Mark 14

1Nteyu kowo kuŋet pesyosyek oyeny kupunto pesyet nyepo sakwetap Yutayek nye cekure keytayet oko sakwet nyepo mukatyantet nyemo kutunat. Kimite yoto tisik cewoyec oko konetikap ntarastinek kucenye aret nye mokunäme Yesu om wule wuŋat oŋnkupakäc kume. 2Kumwoy cekto yoto kule, “Puryo kot kurok kwiy ŋolyontoni ye pesyetap sakwet, omnye muce kiy piko pararet.’’ 3Kimite Yesu pesyet ake kotap Simon citap mutyenkenik om Pesaniya, nteye kimite kwomisyi, kuco korket ake nye kiponto cupet nye nyitat mwaytap ketit nye cekure narat nye poŋu topon nye kyole pesan ce caŋ. Kuyat kuyeyi cupet oŋnkuroŋnkyi mwayta metitap Yesu. 4Kunyer yoto piko alake ce kimite yoto kuŋalal kwicek nkit kumwoy kule, “Omne siciwurta mwayi poŋu topon kuyunyi? 5Kopuryo kot kuroke kyalya sicenyor silinkinek ce keyitye pokolwokik lö oŋnkyikoci pesanik pononik?’’ Kunyerci cekto korkonoto koromun. 6Ntene kumwoy Yesu kule, “Ayaste! Omne sayim akwek neto? Kokwiwo ani ŋolyo nye topon nye nyolunot koromun. 7Omnye opontekey akwek oko pononik okokoy, nteye omöce kule cikalye cek omuci oyici tukuk ce toponec om pesyo ake tokol, ntene puryo kot opuri ani oko akwek okokoy. 8Kakwiy korkoni ŋalek ce muce, omnye kaŋape mwayta pormwani kutompo kot kupunto muyisyet. 9Komwowok ani akwek ŋalek cepo manta kule, om koret tokol wule mocemwaytye lokoywek ce toponec, mosicemwowu mpo ŋalek cu kokwiwo ani korkoni cisote neto.’’ 10Kunomen yoto Yuta Isikaryoti nye ki akenke om konomik taman ok oyeny, kuwo wule mite tisik cewoyec wokuŋomnto Yesu kukoci cekto. 11Kuŋerec tisik koromun yu kowo kulim ŋalek ce komwoy Yuta. Kukurtoci cek neto kule mosicekoniŋ pesanik. Yoto pakenke kucec Yuta kuceny poroyinto nye topon nye mokuŋomnte Yesu. 12Nteye ki pesyet nyepo tayta nyepo sakwet nyo kyome mukatyantet nye mokutunat, pesyet nye ceyenye kecirekap omikap Keytayet, kutepe konomik Yesu kule, “Ono wule möce nyi kule cipe acek woceyiytowuŋ wule meyomisye omik cepo pesyetap keytayet?’’ 13Yoto kuyokto Yesu konomik oyeny kumwoci kule “Ape okoy moŋet orit, mosukutuyenok akwek citake nye toronu teretap peko, arup cicoto, 14okoy koto nye kewut, oŋnkomwoci citap koto kule, ‘Komwowuŋ nyi konetintet kule, ono kotap toyek nye moyomisye ani oko konomikyu omikap pesyetap Keytayet?’ 15Mosukuporwok cicoto koto nyewo nye satat topon nye mite koto parak, wayiyte kiy ake tokol om wuloto.’’ 16Kunomen konomik kupa okoy kupunto moŋet, wokunyor kiy ake tokol kumite kuyu wulo kakamwayta Yesu. Kuyiyta cekto omikap pesyetap Keytayet. 17Ntowo kupunto kosoleny, kuco Yesu oko konomikyi taman ok oyeny. 18Nteye kimite cek kukepur kwomisyi, kumwoy Yesu kule, “Komwowok ani akwek ŋalek cepo manta kule, mosukuŋomnto ani akenke om akwek nye mite yuteyu kwomisyi oko ani.’’ 19Yoto kocoŋoŋonis konomik oŋnkucec ci ake tokol om cekto kutepe Yesu kule, “Ani nyoto?’’ 20Kuwekyi Yesu kumwoci kule, “Akenke om akwek taman ok oyeny nye noknoktoy mukatyantet nyenyi sanit akenke oko ani. 21Omnye mosukume Weritap cito kuyu wulo mwoytoy silutekap Yiyintet kule mosukume, ntene mite kwapi koromun cito nyo mosukuŋomnto neto! Kitopon nto kipuryo kot ceyi cicoto mpo kisic!’’ 22Nteye kimite kwomisyi, kunäm Yesu mukatyantet, oŋnkusomnci kukasta Yiyintet, oŋnkupetec oŋnkukoci konomikyi, oŋnkumwoy kule, “Onäm oyam, pormwani nyitenyi.’’ 