Mark 15

1Ntowo kuyec koret pate, koruruckey lakwar pakenke tisik cewoyec oko poyik oko konetikap ntarastinek oko piko tokol cepo kokwet nyewo oŋnkurwoc. Ntokopok kurat cekto Yesu oŋnkukwer okoy wule mite Pilato. 2Kutepe Pilato Yesu kule, “Yiku nyi kinko nyepo Yutayek?’’ Kuwec Yesu kumwoy kule, “Kemwowu nyi.’’ 3Yoto kuwosontyi tisik cewoyec Yesu kumwoy ŋalek ce caŋ. 4Kutepe yec Pilato Yesu kule, “Puryo kot wece nyi ŋolyo? Kaspa ŋalek ce caŋ ce cewosontyiŋ !’’ 5Yoto kutay Yesu yec mawec ŋolyo okoy kukite Pilato koromun. 6Kityoktoy Pilato mopusyontet akenke nye kosom piko om pesyosyek cepo sakwetap keytayet. 7Kimite pesyosyecoto citake nye cekure Parapa nye ki akenke om piko alak ce kirototin om mopusi ce kiporis oko pararet nye kikwiy. 8Yoto kukwa piko tokol kwokusom Pilato kwici cek kuyu wulo yiytoy kwak ye pesyetap sakwet. 9Kutepe Pilato cekto kule, “Omöce akwek kule otyokwok ani Kinko nyepo Yutayek?’’ 10Kinket Pilato topon kule kowosontyi tisik cewoyec Yesu om corokyinot pate. 11Ntene kowurur tisik cewoyec piko kumwoci kule kusom Pilato kutyokyi cekto Parapa. 12Kuŋololyi Pilato piko kutepe yec kule, “Kunyo omöce akwek kule ayiye ne ani cici okure akwek Kinko nyepo Yutayek?’’ 13Kupol piko kumwoci Pilato kule, “Wuyitoci murtowontet!’’ 14Kutepe Pilato cek kule, “Omne, kukwiy lelis ne nye miyat?’’ Kutosyikey piko kupol koromun kumwoy kule, “Wuyitoci murtowontet!’’ 15Omnye kimöce Pilato kule aŋerec piko, yoto kutyokyi cekto Parapa, oŋnkukoyito Yesu wokupas sikarek, oŋnkyekwer wocewuyitoci murtowontet. 16Yoto kukwer sikarek Yesu kuwo kaytap Poytoyintet, ye cekure Pretoriyom, oŋnkukur koruruc sikarek tokol kukwa koyoto. 17Kulokyi cekto Yesu siret nye mur kwarar, oŋnkuta kutwet nyepo kotok oŋnkukoci metinyi, 18oŋnkucec kusupay kumwoci kule, “Cisupoyiŋ kinko nyepo Yutayek! Ilaŋnte!’’ 19Kupire cekto Yesu korokto metit, oŋnkuŋutyi oŋnkukutuŋnkyi kuyu nye keywey. 20Nteyu kowo koncurur cekto Yesu okoy kuwany, konomune siretkey mur kwarar; oŋnkulokyi sirokyi nkit, oŋnkukwer kuwo wocewuyitoci murtowontet. 21Nteye kimite kupeti om aran, cetuye citake nye cekure Simon nye kicone koret saŋ kuconi moŋet, kunäm cekto neto kukerci koŋ kukonopat murtowontetap Yesu. Cicitenyi ku Simon nyepo koretap Kurene nye kikwanitap Alekisanta oko Rupo. 22Yoto cekwer Yesu okoy kupunto ye cekure Kolokosa nye mwowu kule “Rokyetap Metit.’’ 23Kusyem cek kule cikoci Yesu kuye nfinonyik ce kacetase sakityek alak ce mwonec ce cekure mira, ntene kutay Yesu kuye. 24Yoto kuwuyitoci cek Yesu murtowontet, oŋnkupcicin sirokyi kuporci kirotyet sukuŋet kukäs kule mosukupoyit ŋo siret oŋnkono. 25Kimite yoto sawet somok nyepo kororn ye kiwuyitocini cekto Yesu murtowontet. 26Cecil ŋalek cepo musankunyi kule, “Kinko nyepo Yutayek.’’ 