Luke 8

1Om letut kunomen Yesu kuwo kupunte soŋwek oko moŋosyek kuceke ake okoy ake kumwoytoti lokoywek ce nöme poytoyisyetap Yiyintet. Kipontotikey neto yoto konomikyi taman ok oyeny, 2oko koruk alak ce kikicisopci oyik ce miyotec oko porwonikwa. Coto ku mpo Mariyam nyepo maktala nye kikicekwetyi oyik tisap, 3oko Yoana korketap Yusa cito nyewo nye kipoytoy kaytap Erote, oko Susana, oko koruk alak ce caŋ ce kikolyoy korucoto Yesu oko konomikyi tukuk ce kimöce. 4Ntowo koruruckey piko ce caŋ, oŋnkumite alake kutosyinikey kukwone moŋosyek alak tokol, kumwoci Yesu cekto tyonkoconi kule, 5“Kiwo kolintet ake wokukol kupuswekyi, nteye kimite kukolsyi kupuswekyi, kusuci kupuswek alake aret tapan, cetyikta ŋony, kuterer toritek oŋnkwokwam. 6Kusuci alake yepo kitawet parak, kutur oŋnkuyom omnye kipuryo kot kunyor peko. 7Kusuci kupuswek alake yepo kotok orit, kupityo wanak oko kotok kwam kotok. 8Kusuci alake yepo teŋek ce toponec, kupityo oŋnkwiy kupuswontet akenke kupuswek pokol akenke’’. Nteye kimwowu Yesu ŋalecutecu kukurto kupol om kutit nyewo kumwoy kule, “Ci nye ponto yitik ce limnte, roke kulimnte!’’ 9Kutepe konomikyi Yesu kumwoci kule, “Mwowu ne tyonkoconi?’’ 10Kumwoci Yesu cek kule, “Om wule omite akwek, kicekonok oŋnket ŋalek ce wuŋotin cepo poytoyisyetap Yiyintet, ntene om wule mite piko alak kicikoci co kunket om tyonkocoy pate, sukuŋet cek kukäs ntene oŋnkupuryo kot kunkete, kulim ntene oŋnkupuryo kot kusowu kunket.’’ 11“Poru tyonkoconi kule, kupuswontet kunye ŋolyontetap Yiyintet. 12Kupuswek co kisuci aret tapan; kukerkey oko piko co kalim ŋolyontet, ntene kuco Setani nyewo nyepo oyik oŋnkucokunumune ŋolyontet mukuleywekwa kule mente kuyen ŋolyontet oŋnkyisop. 13Nto kupuswek co kisuci kitawet parak, kukerkey oko piko co ye kalim ŋolyontet kuŋerekyi koromun, ntene oŋnkupuryo kot kowute mukuleywekwa orit, kuyen pate pesyos tukusic, nteye kacesyem cekto kumwey. 14Nto kupuswek co kisuci kotok orit, kukerkey oko piko co ye kalim ŋolyontet nteye tokumite kurupe, kowurta cekto kasoteywek oko mokoryontit oko ŋerekwekap koret. Kunyo puryo kot kwiye cek omik kot kururyo. 15Kupuswek co kisuci teŋek ce toponec, kukerkey oko piko co ye kalim ŋolyontet, kunäm oŋnkurip topon om mukuleywekwa ce toponec ce muytocini oŋnkukwilokis okoy kwiy omik.’’ 16“Puryo ci nye pele tarit oŋnkukupuye pesenit, nto kukoci kwiririt ŋony, ntene tore meset parak sukuŋet kukäs piko co miŋu koto orit lakweyet. 17Omnye puryo ŋolyo nye kicewuny nye puryo kot ciporu koyin kutok. Oŋnkupuryo kiy nye kicetup cewuny nye puryo kot ceŋonye koyin kutok. 18Oripkey yawut wule olimntoy; omnye ci tokol nye ponto kiy mosicetosyi kucaŋit, nto ci tokol nye puryo kot kuponto nka mpo tukusic co sote kule oponte, mosicinumune.’’ 