Luke 24

1Nto kerir koret pate ye kipesyetap Santey, kupa koruk okoy kupunto ye kimite mwenet, kusute cek mwaninek co poŋu ce kikikwiyta. 2Ntene wokunyor kucewunukto rwantet nye kicekere mwenet. 3Ntowo kowut orit, yoto kipuryo kot kunyor portap Mokoryontet Yesu. 4Nteye kimite korucoto kokite, yoto pakenke kukwa piko oyeny ce kelac sirok ce lelac ce lekecectos onŋkuyoŋe komos om ye kimite cekto. 5Kumuyo korucoto koromun, oŋnkuwec metewokwa kukäs ŋony, kumwoci picoto cek kule, “Omne socenye akwek, wule mite muswek ce kipok neto cito nye sopot? 6Puryo kot kumite yu; kokotutune met. Asot pa ŋalek co kimwowok akwek neto ye kimite Kalilaya kule, 7‘Mosicenäm weritap cito oŋnkyikoyito kunäm yewuniyekap piko ce miyotec; oŋnkuwo cewuyitoci murtowontet, nteye pesyetap somok ciŋet kotutune met.’ ’’ 8Yoto kusot korucoto ŋalekap Yesu. 9Kunomene cek wuloto kimite mwenet; oŋnkupa wokumwoci ŋalek tokol kiyokik taman ok akenke oko piko alak tokol. 10Korucoto ku mpo, Mariyam nyepo moŋetap Maktala, oko Yoan, oko Mariyam kametitap Yakopo; cekto coto wanak oko koruk alak. Kumwoci cek Kiyokik ŋalek tokol. 11Ntene kusot Kiyokik yoto kule, perperyo pate ŋalek ce komwoy koruk, yoto kutay macäm ŋalekwa. 12Ntene kuŋet Petero oŋnkulapat okoy ye kimite mwenet, ntowo kupunto; kuyim kukoyito; yoto kukäs pate sirok co cemuytoy musto, ntene kipuryo kiy ake tokol. Kunomen kuweckey kuwo ka kokitote tukuk ce kukwiyokis. 13Om pesyonoto akenke, ye kimite kupeti konomik oyeny kaytake nye cekure Emawus nye kimite kilomitanik taman kuceke Yerusalem. 14Nteye kimite cek kupeti om aran kuŋololoti kurwoke tukuk ce kukwiyokis, 15yoto kuco Yesu ye kimite cek oŋnkupetakey wanak tokol. 16Kukäs cek neto, ntene kipuryo kot konket kule neto ku ŋo. 17Kumwoci neto cek kule, “Ŋal ne cu oŋololoti akwek yu omite opeti?’’ Kuyoŋ cek om yoto konyer kusiriny tokoywekwa. 18Kuwekyi akenke om cekto nye cekure Kliopa kumwoci kule, “Nyi nkit pate tontet nye mite Yerusalem nye puryo kot konkete tukuk ce kukwiyokis om wuloto?’’ 19Kutepe neto cek kule, “Kiy nye kukwiyakay?’’ Kuwec cek kumwoci kule, “Ŋalekap Yesu nyepo Nasaret, cito nye ku workoyo nyepo swamet om ŋalek ce kukwiye om wule mite Yiyintet oko wule mite piko tokol. 20Ntene kunyo kunäm tisik kyacek cewoyec oko poytoyik oŋnkuwosontyi kumutyi musankut cepakäc kume cewuyitoci murtowontet. 21Kunyo kucisot acek kule neto nye mokusop kusor pikap Israel! Kunyo kutokumite ŋalekyo tokol yo, pesyetap somok yawut nyi kuceke kweyokis ŋalecato. 22Kunyi kucikite acek koromun koruk alak ce kucepontekey tokol ce kamusta pesyoni kerir koret pate kupa wule mite mwenet, 23ntene puryo kot wokunyor pornyi, kuweckey cek oŋnkukwa kwokumwoy kule keporcikey kuŋoŋnkyi malaykanik ce komwoci cek kule, sopot neto. 24Kapa mpo pesyoni piko alake ce kucepontekey acek tokol okoy wule mite mwenet, wokunyor mpecek manta kuyu wulo komwoytoy koruk, ntene puryo kot kukäs cekto neto.’’ 25Kuwekyi Yesu kumwoci cek kule, “Oyiku akwek pic ce perper, ce oponte mukuleywek ce wuyec ye mocäm ŋalek tokol ce kimwoy workoyik! 