Luke 5

1Nteyu kimite piko ce caŋ kukicekey kumut Yesu kule celim ŋolyontetap Yiyintet, kimite yoto Yesu kukeyoŋe tapantap tampayayetap Kenesaret. 2Kukäs Yesu om yoto rapanik oyeny ce kimite tampayayet tapan ce kapakakta piko co nöme purpurunek oŋnkupa wokusit porokap purpurunek co cenömisye. 3Kulany Yesu rapet akenke nyepo Simon, oŋnkusom kumwoci Simon kutorta rapet kunata kusic kuwo tampayayet. Yoto kupure Yesu rapanato oŋnkunet piko. 4Nteyu kowo kuŋalal kot kuwany, kumwoci Yesu Simon kule, “Torte rapet kuwo peko kwen, oŋnkikoci nyi oko piko co konömisyi tokol porokwok peko orit onömisye.’’ 5Kuwekyi Simon kumwoci Yesu kule, “Mokoryontet, kukyiyisye om swama komowut tokol; ntene puryo kot cimuc kot cenäm kiy, ntene om ŋolyonteŋuŋ nye kemwowu, mosokoci porok peko orit.’’ 6Yoto kwiy cek kuyunyoto kukoci porok peko orit; kunäm yoto purpurunek ce caŋ koromun okoy kumac kuŋetyo porok. 7Yoto kukur cekto kuwus nömik alak ce kinömisyi tokol ce kimite rapet ake kule kukwa kwokukalya, kukwa cut, kwokonum cek purpurunek ce caŋ koromun kunyit raposyek tukway kot kumac kotompultokey kowut peko orit. 8Nteye kotoköse Simon Petero ŋalek coto keyokis, koputyi kukutuŋe kerenkokap Yesu oŋnkumwoy kule, “Mokoryontet wecikey, omnye oyiku ani ci nye miyat.’’ 9Omnye kikite Simon oko piko co kipontokey coŋintap purpurunek ce caŋ ce kicenäm. 10Kuyuyit nyoto kukite mpecek Yakopo oko Yowana werikap Sepetayo ce kinömikap purpurunek ce kipontokey oko Simon. Kumwoci Yesu Simon kule, “Mente omuy; kuceke yawut pesyoni meseyeku nyi roponintet nye kweru piko.’’ 11Yoto kusut cekto raposyekwa okoy kupunto tampayayet tapan, oŋnkupakakta tukuk tokol, oŋnkunomen kunam kupetakey Yesu. 12Nteye kimite Yesu pesyet ake moŋet ake, kimite moŋonoto citake nye kunäm mutyenkenik koromun, nteye kotoköse cicoto Yesu, kuputyi ŋony kukutuŋnkyi oŋnkusom kumwoci kule, “Mokoryontet, ye kecäm nyi nkit, muci sopo ani!’’ 13Kuyito Yesu yewunyi oŋnkunäm cicoto, oŋnkumwoy kule, “Omöce ani; kunyo sop nyolu.’’ Kusopco om yoto pakenke mutyenkenik ce kiponto cicoto. 14Kunkolontyi Yesu kumwoci cicoto kule, “Mente kot omwoci citake tokol ŋalecu, ntene iwo weporcikey tisintet, nto kuyu ŋalek ce nöme kosopeŋuŋ, iwo wekoyite korosyontet kuyu wule kimwayta Moses, sukuŋet porci ci tokol kule kwesop nyi.’’ 15Ntene kutosyikey kutisto lokoywecoto po Yesu, koruruckey piko ce caŋ oŋnkukwa kwokulimnta ŋalekyi oŋnkyisopci cekto porwonikwa. 16Ntene kikweyekey Yesu kwine nkit om pesyosyek alak oŋnkuwo surukwenet wokusom. 17Kimite Yesu kunetisyi pesyet ake, nto om yoto kimite kukepur Farasayek oko konetikap ntarastinek ce kikwone moŋosyekap Kalilaya oko Yuteya oko Yerusalem. Kiponto Yesu yoto swametap Mokoryontet nye kisopse. 18Yoto kusutune piko alake kwiririt citake nye kipok kerenkok. Kusyem picoto kule cekonop cicoto kuwo okoy kupunto taytap Yesu. 19Ntowo kupotyi cek aret nye kepunte omnye kicaŋ piko, kunäm kulaŋnte okoy koto kisyek, oŋnkuput kisyekutap koto onŋkopunte cicoto kumite kwiririt okoy kupunto kwenutap piko om yepo taytap Yesu. 20Ntowo kukäs Yesu koyenetap picoto, kumwoy kule, “Corwenyu, kacikalyiŋ nyi miyotyonikuk.’’ 