27Cewuyitoci murtowonik mpo piko corik alak oyeny oko Yesu, kopurune ake yewunyi nyepo tay, koporune ake yewunyi nyepo let. 28[Yoto kwitita kupoyit manta silutekap Yiyintet ce mwowu kule, “Kicituyo neto oko piko ce yirye ntarastinek.’’] 29Kulelec metewokwa piko ce kipeti kutile aran, oŋnkucup cekto Yesu kumwoy kule, “Ye! Nyi nyo mwowu kule omuci oturpup kotap Yiyintet aŋnkatec ake om pesyosyek somok. 30Kunyo rekune pa nyi yawut murtowontet co ŋony sopkey nkit.’’ 31Kuŋalal kwicek nkit mpo tisik cewoyec oko konetikap ntarastinek koncurur kucup Yesu kumwoy kule, “Kwesope neto piko alak, ntene puryo kot komuce kot kusopkey nkit! 32Ce möce acek yawut cekäs Ŋapanet Kinko nyepo Israel kurekune Murtowontet kuco ŋony, sukuŋet ciyen acek neto.’’ Mpo piko oyeny ce kicewuyitoy oko Yesu kucupis mpecek kucup Yesu. 33Ntowo kupunto asista pet kwen, kunäm menonet koret tokol okoy kupunto asista sokol nyepo kosoleny. 34Ntowo kupunto asista sokol kupol Yesu om kutit nyewo kumwoy kule, “Eloy, Eloy, lema sapaksani?’’ Nye mwowu ŋaleca kule, “Yiyintenyu, Yiyintenyu, omne seyasta ani nyi?’’ 35Nteye kotolime piko alake ce kimite keyoŋ yoto, kumwoy kule, “Alim pa, mite kukure Eriya!’’ 36Yoto kulapat citake nye kiponto siponcit nye kerkey cankut nye kakolumnta nfinyonik ce mintililec; oŋnkurutyi tekantet oŋnkunömnci kutitap Yesu oŋnkumwoy kule, “Akany pa cekäs oŋnkuconi Eriya cokurek neto kucone murtowontet kuco ŋony!’’ 37Kunco Yesu om kutit nyewo oŋnkume. 38Yoto kukerer kupciwunekey oyeny kuceke met okoy kel siret nyo cepciye otepto nye tilil om kotap Yiyintet. 39Ntowo kukäs nyewo nyepo sikarek nye kimite keyoŋe taytap murtowontet wule kencoyto Yesu oŋnkume, kumwoy kule, “Weritap Yiyintet cici manta!’’ 40Kimite yoto koruk alake ce kimite kuköse ce kimite ye low kuminiŋ. Om cekto korucoto, kimite mpo Solome oko Mariyam nyepo Maktala oko Mariyam kametitap Yakopo nye miniŋ oko Yose. 41Korucoto kuce kipontokey Yesu ye kimite Kalilaya ce kikwici neto yisyet. Kimite yoto mpo koruk alake ce caŋ ce kikwontoykey Yesu okoy kupun Yerusalem. 42Nteye kimite kwimene koret, yoto kuco Yosep nyepo moŋetap Arimaseya, 43Cito nye kisikenet nye kiciyweye nye kipo kokwetap Yutayek. Ki cito neto nye kimite kukene pesyet nye cone poytoyisyetap Yiyintet. Pesyonoto kunye kipesyet nye kiceyiytoykey sukuŋet ye koyekune kwek pesyetap Sapat. Yoto kuwo Yosep nye kipuryo kot kumuy okoy taytap Pilato oŋnkusom portap Yesu. 44Kukite Pilato kulim kule kame Yesu. Yoto kukur neto nyewo nyepo sikarek oŋnkutepe kule kame Yesu kuloyit. 45Ntowo kulim ŋalekap nyewo nyepo sikarek, kucomnci Pilato Yosep wokusut porto. 46Kwal Yosep suket nyelel, oŋnkurek musto, oŋnkurate suket oŋnkumuci mwenet nye mite kepenet nye kicepal rwantet. Ntowo kupok, kutor rwantet nyewo kukere kurket nyepo mwenetap kepenet. 47Kimite yoto Mariyam nyepo Maktala oko Mariyam kametitap Yose. Yoto kukäs cekto topon ye kocemuci Yesu.

will be added

X\