23Kunäm yec cikompet oŋnkusomnci kukasta Yiyintet, oŋnkukoci kuyesyo cek tokol. 24Kumwoci Yesu cekto kule, “Korotikwani cutecu cepo kirotyetap Yiyintet nyelel ce citotocini piko ce caŋ. 25Komwowok ani akwek ŋalek cepo manta kule komo toye ani yec mpo tukusic pekap omikap sapipunek okoy pesyet nye mosaye ce lelac om poytoyisyetap Yiyintet.’’ 26Ntowo kupok, kutum tumnto oŋnkuŋetyo kupa okoy kupunto tulwetap sapipunek. 27Yoto kumwoci Yesu cek kule, “Mosomwey arway akwek tokol oŋnkopakakta ani, omnye mwowu silutekap Yiyintet kule, ‘Mosukupar Yiyintet mesewontet kume, yoto kuseret kecirek.’ 28Ntene om letut ye kaciŋeta otutune met, mosontowok awo anyosye Kalilaya.’’ 29Kumwoy Petero kule, “Nka kot kamwey kurway cut alake tokol, puryo kot oyostiŋ ani nyi mpo kisic.’’ 30Kumwoci Yesu Petero kule, “Oŋnkisot ŋolyontoni! Kutompo kot koncur kurkonkit aret oyeny om kwomowutap pesyoni, mesetuckey nyi aret somok mwowu kule puryo oŋnketo ani.’’ 31Kuwec Petero yec om swamet kumwoy kule, “Puryo kot omuci ani kot atuckey omwowu kule monketiŋ nyi, nka kot koyek met cepoku mpo tukway!’’ Kumwoy mpo konomik cut tokol kuyunyoto. 32Kupa cek okoy kupunto mparet nye cekure kesesemane. Yoto kumwoci Yesu konomikyi kule, “Opur yuteyu ye omite ani osome.’’ 33Kukwer neto kupetakey Petero oko Yakopo oko Yowana. Kupotpoten Yesu kumuy oŋnkusot koromun om yoto, 34oŋnkumwoci neto cekto kule, “Oponte nerekwek ce caŋ koromun om mukuleymwani kot karik kupakäca, opur yuteyu oŋnkosom.’’ 35Kuwo neto kunata tay kisic, oŋnkuyim kukutuny oŋnkusom kule nto kemukoktos kukeytena sawet nyepo toŋoŋutek. 36Kusom kumwoy kule, “Papa! Papanyu! Mukoktos kiy ake tokol om wule mite nyi. Nemuneno ani toŋoŋutecu, puryo kot kuyu wulo omoktoy ani, ntene kwiyokis kuyu wule moktoy nyi.’’ 37Yoto kuweckey kuco okoy cokunyor konomik co kosomok kumite koruy. Kumwoci Yesu Petero kule, “Simon, keru nyi? Puryo kot muc kot kösu wany mpo sawet akenke?’’ 38Kumwoci neto cek kule, “Okösu sukuŋet mente kot osuci syemutok. Cöme mukuleyto, ntene puren porto.’’ 39Kuwo Yesu yec wokusom kumwoy ŋalek ce kerkey oko co kumwowu yo kusome om panta nyepo tay. 40Ntowo kuweckey kuco, cokunyor cekto kumite koruy yec, omnye kikinäm rwonto nyewo konyekwa. Yoto kupotyi cek ŋolyontet nye mokuwec kumwoci Yesu. 41Kuco Yesu yec aret nyepo somok oŋnkucokomwoci cek kule, “Tomite akwek oruytosi omunyi? Kayem! Kapunto sawet! Kacenäm yawut Weritap cito oŋnkyikoyito kunäm piko ce ponto miyotyonik. 42Oŋetye cipe! Akäs karik cito nye ŋomnto ani!’’ 43Nteye kimite Yesu tokuŋolole, kupun Yuta akenke om konomik taman ok oyeny kupontonukey oko luket nyepo piko ce caŋ ce kiponto ponkok oko runkunek, kiyoku picoto tisik cewoyec oko konetikap ntarastinek oko poyik. 44Kikimwoci ŋomntoyintet Yuta picoto pelutyet, kumwoci kule, “Cito nyo katoroc aŋatut ani kunye cito nyoto, anäm nyoto okwer oŋnkorip topon koromun.’’ 45Ntowo kupun Yuta kuwo okoy ye kimite Yesu oŋnkumwoy kusupay kule, “Konetintet.’’ Oŋnkutoroc kuŋatut. 46Yoto kunäm cekto Yesu oŋnkurat. 47Ntene kocut cito akenke nye kimite keyoŋe yoto rotwetap cok, oŋnkuyep kulot yititap mutworintetap tisintet nyewo. 48Kutepe Yesu cek kule, “Kakwa kule kwocenama kuyu nye omöce kule cenäm corin? Omnye kakwante ponkok oko runkunek. 