Luke 20

1Nteye kipesyet ake, ye kimite Yesu kunete piko komwocini lokoywek ce toponec om kotap Yiyintet, yoto kukwa tisik cewoyec oko konetikap ntarastinek oko poyik, 2oŋnkwokutepe cek Yesu kule, “Mwowec acek, po ŋo kamukeywek cu yiye nyi tukucu? Ŋo nyi kikoniŋ nyi kamukeywecu?’’ 3Kuwekyi Yesu kumwoci cek kule, “Mpo ani mosatepenak akwek teputyoni kule, omwowo ani pa akwek, 4kicone potisonisyetap Yowana wulin po torot nto kicone wule mite piko?’’ 5Yoto kurwoc cek kwicek nkit kumwoy kule, “Ye kocemwowu kule, ‘Kicone torot,’ mosukumwowec acek neto kule, ‘Omne satay akwek moyen ŋalekyi?’ 6Nteye kocemwowu kule, ‘Kicone wule mite piko,’ mosukuwirenec piko rwontok; omnye cöme piko kule workoyo Yowana manta.’’ 7Yoto kuwekyi cek Yesu kumwoci kule, “Puryo kot cinket wule kicone.’’ 8Kumwoci Yesu cek kule, “Mpo ani puryo kot omuci kot omwowok akwek wule anyortoy ani kamukeywek cu oyiye tukucu.’’ 9Kumwoci Yesu piko tyonkoconi kule, “Kiwu citake mparenyi nyepo ketik ce cekure sapipunek, oŋnkukoci kopotik ce kekotesan oŋnkunomen kuwo koret ake nye low wokuwany wuloto pesyosyek ce caŋ. 10Nteyu kowo kupunto pesyosyek ce rurye omikap ketik ce cekure sapipunek, kuyok mutworintenyi kuco wule mite kopotik co kikotesonisyi, kule sukuŋet co kukoci mutworintonoto omik alak cepo mparetap ketik ce cekure sapipunek ce kikiciyoyekyin; ntene kunäm kopoticoto mutworintonoto oŋnkupir oŋnkukwet kuweto yewuniyek pate. 11Kuyokto yec cicoto mutworintet ake, ntene kupir kopotik oŋnkunyalil mutworintonoto oŋnkukwet kuweto yewuniyek pate. 12Kuyokto yec cicoto mutworintet nyepo somok, kupir kopotik mpo nyoto kukoten oŋnkukwetyi saŋ. 13Yoto kumwoy citap mparetap ketik ce cekure sapipunek kule, ‘Mosayiy ne ani? Mosoyokte werimwani nyi akenke pate, pesyet ake muce cek kuywey neto!’ 14Nteye kotoköse kopotik weroto, kurwoc nkit kumwoy kule, ‘Nyitenyi kunye kontiyintet; akany cepakäc kume, sukuŋet kwek nyinyacek kontiyisyet!’ 15Kunäm kopotik weroto oŋnkucutune mparen oŋnkupakäc kume.’’ Kutep Yesu kumwoy kule, “Mosukwiye kiy ne citap mparanato kopoticoto? 16Mosukuco nkit citap mparet oŋnkupar kupok kopoticoto oŋnkukoci kopotik alak ce kekotesan mparetap ketik ce cekure sapipunek.’’ Nteye kotolime piko ŋalecato, kumwoy cek kule, “Puryo kot kurok kwiyokis kuyunyo!’’ 17Kukäs Yesu kurotot cek topon, oŋnkutep kumwoy kule, “Mwowu ne nyun ŋalecu kicesil om silutekap Yiyintet kule: ‘Rwantet nyo kitoye tekik kule, puryo kot kuponto latik, Kunye kiweckey kwek rwantet nye pële tokol nye tiye koto tapan.’ 18Ci tokol nye kowircikey rwantanato kutirtiroktos neto nyoto, nteye kowircikey rwantanato citake kunyirnyire cicoto.’’ 19Kusyem om yoto konetikap ntarastinek oko tisik cewoyec kule cenäm Yesu, omnye kinket kule komwoy Yesu tyonkocet nyepo ŋalek ce nöme cekto. Ntene kuywey piko. 20Yoto kuceny cek pesyet nye topon. Kwal piko alak ce kosutkey picoto kuyu pic ce toponec, oŋnkuyokto cek picoto kupa wokulot kutepe Yesu ŋalek ce mosukumwoy, sukuŋet kunäm oŋnkukwer wokuwosontyine taytap poytoyintet nyewo nye ponto kamukeywek. 