Mark 13

1Nteye kimite Yesu kunomene kotap Yiyintet, kumwoy akenke om konomikyi kule, “Konetintet, käs pa, rwontok cewoyec oko tekset nyepo korik cewoyec.’’ 2Kuwekyi Yesu kumwoci kule, “Kekäs nyi koricu woyec cu kicetec kuyunyi, puryo rwantet mpo akenke nye ŋetune ye mite yawut, mosiciturpup tokol oŋnkyewirci ŋony.’’ 3Nteye kimite Yesu kukepur tulwetap mokoyek kutokyikey kotap Yiyintet. Yoto kukwa ye kimite neto mpo Petero oko Yowana oko Antereya oŋnkumwoci möt kule, 4“Mwowec acek, mosukwiyokis pesyo ne ŋalecutecu?’’ 5Kucec Yesu kunet cekto kumwoci kule, “Akäste monte kot kuperperak kumasak citake tokol. 6Mosukukwa piko ce caŋ om kaynemwani oŋnkwokumwoy kule, ‘Ani kunye nyoto!’ Oŋnkuperper piko ce caŋ. 7Monte cemuye ye kolim polotetap poryet nye lekit, nto poryet nye mite wule low, monte cemuye, mosukwiyokis tukucoto, ntene kupuryo kot kuporu kule kopunto pesyetap letut. 8Omnye mosukusetyi koret ake kuporye koret ake, kusetyi poytoyisyet ake kuporye poytoyisyet ake, mosukoriŋriŋ koret wulyo tokol oŋnkunäm rupet koret tokol. Tukucutecu kuce poru kule kacec mwoninto nyepo toŋoŋutek. 9“Ntene misyinok oripkey akwek nkit. Omnye mosukunämak piko oŋnkukwerok ape koti, mosicepasenak korikapkok, mosoyoŋe taytap poytoyik cewoyec oko taytap kinkonik omnye kacäm akwek kaynemwani sukuŋet omwoci akwek cekto lokoywek ce toponec. 10Ntene misyini ce nyosye ce mwoci lokoywek ce toponec piko cepo koret tokol. 11Nteye kacenämak akwek oŋnkyekwerok ape koti, monte ce nyosye cemuye kule mosicemwowu ne, ye kopunto pesyonoto, aŋalal omwowu pate ŋalek ce kacekonok kule omwowu om yoto. Omnye puryo kot kucikwakwek ŋalek ce moŋalal, mosukukwane wule mite Muyet Nyetilil. 12Mosukukoyito piko nkit mpo yeyamwa cenäm oŋnkyepakäc, mosukwiy mpo kwan lekokwa kuyunyoto. Mosukuweckey lekok kunäm mpo kwan oŋnkukoyito cepakäc. 13Mosukusenkerak akwek piko tokol omnye kocäma ani. Ntene mosicisop cesor ci ake tokol nye kotitir okoy kupunto pesyet nyepo letut.’’ 14“Ntene ye kokäs akwek, ‘Kiy nye miyat nye cetoye,’ kumite keyoŋe otepto nye puryo kot kuroke kuyoŋe. (Moce kunket cito nyo sumone kule mwowu ne ŋalecu!) Misyini kumwey yoto piko ce mite Yuteya kupa lokomosyek. 15Oŋnkupuryo kot kumisyini cito nye mite konyi kisyek kurek kuwo koto orit wokonum kiy ake tokol nye möce kule owete, 16Puryo kot kuroke cito nye mite mparen kuwo konyi kule wonumu siret. 17Mite kwapi koromun om pesyosyecoto koruk ce koyotin oko koruk ce rerisyi lekok! 18Osom Yiyintet sukuŋet mente kwiyokis ŋalecutecu om pesyosyek cepo peŋat ye katit koret. 19Omnye mosukupëlis toŋoŋutek cepo pesyosyecoto kupël toŋoŋutek cepo pesyosyek alak tokol ce kikwiyokis om koret kuceke ye kitany Yiyintet koret okoy kupunto pesyosyecoto. Ntene komokwiyoktos yec taŋanyanta ake nye kerkey nyoto. 20Ntomo nye kikoŋerin Mokoryontet Yiyintet kuŋerinitu pesyosyecoto, nto puryo ci mpo akenke nye ŋetu nye cimuce cisop. Ntene kikoŋerin Mokoryontet pesyosyecoto om toponiyetap pikyi co kweyanik. 21“Kunyo, ye komwowok akwek citake om pesyosyecoto kule, ‘Akäs oŋyi Kristo nye Ŋapanet!’ nto ‘Oŋyin mite yun!’ Monte ciyen ŋalekyi. 22Omnye mosukutok piko ce mwiynec ce perperisyi kule ciku Ŋapanet oko piko cemwowu kule ciku workoyik. Mosukwiy picoto pelutok cepo kakitat kule siceŋet cemas ciwurte piko ce kweyanikap Yiyintet ye kemukakay. 23Akäste akwek! Omnye komwowok ani akwek ŋalek tokol kutompo kot kupunto pesyonoto.’’ 24“Om letutap pesyosyekap toŋoŋutek; mosukolumakay kutuyit asista, 25oŋnkutay arawet me luwu. Mosukosuwune kokelik torot. Mosukotimtimkey swamet nyepo torot. 26“Yoto ye mosokäs Weritap cito kucone polyet kuponto swamet nyewo oko woyinto. 27Mosukuyokto neto malaykanik kupa taponutek amwan cepo koret, oŋnkoruruc pikap Yiyintet ce kweyanik kukwane wule kiŋete koret tokol kuceke tapan okoy tapan.’’ 28“Roke anetekey akäse ketit mokoywet. Ye kokäs akwek kwak kule kokuŋot sokek ce ŋorŋor; oŋnket yoto kule karik pesyosyekap peŋatut. 29Kuyunyoto, ye kokäs akwek kwiyoktos tukuk ceyucutecu, kuye mosonket kule karik kucec pesyosyekap Weritap cito. 30Komwowok ani akwek ŋalek cepo manta kule! Mosukwitita ŋalecutecu tokol kutompo kot kupok piko tokol cepo pini soptos yawut. 31Poku wulin po torot, oŋnkupok wuli po ŋony, ntene puryo kot kupoku ŋalekwani mpo kisic.’’ 32“Puryo ci mpo akenke nye nkete pesyonoto nto sawet, nka mpo Malaykanik om torot, nka mpo Werit. Papa nkit pate nye nkete. 33Akäste, oripkey okoŋisye, omnye puryo kot oŋnketi akwek kule pesyo ne ye puntoy pesyonoto. 34Mosukukerkeyit oko ci nye konomen kuwo toyek oŋnkupakakta mutworikyi kumite kwiyisyi, oŋnkukoci ci ake tokol yisyenyi nye yiye, oŋnkumwoci cito nye ripe kurket kukös kuripso topon. 35Kunyo oripsye, omnye puryo kot oŋnketi akwek pesyet nye cone citap koto. Muce pesyet ake kupun kosoleny, nto ye komoy kwen, nto ye kerir koret, nto ye komwok asista. 36Nteye kotepe kot kuco lakwar, kupuryo kot kuroke cokunyorwok akwek omite koruye rwonto! 37Kunyo ŋalek ce omwowok ani akwek kuce omwocini mpo piko alak tokol kule, okösu oripkey.’’

will be added

X\