Mark 4

1Kunetisye Yesu yec pesyet ake tampayayet tapan, yoto kukwa piko ce caŋ korurukyikey ye kimite okoy kulany Yesu rapet nye kimite tampayayet. Kimite yoto piko ce caŋ ce kepur yepo tampayayet tapan om koret okoy kupun tapantap peko, kumite rapet peko orit. 2Kunet Yesu piko ŋalek ce caŋ kwiyisye tyonkocok, nteye kinetisyi kumwoci piko kule, 3“Akäs pa! Kiwo citake wokukolsyo. 4Nteye kimite kukolsyi, kusuci kupuswek alake aret tapan, kuterer toritek kwokwam. 5Kusuci kupuswek alake kitawet ye kipuryo kot kumite teŋek ce yeme, yoto kutur kupityo lakwar omnye kipuryo kot kuponto tikityek ce kipa ŋony. 6Ntono kumwok asista kupel kuyom kupotyo. 7Kusuci kupuswek alake ye kimite kotok orit, kupityo kotok kwam kowurta kupotyo nye puryo kot kwiy kupuswek. 8Ntene kusuci kupuswek alak ye kimite teŋek ce toponec, kutur kupityo oŋnkwiy ketit akenke kupuswek sosom; nto ake kwiy kupuswek tomonwokik lö, nto ake kwiy kupuswek pokol akenke.’’ 9Yoto kumwoy Yesu kule, “Ci nye ponto yitik ce limntoy, roke kulimnte.’’ 10Nteye kimite Yesu kwine nkit, kukwa ye kimite neto piko alake ce kilimntoy ŋalekyi oko kiyokikyi taman ok oyeny oŋnkutepe kule mwowu ne tyonkocok. 11Kumwoci Yesu cek kule, “Kicekonok akwek oŋnket ŋalek ce wuŋotin cepo poytoyisyetap Yiyintet. Ntene om wule mite piko alak ce mite saŋ kuce mosukulim cekto ŋalek om tyonkocok, 12sukuŋet, Kukästa oŋnkukästa, ntene oŋnkupuryo kot kuköse, kulimnta oŋnkulimnta, ntene oŋnkupuryo kot kusowu kunket, Nto kukostoy oŋnkunket, kuye kuwekyikey wule mite Yiyintet, sukukalya neto cekto.’’ 13Yoto kutepe Yesu cekto kule, “Tompo kot oŋnket akwek ŋalek ce mwowu tyonkoconi? Kunyo omuci kot oŋnket kulene ŋalek ce mwowu tyonkocok alake? 14Kole kolintet lokoywekap Yiyintet. 15Muce pesyet ake kusuci lokoywek aret tapan kulim picoto lokoywek, nteye kalim; yoto kuco lakwar Setani oŋnkunum ŋolyontet nye kacekol mukuleywekwa. 16Kerkey piko alake oko kupuswek co kicekol teŋek cepo kitawet, coto kuce ye kotolime lokoywek kucäm lakwar om ŋerekwek 17ntene nye puryo kot kowute mukuleywekwa orit, kunyo puryo kot kopure kuloyit, nteye kaco wuyinto nto toŋoŋutek kupo lokoywek kwasta lakwar. 18Kerkey piko alake oko kupuswek co kicekol kotok orit, coto kuce piko co lime lokoywek, 19ntene om kasoteywekap soponto nyepo pesyosyecu, oko corokyinotet nyepo mokoryontit oko tukuk alak cepo koret, kucut kunum lokoywek nye puryo kot kwiye kupuswek. 20Ntene kerkey piko alake oko kupuswek co kicekol teŋek ce toponec, lime piko coto lokoywek, oŋnkucäm oŋnkwiy kupuswontet akenke kupuswek alak sosom, oŋnkwiy kupuswontet ake kupuswek alak tomonwokik lö oŋnkwiy ake kupuswek alak pokol akenke.’’ 