Mark 11

1Nteyu kowo kurik cek kupun Yerusalem om ye lekite moŋetap Pesapake oko moŋetap Pesaniya om komosta nyepo tulwetap ketik ce cekure Seituninek. Yoto kuyokto Yesu konomikyi oyeny. 2Kumwoci kule, “Ape okoy opunte kayta nyin mite taymwoŋ. Nteye kopunte kayata orit, mosonyoru moyitap sikiryet nyeratat nye tompo kot kulany kuwete ci mpo akenke, atyac oŋnkokweru kuco yu. 3Nteye katepenak citake kule omne satyac akwek moyitap sikiryet? Omwoci kule möce mokoryontet, kunyo mosukukwer kuket lakwar okoy yu!’’ 4Kunomen cek kupa okoy wokunyor moyitap sikiryet nye kocerotyi kurkat om yepo aret nyepo kayta. 5Nteye kimite cek kutyoce, kutepe piko ce kimite keyoŋ yoto kule, “Omne sayiy kuyunyi atyac moyitap sikiryet?’’ 6Kuwekyi konomik kumwoci picoto ŋalek co komwowu Yesu. Yoto kwasta picoto konomik kukwer moyitap sikiryet. 7Kukwer cek moyitap sikiryet okoy kupun ye kimite Yesu, oŋnkuyitoci sirokwa pataytap moyitap sikiryet oŋnkulany kukonopci Yesu kopure parak. 8Kuyito piko ce caŋ sirokwa aret nye wete Yesu, kuput piko alake ketik ce ponto sokek oŋnkoyito aran. 9Yoto kucec piko ce kimite let oko ce kimite tay kupol kutum kule: “Akaste Yiyintet! Kukoci Yiyintet kupeyok kinko nyi coni om kaynetap Mokoryontet! 10Kukoci Yiyintet kupeyok poytoyisyet nyi coni nyepo kukonyo Tauti! Cikaste Yiyintet!’’ 11Yoto kupunto Yesu Yerusalem, oŋnkuwo okoy kotap Yiyintet orit, nteyu kowo kukäs tukuk tokol ce kimite orit okoy kuwany, kunomen oko konomikyi taman ok oyeny okoy kupunto Pesaniya, omnye kikwimen koret. 12Ntowo kuyekune ye kimite cekto kukwone Pesaniya, kwam Yesu rupet, yoto kukäs neto mokoywet nye ponto sokek nye kimite ye low. 13Kuwo kule wakäs nto manyorte mokoyek ketoto. Ntowo kupunto yeto, wokunyor kuponto sokek pate, omnye kipuryo kot ku pesyosyek coto ce rurye mokoyek. 14Yoto kumwoci Yesu mokoywet kule, “Mente kot tokwameniŋ nyi ci yec mokoyek kenyis.’’ Kulim konomik ŋalek ce kimwoy neto. 15Ntowo kupun cek Yerusalem, kowut kotap Yiyintet orit, oŋnkucec kukwetune orit piko ce kyolisyi oko ce kyolyoyisyi, oŋnkumil mesanikap piko co wöle pesanik oko ŋecerokap piko ce kyolyoy swororok, 16oŋnkuyete piko tokol manamat kusut kiy kuweto saŋ. 17Kunet Yesu piko yoto kumwoci kule, “Kicesil silutekap Yiyintet kule kimwoy Yiyintet kule ‘Mosukwek komwani koto nye some pikap koret tokol,’ kunyi kwawec akwek kwek kepenet nye wuŋekey corik?’’ 18Yoto kulim tisik cewoyec oko konetikap ntarastinek ŋalecato, kucec cek kuceny aret nye mokupakäce Yesu. Ntene kunyokoritu kuywey neto omnye kikite piko ce caŋ konetisyenyi. 19Ntowo kwimen koret, kunomen Yesu oko konomikyi kupete moŋet. 20Ntowo kuyekune kororn ye kimite cekto kupeti om aran kukäs mokoywetwe nye kuyam kuceke met okoy tikityek. 21Yoto kusot Petero kito nye kukwiyakay, kumwoci neto Yesu kule, “Konetintet, käs pa kuyam mokoywetwe kwecupe nyi!’’ 22Kuwekyi Yesu kumwoci kule, “Komwowok ani akwek ŋalek cepo manta kule, ye koyen okenekey Yiyintet, 23omuci omwoci tulwoni kule, ‘Ŋayekisye oŋnkiwo wewircikey ruretyet orit.’ Oŋnkupuryo kot oponte mukuleywek oyeny, ntene oyeni kule mokwiyokis ŋalek ce kemwowu, kwiyiyoktos kupoyit manta ŋalecato kemwowu nyi. 24Kunyo omwowok ani akwek kule, ye kosom kule cekonok kitake kumöce kule oyeni kule kacenyoru, mosicekonok kiy ake tokol. 25Nteye koŋetye osom, roke okalye ci ake tokol ŋolyo ye kwopontekey, sukuŋet kukalyak akwek Papamwoŋ nye mite torot miyotyonikwok. 26[Ntene ye puryo kot omuci akwek kot akalye piko alak; kupuryo komuce mpo kot kukalyak Papamwoŋ nye mite torot miyotyonikwok.]’’ 27Yoto kukwa cekto okoy kupun Yerusalem. Nteye kimite Yesu kuwesetoti om kotap Yiyintet orit, yoto kukwa tisik cewoyec oko konetikap ntarastinek oko poyik ye kimite neto, 28oŋnkutepe kumwoci kule, “Poŋo kamukeywek cu yiye nyi tukucu? Ŋo nyi kikoniŋ kamukeywek iyiy tukucu?’’ 29Kuwekyi Yesu kumwoci cek kule, “Mosatepenak ani akwek teputyet akenke pate, nteye kowekwo, mpo ani mosowekwok wule onyortoy kamukeywek ce oyiye tukucu. 30Kicone potisonisyetap Yowana torot, nto kicone wule mite piko? Owekwo ani pa akwek?’’ 31Yoto kurwoc cekto kwicek nkit kumwoy kule, “Ye kocemwowu kule, ‘Kicone torot,’ mosukuwekwec neto kule, ‘Omne satay akwek moyen ŋalekyi?’ 32Nteye kucemwowu kule, ‘Kicone wule mite piko.’ ’’ (Kuywey cek piko, omnye kicöme ci ake tokol kule kiworkoyo Yowana manta.) 33Kuwekyi cekto Yesu kumwoci kule, “Puryo kot cinket acek.’’ Kumwoci Yesu cek kule, “Mpo ani puryo kot omuci kot omwowok akwek wule onyortoy kamukeywek cu oyiye tukucu.’’

will be added

X\