Luke 3

1Nto om kenyitap taman ok mut ye kipoytoyisyi Kinko Nyewo Taperiyo, kupoytoy Pontio Pilato koretap Yuteya, kupoytoy Erote koretap Kalilaya, kupoytoy mutakwam Filipo koretap Itureya oko koretap Tirakoniti, kupoytoy Lusaniya koretap Apilene. 2Nto tisik cewoyec ku Anas oko Kayafa. Om pesyosyecoto kucontyi ŋolyontetap Yiyintet Yowana weritap Sakariya kumite kitela. 3Yoto kuwesetote Yowana koret tokol nye lekite tapantap oyinetap Yortan, kumwoytoti kule, “Arenynkey ayaste miyotyonikwok, oŋnkyepatisanak, sukuŋet kukalyak Yiyintet miyotyonikwok.’’ 4Kuyu wulo kisilyo workoyontet Isaya om kitapunyi kule: “Kapole citake kitela, ‘Oyiytoci Mokoryontet arenyi, asat kurotakay arenyi nye mosukupunte! 5Misyini alakan wulyo tokol wule mite roroŋisyek; oŋnkyicat lakomosyek oko tulonok tokol. Cecul kuculokis orustunwek tokol co musotin. 6Mosukukäs pikap koret tokol kosopotetap Yiyintet.’ ’’ 7Yoto kukwa piko ce caŋ wule mite Yowana kule kupatisanec, kumwoci neto cek kule, “Akwek erenocu! Ŋo nye kwesowok kule omweye nyerunotetap Yiyintet nye karik kuco? 8Kunyo ayiy tukuk ce sukupor kule kwarenynkey akwek ayaste miyotyonikwok, ntene monte cecec ceŋalal omwowu kule, ‘Ceponte Apram nye kukonyo!’ Omnye komwowok ani kule, muce Yiyintet kunäm rwontocu oŋnkuwec kwici Apram lekok. 9Kunyo kocenömnci oywet kulekite kirintonokap ketik; nto ket ake tokol nyo puryo kot kwiye omik ce toponec mosiceyep nyo kulul oŋnkyewirci mata orit.’’ 10Kutepe piko Yowana kule, “Kunyo mokyiy ne acek yawut?’’ 11Kuwekyi kumwoci kule, “Ci tokol nye ponto sirok oyeny, misyini kukoci cito nyo puryo kot kuponto, mpo cito nyo ponto omik misyini kupciyta kuyunyoto.’’ 12Yoto kukwa mpo piko alak co ruruce mosoret kwocepatisan, oŋnkutepe cek Yowana kule, “Konetintet mokyiy ne acek?’’ 13Kumwoci Yowana cekto kule, “Monte ciruruc mosoret kutil co kiciyoyec.’’ 14Kutepe sikarek alak neto kule, “Nto acek, mokyiy ne?’’ Kumwoci co kule, “Monte cinumune citake tokol pesan om swama, nto om aret nyepo mwiynan; roke kuyemak musyaremwoŋ.’’ 15Nteyu kimite piko tokol kukonye ŋalek ce mokwiyokis kutintentos om kasoteywekwa om ŋalekap Yowana, kule pesyet ake neto kunye Ŋapanet. 16Yoto kumwoci Yowana piko tokol kule, “Opotisonenok ani peko, ntene coni om letumwani citake nyewo nye ponto swamet kupëlo ani, nye puryo kot kumisyino ani atyac porokap kweyonikyi. Neto nyoto nye mosukupatisanenak akwek Muyet Nyetilil oko mata. 17Pontonu neto sweswet nye kanäme yewuniyekyi; nye mokusese nkanuk oŋnkururukyi nkanuk cokenikyi nto moriryek kupele co mata nye momise!’’ 18Wanak oko ŋalecutecu, kumwoy Yowana ŋalek alak ce caŋ kurorci piko lokoywek ce toponec. 19Yoto kupolyi Yowana potisonintet poytoyintet Erote om ŋalek ce nömekey oko Erotiya korketap mutakwam nye kimüt Erote, oko om ŋalek alak ce caŋ cepo ŋokis ce kikwiy Erote. 20Yoto kutosyi Erote miyotyet ake omnye kinäm Yowana oŋnkukerta mopusi. 21Nteyu kowo cepatisan piko tokol, yoto cepatisan mpo Yesu. Nteye kimite Yesu kusome, kuyatakay wulin po torot, 22kuco kurekyi neto Muyet Nyetilil nye kerkey porto kuyu swarar. Kucone kurset torot kumwoy kule, “Nyi kunye yiku Werimwani camanet, nye oŋerekyiŋ ani nyi koromun.’’ 23Kucec Yesu kwiyis yisyenyi kuponto kenyisyek ce puntoy sosom; Cisote kule neto kunye weritap Yosep nye ki weritap Eri, 24weritap Matati, weritap Lefi, weritap Merek, weritap Yanai, weritap Yosep, 25weritap Matatiya, weritap Amos, weritap Naum, weritap Esil, weritap Nakay, 26weritap Masati, weritap Matatiya, weritap Semeyin, weritap Yosek, weritap Yota, 27weritap Yowanan, weritap Resa, weritap Serupapel, weritap Salatiyeta, weritap Neri, 28weritap Meleci, weritap Atti, weritap Kosma, weritap Elmatam, weritap Eri, 29weritap Yoswa, weritap Eriesa, weritap Yorim, weritap Mata, weritap Lefi, 30weritap Simiyon, weritap Yuta, weritap Yosep, weritap Yonam, weritap Eliyakim, 31weritap Meleya, weritap Menna, weritap Matasa, weritap Nasan, weritap Tauti, 32weritap Yese, weritap Opet, weritap Poas, weritap Solomon, weritap Nasyon, 33weritap Aminatap, weritap Atamin, weritap Arin, weritap Eseron, weritap Peres, weritap Yuta, 34weritap Yakopo, weritap Isaka, weritap Apram, weritap Tera, weritap Nakor, 35weritap Seruk, weritap Reyu, weritap Pelek, weritap Eper, weritap Syella, 36weritap Kanan, weritap Arapasat, weritap Syem, weritap Nuwa, weritap Lamek, 37weritap Misusera, weritap Enok, weritap Yaret, weritap Makalalel, weritap Kanan, 38weritap Enos, weritap Sesi, weritap Atam, weritap Yiyintet.

will be added

X\