Mark 12

1Yoto kuŋololyi Yesu cekto om tyonkocok kumwoy kule, “Kimite citake nye kiwu ketik ce cekure Sapipunek oŋnkuker tuyita komut, oŋnkupal kutec mwenet nye cirurunye matuntanikap Sapipunek, oŋnkutec kitarit nye ceripse oŋnkukoci kopotik kukotesan, oŋnkunomen kuwo toyek. 2Ntowo kupunto pesyosyek ce rurye omikap sapipunek, kuyok cicoto mutworintenyi kuco wule mite kopotik co kikotesonisyi, kule sukuŋet co kukoci mutworintonoto omik alak cepo sapipunek ce kiciyoyekyin. 3Kunäm kopoticoto mutworintonoto oŋnkupir oŋnkukwet kuweto yewuniyek pate. 4Kuyok cicoto mutworintet ake yec, kupir kopoticoto yec mutworintet nyoto metit kukoten, oŋnkunyalil kutaŋany. 5Kuyokto cicoto mutworintet ake yec, kupakäc kopoticoto mutworintet nyoto kume, oŋnkutaŋany mpo alak ce caŋ, kupir alak, oŋnkupakäc alak kupok. 6Cito nye kikiŋet kuyokto cicoto ku weritap cicoto akenke pate cämanet. Nto om letut kuyokto cicoto werinyi nkit kuwo wule mite kopotik, kumwoy kule, ‘Mosukuywey cek werimwani.’ 7Ntene kurwoc kopotik kwicek nkit kumwoy kule, ‘Nyitenyi kunye kotiyintet, akwa cenäm cepakäc kume, sukuŋet kwek nyinyacek kontisyet!’ 8Yoto kunäm cekto werit oŋnkupakäc kume, oŋnkocut kucone mparetap sapipunek.’’ 9Kutep Yesu kumwoy kule, “Mosukwiy kulene citap mparetap sapipunek? Mosukuco neto nkit, oŋnkupakäc kupok kopoticoto oŋnkukoci kopotik alak kukotesan mparetap sapipunek.’’ 10Porukey kule tompo kot asuman akwek silutyoni po Yiyintet nyi mwowu kule: “Rwantet nyo kitoye tekik kule puryo kot kuponto latik, kunye kiweckey kwek rwantet nye pële tokol nye tiye koto tapan. 11Mokoryontet nye kikwiye, kunyo po kakitat koromun wule yunto!’’ 12Yoto kusyem kantoyikap Farasayek kule cenäm Yesu, omnye kinket kule kaŋalale neto tyonkocet nye nöme cekto, ntene kuywey luket nyepo piko ce caŋ. Yoto kunomen cekto kupecikey kupapakta neto. 13Ciyok Farasayek alak oko piko cepo luketap Erote alak kukwa wule mite Yesu kule sukuŋet kwokulot cek neto om ŋalek ce mosukumwoy om tintenotet. 14Kukwa picoto oŋnkwokutepe Yesu kule, “Konetintet, cinket kule yiku nyi ci nyepo manta, oŋnkupuryo kot soti ŋalek ce sote piko, omnye puryo kot soti wule yunto piko, ntene neti pate ŋalek cepo manta cepo Yiyintet, kunyo mwowec acek, cömwec ra ntarastinekyo cekweci mosoret Kinko Nyewo nto puryo? Roko cekweci nto puryo kot kuroke cekweci?’’ 15Ntene kunket Yesu tekutek ce kiponto cek, kuwekyi kumwoci kule, “Omne sasyem akwek kule ceteca ani? Osutwo pa silinkit akäs?’’ 16Yoto kusutyi cek neto silinkit akenke, kutepe Yesu cek kule, “Po ŋo metit nyi oko kaynet nyi silot?’’ Kuwec kumwoy kule, “Po Kinko. Nyewo.’’ 17Kumwoci Yesu cekto kule, “Kunyo okocini kinko tukuk cepo kinko, okocini Yiyintet tuku cepo Yiyintet.’’ Kukite cekto yoto koromun ŋalekyi. 18Kukwa Satusayek alake wule mite Yesu. (Coto ku piko co mwowu kule puryo kot komuce kot kotutune met piko ce kipok.) Kutepe cekto Yesu kule, 19“Konetintet, kisilwec acek Moses ntarastini kule, ‘Ye kame citake oŋnkupakakta korket nye puryo kot kuyici lekok, kuroke konti komüt mutakwam korkonoto musuk, sukuŋet kuyici mutakwam nyo kime lekok.’ 20Kunyo kimite piko tisapu ce kitupco, kukesyo nyewo komüt korket, ntene kume nye kipuryo kot kuyi lekoy. 21Komüt mutakwam nyepo oyeny konti korkonoto musuk, kume mpo nyoto nye kipuryo kot kupakakta lekoy, kuyunyoto mpo nyepo somok. 22Komüt picoto ku tisap korkonoto oŋnkupok picoto tokol nye kipuryo kot kuyi lekwa mpo akenke. Nto om letut kume mpene korkonoto. 23Kunyo om pesyet nyo ceŋetos citutune met piko tokol, poyitu ŋo korkonoto? Omnye kikomüt cekto picoto tokol ku tisap?’’ 