21Yoto kucec kuŋalal kwicek nkit konetikap ntarastinek oko Farasayek kumwoy kule, “Ŋo cici ŋolole ŋal ce nyile Yiyintet kuyu nyi! Ŋo yec nye muce kukalya miyotyonik nye puryo kot ku Yiyintet nkit!’’ 22Kunket Yesu kasoteywek ce kimite cekto kusote; kuwekyi kumwoci kule, “Omne sasot akwek ŋalek ceyuco otintentyine om kasoteywekwok? 23Oŋnkono nye lekite, cemwoy kule, ‘Kacikalyiŋ miyotyonikuk’. Nto ye kocemwoy kule, ‘Ŋet wesetote?’ 24Kunyo moporwowok ani akwek ŋalek cepo manta kule ponto Weritap cito kamukeywek om koret kukalya miyotyonik.’’ Yoto kumwoci Yesu cicoto kule, “Ŋet yony, oŋnkitor kwiririŋuŋ nomen iwo ka!’’ 25Om yoto pakenke kuŋet cicoto kuyo om konyekap piko tokol, oŋnkutor kinyi nyo korwoye oŋnkuwecikey ka; kukostoti Yiyintet. 26Kukite piko tokol ce kimite yoto koromun! Oŋnkumuyo kukasta cek Yiyintet kumwoy kule, “Kacekäs pesyoni ŋalek cepo kakitat!’’ 27Om letutap coto, kunomen Yesu kuwo okoy wokunyor korurukintetap mosoret nye cekure Lefi kukepur konyi nye cekweye mosoret, kumwoci Yesu neto kule, “Nama cepetekey oko ani.’’ 28Yoto kuŋet Lefi kupakakta tukuk tokol oŋnkunomen kunam kupetakey Yesu. 29Yoto kwici Lefi Yesu sakwet nyewo koromun om kanyi, kimite yoto piko ce caŋ co ruruce mosoret oko piko alak kukepur tokol wanak. 30Kuŋunyŋuny Farasayek oko konetikwa cepo ntarastinek om wule mite konomikap Yesu kumwoy kule, “Omne soyomisye oŋnkoyesye akwek oko pic ce ruruce musoro, oko pic ce kicetay?’’ 31Kuwekyi Yesu kumwoci cekto kule, “Puryo kot kumöce piko ce sopcotin cepsakityantet, ntene piko ce mnyontos ce möce. 32Kipuryo kot aco ani kule cokur piko ce toponec, ntene kyaco kule sukuŋet kurenynkey piko co ponto miyotyonik.’’ 33Kumwoci piko alake Yesu kule, “Kire omik om pesyosyek alak oŋnkusome konomikap Yowana, mpo konomik cepo Farasayek kwiye kuyunyoto, ntene omne sukwomisyi oŋnkuyesyo konomikukyi?’’ 34Kuwekyi Yesu kumwoci cekto kule, “Omuci akwek omwoci pikap sakwet kule kukir omik ye tokupontokey cek cito nyo kemütisyi? Puryo kot kuyunyo! 35Mosukupunto pesyet nye mocipesyo cek oko cito nyo kemütisyi, kunyo om pesyosyecoto ye mosukukiris cekto omik.’’ 36Kumwoci Yesu cekto tyonkoconi kule, “Puryo ci nye poce yokwontet kisic kopukune siret nyelel oŋnkunopci siret nye yoswak, omnye ye kakwiy neto kuyunyoto, mosukupac siret nyelel kunyor koŋnta, nto siret nyelel nyo kocenopci kupuryo kot kunyolcintos oko siret nyo yoswaket. 37Puryo mpo ci nye roŋnkyini komek ce mwonec wonkinek ce yoswak, omnye ye kakwiy kuyunyoto, kumuce finyonik ce mwonec kuyeyi wonkinek ce yoswak, kutumntokey finyonik kupa wuy oŋnkuyeyo kworon wonkinek. 38Möce finyonik ce mwonec ceroŋnkyi wonkinek ce lelac. 39Puryo mpo ci nye ye kiye finyonik ce rucwok nye möce kule nto aye finyonik ce mwonec ce kururyo, omnye mwowu kule toponec finyonik co rucwok.’’

will be added

X\