26Kipuryo kot kumisyini kutaŋany Ŋapanet om tukucutecu sukowut woyin nyi?’’ 27Yoto kuporci kumwoci neto cek ŋalek tokol ce kicemwoy ce nöme neto om silutekap Yiyintet, kuceke kitaputap Moses oko silutek tokol cepo workoyik. 28Nteyu kowo kukwa cek okoy kurikta kayta nye kipeti, yoto kuyiytakey neto nye möce kule atil akeyte cek kuwo tay; 29ntene kurany cekto neto kumwoci kule, “Cipur oko acek, omnye kokwimen, kunyo mite kurotorote koret.’’ Kuwo neto koto orit wokopur oko cekto. 30Nteyu kowo kopur neto oko cek kwomis, kunäm neto mukatyantet oŋnkusomnci oŋnkupetec oŋnkukoci cek. 31Yoto kuŋoŋokis konyekwa kusow konket neto, oŋnkupote konyekwa. 32Kuŋalal konomikey oyeny kwicek nkit kumwoy kule, “Kopuryo kot kwamec acek montuwok yo koŋololwec neto om aran kuŋoŋwec ŋalek ce mite silutekap Yiyintet.’’ 33Yoto pakenke kuŋetyo cek lakwar, oŋnkunomen kupa Yerusalem; wokunyor kiyokik cut taman ok akenke ok piko alak kumite keruruckey wanak. Kimite yoto cut kuŋolole kumwowu kule, 34“Kokotutune met mokoryontet manta! Omnye kokuporcikey Simon!’’ 35Yoto kuporci kumwoci konomik co koyeny cut ŋalek tokol ce keyokis om aran oko ye kosowu kunket cek Mokoryontet ye kopetece mukatyantet. 36Nteye kitokumite cek kuporcini kumwocini cut ŋalecato, kuco pakenke lakwar Mokoryontet nkit oŋnkuyoŋe kwenumwa, oŋnkumwoci cek kule, “Opurte kalyet.’’ 37Kumuyo cek koromun; kusote kule toskoy ceköse atotoy. 38Ntene kumwoci neto cek kule, “Omne somuye kuyunyi aŋnkasot om kasoteywekwok ŋal ceyucu? 39Akäs pa akwek yewuniyekwani oko kerenkokwani. Ani nyitenyi. Anäma ani pa akwek oŋnkokäs; omnye puryo kot kuponto atotoy panyek oko koyek kuyu cu oponte ani.’’ 40Kumwoy ŋalecato kuyunyoto oŋnkuporci cek yewuniyekyi oko kerenkokyi. 41Nteye kimite cek kutompo kot kuyen kucäm kule manta ŋalecata om ŋerekwek ce kiponto oko kakitatet; yoto kutepe neto cek kule, “Oponte akwek om yu kiy nye moyam?’’ 42Kukoci cek neto purpuryontet nye kaciyo kurur. 43Kunäm neto oŋnkwam kuköse cek om konyekwa. 44Kumwoci Yesu cek kule, “Ŋalecutecu kuco kyomwowo akwek ye kitocepontekey, yo kyomwowok kule, mosukwitita kupoyit manta ŋalek tokol ce kicesil ce nömo ani om ntarastinekap Moses oko silutekap workoyik oko cepo tumwonikap kakastayet.’’ 45Yoto kuŋany neto kasoteywekwa kunket silutekap Yiyintet, 46oŋnkumwoci cek kule, “Ŋalecutecu kuco kicesil kule, ‘Misyini kutaŋany Ŋapanet; oŋnkyiŋet kotutune met ye pesyetap somok. 47Oko kule; om kaynenyi mosicemwoci pikap koret tokol lokoywek cepo reŋetapkey oko kakalyayetap miyotyonik; kuceke ŋalecato Yerusalem.’ 48Kunyo oyiku akwek muncururwanikwani cepo ŋalecutecu. 49Kunyo mosoyoku ani nkit kuco wule omite akwek neto nyo kikurto Papamwani. Ntene opur moŋonitenyi okoy ye kocilokwok akwek swamet nye cone torot.’’ 50Yoto kuntoci Yesu cek kukwer kuŋete moŋet kupa okoy kupunto Pesaniya, ntowo kupunto yoto kunömnci Yesu yewuniyekyi torot kusomnci cekto. 51Nteye kimite kusomncini cekto kupeyok kupciykey om wule mite cek, cesut neto kuwo torot. 52Yoto kukutuny cek kusay Yesu, oŋnkuweckey tokol kupa Yerusalem kuponto ŋerekwek ce caŋ. 53Yoto kopurune cek pesyosyek tokol kotap Yiyintet orit kukostoy Yiyintet.

will be added

X\