21Kutosyikey Yesu kutepe cekto kule, “Sutu ra cito kenyis tarit oŋnkunäm pesenit kokupuye, nto mpo kotore tarit kwiririt ŋony? Puryo kot kusutu neto oŋnkukoci kuyoŋe meset nye yoŋe tarit parak? 22Omnye puryo ŋolyo nye kicewuny nye puryo kot ceŋonye koyin kutok, oŋnkupuryo kiy nye kicetup cewuny nye puryo kot ceŋonye koyin kutok. 23Kunyo, ci nye ponto yitik ce limnte, roke kulimnte!’’ 24Kumwoci Yesu yec cekto kule, “Olimnte topon ŋalek ce olime! Omnye koyoyeket nye oyoyekyini akwek piko alak kunye koyoyeket nye yunyoto nye mociyoyekwok mpo akwek, oŋnkyetoswok mpo kucaŋit. 25Omnye cito nye ponto kunye mosicetosyi nyoto kucaŋit, nto cito nye puryo kot kuponto, nka mpo ce tukusic ce ponto mosicinumune.’’ 26Kutosyikey yec Yesu kumwoy kule, “Kerkey poytoyisyetap Yiyintet oko ci nye kole kupuswek mparen, 27kurucikey ye komoy oŋnkukös ye koyek pet, kumite yoto kupuswek kuturu kupitos, oŋnkurok kupuryo kot kunkete neto kule yiyoktos kulene. 28Teŋek nkit kuce kocini kupityo okoy kwek omik. Nyosyi kupityo kunyo sokek ceŋorŋor, ntekere kuyiy taptet, nto om letut kuwoŋnkyi kwiy kupuswek. 29Nteye koruryo omik, kunäm cito rotwet oŋnkuwo wokusis omnye kopunto kisisyet.’’ 30Kutosyikey yec Yesu kumwoy kule, “Mocemwowu kule kerkey poytoyisyetap Yiyintet oko kiy ne? Tyonkocet oŋnkono nye mocemwowu sukuŋet ceroru cikerkeye? 31Kerkey oko kupuswontetap ketit ake nye cekure kalitarit nye kisic kupël kupuswek alak tokol ce mite koret 32nteye kocewu kupite kuwoyit kwek cemosi kupël ketik alak tokol, oŋnkupityo sarisyek ce woyec oŋnkukwa toritek kwokutec korikwa wuronokap ketoto.’’ 33Kumwoci Yesu piko lokoywekyi ce caŋ kwiyisye tyonkocok ce kerkey cutecu ce kimuc cekto kot konket ŋalek. 34Kipuryo kot kumwoci neto piko ŋalek ye mnokwiyisye tyonkocok, ntene nteye kimite kwine nkit oko konomikyi kuye sukumwoci co ŋalek tokol ce mwowu tyonkocok. 35Ntowo kupunto pesyonoto kosoleny, kumwoci Yesu konomikyi kule, “Onte cipe kyay tampayayet pitonin.’’ 36Yoto kunomen kupa oŋnkupakakta piko tokol. Kulany konomik rapet nye kimite Yesu kunyosyo kopure orit, kupetakey cekto yoto raposyek alak. 37Ntene kuwus yomet nyewo koromun okoy kuwosyikey peko rapet kot kumac kunyiy peko. 38Kimite Yesu yoto kukoru rapet let oŋnkutiye metinyi kito nyo cetiye metit. Kuŋet konomik kumwoci kule, “Mokoryontet, puryo kot köse nyi kule karik cepoku?’’ 39Kuŋet Yesu Kukos, oŋnkupolyi yomet kumwoci kule, “Sis yomet! Oŋnkitempes tampayayet!’’ Yoto kusis yomet oŋnkutempes tampayayet. 40Kumwoci Yesu konomik kule, “Omne somuye? Tompo kot onyoru akwek koyenot?’’ 41Ntene kumuyo konomik koromun oŋnkuŋalal kwicek nkit kumwoy kule, “Ŋo nyun cici, nyi limncini yomet oko tampayayet?’’

will be added

X\