Luke 22

1Nteyu kowo kurikta kupunto pesyetap sakwetap mukatyantet nye mokutunat, nyoto kunye sakwetap Yutayek nye cekure Keytayet. 2Kimite yoto tisik cewoyec oko konetikap ntarastinek kucenye aret nye muce kupakäce Yesu kume, omnye kiywey cekto piko. 3Yoto kowut Setanit Yuta nye cekure Isikaryoti nye ki akenke om kiyokikap Yesu taman ok oyeny. 4Kunomen Yuta kuwo wule mite tisik cewoyec oko piko cewoyec ce ripe kotap Yiyintet, oŋnkuwokuŋololyin oko cek wule muktoy neto kuŋomnto Yesu oŋnkukoci cek kunäm. 5Kuŋerec cek koromun oŋnkumwoci cek Yuta kule mocekoniŋ pesanik. 6Kucäm Yuta kuyunyoto oŋnkucec kuceny poroyinto nye topon nye muce neto kuŋomnte Yesu kunäm cek nye puryo kot kunkete piko. 7Yoto kupunto pesyetap sakwetap mukatyantet nye mokutunat, ye ceyenye keciryetap Keytayet kwek korosyo oŋnkyam. 8Yoto kuyokto Yesu Petero oko Yowana oŋnkunkolontyi kumwoci kule, “Ape woyiytowec kyam omikap pesyetap Keytayet.’’ Kutepe cek Yesu kule, 9“Ono wule möce nyi kule woceyiyte acek?’’ 10Kumwoci Yesu cek kule, “Alim pa, ape nteye kopunte moŋet mosukutuyenok akwek citake nye toronu teretap peko, arup cicoto okoy koto nye kewut. 11Omwoci citap koto kule, ‘Komwowuŋ konetintet kule, ono kotap toyek nye moyomisye ani oko konomikwani omikap Keytayet?’ 12Mosukuporwok cicoto koto nyewo nye satat topon nye mite koto parak; wayiyte akwek kiy ake tokol om wuloto.’’ 13Kupa cek okoy wokunyor kiy ake tokol kumite kuyu wulo kakamwayta Yesu. Kuyiyta cek omikap Keytayet. 14Ntowo kupunto ye kyomisyi, kopur Yesu ŋony wanak oko Kiyokik. 15Yoto kumwoci Yesu cek kule, “Kwomöce ani koromun kule kyomisye wanak oko akwek omicu po pesyetap Keytayet kutompo kot ataŋany ani! 16Omnye komwowok ani akwek kule, puryo kot toyome ani yec mpo kisic okokoy cikoci wule cemoktoy om poytoyisyetap Yiyintet.’’ 17Yoto kunäm Yesu cikompet oŋnkusomnci kukasta Yiyintet, kumwoy kule, “Onäm oŋnkoye opcicine akwek nkit, 18omnye komwowok ani akwek kule, kuceke pesyoni, komo toye ani pekap omikap ketik ce cekure sapipunek okoy ye kaco poytoyisyetap Yiyintet.’’ 19Kuyunyoto kunäm mukatyantet oŋnkusomnci kukasta Yiyintet, oŋnkupetec oŋnkukoci cek, oŋnkumwoy kule, “Nyi kunye pormwani, [nye kacekon kupo akwek, oyiye kuyunyitenyi ye asoteno ani akwek.’’ 20Kuyunyoto yec yu kowo kupok omikap kosoleny, kunam Yesu cikompet, oŋnkumwoy kule, “Cikomponi kunye Kirotyet nyelel nyepo korotikwani ce kicitotowok akwek.’’] 21“Ntene akäs pa, yewutap neto cito nye ŋomnto ani, nye mite cepontekey kyomisye meset akenke oko ani! 22Omnye ŋalek cepo manta kucu kule, weti Weritap cito kuyu wule kiceyiytoci, ntene mite kwapi neto cito nyo ŋomntoy!’’ 23Yoto kucec konomik kutepekey cek kwicek nkit kumwoy kule, “Ŋo om cekto nye wokwiye ŋolyontoni?’’ 24Yoto kuco tintenotet om kwenutap kiyokik kule ŋo om cekto nye cinket kule nyewo kupëlis. 