1 Yunyi wule yunto lokoywek ce toponec ce nöme Yesu Kristo, nye Weritap Yiyintet. 2 Kicec kuyu wulo kisil workoyontet Isaya kule: “Mwowu Yiyintet kule: Akäs pa, oyoku ani kiyokintenyu kuntowuŋ nyi; nye mosukutemuŋ areŋuŋ. 3 Kapole citake kitela; ayiytoci Mokoryontet arenyi, asat kurotakay arenyi nye mosukupunte!’’ 4 Yoto koporkey Yowana om koretap kitela, oŋnkupatisan piko oŋnkumwoci lokoywekyi kule, “Arenynkey ayaste miyotyonikwok oŋnkyepatisanak sukuŋet kukalyak Yiyintet miyotyonikwok.’’ 5 Yoto kupa piko tokol cepo koretap Yuteya oko cepo moŋetap Yerusalem wule mite Yowana wokulimnta ŋalekyi. Kurenynkey cek kuŋoŋ kupor miyotyonikwa oŋnkupatisan Yowana cek om oyinetap Yortan. 6 Kiloce Yowana yoto siret nye kicenape kororikap tyonyntake nye cekure nkamiyet oŋnkurate anwet suwenyi. Kikwome talamik oko kumnyatetap samiyita. 7 Kumwoci Yowana piko ŋalek kule, “Coni om letumwani citake nyewo nye ponto swamet kupëlo ani, nye puryo kot kuyemo oyimnci aŋnkatyac porokap kweyonikyi. 8 Opotisonenok ani yawut peko, ntene mosukupatisanenak Muyet Nyetilil.’’ 9 Om pesyosyecoto, kucone Yesu moŋetap Nasaret om koretap Kalilaya, yoto kupatisan Yowana Yesu om oyinetap Yortan. 10 Nteye kimite neto kuloŋune peko, kukäs pakenke kuyatakay wulin po torot oŋnkuco kurekyi Muyet Nyetilil neto nye kerkey swarar. 11 Yoto kucone kutit torot kumwoy kule, “Yiku nyi Werimwani camanet, oŋerekyiŋ ani nyi koromun.’’ 12 Yoto pakenke kukwer Muyet Nyetilil Yesu kuwo okoy kitela. 13 Kopur Yesu wuloto po kitela kuwany pesyosyek artam; kusyem Setani nyewo nyepo oyik, kule olotu Yesu. Kipontokey neto om wuloto tyoŋikap kitela pate. Ntene kukwa Malaykanik kwokukalya neto. 14 Nto om letut yu kowo cenäm Yowana cekerta mopusi, yoto kuwo Yesu okoy Kalilaya kumwoytoti lokoywek ce toponec ce kwone wule mite Yiyintet. 15 Kumwoy kule, “Kacontyok akwek pesyet nyo kicekwey, kunyo karik poytoyisyetap Yiyintet! Arenynkey ayaste miyotyonikwok oŋnkocäm lokoywek ce toponec.’’ 16 Nteye kimite Yesu kuweti kurupe tapantap tampayayetap Kalilaya, yoto kukäs Yesu Simon oko mutakwam Antereya ce kimite kuwircini porok tampayayet omnye kinömik ce nöme purpurunek. 17 Kumwoci Yesu cek kule, “Akwa arupa cepetekey ani, mosokonok yisyet nye okweru piko.’’ 18 Yoto pakenke kupakakta cek porokwa oŋnkurup kupetakey Yesu. 19 Yoto kuwo tay kuminiŋ, kukäs Yesu Yakopo oko Yowana werikap Sepetayo ce tupco ce kimite rapemwa kuyiytoy porokwa. 20 Yoto pakenke ntowo kukäs Yesu cek, yoto kukur cekto. Yoto kupakakta kwan Sepetayo kumite kupontokey oko piko ce kikwiyisyi oŋnkupetakey cek Yesu. 21 Kukwa cek okoy kupun moŋetap Kapernaum. Nteye kipesyetap Sapat nye kirupe, kuwo Yesu kotapkok oŋnkucec kunetis. 22 Kukite piko ŋalek ce kinet omnye kinet ŋalek ce nyikisec ce ponto kamukeywek ce puryo kot kukerkey oko wule netitoy konetikap ntarastinek. 