49Nteyu kucepontekey oko akwek kuwany pesyosyek ce caŋ om kotap Yiyintet onetisyi ani, ntene puryo kot onäma ani akwek yoto. Ntene misyini kwiyokis ŋalecu sukuŋet kwitita ŋalak co kicemwoy om silutekap Yiyintet.’’ 50Yoto kumwey konomik tokol kupakakta Yesu. 51Yoto kurup oyiperyontet ake Yesu let, nye kikilac suket pate. Kusyem piko alak kule cenäm oyiperyontonoto 52ntene kuciwit kumwey kupokokyi cek suket oŋnkulopotyikey puc pate nye puryo sira. 53Kukwer cek Yesu okoy kupunto kaytap Tisintet nyewo, wule kimite kukokorurukyikey tisik cewoyec tokol oko poyik oko konetikap ntarastinek. 54Yoto kurup Petero cekto letut kuloyityi kisic okoy kupunto saŋntap kaytap Tisintet nyewo. Kopur Petero ŋony kuyu mata wanak oko sikarek ce ripsi. 55Kusyem tisik cewoyec oko piko cepo kokwet tokol kule ceceny piko muncururwanik ce komwoy lelisto nye nöme Yesu sukuŋet kupakäc kume, ntene kipuryo kot kunyor ŋolyo nyepo lelis. 56Kumwoy piko muncururwanik ce caŋ ŋalek cepo mwiynan pate kule kikwiy Yesu. Ntene kutoytocin ŋalekwa nye puryo kot kunömekey. 57Kuyoŋ alake oŋnkuwosontyi Yesu kumwoy ŋalek cepo mwiynan pate, kumwoy picoto kule, 58“Kucelim acek nkit kumwowu cici kule, ‘Mosoturpup ani kotap Yiyintet nyi kitece piko yewuniyek, nto om letutap pesyosyek somok, atec ani ake nye puryo kot kutec piko yewuniyek!’ ’’ 59Kutoytocin mpo ŋalek ce kimwoy picoto nye puryo kot kunömekey. 60Yoto kuŋet Tisintet nyewo kuyoŋe taytap kokwet, oŋkutepe Yesu kule, “Puryo kot ŋololi nyi wec ŋalekyu cewosontyiŋ nyi picu?’’ 61Ntene kusis Yesu nye mnawec ŋolyo. Kutepe yec Tisintet nyewo Yesu kule, “Yiku nyi Ŋapanet nye Weritap Yiyintet Nyetilil nye cikostoy?’’ 62Kumwoy Yesu kule, “Ani nyoto! Kunyo mosakäs akwek tokol Weritap cito kukokopure komostap yewut nyepo tay nyepo Yiyintet nyepo kamukeywek tokol, oŋnkucontoykey polik cepo torot.’’ 63Yoto kupac Tisintet nyewo sirokyi, oŋnkumwoy kule, “Tocemocene acek yec piko muncururwanik alak! 64Kalim akwek ŋalekyi nkit ce miyotec, omute akwek musankut kulene?’’ Yoto kumüt piko tokol musankut kulot Yesu kule misyini cepakäc kume. 65Kucec piko alake kuŋutyi Yesu ŋulek, oŋnkuyen konyekyi, oŋnkutuluc, oŋnkumwoci kule, “Ŋor ŋo nye kopiriŋ nyi!’’ Kunäm sikarek Yesu oŋnkusyec. 66Nteye kitokumite Petero kukepur ŋony om saŋntap kayta, kuco cepto mutworintet akenke nyepo Tisintet nyewo. 67Nteye kotoköse cepoto Petero kumite kuyuye mata, kurotot komil topon, oŋnkumwoy kule, “Kepontekey mpenyi Yesu nyepo Nasaret?’’ 68Ntene kutuckey Petero kutoyis kumwoy kule, “Puryo monket, oŋnkupuryo mpo kot oŋnket ani ŋalek ce mwowu nyi.’’ Kumiŋnto Petero kuwo aret nyepo kayta saŋ. Yoto koncur kurkonkit. 69Kukosyi yec cepkey Petero kumite wuloto, kumwoci cepoto piko ce kimite keyoŋ yoto kule, “Oŋyi cito akenke nye kopontokey picut.’’ 70Kutuckey yec Petero kutoyis. Nto om letut kuminiŋ, kumwoci piko ce kimite keyoŋ yoto Petero kule, “Yiku nyi manta akenke om picut, omnye yiku citap Kalilaya.’’ 71Kutuckey Petero yec kuwälkey kucupkey kumwoy kule, “Kupara asis, monket ani cici oŋolole akwek!’’ 72Yoto pakenke koncur kurkonkit nyepo oyeny. Yoto kusot Petero ŋalek co komwocini Yesu neto kule, “Kutompo kot koncur kurkonkit aret oyeny mesetuckey toyisye aret somok kule monketo ani.’’ Yoto kucec Petero kurir.

will be added

X\