Luke 21

1Yoto kukäs Yesu piko ce mokoren ce kikocini kokotutekwa sontukut nye cekonore pesanikap kotap Yiyintet. 2Yoto kukäs om yoto korko panan nye musuk kukocini mpene orit kafunek oyeny; 3kumwoy Yesu kule, “Komwowok ani akwek ŋalek cepo manta kule, kekoci panani musuk ce caŋ kusir ce kekoci piko alake tokol, 4omnye kokon piko alake tokol kokotutekwa om ce koŋetune ce caŋ cepo mokoryontimwa. Ntene om wule mite korkoni panan kuyu wule yunto neto kokukoci tokol ce kuponto ce kwekolyekey om sopon nyi.’’ 5Kimite kuŋolole piko alake om yoto ŋalek ce nöme toponiyetap kotap Yiyintet, oko rwontok ce toponec ce kicetece oko kokotutek ce kicikase. Kumwoy Yesu kule, 6“Tukucu tokol cu oköse akwek yawut, mosukupunto pesyet nye puryo kot kuŋetune rwontocu yu mite yawut, mosicipuryet tokol oŋnkyewirci ŋony.’’ 7Kutepe piko Yesu kule, “Konetintet, mosukupunto ŋalecutecu pesyo ne? Oŋnkukiy ne nye pelutyet nye poru kule kopunto pesyet kwiyokis ŋaleca?’’ 8Kumwoy Yesu kule, “Akäste koromun, mente kot ciperperak cëmasak akwek, omnye mosukukwa piko ce caŋ om kaynemwani, oŋnkumwoy kule, ‘Ani kunye neto!’ Oŋnkumwoy kule, ‘Karik pesyet nyo kicekwey!’ Monte kot arup akwek picoto. 9Monte cemuye ye kolim poryosyek oko kwankwaŋatet ye puryo kot kumite kalyet koret. Omnye mosukunyosyo kutok kunyo tukuk ceyucoto, ntene kutompo yoto kot kurik pesyetap letut.’’ 10Kutosyikey Yesu kumwoci cek kule, “Mosukusetyi koret ake kuporye koret ake, kusetyi poytoyisyet ake kuporye poytoyisyet ake; 11mosukuriŋiŋ koret koromun oŋnkunäm rupet oko porwonik korosyek ce caŋ, mosukutok tukuk ce muye piko oko pelutok cekwone parak. 12“Kutompo kot kwiyokis tukucutecu tokol, mosukunämak akwek piko oŋnkutaŋanyak oŋnkyewosontyinenok korikapkok oŋnkyekertak mopusi, mosicekwerok ape taytap kinkonik oko taytap poytoyik cewoyec, omnye kacäm akwek kaynemwani. 13Yoto ye mosonyoru akwek poroyinto nye kamwayte ŋalek ce toponec. 14Kunyo asot aŋnkawany om mukuleywekwok kutompo kot kupunto pesyet, monte cisot kule, mosiceyetkey acek kulene; 15omnye mosokonok ani akwek ŋalek oko ŋomnonet nye puryo kot komuce punikwok kutay nto kutintentyi kot komuc. 16Mosukuŋomntok akwek mpo Papamwoŋ oko mpo komet, oko mpo yeyamwoŋ, oko mpo tilyonutekwok, oko mpo coronutekwok, mosicepakäc kupok alake om akwek. 17Mosukusenkerak akwek piko tokol omnye kocäm kaynemwani. 18Ntene puryo kot kupote putyontet mpo akenke nyepo metewokwok. 19Otitir okwilokisye koromun, omnye yunyoto wule mososorukey osopkey akwek nkit.’’ 20“Ye kokäs kule kakomut pikap luketap poryet Yerusalem, yoto ye mosonket kule karik citurpup lakwar. 21Roke yoto kumwey kupa lakomosyek piko ce mite Yuteya; nto piko co mite Yerusalem orit; roke kumwey co kupa saŋ, oŋnkupuryo kot kumisyini piko co mite koret saŋ kukwa oŋnkwokowut moŋet orit. 22Omnye pesyosyekap toŋoŋutek coto; kunyo kopunto pesyosyecoto sukuŋet kwitita kupoyit manta ŋalek cepo silutekap Yiyintet ce mwowu kule: 23Mite kwapi kulene om pesyosyecoto koruk ce koyotin nto ce rerisyi! Mosukucontyi koroni taŋanynta; oŋnkunyor cek picu nerekwekap Yiyintet. 24Mosicepare piko ŋotit, oŋnkyenäm cekwer ku mopusin kupa korosyek tokol; oŋnkukwa lamek kwokutyikta Yerusalem, okoy kupunto pesyosyekwa ce kiceyiytoci.’’ 25“Mosukuporkey pelutok cepo kakitat om wule mite asista oko arawet oko kokelik, nto om koret kumuyo piko tokol kucoŋoŋenis cek om karumntap ruretyet oko peko ce tultoykey. 26Mosukumisto piko om muyotet ye mite cek kukene tukuk ce mo kukwontyi koret tokol; omnye mosukutimtimnkey swametap torot. 27Yoto ye mosukukäs cek Weritap cito kucone polyet kuponto kamukeywek oko woyinto nyewo koromun. 28Ye kacec kutok tukuk ceyucoto, oyoŋnkye onyal parak omnye karik yoto pesyet nye ce sorunenok akwek.’’ 29Yoto kumwoci Yesu piko tyonkoconi kule, “Akäs ketit mokoywet oko ketik alak tokol. 30Ye kokäs akwek nye puryo kot ce mwowok kule kokuŋot sokek, yoto oŋnket kule karik pesyosyekap peŋatut. 31Kunyo ye kokäs akwek tukuk ceyucoto kwiyoktos möce onŋket kule karik poytoyisyetap Yiyintet. 32Komwowok ani akwek ŋalek cepo manta kule, mosukwiyokis tukucu tokol kutompo kot kupok piko cepo pini ce soptos yawut. 33Poku wulin po torot oko wuli po ŋony, ntene puryo kot kupoku ŋalekwani mpo kisic.’’ 34“Oripkey akwek nkit! Monte kot kowurtak sokwonutek oko pokitetap komek, oko kasoteywekap sopontap pesyosyecu, omnye muce kucontyok akwek pesyonoto lakwar nye puryo kot oŋnket kuyu musat; 35omnye mosukucontyi piko tokol ce mite koret tokol kumukul. 36Kunyo oripkey pesyosyek tokol, oŋnkosome sukuŋet onyoru swamet nye omuci omweye acilile tukucutecu tokol ce mokwiyokis, saŋet oyoŋe akwek taytap Weritap cito.’’ 37Kunetisye Yesu pesyosyecoto kotap Yiyintet, nteye kemen koret kuweti wokurwe tulwet nye cekure tulwetap ketik ce cekure Seituninek. 38Yoto kupeti piko tokol kororn okoy kotap Yiyintet wule kinetisye Yesu wokulimntoy ŋalekyi.

will be added

X\