwoci piko kule, “Omne soselelen kuyunyi? Omne sorirye! Puryo kot kume lekwet koru, pate!’’ 40Kurori piko tokol kurorci neto. Kukwet Yesu piko tokol ce kimite koto orit kupa saŋ, oŋnkukwer kwanitap lekwet oko kamet oko konomikyi somok okoy koto nye kimite lekwet. 41Kunäm Yesu yewutap lekwet oŋnkumwoci kule, “Talisa kaum.’’ Nye mwowu kule, “Cepi miniŋ, kumwowuŋ ani kule ŋet yony.’’ 42Yoto pakenke kuŋet cepoto kuyo oŋnkuwesetot. (Kiponto cepoto kenyisyek taman ok oyeny.) Ntowo kwiyakay ŋolyontonoto; kukite piko koromun. 43Ntene kunkolontyi Yesu kumwoci cek kule puryo kot kuroke kunket citake tokol ŋalecu, oŋnkumwoci cek kule, “Okoci cepoto kito nye mokwam.’’

will be added

X\