Luke 7

1Nteyu kowo kuwany Yesu kumwoci piko ŋalecutecu tokol, kunomen kuwo Kapernaum. 2Kimite wuloto citake nyewo nyepo sikarek nye kiponto mutworintenyi nye kicöme koromun. Kimnyone nye kikasat koromun nye karik kume mutworintonoto. 3Ntowo kulim cicoto kinyewo nyepo sikarek ŋalek ce nöme Yesu, kuyokto poyikap Yutayek alak kupa wokumwoci Yesu kuco cokusop mutworintenyi. 4Yoto kukwa poyikap Yutayek okoy kupun wule mite Yesu, oŋnkusaysay koromun kumwoci kule, “Misyini yici neto kuyunyoto, roke neto kunyor, 5omnye cöme pikyacek, oŋnku neto nye kitekwec acek kotapkok.’’ 6Yoto kunomen Yesu kupetakey wanak oko cekto, ntowo kurikta koyoto, kuyok nyewo nyepo sikarek coronutekyi kwokumwoci Yesu kule, “Mokoryontet, mente ayimnkey omnye oyiku ani ci nye puryo kot kumisyiniŋ nyi ico cewut komwani. 7Kunyo puryo kot kumisyo ani aco wule mite nyi; mwowu pate ŋolyo mosukusop mutworintemwani. 8Omnye oyiku mpo ani ci nye cepoytoy, oŋnkoponte sikarek ce opoytoy ani, omwocini ake kule, ‘Iwo’, kuwo, nto ake omwoci kule, ‘Co’, kuco, nto mutworintemwani omwoci kule, ‘Yiy kiyi’, kwiye kuyunyoto.’’ 9Nteyu kowo kulim Yesu coto, kukite ŋalekap cicoto koromun, oŋnkumwoci piko ce kirupe neto kule, “Komwowok ani akwek kule, nka mpo om Israel tokol kumukul; tompo kot anyoru ani ci nye ponto koyenot nyewo kuyunyi.’’ 10Ntowo kuweckey piko co kociyoku kupa okoy koyoto, wokunyor kosop mutworintetkey. 11Nto om letut kuminiŋ, kunomen Yesu kuwo okoy kupunto moŋet nye cekure Nain. Kiwetoykey neto yoto konomikyi oko piko ce caŋ. 12Nteyu kowo kupunto kurketap moŋet kutuye piko ce sutu cito nye kame, nyoto kunye kiwero akenke pate nyepo korko nye musuk. Kipontokey korkonoto piko ce ce caŋ cepo moŋonoto. 13Ntowo kukäs Mokoryontet korkonoto, kurire oŋnkumwoci kule, “Mente tarir.’’ 14Yoto kunokyi Yesu kulekityi oŋnkunäm kito nye kicesute cito, yoto kuyoŋ piko ce kisute, kumwoy Yesu kule, “Oyiperyontoni! Komwowuŋ kule, Ŋet yony!’’ 15Kuŋet cicoto kikime kopur ŋony oŋnkucec kuŋalal, kunäm Yesu oŋnkukoci kamet lekwenyi. 16Yoto kokite oŋnkumuyo piko tokol, oŋnkukasta cekto Yiyintet kumwoy kule, “Kotokune kwenunyo workoyonto nyewo koromun!’’ 17Kutisto lokoywecutecu po Yesu om koretap Yuteya tokol oko korosyek ce lekite wuloto. 18Kumwoci konomikyi Yowana ŋalecutecu tokol. Yoto kukur Yowana konomikyi oyeny, 19oŋnkuyokto kupa wule mite Mokoryontet wokutepe kule, “Nyi neto cito mosukuco nto cekany acek citake?’’ 20Nteyu kowo kukwa picoto okoy kupun wule mite Yesu; kwokumwoy kule “Keyokwec acek Yowana potisonintet wule mite nyi kutep kule, ‘Nyi neto cito nyo mosukuco nto cekany acek citake.’ ’’ 21Yoto pakenke kusop Yesu piko ce caŋ ce kiponto porwonik, ce kisyen, oko ce kiponto oyik ce miyotec, oŋnkuŋany konyek kukästa piko ce caŋ ce kikoryo. 22Kuwekyikey Yesu pikap Yowana oŋnkumwoci kule, “Ape womwoci Yowana ŋalek tokol ce kokäs oŋnkolim akwek: Akäs pa, köstoy piko ce kikoryo, pesetoti piko ce kimwolyos, kocisop piko ce kuponto mutyenkenik, limntoy piko ce kikimiŋitu, kokotutune met piko ce kikipok, oŋnkyemwocini pononik lokoywek ce toponec. 23Ntene ŋerekat kuponto kupeyoy ci tokol nye puryo kot kunyoruneno ani kanokut.’’ 24Nto om letut yu kowo kupecikey piko co kiyoku Yowana, kumwoci Yesu piko ŋalek ce nömekey oko Yowana kule, “Kyopeti akwek Kitela kule wocekäs ne? Rostit nye kitimtime yomet? Puryo kot kuyunyo! 25Ntene kyopeti akwek kule wocekäs ne? Ci nye kelac sirok ce toponec ce kintus? Cinkete kule piko co loce sirok ce toponec ce cikite oŋnkuponto soponto nyepo ŋerekwek kuminye piko coto korikap mokorenik! 