Mark 10

1Yoto kunomene Yesu wuloto kuwo okoy koretap Yuteya oŋnkway oyinetap Yortan. Korurukyikey yec piko ce caŋ wule mite neto. Kunet neto cekto kuyu wule yunto kopurnyi. 2Kukwa Farasayek ye mite Yesu oŋnkulot kutepe kule, “Mwowec acek, cömwec ra ntarastinekyo kukwet cito korkenyi?’’ 3Kuwekyi Yesu kutepe cekto kule, “Kikonok akwek Moses ntarastit oŋnkono?’’ 4Kuwec cek kumwoy kule, “Kicäm Moses kule muce kusil cito parwet nye kakwete korket.’’ 5Kumwoci Yesu cek kule, “Kisilwok Moses akwek ntarastini omnye wuyec mukuleywekwok ye mocinetak. 6Ntene kuceke ye kicece citany koret, kicemwoy kule, ‘Kitany Yiyintet moron oko korko. 7Kunyo om ŋolyontoni kuye sukuŋet kupakakta cito kwan oko kamet oŋnkuyomokey oko korkenyi, 8kwek picoto oyenku akenke nye komo ku pic oyeny yec, ntene kokwek ci akenke.’ 9Kunyo puryo kot kumisyini kot kupciy cito piko ce kokuyomo Yiyintet.’’ 10Nteye kimite cekto koto orit, kutepe konomik Yesu ŋalek ce nöme ŋolyontoni. 11Kumwoci Yesu cek kule, “Ci ake tokol nye kakwet korkenyi oŋnkömüt ake, kakwiy cito nyoto sakwayanat om wule mite korkenyi. 12Nto korko nye katay santenyi oŋnkuwo wokomüt citake, kakwiy korkonoto sakwayanat.’’ 13Kukwer piko lekok kukwa wule mite Yesu kule sukuŋet kunäm neto lekocoto ntene kupolyi konomik kukerekta picoto. 14Nteye kotoköse Yesu kunyer oŋnkumwoci konomikyi kule, “Ayaste lekok kukwa wule omite ani! Monte ceyete, omnye po poytoyisyetap Yiyintet cekto ceyucutecu. 15Komwowok ani akwek ŋalek cepo manta kule, ci ake tokol nye puryo kot kunome poytoyisyetap Yiyintet kuyu lekwa, kunye puryo kot komuce cito nyoto kot kowut mpo kisic.’’ 16Yoto kunäm Yesu lekocoto kopure kupesokyi oŋnkukemer yewuniyekyi metewokap lekocoto kusomnci kupeyok. 17Nteye kimite Yesu kunomene poninekyi, kulapat citake kuwo tay nyi oŋnkukutuŋnkyi kutepe kule, “Konetintet nye topon, mosayiy ne ani ye sonyoru soponto nye mopoku?’’ 18Kutepe Yesu cicoto kule, “Omne sekureno ani nyi nye topon? Puryo ci nye topon, ntene Yiyintet pate nkit nye topon. 19Nketi nyi ntarastinek, mwowu kule, ‘Mente oporisye, mente operperisye, mente asakwayan, mente acorsye, mente oŋomu ci, ywey kon oko komet!’ ’’ 20Kuwekyi cicoto kumwoci Yesu kule, “Konetintet, kyorip ani ntarastinecutecu tokol kuceke oyiku lekwa.’’ 21Yoto kurotot Yesu cicoto topon kuŋerekyi moyenyi, oŋnkumwoy kule, “Mite kito akenke nye tokupotuŋ nyi, iwo weyalye tukuk tokol ce ponte oŋnkikoci pesanik pononik mesenyoru mokoryontit om torot, oŋnkico cepetekey oko ani.’’ 22Nteye kotolime cicoto ŋalecato; kunyer kusiriny tokoynyi oŋnkunomen kuwecikey kunerekat omnye kimokoryo nye kiponto tukuk ce caŋ. 23Yoto kukäsakästa Yesu oŋnkumwoci konomikyi kule, “Mokuwuyit koromun om wule mite piko co mokoren ce ponto tukuk ce caŋ ye mokowut cekto poytoyisyetap Yiyintet!’’ 24Kukite konomik ŋalecato koromun, ntene kutosyikey Yesu kumwoy kule, “Lekocu, mokuwuy koromun ye mociwut poytoyisyetap Yiyintet! 25Lekit kupunte nkamiyet koŋntap sintanit kupël ye mokowut cito nye mokoryo nye ponto tukuk ce caŋ poytoyisyetap Yiyintet.’’ 26Yoto kukite konomik koromun oŋnkutepekey kwicek nkit kumwoy kule, “Kunyo ŋo nyun cito nye cimuce cisop.’’ 27Kurotot Yesu cek topon, oŋnkuwekyi kumwoci kule, “Puryo kot komukoktos ŋalecu om wule mite piko, ntene mukoktos kiy ake tokol om wule mite Yiyintet.’’ 