25Kumwoci Yesu cek kule, “Ponto Kinkonikap lamek kamukeywek kupayta piko, oŋnkyekure poytoyik kule, ‘Coronutekap piko.’ 26Ntene puryo kot kuyunyo om wule omite akwek, misyini nyewo om wule omite akwek kusutkey kwek nye miniŋ, nto nye kantoyin kunye yiyisyi kukolyoyisyi. 27Omnye ŋo nyewo kupëlis, cito nyo pure meset kwomis nto cito nyo yosyi oŋnkusut? Cepo manta ku kule neto nyoto ku cito nyo pure meset. Ntene amite ani kwenumwakwek kuyu ci nye oyiwok akwek yisyet. 28“Kwopur ani oko akwek, kunyo kwopunte syemutok kwani tokol. 29Kunyo kuyu wulo kikono ani Papamwani Poytoyisyet, kunyo kakonok mpo ani akwek kamukeywek. 30Sukuŋet oyomisye oŋnkoyesye mesemwani om poytoyisyemwani, oŋnkopure ŋecerok cewoyec omutyi musankut aretap pikap Israel co taman ok oyeny.’’ 31Kumwoy Yesu kule, “Simon! Simon! Käs pa, kamac Setanit kule asesak akwek tokol kuyu wulo sestoy cito nkanuk oŋnkupciy nkanuk oko moriryek. 32Ntene kosomuŋ ani nyi Simon, kule sukuŋet mente kot kupok koyeneŋuŋ, ntene om wule mite nyi nkit, ye keweckey nyi kwilakisye om wule omite ani, kumisyini kwil mpo yeyaŋuŋ.’’ 33Kumwoy Petero kule, “Mokoryontet, oyiku ani yiytat cerotyo mopusi oko nyi oŋnkyepoku mpo tukway!’’ 34Kumwoy Yesu kule, “Komwowok ani nyi Petero kule, puryo kot koncure kurkonkit om kwomowutap pesyoni okoy tuckey nyi aret somok mwowu kule puryo kot oŋnketo ani?’’ 35Kumwoci Yesu cek kule, “Yo kyoyoktok ani akwek pesyet itye nye kipuryo kot anämate munyenkutap pesanik oko lolonik oko kweyonik, mite ra kiy nye kipotwok akwek yoto?’’ Kuwec cek kumwoy kule, “Puryo kiy nye kipotwec.’’ 36Yoto kumwoci Yesu cek kule, “Kunyo kunäm yawut ci tokol nye puryo kot kuponto munyenkutap pesanik oko lolet, nto ci tokol nye puryo kot kuponto rotwetap cok, misyini nyoto kwalya sirenyi oŋnkwale rotwet. 37Omnye komwowok ani kule, misyini kwitita kupoyit manta silutekap Yiyintet om wule omite ani co mwowu kule, ‘Kiciyitito neto piko ce miyotec co yirye ntarastinek.’ Omnye mite kwititoy ŋalek co kicesil ce nömo ani.’’ 38Kumwoy cekto kule, “Mokoryontet, käs pa, okyu rotok.’’ Kumwoci Yesu cek kule, “Kayem.’’ 39Kunomen Yesu kuyu wulo yunto kopur nyi nyepo kwak, kuwo okoy kupunto tulwetap ketik ce cekure Seituninek, yoto kupetakey neto kiyokikyi. 40Nteyu kowo kupunto yoto, kumwoci cek kule, “Osom sukuŋet mente kot osuci onyoru akwek syemutok.’’ 41Yoto kunata Yesu kuwete ye kimite cek kuwo ye low kisic ye muce kutic rwantet ye kacewirta, oŋnkukutuny kusom kumwoy kule, 42“Papa, ye cöme nyi numuneno ani cikomponi, ntene puryo kot kuyu wulo omoktoy ani, ntene kwiyokis kuyu wulo moktoy nyi.’’ 43[Yoto kuporkey malayket nye cone torot oŋnkutitir neto kukoci swamet. 44Kusot oŋnkutaŋany koromun, ntene kutosyikey kusom koromun, okoy kurotune kiyotik ce kerkey korotik ce kitecini ŋony.] 45Kuŋete Yesu ŋony om ye kimite kusome, oŋnkuwo kuketitakey ye kimite konomik, wokunyor kumite koruy om nyalilya. 46Kumwoci Yesu cek kule, “Omne soruye akwek? Oŋetye oŋnkosom sukuŋet monte osuci onyoru syemutok.’’ 