Luke 23

1Yoto kuŋetyo luketap piko tokol oŋnkukwer Yesu okoy kupunto taytap Pilato. 2Oŋnkucec cek kuwosontyi neto kumwoy kule, “Kucenyoru acek cici kumite kumose pikap korenyacek, oŋnkuyete kukerekta piko mente kukweci mosoret Kinko Nyewo, oŋnkukurkey kule oyiku Ŋapanet!’’ 3Kutepe Pilato kumwoci Yesu kule, “Yiku nyi Kinko nyepo Yutayek?’’ Kuwekyi Yesu kumwoci neto kule, “Nyi nye mwowu.’’ 4Yoto kumwoci Pilato tisik cewoyec oko luketap piko tokol kule, “Mnanyorte ani cici lelis nye miyat.’’ 5Ntene kutosyikey cek kumwoy om swamet kule, “Kwonykwonye kumose neto piko, kunet om koretap Yuteya tokol; kiceke Kalilaya okoy kunyi mite yawut wuli.’’ 6Ntowo kulim Pilato kuyunyoto, kutep kule, “Po cicitenyi Kalilaya?’’ 7Nteyu kowo kunket kule cepoytowune Yesu koretap Erote, kukoyito Yesu cekwer kuwo wule mite Erote, omnye kimite nyo pesyosyecoto Yerusalem. 8Nteye kotoköse Erote Yesu, kuŋerec koromun, omnye kikilim neto ŋalek ce nöme Yesu, kunyo kisotyini kule mosukukäs kwiye pelutok cepo kakitat. 9Kutepe Erote Yesu teputek ce caŋ, ntene kusis Yesu nye kipuryo kot kuwekyi neto ŋolyo mpo akenke. 10Yoto kuyoŋ tisik cewoyec oko konetikap ntarastinek oŋnkuwosontyi Yesu kumwoy ŋalek cepo swama. 11Kunyil oŋnkurorci Erote oko sikarekyi Yesu, oŋnkulokyi siret nye topon; oŋnkuketita cekwer kuwo wule mite Pilato. 12Kuceke pesyonoto kucomnyo kwek coronut yec Erote oko Pilato, omnye kisenkerekey cek kunyo. 13Kukur Pilato kukwa kopur wanak tisik cewoyec oko poytoyik oko piko, 14oŋnkumwoci cek kule, “Kokweru akwek cici kuco wule omite ani oŋnkwowosontyi omwowu kule, mose piko kutay kurup ntarastinek. Kunyo kokir ŋalekyi om yu po taymwakwek, ntene puryo kot onyoru ani lelis nye miyat nye ponto kuyu wulo omwoytoy akwek. 15Kunyo mpo Erote puryo kot kunyorta neto lelis, omnye koketwec acek. Kunyo puryo kot kwiy neto ŋolyo nye miyat nye misyini cepakäce. 16Mosokoyite ani wocepas korokonik, nteye kapok atyakte.’’ 17[Om pesyetap sakwetap Yutayek nye cekure Keytayet kimuce Pilato kutyokyi piko mopusyontet akenke.] 18Yoto kupol piko tokol koromun kumwoy kule, “Pakäc cici! Oŋnkityokwec acek Parapa!’’ 19(Kicerat cekerta Parapa mopusi om ŋalek ce kikwonykwonyokis om moŋet oko omnye kiporis neto.) 20Kuŋololyi Pilato yec piko, omnye kimöce kule atyakte Yesu. 21Ntene kutosyikey piko tokol kupol kumwoy kule, “Wuyite! Wuyite! Wuyitoci neto murtowontet!’’ 22Kumwoci Pilato yec piko aret nyepo somok kule, “Omne! Lelis ne nye kukwiy? Puryo kot anyoru ani lelis nye miyat nye misyini cepakäce! Kunyo mokoyite ani wocepas aŋnkatyakte.’’ 23Ntene kutosyikey piko tokol kupol koromun kumwoy om swamet kule, “Misyini cewuyitoci murtowontet.’’ Nto om letut kupëlis polotetap piko. 24Yoto kumutyi Pilato musankut Yesu kuyu wulo komoktoy cekto. 25Kutyakta Pilato cito nyo komöce cekto, nyoto kunye kiratat om mopusi om ŋalekap kwankwaŋatet oko porisyet, oŋnkukoyito Yesu kuyiyta kuyu wulo komoktoy cek. 26Nteye kimite cikwer Yesu, cetuye om aran Simon nyepo koretap Kurene nye kicone koret saŋ kuconi moŋet, kunäm cek neto oŋnkyikoci kukonopat murtowontet oŋnkunam letutap Yesu. 27Kupa piko ce caŋ kurup Yesu let oko koruk ce kiriroti kusyekotikey montuwu kurire Yesu. 28Kuwekyikey Yesu korucoto oŋnkumwoci kule, “Tipikap Yerusalem, monte cerirena ani, arirekey akwek nkit pate oko lekokwok. 