Mark 3

1Yoto kuwo Yesu yec pesyet ake kotapkok. Kimite koyoto cito nye kime yewut. 2Kurip piko alake ce kimite yoto kukäs topon Yesu kule sicekäs oŋnkomuce kusop cicoto ye pesyetap Sapat sukuŋet cewosontyi. 3Kumwoci Yesu cicoto kime yewut kule, “Co ceyoŋe yu po tay.’’ 4Oŋnkuwekyikey piko kutepe kule. “Cömwec acek ntarastinekyo kyiy ne ye pesyetap Sapat? Cikalya nto ciwurta? Cisop sopontap cito nto cepakäc cipot?’’ Ntene kusisio cekto. 5Kukäskästa Yesu kurotot cek tokol nye konyer, oŋnkukalya wuyinto oko solwontit nye kiponto. Kumwoci Yesu cicoto kule, “Yite yewuŋuŋ.’’ Kuyito yewunyi, yoto kusop yewunyi. 6Kuŋetyo Farasayek kumiŋnto kupa saŋ oŋnkurwoc oko pikap Erote wule muktoy kunämnta Yesu oŋnkupakäc kume. 7Kunomen Yesu oko konomikyi kupa okoy kupunto tapantap Tampayayetap Kalilaya. Kurup luket nyepo piko ce caŋ ce kikwone Kalilaya oko ce kikwone koretap Yuteya, 8oko ce kikwone moŋetap Yerusalem, oko ce kikwone koretap Itumeya, oko ce kikwone koretap oyinetap Yortan pitonin, oko ce kikwone korosyekap moŋosyekap Tiro oko Siton. Kikwa picoto tokol wule mite Yesu omnye kikilim tukuk ce kikwiye. 9Kucaŋit piko yoto koromun okoy kumwoci Yesu konomikyi kule kuyiytoci rapet nye kepure sukuŋet mente kot kuwunukto oŋnkukic piko neto. 10Omnye kikikusop piko ce caŋ, kunyo kimite yoto piko ce kimnyontos kuwunuktotikey kule cepunte ye mite Yesu sukuŋet cenäm cetway. 11Nteye kutoköse piko ce kiponto oyik Yesu, koputyi kukutuŋe yepo taynyi oŋnkuriryo kumwoy kule, “Yiku nyi Weritap Yiyintet!’’ 12Kuyete Yesu kumwoci konkolontyi oyik ce miyotec kule mente kot kumwayta kule neto kuŋo. 13Kunomen Yesu kuwo kulaŋnta lakamet parak oŋnkukur kupetakey piko ce kimöce neto. 14Yoto kukwey Yesu piko taman ok oyeny oŋnkutoci kaynet kukure kiyokik. Oŋnkumwoci kule, “Kakweyak akwek sukuŋet opur oko ani, kunyo mosoyoktok ape wamwaytate lokoywek, 15mosonyoru kamukeywek ce okwete oyik.’’ 16Kaynokap kiyokik taman ok oyeny ce kikwey Yesu kucu; Simon nye kimulyi kaynet nyepo oyeny kukure Petero, 17Yakopo oko mutakwam Yowana werikap Sepetayo (ce kimulyi kukure Poanerke nye poru kule, “Werikap ilat.’’) 18Antereya oko Filipo, oko Paturumayo, oko Matayo, oko Tomas, oko Yakopo weritap Alufayo, oko Tatayo, oko Simon nyikanet nye poryecini korenyi, 19oko Yuta Isikaryoti nye kiweckey kwek ŋomntoyin. 20Yoto kunomen Yesu kuwo okoy ka. Koruruckey yec piko ce cäŋ okoy kupotyi ye mokwomis oko konomikyi. 21Ntowo kulim pikap kamwa ŋalecato, kupa kule wocerip, omnye kimwowu piko kule, “Kopun met.’’ 22Kumwoy konetikap ntarastinek ce kikwone Yerusalem kule, “Ponto neto Pelsepul! Kunyo Pelsepul nye, Oyinot nyewo nyepo oyik nye kocini neto swamet sukuŋet kukwet oyik.’’ 23Yoto kukur Yesu piko kukwa ye mite neto oŋnkunet kumwoci tyonkocok kule, “Muce kulene Setani kukwetkey nkit? 24Ye kapciwunekey oyeny poytoyisyet nyepo koret ake oŋnkuporyekey nkit kupote koronoto. 25Nteye kapciwunekey oyeny piko cepo kayta ake oŋnkuporyekey kwicek nkit kupote kayata. 26Kunyo ye kaŋet poytoyisyetap Setani kupciykey oŋnkuporyekey nkit, kupuryo kot komuce kot kuyo, ntene pote nyo kupok. 27“Om ŋolyontet ake yec, puryo ci nye muce kot kowut kotap cito nye ponto swamet oŋnkunum tukukyi, tos pate ye kanyosyo kurat cito nyo ponto swamet sukuŋet komuc kowut kotap cicoto oŋnkunyapan tukukyi. 28“Kumwowok ani akwek ŋalek cepo manta kule, cimuce cikalya piko miyotyonik tokol oko ŋalek alak tokol ce miyotec ce kaŋalal, nka kot kaŋalal aret cetya. 29Ntene puryo kot cikolyoy mpo kisic ci ake tokol nye kaŋalale kwapi Muyet Nyetilil, omnye kakwiy cicoto miyotyonik cepo kenyis ce mopoku.’’ 30(Kimwoy Yesu kuyunyoto omnye kimwoy piko alake kule, “Ponto neto oyik ce miyotec.’’) 31Yoto kupun kametitap Yesu oko mpo mutakwam, kwokuyoŋe saŋ oŋnkuyokto kukur kule kuco saŋ. 32Kimite yoto piko ce caŋ ce kepur komut Yesu. Kumwoci cek neto kule, “Lim pa, mite komet oko mpo mutokwomet saŋ ce mociŋ.’’ 33Kuwekyi Yesu kumwoci kule, “Ŋo nye yeyomwani? Nto ŋo ce mpo yeyamwani?’’ 34Kukäsakästa Yesu kukäs piko ce kimite kepur komut neto, oŋnkumwoy kule, “Akäs pa, piko cu ce mpo yeyomwani oko mpo yeyamwani. 35Omnye ci nye yiye ŋalek möce Yiyintet kule kwiy neto kunye yeyamwani nyoto oŋnku yeyomwani.’’

will be added

X\