47Nteye kimite Yesu tokuŋolole, kupun luketap piko ce kintocini Yuta nye ki akenke om konomik taman ok oyeny. Kuco Yuta okoy ye mite Yesu oŋnkutoroc kuŋatut. 48Ntene kumwoci Yesu neto kule, “Ŋatutani kunye ŋomnte nyi Weritap cito?’’ 49Nteye kotoköse konomikyi kito nye mosukwiyakay kumwoy kule, “Mokoryontet, ceyepe acek rotok?’’ 50Yoto kuyepis akenke om cek kuyep mutworintetap tisintet nyewo kulot yititap tay. 51Kumwoy Yesu om yoto kule, “Ayaste kayem nyoto!’’ Kunäm Yesu yititap cicoto oŋnkusop kusop. 52Yoto kumwoci Yesu tisik cewoyec oko kantoyik cewoyec ce ripe kotap Yiyintet, oko poyik ce kikwa kwokunäm neto, kumwoci kule, “Kakwa akwek kuyu nye omöce kule cenam corin? Omnye kakwante rotokap cok oko runkunek? 53Nteyu kwopontokey ani oko akwek pesyosyek tokol om kotap Yiyintet, ntene puryo kot asyem akwek kule cenäma ani yoto. Ntene nyimwoŋ sawet nyi, nye poytoyisyi menonet.’’ 54Yoto kunäm cek Yesu oŋnkukwer okoy kupunto kaytap Tisintet Nyewo. Kunam kurup Petero letut kuloyityi kuminiŋ. 55Nteyu kowo cila mata yepo kwenutap saŋntap kayta, kopur piko kuyuye mata, yoto kuco mpene Petero oŋnkupur otepto nyenyi om ye kimite cekto. 56Nteye kotoköse korko nye mutworin kukekweny mata Petero, kukäs topon; oŋnkumwoy kule, “Kopontokey cici Yesu!’’ 57Ntene kutuckey kutoyis Petero kumwoci korkonoto kule, “Cepyosyani, puryo kot oŋnket ani cico!’’ 58Om letut yec kuminiŋ, kukäs citake Petero, oŋnkumwoy kule, “Mpenyi yiku akenke nye kepontekey oko Yesu!’’ Ntene kumwoy Petero kule, “Puryo kot ku ani!’’ 59Om letut yec kukopok sawet akenke, kumwoy citake yec om swamet kule, “Manta nye puryo kot kumite tintenot, kopontokey cici oko Yesu, omnye po mpene cici koretap Kalilaya.’’ 60Ntene kuwec Petero kumwoy kule, “Puryo kot oŋnket ani kito nye mwowu nyi.’’ Yoto pakenke kumite Petero kutokuŋolole, koncur kurkonkit. 61Kuweckey Mokoryontet Yesu kukäs Petero. Yoto kusot Petero ŋolyontetap Mokoryontet nyo kumwocini neto kule, “Kutompo kot koncur kurkonkit om kwomowutap pesyoni, mesetoyisye nyi tuckey aret somok mwowu kule puryo kot oŋnketo ani.’’ 62Kumiŋnto Petero kuwo saŋ, oŋnkurir lokik koromun. 63Kurorici kucup piko ce kiripe Yesu, oŋnkupir neto. 64Kurat konyekyi oŋnkutepe kule, “Ŋor, ŋo nyi kasyeciŋ nyi!’’ 65Oŋnkuŋalal cek kucup kumwoci Yesu ŋalek ce caŋ ce miyotec ce kincurure. 66Nteyu kowo kuyec koret, kutuyo wanak poyikap Yutayek oko tisik cewoyec oko konetikap ntarastinek, yoto kukwer cek Yesu kuco kokwemwa. 67Kutepe cek Yesu kule, “Mwowec acek, yiku nyi Ŋapanet?’’ Kuwec Yesu kumwoy kule, “Nka kot komwowok ani akwek kupuryo kot oyeni; 68kunyo nka kot katepenak ani akwek teput kupuryo kot owekwo. 69Ntene kuceke yawut oŋnkutosyikey kuwo tay mosukopurune Weritap cito yewutap tay nyepo Yiyintet nyepo kamukeywek tokol.’’ 70Kumwoy cek kule, “Kunyo yiku nyi so Weritap Yiyintet?’’ Kuwekyi Yesu kumwoci cek kule, “Akwek ce omwowu kule oyiku ani.’’ 71Yoto kumwoy cek kule, “Komo cemöce acek muncururwanik alak omnye kacelim acek nkit ŋalek ce kwone kutinyi nkit!’’

will be added

X\