1 Kuwecekey Yesu oyinetap Yortan kukonyor swametap Muyet Nyetilil, nye kisut neto okoy kupunto kitela. 2 Kuwany om wuloto pesyosyek artam, nteye kimite wuloto kusyem kulot Setani nyewo nyepo oyik neto. Kipuryo kiy nye kyome kuwany pesyosyecoto tokol, nteyu kowo kuwany kwam neto rupet. 3 Yoto kumwoci Setaninato neto kule, “Ye yiku nyi Weritap Yiyintet, mwoci panyi rwontocu kuweckey kwek mukatya.’’ 4 Kuwekyi Yesu kumwoci neto kule, “Mwowu silutekap Yiyintet kule, ‘Puryo kot kusope cito mukatya pate nkit!’ ’’ 5 Yoto kusut Setaninato Yesu kuwo parak, oŋnkuporci lakwar poytoyisyonikap koret tokol kumukul, 6 oŋnkumwoci kule, “Mosokoniŋ ani nyi woyinto nyi oko kamukeywek payte tukucu tokol, omnye kicekono ani tokol kunyo omuci okoci ci nye kacäm ani; 7 Kunyo ye kekutumwo ani nyi mosukwek cekuk cutecu tokol.’’ 8 Kuwekyi Yesu kumwoci neto kule, “Mwowu silutekap Yiyintet kule, ‘Misyini kutuŋnkyi say Mokoryontet Yiyinteŋuŋ oŋnkiyici neto yisyet nkit pate!’ ’’ 9 Kusut yec oyinoto cekwol yitik Yesu okoy Yerusalem, oŋnkumwoci kuyoŋe kusurutap kotap Yiyintet ye koy koromun, oŋnkumwoci kule, “Ye yiku nyi Weritap Yiyintet, wirtekey panyi kuceke yu okoy wepir ŋony; 10 omnye mwowu silutekap Yiyintet kule, ‘Mosukumwoci Yiyintet malaykanikyi kukwa kwokutaciŋ nyi.’ 11 Oko yec kule, ‘Mosukutaciŋ om yewuniyekwa mente kot kuryac kerenkokuk rwantet.’ ’’ 12 Kuwekyi Yesu kumwoci neto kule, “Mwowu silutekap Yiyintet kule, ‘Mente kot asyem alotu Mokoryontet Yiyinteŋuŋ’ ’’ 13 Nteyu kowo kusyem kulot Setani nyewo nyepo oyik Yesu okoy kuwany; kwasta okoy pesyet ake. 14 Yoto kuweckey Yesu kuco Kalilaya kuponto swametap Muyet Nyetilil. Kupunte lokoywek ce nöme neto koronoto tokol. 15 Kunetisye Yesu korikapkokwonikwa om wuloto, kucämnta piko tokol ŋalekap Yesu. 16 Kuwo Yesu okoy kupunto Nasaret wule kinere, nto kuyu wule kiyunto kopur nyi, kuwo ye kipesyetap Sapat okoy kotapkok. Nteye kimite orit, kuŋet kuyo kule asuman silutekap Yiyintet. 17 Yoto cikoci kitaputap workoyontet Isaya, kuŋany kitaput okoy kunyor ye kicesil kule: 18 “Oponte ani Muyetap Mokoryontet, omnye kaŋape ani mwayita saŋet omwoci pononik lokoywek ce toponec. Kweyokwo ani saŋet omwoci piko co rototin pesyet nye cityoktoy cekto, oko ye mosukukäste piko co koryotin, oŋnkyityakta piko co kicinyalil kupecikey, 19 oŋnkomwowu oporu kenyit nye mosukusope Mokoryontet pikyi.’’ 20 Yoto kuker Yesu kitaput oŋnkuketyi cito nye ripe, oŋnkupur ŋony; kuwec konyekwa piko tokol ce kimite kotapkok oŋnkukäs Yesu topon. 21 Yoto kuwec Yesu kumwoci cek kule, “Pesyoni ye kakwitita kupoyit manta ŋalecu silotin cu kalim akwek om yitikwok.’’ 22 Kucämnta oŋnkukite piko tokol ŋalekyi ce toponec ce toloyec ce kiŋalale kutinyi. Kumwoy picoto kule, “Puryo kot ku weritap Yosep nyitenyi?’’ 23 Kumwoci Yesu cekto kule, “Oŋnket kule mosomwowo ani akwek tyonkoconi kule, ‘Cepsakityantet, sopkey nyi nkit!’ Oŋnkomwowu yec kule, ‘Yiy nyi yec om wuli po koreŋuŋ tukuk co kicelim acek kule kiyokis om Kapernaum.’ 