26Ntene omwowo ani pa, kyopeti akwek kule wocekäs ne? Workoyo? Yunyoto manta, komwowok ani kule kyokäs akwek yoto ci nye pële workoyo. 27Omnye neto nyoto nyo mwowu silutekap Yiyintet ŋalek ce nöme neto kule: ‘Akäs pa, oyoku ani kiyokitemwani kuntowuŋ nyi, Nye mosukusat areŋuŋ om tayŋuŋyi.’ ’’ 28Kutosyi Yesu kumwoy kule, “Komwowok ani kule, om piko tokol ce kiyi koruk, puryo mpo akenke nyewo kupël Yowana. Ntene nye miniŋ om poytoyisyetap Yiyintet kunye nyewo nyoto kupël neto.’’ 29Nteyu kowo kulim ŋalecato piko tokol oko korurukikap mosoret, kukasta cekto kucämnta toponiyetap Yiyintet, omnye kikicäm oŋnkyepatisan cek om potisonisyetap Yowana. 30Ntene kutay Farasayek oko konetikap ntarastinek ŋalek ce möce Yiyintet om wule mite cek, omnye kipuryo kot kucäm kupatisan Yowana cekto. 31Kumwoy Yesu kule, “Moyuyite ne ani yawut pikap pesyosyecu? Kerkey oko kiy ne? 32Kerkey oko lekoy ce kepure yepo motepet sukupole kukurcinikey kumwowu kule: ‘Kicekutwok akwek kurerunek, ntene atay akwek motum! Kicerirye acek kyam mnyat, ntene atay akwek morirye omesye!’ 33Omnye kico Yowana potisonintet, oŋnkukir omik nye puryo kot kwomisyi oŋnkupuryo kot kuye finyonik, omwowu akwek kule, ‘Ponto oyinot!’ 34Kunyo kuco Weritap cito oŋnkwomis, oŋnkuyesyo, omwowu akwek kule, ‘Akäs pa cici! Nye cemoyetyontet oŋnkuyeyin nyepo pokitet, oŋnkucorwetap korurukikap mosoret oko piko co kicetay!’ 35Ntene kunyo kicinket kule po manta ŋomnonetap Yiyintet om wule mite piko tokol ce lekokyi.’’ 36Kukur Farasoyintet ake Yesu cokwomis kanyi, kuwo Yesu okoy kupunto kotap Farasoyintonoto oŋnkupur ŋony kwomis. 37Kimite korket ake moŋonoto nye kiponto kopurto nyepo soponto nye miyat, nteyu kowo kunket korkonoto kule mite Yesu kwomisyi om kotap Farasoyintet, yoto kusut cupet nye nyitat mwayita nye poŋu topon. 38Kuco oŋnkuyoŋe patay om yepo kerenkokap Yesu, kuyile mwayikey poŋu topon. 39Nteye kotoköse Farasoyintet nyo kukure Yesu ŋalecato, kumwowune moyenyi kule, “Nto koworkoyo cici, nto kokonket kule, ŋo, oŋnkuyu ne korkoni kanäm neto, oŋnkunket kule, ponto korkoni miyotyo.’’ 40Kuwekyi Yesu kumwoci neto kule “Simon, oponte ani ŋolyo nye omöce kule omwowuŋ nyi.’’ Kumwoy Simon kule, “Mokoryontet, mwowu.’’ Kuporci Yesu kumwoci neto kule. 41“Kiponto piko alak oyeny pesenutekap citake nye pesentoy pesan. Kiceyoce ake silinkinek pokolwokik mut, nto ake kiceyoce silinkinek konom. 42Omnye kipuryo kot kuponto picoto oyenku tukuk ce mokuyokune, cikalya tukway pesenutekwa. Kunyo oŋnkono om picoto oyeny nye mosukucäm koromun cito nyo kikolyoyisyi?’’ 43Kuwec Simon kumwoci Yesu kule, “Asoti ani kule cito nyo kicikalya pesento nyewo.’’ Kumwoci Yesu neto kule, “Kerwoc topon.’’ 44Kuwekyikey Yesu korketkey oŋnkumwoci Simon kule, “Kekäs nyi korkoni? Kaco ani koŋuŋyi, ntene puryo kot kono pekap kerenkok, kunyo korkoni kunye kenyinye lokikyi kerenkokwani, oŋnkupuke putekap metinyi. 45Kopuryo mpo kot ŋerekyo ŋatuta ani nyi, ntene kuceke ye kaco ani koŋŋyi, puryo kot kwasta korkoni nye moŋotute kerenkokwani. 46Kopuryo mpo kot iyile nyi mwayita metimwani, ntene kakuyile korkoni kerenkokwani mwayita nye poŋu. 47Kunyo cömisyenyi nyewo nye kokupor kunye poru kule kacikalya neto miyotyonikyi ce caŋ. Ci tokol nye kacikalya ce tukusic kuporu nyoto cömisyet nye miniŋ.’’ 48Kumwoci Yesu korkonoto kule, “Kacikalyiŋ nyi miyotyonikuk tokol.’’ 49Yoto kucec kuŋalal piko co kyomisyi wanak om montuwokwa kumwoy kule, “Ŋo yec nyi kolyoy miyotyonik?’’ 50Kumwoci Yesu korkonoto kule, “Kakusopiŋ nyi koyeneŋuŋ wecikey om kalya.’’

will be added

X\