28Kumwoci Petero Yesu kule, “Nto acek? Käs pa, kicepakakte acek tukuk tokol oŋnkyinämiŋ cepetekey oko nyi.’’ 29Kumwoci Yesu cekto kule, “Kumwowok ani akwek ŋalek cepo manta kule, puryo ci nye ye kapakakta kanyi; oko mpo mutakwam, nto mpo cekwam, nto kamet, nto mpo lekok, nto mosonok oŋnkucäm ani oko lokoywek ce toponec, 30nye puryo kot kunyoru om pesyosyecutecu korik pokolwokik ce caŋ, oŋnkunyor mpo cekwam oko mpo kamet, oko mpo kwan oko mpo lekok, oko mpo mosonok, oŋnkunyor mpo toŋoŋutek, oŋnkunyor yec soponto nye mopoku om kenyisyek co kwoni. 31Ntene piko ce mite yawut tayta kuce mosukwokupoyit coto letut, nto piko ce caŋ ce mite yawut letut kuce mosukwokupoyit coto tayta.’’ 32Nteye kimite cekto kupeti om aran kuloŋntoy Yerusalem, yoto kuwo Yesu tay kuntoci konomik ce kanyokoritu kumuyo oko piko ce kirupe cekto ce komuyo mpecek. Yoto kukwer Yesu konomik taman ok oyeny kupa tapan, oŋnkumwoci kito nye mosukwiyakay om wule mite neto. 33Kumwoci kule, “Alim pa, ce mite yawut cepeti celoŋntoy Yerusalem, wule mowocenäm Weritap cito, oŋnkyekwer kuwo wule mite tisik cewoyec oko konetikap ntarastinek, mosicewosontyi oŋnkyemutyi musankut cepakäc oŋnkyikoyito kuwo wule mite lamek. 34Mosukurorici kucur co neto, oŋnkuŋutyi, oŋnkupas, oŋnkupakäc kume, ntene mosukotutune met om letutap pesyosyek somok.’’ 35Yoto kukwa ye kimite Yesu werikap Sepetayo oyenku Yakopo oko Yowana, oŋnkumwoci cekto Yesu kule, “Konetintet, mite ŋolyontet akenke nye ce möce acek kule yiwec nyi.’’ 36Kutepe Yesu cekto kule, “Ŋolyo ne nye omöce kule oyiwok ani?’’ 37Kuwekyi kumwoci kule, “Comwec kule, ye kepure nyi ŋeceret nyepo woyinŋuŋ, comwec acek yoto cipur oko nyi, kopurune ake yewuŋuŋ nyepo tay kopurune ake yewuŋuŋ nyepo let.’’ 38Kumwoci Yesu cekto kule, “Puryo kot oŋnket akwek kito nye osome. Omuci akwek ra kot opunte toŋoŋutek ce mataŋany ani?’’ 39Kuwekyi kumwoci kule, “Cimuci.’’ Kumwoci Yesu cekto kule, “Po manta kule omuci akwek opunte toŋoŋutek ce mataŋany ani, oŋnkyepatisanak mpo patisanet kuyu wulo mocepatisana. 40Ntene puryo kot oponte kamukeywek akwey kule ŋo nye mosukopure yewumwani nyepo tay nto nyepo let. Yiyintet nkit nye mosukukoci oteputek coto piko ce kiyiytoci neto.’’ 41Ntowo kulim konomik cut tamanu ŋalecato, kunyerci cekto Yakopo oko Yowana. 42Yoto kukur Yesu konomik kuyomo wanak, oŋnkumwoci kule, “Oŋnket akwek kule piko ce ciyite kule poytoyik cepo lamek kuce ponto kamukeywek kupayta piko, kunyo yiyisye pikwa cewoyec kamukeywek kupayta cekto. 43Puryo kot kuroke kuyuyit nyo om wule omite akwek. Ye möce citake om akwek kule oyiku nyewo, kuroke nyoto kwek mutworintet nyepo piko. 44Nteye möce citake om akwek kule oyiku kantoyin, kuroke nyoto kwek mutworintet nyepo piko tokol. 45Omnye kipuryo kot kuco Weritap cito kule kwokyiwo yisyet, ntene kico kule coyiyisye oŋnkume kukoyto soponto nyenyi kwolis sukusop piko ce caŋ.’’ 46Kukwa cekto okoy, Yeriko. Nteye kimite Yesu kunomone oko konomikyi Wanak oko piko ce caŋ, kimite yoto citake nye korat nye kipure aret tapan sukusomsi; nye kicekure Partimayo weritap Tamayo. 47Ntowo kulim cicoto korat kule Yesu nyepo Nasaret nyitenyi, kucec kupol kumwoy kule, “Yesu! Weritap Tauti! Rirena kalya ani!’’ 48Yoto kupolyi piko ce caŋ cicoto kumwoci kusis, ntene kutosyikey kupol koromun kumwoy kule, “Weritap Tauti! Rirena kalya ani!’’ 49Kuyo Yesu oŋnkumwayta kule, “Okur kuco yu.’’ Yoto kukur piko cicoto korat kumwoci kule, “Titir ŋete ŋony! Kuriŋ Yesu.’’ 50Yoto kuwirci cicoto sirenyi tapan, oŋnkuŋet kuyo oŋnkuco ye kimite Yesu. 51Kutepe Yesu cicoto kule, “Möce nyi kule oyiwuŋ ne?’’ Kumwoci cicoto Yesu kule, “Konetintet, omöce kule akäste yec.’’ 52Kumwoci Yesu neto kule, “Wecikey kokusopiŋ nyi koyeneŋuŋ.’’ Yoto kusopco konyekyi kukästa oŋnkuwo kunäm kupetakey Yesu om aran.

will be added

X\