Luke 6

1Nteye kipesyetap Sapat kuwo Yesu kupunte mparosyekap nkanuk, yoto kuputot konomikyi nkanuk oŋnkupirir kwam. 2Kumwoci Farasayek alake konomik kule, “Omne sayiy akwek om pesyetap Sapat yisyet nye puryo kot kucöme ntarastinekyo?’’ 3Kuwekyi Yesu kumwoci cekto kule, “Tompo kot asuman akwek ŋalek cek kikwiy Tauti oko pikyi yo kikwome cek rupet? 4Kiwut neto kotap Yiyintet oŋnkunum mukatyantet nye kicesoci kupoyit Yiyintet, oŋnkwam oko pikyi co kipontokey, ntene kipuryo kot kucömncini ntarastit ci ake tokol kwam, tisik pate nkit ce kicecömncini.’’ 5Kutosyi Yesu kumwoy kule, “Weritap cito kunye Mokoryontetap Sapat.’’ 6Nteye kipesyetap Sapatit ake, kuwo Yesu okoy kotapkok oŋnkunetis, kimite koyoto orit citake nye kime yewutap tay. 7Yoto kurip Farasayek oko konetikap ntarastinek kule cekäs oŋnkusopsi Yesu ye pesyetap Sapat, sukuŋet cekto kuwosontyi. 8Ntene kunket Yesu kasoteywekwa, kumwoci cicoto kime yewut kule, “Ŋet yony oŋnkico ceyoŋe yu potay’’ Kuŋet cicoto oŋnkuyoŋe yoto. 9Kumwoci Yesu cekto kule, “Otepenok akwek kule, cömwec acek ntarastinekyo kyiy ne ye pesyetap Sapat? Cikalya nto ciwurta? Cisop sopontap cito nto cipot?’’ 10Kukäskästa Yesu kukäs cekto tokol, oŋnkumwoci cicoto kime yewut kule, “Yite yewuŋuŋ.’’ Kwiy cicoto kuyunyoto, kusop yewunyi kuyu wule kiyunto kunyo. 11Ntene kunerekis cek koromun, oŋnkucec kuŋalale nkit kito nye mokwiye Yesu. 12Om pesyosyecoto kuwo Yesu kulaŋnta lakamet parak wokusom; kuwany kwomowunoto tokol kusome Yiyintet. 13Nteyu kowo kuyec koret, kukur konomikyi kukwa ye kimite neto, oŋnkukwey taman ok oyeny om coto oŋnkutoci kaynet kukure kiyokik. 14Simon nye kimulyi cekure Petero, oko mutakwam Antereya, oko Yakopo, oko Yowana, oko Filipo, oko Paturumayo, 15oko Matayo oko Tomas, oko Yakopo weritap Alufayo, oko Simon nye kicekure nyikanet nye poryecini korenyi, 16Yuta weritap Yakopo, oko Yuta Isikaryoti nyo kiweckey kwek ŋomntoyin. 17Kurekune Yesu lakam wanak oko konomikyi, kuco okoy cokuyoŋe yepo kewet nye topon. Kimite yoto konomik ce caŋ oko piko ce caŋ koromun ce kikwone koretap Yuteya tokol oko Yerusalem, oko ce kikwone tapantap ruretyet om Tiro oko Siton. 18Cekikwa kule kwocelimnte ŋalekyi oŋnkyisopci porwonikwa. Kukwa mpecek piko ce kikikutaŋany oyik ce miyotec, cisop cek tokol. 19Kusyem piko tokol kule cetiny Yesu, omnye kicone swamet wule mite neto oŋnkusop cekto tokol. 20Kukäs Yesu konomikyi oŋnkumwoci kule: “Oponte akwek pononik kupeyoy, omnye nyimwoŋ poytoyisyetap Yiyintet! 21Oponte akwek kupeyoy co omok yawut rupet: omnye koyin cipiyonyok! Oponte akwek kupeyoy co orirtosi yawut: omnye mosorori koyin! 22“Oponte akwek kupeyoy ye kasenkerak piko oŋnkukwetak, oŋnkucupok kumwowok kule, oyiku oyi, omnye kocäm Weritap Cito! 23Aŋerec om pesyonoto, oŋnkotum om ŋerekwek omnye komwowok ani akwek kule coŋec kupeyokwok om wulin po torot. Omnye kikwicini mpo kukomwa workoyik ŋalek ceyucoto. 24“Ntene Oyey! Omite akwek kwapi co oyiku mokoren yawut, omnye kiyemak ŋerekwek! 25“Oyey! Omite akwek kwapi co oyiku piyoŋotin yawut, omnye mosukwamak rupet! Oyey! Omite akwek kwapi co ororye yawut, Omnye mosomesye oŋnkorirye. 26“Oyey! Omite akwek kwapi co ŋololenok piko topon. Omnye kikwici mpo kukomwa ŋalek ceyucutecu workoyik co kimwiynot. 27“Ntene komwowok ani akwek cu olime ŋalekwani yawut kule, ocäm punikwok, oŋnkoyici tukuk ce toponec piko tokol co senkerok. 28Osomnci kupeyok piko co cupok kurumncok akwek, oŋnkosomnci piko co toŋonyok akwek. 