19Yoto kukwa mpo mutakwam oko kamet wule mite Yesu, ntene kipuryo kot komuc cek kot kupunto wule mite Yesu omnye kicaŋ piko koromun. 20Kumwoci citake Yesu kule, “Mite komet oko mpo mutokwomet keyoŋe saŋ kumöce kule cekäsiŋ nyi.’’ 21Kuwekyi Yesu kumwoci cek tokol kule, “Yeyomwani oko mpo yeyamwani ku piko co lime ŋolyontetap Yiyintet oŋnkurup kwiy.’’ 22Nteye kipesyet ake, kulany Yesu rapet oko konomikyi oŋnkumwoci cek kule, “Onte cipe kyay tampayayet pitonin.’’ Yoto kunomen cek kway. 23Nteye kimite kwoye, kunuc Yesu kunäm rwonto; yoto kuwus yomet nyepo swama om tampayayet okoy kumac kunyiy peko rapet, kukäs konomik kule cemite ye miyat. 24Kukwa cek ye kimite Yesu oŋnkuŋet kumwoci kule, “Konetintet, Konetintet! Kocemis!’’ Kuŋet Yesu oŋnkupolyi yomet oko peko ce kiwosekey, yoto kusis yomet oko tampayayet tokol. 25Kumwoci Yesu cek kule, “Mite ono koyenemwoŋ?’’ Kumuyo cekto oŋnkukite, oŋnkuŋalal kwicek nkit kumwoy kule, “Ŋo yec cici? Nyi polyini mpo yomat oko peko kulimnci neto!’’ 26Yoto kway cek kupete rapet okoy kupunto pitonin om koretap Kerasenik nye tokyintos oko koretap Kalilaya. 27Nteyu kowo kupunto cek tapantap tampayayet, kutuye Yesu citake nye kiponto oyik nye kicone moŋet, kikukuwany cicoto pesyosyek ce caŋ nye puryo kot kuloce siroy, oŋnkupuryo kot kuminye ko, ntene kiminye pate wule cemucini piko. 28Nteye kotoköse cicoto Yesu, kurir kupol om kutit nyewo koromun oŋnkuputyi ŋony kukutuŋe taytap Yesu oŋnkumwoy kule, “Ponteno ne ani nyi Yesu Weritap Yiyintet nyepo torot koromun? Osomiŋ kule mente ataŋanya ani!’’ 29Kimwoy cicoto kuyunyoto omnye kikipolyi Yesu oyinot nye miyat kuwete neto. Kikinäm oyik cicoto aret ce caŋ, kunyo kiceripe cerate nyororonik oko pinkonok, ntene kimuce cicoto kuŋeti oŋnkusut oyik neto okoy kupunto surukwenet. 30Kutepe Yesu neto kule, “Cekure ne kayneŋuŋ?’’ Kuwec cicoto kumwoy kule, “Cekure kaynemwani, ‘Luket’, ’’ omnye kikikowut cicoto oyik ce caŋ. 31Kusaysay oyik Yesu kumwoci kule, kukwet cek kupa wokowut kapkompic. 32Kimite ye kilekite yoto yeceytap nkururwenik ce kimite kwokete tulwet komos. Kumwoci oyik Yesu kule kucömnci cek kupa wokowut nkururwenicoto. Yoto kumwoci Yesu cek kupa kuyunyoto. 33Yoto kuŋete oyik cicoto oŋnkupa wokowut nkururwenicoto kumwey kurway yeceyta tokol okoy wokoŋirte lakam wokosuci tampayayet kupakäc peko kupok tokol. 34Nteyu kowo kukäs mesewek ce kyokisyi ŋalecato keyokis kumwey kurway kupa wokumwaytat kupunte lokoywek moŋosyek oko koret tokol. 35Kukwa piko kwokukäs ŋalecato kokwiyokis, ntowo kupun yoto; kwokunyor Yesu kupontokey cicoto kopete oyik kukepur yepo kerenkokap Yesu kulakat oŋnkuponto ŋomnonet. Yoto kumuyo piko tokol. 