24 Kumwoy Yesu kule, komwowok ani akwek ŋalek cepo manta kule, ‘Puryo workoyo nye cecöme om korenyi. 25 Cinket kule po manta ŋalek kule kimite musukik ce caŋ om Israel om pesyosyekap Eriya, yo kipuryo kot kumite ropta koret tokol kuwany kenyisyek somok ok orok lö, yoto kunäm rupet koret tokol. 26 Ntene kipuryo kot ciyokto Eriya om pesyosyecoto kuwo wule mite akenke om musukik coto, ntene kiciyokto kuwo pate wule mite musuk akenke nyepo Sarepta om koretap Siton. 27 Kimite mpo yec pikap mutyenkenik ce caŋ Israel om pesyosyek ce kipo workoyontet Elisya, ntene puryo mpo akenke nye kicisop, tos pate Naman nyepo koretap Siriya.’ ’’ 28 Yoto kunyer koromun piko tokol ce kimite kotapkok orit yu kowo kulim ŋalecato komwoy Yesu. 29 Kuŋetyo cekto oŋnkunäm Yesu kocut kuŋete moŋonoto oŋnkukwer okoy kupunto tulwet parak nye kicetec moŋonoto kule wocitulye kuŋirte lakam. 30 Ntene kupunte neto yewuniyekwa oŋnkuwecikey arenyi ake. 31 Kurekto Yesu kuwo okoy kupunto Kapernaum moŋet nyepo Kalilaya, yoto kunet piko ye kipesyetap Sapat. 32 Ntene kukite piko konetisyenyi, omnye kinet kumwoy ŋalek ce kinyikisec koromun, oŋnku ŋalek ceponto kamukeywek. 33 Kimite yoto po kotapkok orit citake nye kiponto oyik ce miyotec, yoto kupol cicoto koromun om kutit nyewo kumwoy kule, 34 “Ye! Mokenec acek ne nyi Yesu nyepo Nasaret? Keco nyi kule cayarantec acek? Oŋnketiŋ ani nyi kule yiku nyi ŋo: Yiku Nyi Nyetilil nyepo Yiyintet.’’ 35 Kupolyi Yesu oyinot kumwoci kule, “Sis! Ŋete cito.’’ Yoto kumilyi oyinoto cicoto ŋony om taytap piko tokol, oŋnkuŋet kuwete cicoto nye kipuryo kot kwiye kiy mpo kisic. 36 Kukite piko tokol koromun, oŋnkutepekey cekto nkit kumwoy kule, “Ŋolyo ne nyi mwowu cici? Omnye polyini oyik ce miyotec om kamukeywek oko swamet okoy kumwey oyik. ’’ 37 Yoto kutisto ŋalekap Yesu kupunte koret tokol nye lekite koronoto. 38 Kuŋete Yesu kotapkok oŋnkuwo okoy kupunto kotap Simiyon. Wokunyor cepyosyetap pikoy nyepo Simon kumnyone yeset nyewo koromun. Kusom piko Yesu kule kukalya neto. 39 Kuwo Yesu oŋnkuyoŋe yepo komostap cepyosyanato, oŋnkukwet yeset, yoto kuwo yeset, kuŋet neto lakwar oŋnkucec kwici cekto yisyonutek. 40 Nteye kimite kurortoy asista, kusut piko pikwa ce kimnyontos porwonik wok tokol kukwa wule mite Yesu, kukemer Yesu yewuniyekyi metitap ci tokol nye kimnyone; kusopco cekto tokol. 41 Kuŋetye oyik piko alak ce caŋ, kupoloti kumwowu kule, “Yiku nyi Weritap Yiyintet!’’ Kupolyi Yesu oyicoto oŋnkuyete mente kuŋalal, omnye kinkete oyik kule Yesu kunye Ŋapanet. 42 Nto kayec koret pate, kunomen Yesu kuwo surukwenet wule momite piko, ntene kucec piko ce caŋ kuceŋat neto okoy wokunyor, nteye kotonyoru, kusyem kule ceyete neto mente kot kuwo wulyo ake kupakakta cekto. 43 Ntene kumwoci Yesu cek kule, “Misyino ani awo wamwayte lokoywek ce toponec cepo Yiyintet mpo moŋosyek alak, omnye kiyokwani Yiyintet comwowu ŋalecutecu.’’ 44 Yoto kumwayte Yesu ŋalek korikapkok cepo Yuteya.