24Kumwoci Yesu cekto kule, “Yunyoto ye somosokisye akwek, ntene oŋnketi akwek omne? Omnye puryo kot oŋnketi silutekap Yiyintet oŋnkupuryo mpo kot oŋnket swametap Yiyintet. 25Omnye piko co mokotutune met, kuce puryo kot komütisyi moronik nto cimüt mpo koruk, omnye mosukukerkeyitu cekto oko Malaykanik ce mite torot. 26Kunyo nto ŋalek cepo manta ce nöme kotutunetap met kucu: tompo kot asuman akwek om kitaputap Moses ŋalek cepo rukututwet nyo kiloye? Omnye kicesil ŋalecato kule kimwoci Yiyintet Moses kule, ‘Oyiku ani yiyintetap Apram, Yiyintetap Isaka, yiyintetap Yakopo.’ 27Poru ŋaleca kule, Yiyintet kunye Yiyintet nyepo piko ce soptos ntene puryo ku yiyintetap piko ce kipok. Oyiku akwek mosotin koromun.’’ 28Kimite yoto konetintetap ntarastinek akenke nye kilime ŋalecato. Yoto kukäs neto kule kowekyi Yesu Satusayek ŋalek topon, kuco ye mite Yesu oŋnkutepe kule, “Ntarastit oŋnkono nyepo tayta nye pële tokol.’’ 29Kuwekyi Yesu kumwoci kule, “Ntarastit nyepo tayta nye pële tokol kunyi mwowu kule, ‘Alim pa pikap Israel! Mokoryontet yiyintenyo kunye Mokoryontet akenke nkit pate. 30Misyini cäm Mokoryontet Yiyinteŋunŋ om mukuleyŋuŋ tokol, oko soponŋuŋ tokol, oko kasoteywekuk tokol, oko swameŋuŋ tokol.’ 31Nto nyepo oyeny nye pëlisyi kunyi kule, ‘Misyini cäm latyeŋuŋ kuyu wulo cömntoykey nyi nkit.’ Puryo ntarastinek alak cewoyec kupël cutecu oyeny.’’ 32Kumwoci konetintetap ntarastinek Yesu kule, “Konetintet, kemwowu ŋalek cepo manta kule, ‘Mokoryontet kunye Yiyintet akenke nkit pate, puryo kot kumite yiyik alak ntene neto nkit pate. 33Kunyo misyini kucäm cito Yiyintet om mukuleynyi tokol, oko kasoteywekyi tokol, oko swamenyi tokol, oŋnkucäm latyenyi kuyu wulo cömntoykey neto nkit.’ Topon koromun kupëlis ye kocerip ntarastinecutecu oyeny kupël ye kocesut tyoŋik oŋnkyepele meset nyetilil kwek korosek cepo Yiyintet.’’ 34Yoto kukäs Yesu kule kawec cicoto ŋalek cepo ŋomnon, kumwoci kule, “Puryo kot mitowune nyi wule low om wule mite poytoyisyetap Yiyintet.’’ Kipuryo yoto ci nye kitokomuc kot kusyem kule atepe Yesu ŋolyo mpo akenke. 35Nteye kimite Yesu kunetisyi om kotap Yiyintet, yoto kutep kumwoy kule, “Muce kulene kumwoy konetikap ntarastinek kule, mosukwek Kristo keseniyantetap Tauti? 36Omnye kintoci Muyet Nyetilil Tauti kumwoy kule ‘Kimwoci Mokoryontet Mokoryontenyu kule, Pure yu po yewumwani nyepo tay, okoy okoci ani punikuk kwek ŋacerok cepo kerenkokuk!’ 37Kunyo nteye kure Tauti nkit kule, ‘Mokoryontet.’ Komuce kulene yec Kristo kwek keseniyantetap Tauti?’’ Kulimnta piko ce caŋ om yoto ŋalekyi om ŋerekwek. 38Nteye kimite Yesu kunete cek, yoto kumwoy kule, “Oripkey koromun wule Konetikap ntarastinek, ce möce kule cepesetoti kukelac sirok ce koyec, oŋnkucäm kule ciyweyec cisupayec topon om wulo po moteponik. 39Ce kweye ŋacerok co kweyotin om korikapkok oko oteputek cepo tay om sokwonutek, 40ce nyopone korikap musukik, oŋnkusilkey kusome kwiyisye ŋalek ce caŋ, cekto ce mosukunyor toŋoŋutek ce caŋ ce pëlisyi.’’ 41Nteye kimite Yesu kukepur ye kilekite sontukut nye cekonore pesanikap kotap Yiyintet, kukäs neto piko ce kikocini pesanik sontukut orit. Kukoci piko ce mokoren pesanik ce caŋ. 42Ntene kuco korko nye panan nye musuk oŋnkukoci kafunek oyeny. 43Yoto kukur Yesu konomikyi kukwa yeto oŋnkumwoci kule, “Omwowok ani akwek ŋalek cepo manta kule, kekoci panani musuk kokotutek ce caŋ kusir ce kekoci piko alake tokol. 44Omnye kakon piko alake kokotutekwa ce koŋetune ce caŋ cepo mokoryontimwa. Ntene om wule mite korkoni panan kuyu wule yunto, kokukoci neto kiy ake tokol nye koponto, coto kuce tokol ce kuponto ce kwenekey om sopon nyi.’’

will be added

X\