Mark 2

1Om letutap pesyosyek ce ŋeri, kuweckey Yesu kuco okoy Kapernaum, yoto celim kule kaco neto kamwa. 2Kukwa koruruckey piko ce caŋ okoy kupot poroyinto wule mokopure, nka mpo yepo kurket saŋ. Kimwocini Yesu cek yoto lokoywek cepo Yiyintet. 3Yoto kukwa piko alake amwanu wule mite Yesu ce kitoronu citake nye kipok kerenkok. 4Omnye kicaŋit piko nye kipuryo wule kimuce cek kopunte cicoto okoy wule mite Yesu. Kulany cek koto kisyek oŋnkuput kisyekut ye kimite Yesu. Nteyu kowo kuyatakay yosico, kopunte cicoto yoto kumite kwiririt nye korwoye. 5Ntowo kukäs Yesu koyenet nye kiponto picoto, kumwoci cicoto kipok kerenkok kule, “Werinyu, kacikalyiŋ miyotyonikuk.’’ 6Kusot konetikap ntarastinek alake ce kimite yoto kukepur oŋnkuŋalal kwicek nkit kumwoy kule, 7“Ŋo cici ŋolole ŋal ce nyile Yiyintet? Ŋo nye muce kukalya miyotyonik nye puryo kot ku Yiyintet nkit!’’ 8Yoto pakenke konket Yesu ŋalek ce kimite cek kusote om montuwokwa, kumwoci neto cek kule, “Omne sasot akwek ŋal ceyuco oŋnkotintentyine om kasoteywekwok? 9Oŋnkono nye lekit, cemwoci cito nyi kipok kerenkok kule, ‘Kacikalyiŋ miyotyonikuk!’ Nto ye kocemwoci kule, ‘Ŋet yony, oŋnkinäm tor kwiririŋuŋ wesetote?’ 10Kunyo mosoporwok ani ŋalek cepo manta kule ponto Weritap cito kamukeywek om koret kukalya miyotyonik.’’ Yoto kumwoci Yesu cito nye kipok kerenkok kule, 11“Komwowuŋ kule, ŋet yony, oŋnkinäm tor kwiririŋuŋ nomen iwo ka.’’ 12Kuŋet cicoto kuyunyoto oŋnkunäm kotor kwiririnyi oŋnkunomen kuwo kusartakey kuköse piko tokol. Kokite piko tokol koromun oŋnkukasta woyintap Yiyintet kumwoy kule, “Tompo kot cekäs kenyis ŋolyo nye yunyi.’’ 13Kuketitakey Yesu yec kuwo okoy kupunto tapantap Tampayayetap Kalilaya. Yoto kukwa luket nyepo piko ce caŋ wule mite neto, kucec kunet cekto. 14Nteye kimite Yesu kuweti, yoto kukäs Lefi weritap Alufayo kukepur konyi nye cekweye mosoret. Kumwoci Yesu neto kule, “Rupa cepetekey oko ani.’’ Kuŋët Lefi oŋnkunomen kupetakey Yesu. 15Nto om letut ye kimite Yesu kwomisyi om kotap Lefi. Kimite yoto kukepur wanak oko neto piko co ruruce mosoret oko piko co kicetay, omnye kicaŋ piko ce kipetoykey Yesu. 16Yoto kukäs konetikap ntarastinek alak ce Farasayek kwomisyi Yesu oko piko co kicetay oko piko co ruruce mosoret. Kutepe cek konomikap Yesu kule, “Omne sukwomisyi neto oko pic ce ruruce mosoro oko pic ce kicetay?’’ 17Kulim Yesu ŋalek ce kimwowu cekto, kuwekyi kumwoci kule, “Puryo kot kumöce piko ce sopcotin cepsakityantet, ntene piko ce mnyontos ce möce. Kipuryo kot aco ani kule cokur piko ce toponec, ntene kyaco kule sukuŋet kurenynkey piko ce ponto miyotyonik.’’ 18Kimite pesyet ake kukire omik konomikap Yowana oko konomik cepo Farasayek. Yoto kukwa piko alake wule mite Yesu oŋnkutepe kule, “Omne sukukire omik konomikap Yowana oko konomik cepo Farasayek, ntene oŋnkupuryo kot kukire omik konomikukyi?’’ 19Kuwekyi Yesu kumwoci cek kule, “Muce ra coronutekap cito nyo kemütis kukir omik ye tokupontokey cek cito nyo kemütisyi? Puryo komuce cek kot kukir omik ye tokupontokey cito nyo kemütisyi. 20Ntene Mosukupunto pesyet nye mosicinumune cekto cito nyo kemütisyi, pesyoyecoto ye mosukukir cek omik. 21“Puryo ci nye muce kwiyisye yokwontet kisic nyelel kunopci siret nye yoswaket, omnye ye kakwiy kuyunyoto, komuce yokwontet nyelel kupac siret nyo yoswaket kutok kuwoyit koŋnta. 22Oŋnkupuryo mpo ci nye muce kuroŋnkyi finyonik ce mwonec wonkinek ce yoswak, omnye ye kakwiy kuyunyoto, komuce finyonik ce mwonec kuyeyi wonkinek co yoswak, kworon wonkinek oŋnkupa wuy finyonik. Puryo kot kuyunyo! Ceroŋnkyini komek ce mwonec wonkinek ce lelac!’’ 23Nteye kipesyetap Sapat, kuwo Yesu oko konomikyi kupunte mparosyekap nkanuk. Kucec konomikyi kuputot nkanuk. 24Kumwoci Farasayek Yesu kule, “Käs pa! Omne sukwiri konomikuk ntarastinekap pesyetap Sapat?’’ 25Kuwekyi Yesu kumwoci cek kule, “Tompo kot asuman akwek mpo kisic kito nye kikwiy Tauti oko piko ce kipontokey om pesyet nye kipuryo kiy nye mokwam okoy kwam cek rupet? 26Kiwo neto kowut kotap Yiyintet oŋnkunum kwam mukatyantet nyo kisoci kupoyit Yiyintet. Kikwiy neto kuyunyoto ye ki tisintet nyewo Apiyasar. Kunyo kuyu wule yunto ntarastinekyo, kipuryo ci nye kicecömncini kwam mukatyantanato, ntene tisintet nkit nye kyome. Ntene kwam Tauti yoto oŋnkukoci mpo pikyi ce kipontokey.’’ 27Yoto kumwoy Yesu kule, “Kicekon pesyetap Sapat sukuŋet kukalya cito, ntene kipuryo kot citany cito kupoyit Sapat. 28Kunyo Weritap cito nye Mokoryontet nye poytoy mpo Sapat.’’

will be added

X\