36Kuporci piko co komite yeto kumwoci piko co kokwoni wule kocisopto cicoto kiponto oyik. 37Yoto kusom piko tokol ce kiminye koretap Kerasenik oko ce lekite koronoto kumwoci Yesu kule kuŋet kuwete koremwa, omnye kinäm cek tokol muyotet nyewo koromun. Yoto kulany Yesu rapet oŋnkunomen kuweckey. 38Kusom cicoto kipete oyik kumwoci Yesu kule, “Kany cepetekey tukway.’’ Kuwekyi Yesu kumwoci neto kule, 39“Nomen wecikey kaŋuŋ oŋnkuwemwayte ŋalek ce kokwiwuŋ nyi Yiyintet.’’ Kunomen cicoto kuwecikey oŋnkuwokumwaytat kupunte moŋosyek tokol ŋalek ce kokwici Yesu neto. 40Ntowo kuweckey Yesu kwoy pitoni, kutoroc kuŋerekyi piko ce caŋ, Omnye kimite picoto kukonye neto. 41Yoto kuco citake nye cekure Yairo nye kipoytoyintetap kotapkok, oŋnkuputyi yepo kerenkokap Yesu oŋnkusom kumwoci kule, cipe kanyu, 42omnye kiponto Yairo lekwenyi akenke nye tye nye kiponto kenyisyek taman ok oyeny, nye kikirik kume. Nteye kimite Yesu kuweti kukic piko neto om komoswokik tokol. 43Kimite yoto korket ake nye kimnyan kutaŋany kukwone korotik kuwany kenyisyek taman ok oyeny. Kikikuwoŋnkyi korkonoto tukukyi tokol ce kiponto cepsakitisyek, ntene puryo mpo akenke nye kimuc kot kusop neto. 44Kucone korkonoto letutap Yesu oŋnkutwa kunäm tapantap siretap Yesu, yoto pakenke kusisio korotik ce kikwone neto. 45Kutep Yesu kule, “Ŋo nyi kanäma kutwaya ani?’’ Nteyu kowo kutinton piko tokol, kumwoy Petero kule, “Konetintet, piko cu kuwunuktiŋ kukiciŋ nyi!’’ 46Ntene kumwoy Yesu kule, “Kutwaya kunäma ani citake; omnye kakäs kule kaweteno swamet.’’ 47Ntowo kukäs korkonoto kule komowuŋoktosi, kupotanan kuco tay, oŋnkuputyi taytap Yesu oŋnkumwoci om taytap piko tokol omne sukutwa kunäm neto Yesu, oŋnkumwoy kutor wule kosopto neto yoto pakenke. 48Kumwoci Yesu korkonoto kule, “Cepnyu, kokusopiŋ nyi koyeneŋuŋ, kunyo wecikey om kalya.’’ 49Nteyu kimite Yesu tokuŋolole, kucone citake kotap poytoyintetap kotapkok, oŋnkucokumwoci poytoyintet kule, “Kame cepŋuŋ kunyo mente tayim yec Konetintet.’’ 50Ntowo kulim Yesu ŋalecato, kumwoci Yairo kule, “Mente omuy, iyen pate, mosukusop cepŋuŋ.’’ 51Ntowo kupunto Yesu koyoto, kuyete piko tokol mewut koto orit, oŋnkucömnci pate Petero oko Yowana oko Yakopo, oko kwanitap lekwet oko kamet. 52Kimite yoto piko kurire kwome mnyat cepoto. Kumwoci Yesu cek kule, “Monte cerirye, omnye puryo kot kume, koru pate.’’ 53Kurorici picoto Yesu omnye kinkete cek kule kame lekwet. 54Kunäm Yesu yewutap cepoto oŋnkukur kupol kumwoy kule, “Lekwani ŋet!’’ 55Kuweckey sopon nyi, oŋnkuŋet lakwar kuyo. Yoto kumwayta Yesu cikoci omik ce kam. 56Kukite kwan oko kamet, ntene kunkolontyi Yesu kumwoci cekto kule mente kot kumwoci citake tokol ŋalecu keyokis.

will be added

X\