21Kupa picoto oŋnkuwokutepe cek Yesu kule, “Konetintet, cinket kule, ŋalek ce mwowu nyi oko ce netinyi kuce ŋalek cepo manta, oŋnkyinket kule, puryo kot cöme nyi ŋalek cepo citake oŋnkitay cepo ake, ntene netinyi ŋalekap Yiyintet cepo manta. 22Kunyo, mwowec acek, cömwec pa ntarastinekyo cekweci mosoret Kinko Nyewo nto puryo?’’ 23Ntene kunket Yesu tekutekwa. Kumwoci kule, 24“Oporwo ani pa akwek silinkit? Po ŋo metit oko kaynet nyi silot silinkini?’’ Kuwekyi cek kumwoci kule, “Po Kinko Nyewo.’’ 25Kumwoci Yesu cek kule, “Kunyo okocini Kinko Nyewo tukuk cepo Kinko Nyewo, okocini Yiyintet tukuk cepo Yiyintet.’’ 26Yoto kipuryo komuc cek kot kunyor lelis om ŋalekyi ce kimwoy om taytap piko, ntene kusisio, omnye kikite koromun wule kawekta ŋalekyi. 27Kukwa Satusayek alake wule mite Yesu. Coto ku piko co mwowu kule puryo kot komuce kot kotutune met piko co kipok. Kutepe cek neto kule, 28“Konetintet, kisilwec acek Moses ntarastini kule, ‘Ye kame citake, oŋnkupakakta korket nye puryo kot kuyici lekok, roke komüt mutakwam korkonoto musuk, sukuŋet kuyici mutakwam nye kime lekok.’ 29Kunyo kimite piko alake tisapu ce kitupco. Kukesyo nyewo komüt korket, ntene kume nye kipuryo kot kuyi lekoy. 30Kunti komüt mutakwam nyepo oyeny korkonoto musuk, 31oko nyepo somok, kuyunyoto kupok tokol picoto ku tisap nye kipuryo kot kuyi mpo akenke lekwa, 32nto om letut kume mpene korket. 33Kunyo om pesyet nyo citutune met, poyitu ŋo korket? Omnye kikikomüt picoto tokol ku tisap!’’ 34Kuwekyi Yesu kumwoci cek kule, “Mütisyi moronik, oŋnkyimüte koruk cepo pesyosyecu, 35ntene om wule mite piko co kipok co kicecäm om konyekap Yiyintet kule yeme kotutune met oŋnkumiŋis koret nyin ake, kupuryo kot komütisyi nto cimüte cekto coto. 36Omnye puryo kot tokomuce cek yec kupok, kerkey picoto oko malaykanik, oŋnkukikwek lekokap Yiyintet omnye kikotutune met. 37Kunyo kipor Moses ŋalek cepo manta kule, tutune met piko co kipok kunyor yec soponto. Kimwoy coto om ŋalekyi ce kisil co nömekey oko rukututwet nyo kiloye, kumwoy kule, ‘Mokoryontet kunye Yiyintetap Apram, Yiyintetap Isaka, Yiyintetap Yakopo.’ 38Kunyo poru ŋaleca kule, puryo kot ku Yiyintetap piko ce kipok; ntene Yiyintetap piko ce soptos; omnye sopcotin piko tokol om wule mite Yiyintet.’’ 39Yoto kuwekyi konetikap ntarastinek alake kumwoci Yesu kule, “Konetintet, kewec topon!’’ 40Omnye kipuryo kot tokukany cek yec kot kutepe Yesu ŋalek alak. 41Kumwoci Yesu cek kule, “Omne sukuŋalole piko kumwowu kule, mosukwek Ŋapanet keseniyantetap Tauti? 42Omnye mwowu Tauti nkit om kitaputap tumwonikap kakastayet kule: ‘Kimwoci Mokoryontet Mokoryontenyu kule, Pure yu po yewumwani nyepo tay, 43okoy okoci ani punikuk kwek ŋecerokap kerenkokuk.’ 44Kunyo nteye kure Tauti nkit neto kule, ‘Mokoryontet.’ Komuce kulene yec Ŋapanet kwek keseniyantetap Tauti?’’ 45Yoto kumite kulime piko tokol, kumwoci Yesu konomikyi kule, 46“Oripkey koromun wule mite konetikap ntarastinek, ce möce kule cepesetoti kukelac sirok ce koyec, oŋnkucöme kule ciyweyec cisupayec topon om wulo po moteponik, ce kweye ŋecerok co kweyotin om korikapkok, 47oko oteputek cepo tay om sokwonutek; ce nyopone korikap musukik; oŋnkusilkey kusome somutek ce caŋ, cek ce mosukunyor toŋoŋutek ce pëlisyi.’’

will be added

X\