29Omnye mosukupunto pesyosyek ce kwoni ce mosicemwoy piko kule, ‘Ŋerekotin koruk co kisonon, oko montuwok ce puryo kot kuyiy oko kitinak ce puryo kot kureris.’ 30Om pesyosyecoto ye mosukumwoci piko tulonok kule, ‘Olulyec acek!’ Oŋnkumwoci lakemosyek kule, ‘Awunyec acek!’ 31Omnye ye yicini piko ŋalek ceyucu ketit nye ata, mosukwiy kulene nye yamat?’’ 32Yoto cekwer piko alak oyeny ce kikowurta wocepakäc oko Yesu. 33Nteyu kowo ciyitita cek ye cekure kule, “Rokyetap Metit.’’ Cekwertoci Yesu murtowontet om yoto, neto oko pikey oyeny, kopurune ake yewutap tay, kopurune ake yewutap let. 34Kuŋalal Yesu kumwoy kule, “Papa, kalye nyi cek! Omnye puryo kot kunkete kito nye yiye.’’ Kupcicin sikarek sirokyi kuporci kirotyet. 35Kuyoŋ yoto piko ce kimite kuköse ye kimite kuroricini koncurure poytoyik Yesu kumwowu kule, “Kisope neto piko alak; kunyo kusopkey pa neto nkit ye cici kunye Ŋapanet nye kikwey Yiyintet!’’ 36Kurorici mpo sikarek Yesu, oŋnkukwa ye kimite neto oŋnkukoci finyonik ce mintililec koromun. 37Oŋnkumwoci kule, “Ye yiku nyi Kinko nyepo Yutayek, sopkey pa nyi nkit.’’ 38Cesil murtowontet parak ŋalecu kule, “NYI KU KINKO NYEPO YUTAYEK.’’ 39Yoto kuŋalal cito akenke om pikey oyeny nye kiwuyitot kucup Yesu kumwoy kule, “Puryo kot yiku nyi ne Ŋapanet? Kunyo sopkey pa nyi nkit oŋnkisopec mpo acek.’’ 40Ntene kuwekyi kupolyi cito nyin ake kumwoci kule, “Puryo kot yweyi nyi Yiyintet? Omnye ceponte musankut nye kerkey oko nyenyi. 41Ntene po musankut nyinyo manta, omnye kocenyoru acek ce rokenec om tukuk ce kiciy. Ntene puryo kot kwiy cici lelis nye miyat.’’ 42Kumwoci cicoto Yesu kule, “Yesu oŋnkisota ani om pesyet nye coni om poytoyisyeŋuŋ.’’ 43Kuwekyi Yesu kumwoci cicoto kule, “Komwowuŋ ani ŋalek cepo manta kule, om pesyoni mosicipur wanak oko ani om koretap Yiyintet wule topon.’’ 44Ntowo kupunto sawet lö nyepo pet, kunäm menonet koret tokol okoy kupunto sawet sokol nyepo kosoleny. 45Yoto kutay asista nye meluwu, kukerer kupciwunekey oyeny siret nye cepciye otepto nye Nyetilil om kotap Yiyintet. 46Kokurto Yesu om kutit nyewo kumwoy kule, “Papa, okocini ani soponmwani yewuniyekuk.’’ Nteyu kowo kuwany kumwoy kuyunyoto, kume. 47Nteye kotoköse nyewo nyepo sikarek tukuk ce keyokis, kukasta Yiyintet kumwoy kule, “Kopuryo kot kupunto cici lelis manta.’’ 48Nteyu kowo kukäs piko ce kikerurukyikey yoto kwokukasta, tukuk ce keyokis, kunomen cek kuweckey kupa kestonikwa kusyekotikey montuwu. 49Ntene kuyoŋ ye low kuminiŋ piko co kinkete Yesu, oko koruk co kikwontoykey neto kuceke Kalilaya. Kukäs cek tokol ŋalecutecu. 50- 51Kimite citake nye cekure Yosep, nye kirwokin, nyepo kokwetap Yutayek oŋnku ci nye ki siken koromun. Kipuryo kot kucäm neto kirwoketap cut oko tukuk ce kikwiy. Kipo neto moŋetap Yutayek nye cekure Arimaseya. Kimite neto kukene poytoyisyetap Yiyintet. 52Kuwo cicoto wule kimite Pilato oŋnkusom cikoci neto portap Yesu. 53Kunum kurekune musto kucone murtowontet, oŋnkurate suket nyelel, oŋnkukoci mwenet nye kicepäl rwantet kwek kepen, nye kipuryo kot cetupci citake tokol. 54Kipesyet nyoto nye kiceyiytoykey omnye kikirik kwek pesyetap Sapat. 55Kuwetokey Yosep koruk co kinomu Yesu kuceke Kalilaya okoy wokukäs cek topon mwenet oko wule kacemuyta portap Yesu. 56Oŋnkunomen cek kuweckey kupa ka wokuyiyta mwaninek co poŋu sukuŋet kusut kwokuyile musto. Yoto komuny cekto om pesyetap Sapat kuyu wule yunto ntarastinek.

will be added

X\