23 Yoto pakenke kuco kotapkokwonoto citake nye kiponto oyinot nye miyat oŋnkupol kumwoy kule, 24 “Mokenec ne acek nyi Yesu nyepo Nasaret? Keco kule kyarantec acek? Oŋnketiŋ ani kule yiku nyi Nyetilil nyepo Yiyintet!’’ 25 Yoto kupolyi Yesu oyinot nye miyat kumwoci kule, “Sis! Ŋete cito!’’ 26 Kunäm oyinoto nye miyat cicoto kupotan kwapi oŋnkupol om kutit nyewo oŋnkuŋet kuwecikey. 27 Kukite piko tokol koromun okoy kucec kutepekey nkit kumwoy kule, “Ŋolyo ne nyi? Konetisyet nyi nyelel? Ponto cici kamukeywek ce muce mpo kot kupayta kupolyi oyik ce miyotec oŋnkulimnci.’’ 28 Yoto kutisto lokoywekap Yesu kupunte wulyo tokol om Kalilaya. 29 Kunomen cek kupete kotapkok okoy kupunto kotap mpo Simon oko Antereya; kupetakey Yakopo oko Yowana. 30 Kimite yoto kukoru kwiriri kumnyone yeset cepyosyetap pikoy nyepo Simon. Kumwoci piko Yesu portap cepyosyanato. 31 Kuwo Yesu okoy ye kimite neto, oŋnkunäm yewut kukalya kuŋet, yoto pakenke kusope cepyosyanato yeset oŋnkucec kukalya cek kwici yisyonutek. 32 Ntowo kwimen koret pesyonoto kacumukta asista, kukwer piko piko tokol ce kimnyontos oko ce kiponto oyik kukwa wule mite Yesu. 33 Yoto korurukyikey piko tokol cepo moŋet ye kipo kurketap koto nye kimite Yesu. 34 Kusop Yesu om yoto piko ce caŋ ce kimnyontos porwonik wok tokol, oŋnkukwet oyik ce caŋ. Kuyete Yesu oyik moŋalal ŋolyo, omnye kinkete oyik kule neto ku ŋo. 35 Nto kerir koret pate nye tokutuy; kuŋet Yesu kunomene moŋet kuwo okoy kupunto koret surukwenet wokusom om wuloto kwine nkit. 36 Ntene kupa mpo Simon oko piko ce kipontokey okoy surukwenet kuceŋoti neto. 37 Ntowo kunyor kumwoci kule, “Mite piko tokol kuceŋatiŋ nyi.’’ 38 Kuwekyi Yesu kumwoci cek kule, “Okany cipe cetosyikey okoy cepunte soŋwek alak ce lekitec saŋet wamwayte wuloto ŋalek; omnye kyocontyi ani ŋalek coto.’’ 39 Kuwesetot Yesu yoto komut koretap Kalilaya tokol kumwoytoti ŋalekap Yiyintet om korikapkokwonik oŋnkukwet oyik. 40 Kuco citake nye kinäm mutyenkenik okoy ye kimite Yesu, oŋnkukutuny kusom kakalyayet kumwoci kule, “Ye kecäm nyi nkit muci sopo ani!’’ 41 Yoto kurotot Yesu cicoto okoy kurire kukalya, kuyito yewunyi oŋnkunäm cicoto kumwoy kule, “Omoce ani, kunyo sop nyolu!’’ 42 Kusopco om yoto pakenke mutyenkenik ce kiponto cicoto. 43 Kumwoci Yesu cicoto kunomen kuwecikey oŋnkunkolontyi kumwoci kule, 44 “Lim pa, mente womwoci citake tokol ŋalecu, ntene iwo lakwar wule mite tisintet oŋnkikany kukäsiŋ, nteye kapok koyte kokotutyet nyo kimwoy Moses, sukuŋet porci kunket ci tokol kule kwesop nyi.’’ 45 Ntene kunomen cicoto kuwo wokumwaytat ŋalecato om wulyo tokol. Kumwaytat kutisto ŋalek okoy komokomukoktos kot kuwo Yesu kowut moŋet koporukey, ntene kopurune neto surukwenet. Yoto kukwane piko koret wulyo tokol kukwa wule mite Yesu.