29Ye kasyeciŋ citake kwarmatut ake wekyi kusyec mpo kwarmatut ake. Ye kosut citake kotiŋun koci kusut mpo satit. 30Koci ci tokol kiy nye kosomiŋ, ntene mente atepe cicoto kuketuŋ tukuk coto kosut. 31Oyici piko tokol kuyu wule omoktoy akwek kule ntoyiwok akwek picoto. 32“Nteye kocäm akwek pate piko co cömok akwek, asot akwek kule ceponte kupeyoy ne? Omnye mpo piko co ponto miyotyonik kucöme mpecek piko co cöme cekto! 33Nteye koyici akwek tukuk ce toponec piko co yiwok akwek tukuk ce toponec, asot akwek kule ceponte kupeyoy ne? Omnye mpo piko co ponto miyotyonik kwiye mpecek kuyunyoto. 34Nteye kopesentyi akwek pate piko co oŋnketi kule mosukuketwec kuyokwec tukukyo, asot akwek kule ceponte kupeyoy ne? Omnye mpo piko co miyotec kupesentyini piko co miyotec kunkete kule ceketwec ceyokwec tukukyo! 35Ntene ocäm punikwok, oyici tukuk ce toponec; opesente ntene monte osotyi kule ceyokwec om letut, omnye mosonyoru kupeyok ce cäŋ oŋnkoyiku lekokap Yiyintet nyewo nyepo torot koromun, Omnye tala Yiyintet om wule mite piko tokol co puryo kot kukostoyisyi oko piko co miyotec. 36Oyiku pic ce ponto poypoyet kuyu Papamwoŋ nye ponto poypoyet.’’ 37“Monte cemutyi piko alak musanku, mpo akwek kupuryo kot kumutwok Yiyintet koyin musanku. Monte cemutyi piko alak kulot musanku, mpo akwek kupuryo kot cemutwok koyin kulotak musanku. Okalye sukuŋet koyin kukalyak mpo akwek Yiyintet. 38Okoyite sukuŋet koyin cekonok mpo akwek, mosonyoru akwek koyoyeketap sweswet nye topon nye kiciruruŋnkyi okoy kuwastakey; omnye koyoyeket nyo oyoyekyini akwek piko alak, kunyoto koyoyeket nye koyin ciyoyekwok mpo akwek.’’ 39Kumwoci Yesu cekto yec tyonkoconi kule, “Muce pa cito nye korat kuretot citake nye korat? Puryo kot kosucini tukway mwenet? 40Puryo kot kupële cito nyo cinete cito nyo netisyi, ntene ci tokol nyo cinete ye kacinet okoy kunket mosukukerkeyit neto oko konetintenyi. 41“Kunyo omne seköse nyi pertet nye kisic nye mite koŋntap yeyaŋuŋ, oŋnkupuryo kot muci kot käs musukyet nye mite koŋnta nyeŋuŋ nkit? 42Muci nyi kulene mwoci yeyaŋuŋ kule, ‘Yeya, kany onumuŋ ani pertet nye mite koŋnta nyeŋuŋ oŋnkurok kupuryo muci nyi kot käs musukyet nyo mite koŋnta nyeŋun nkit? Ye, koperperintoni! Nyosye numu kunyo musukyet nyo mite koŋnta nyeŋuŋ nkit, siŋet käste topon semuc numu pertet nyo mite koŋntap yeyaŋuŋ.’ ’’ 43“Omnye puryo ket nye topon nye muce kot kwiy omik ce miyotec, oŋnkupuryo yec mpo ket nye miyat nye muce kot kwiy omik ce toponec. 44Cinkete ket ake tokol omikyi ce yiye; omnye puryo kot komuce piko kupute mokoyek ketik ce ponto kotok, nto muce ra kupute komolik ketik ce ponto kotok? 45Numu cito nye topon toponiyet kucone konorutyenyi nye nye topon nye mite mukuleynyi, nto cito nye miyat kunum miyotyet kucone konorutyenyi nye miyat nye mite mukuleynyi, omnye ŋolole kutitap cito ŋalek tokol ce nyitotin mukuleynyi.’’ 46“Omne sokureno ani akwek, ‘Mokoryontet, Mokoryontet,’ oŋnkurok kupuryo kot oyiye ŋalek ce omwowok ani akwek? 47Mosoporwok ani wule yunto cito nye coni wule omite oŋnkulim ŋalekwani oŋnkwiy kurup. 48Kerkey nyo oko ci nye tece koto kupal kuwo ŋony koromun oŋnkutuci topon, nteye keyin mokotekap oyinet oŋnkurotyi koyoto om swama kupuryo kot kumuce kutyem omnye kicetec topon. 49Nto ci nye kalim ŋalekwani oŋnkupuryo kot kwiy kiy, kukerkey nyo oko ci nye tece koto yepo ntapca oŋnkupuryo kot kutec topon kupal kuwo ŋony, kurotyi oyinet koyoto om swama kulul lakwar, nto luletap koyoto kululot nyewo koromun.’’

will be added

X\