Luke 2

1Yoto om pesyosyecoto kucone ntarastit wule mite Kinko Akusto kule, cemöce ciyitis cesil kaynokap piko tokol cepo korenyi. 2Koyitisyet nyoto kunye kinyosyo ciyitis cesil kaynokap piko ye kipoytoy Kureniyo koretap Siriya. 3Yoto kuwo ci tokol wokusilyokey om moŋenyi. 4Kunomene Yosep moŋetap Nasaret om Koretap Kalilaya kuwo kulaŋnta Yuteya okoy wokupunto moŋetap Tauti nye cekure Peselekem, omnye kipo Yosep aretap mpo Tauti. 5Kuwo Yosep wokusilyokey oko Mariyam nye kimöce neto kule amüt, kikoyat Mariyam yoto. 6Nteye kimite cekto wuloto, kupunto pesyosyek ce cömekey Mariyam. 7Yoto kucämnkey Mariyam werit poretyet, kunäm oŋnkulokyi sirok oŋnkömukontyi rapet nye omisye toka, omnye kipuryo kot kumite poroyinto koto nye mokuruy cekto om kotap toyek. 8Kimite mesewek alake koronoto ce kikwokisyi komoy kuripe kecirekwa. 9Kuco malayketap Mokoryontet ye kimite cekto; oŋnkukoci kukweny cekto komut woyintap lakweyetap Mokoryontet, yoto kumuyo koromun. 10Ntene komwoci malayket cek kule, “Monte cemuye! Omnye osutwok ani lokoywek ce toponec cepo ŋerekwek ce mosukupoyit piko tokol. 11Omnye kaceyiwok akwek yawut pesyoni Mokoryontet om moŋetap Tauti nye Kosopintet Kristo Yesu! 12Kito nyi nye mosokäse akwek, mosonyoru lekwa nye rweru nye kocilokyi sirok; oŋnkyimukontyi rapet nye omisye toka.’’ 13Om yoto pakenke mosolim akwek luket nyewo nyepo malaykanik om torot kukostoy Yiyintet kumwowu kule, 14“Kupoyit woyinto Yiyintet nye mite torot, oŋnkupoyit kalyet koret oko piko ce ŋerekyini cekto Yiyintet!’’ 15Nteyu kowo kunomen Malaykanik kupakakta cek kupecikey torot, kuŋalal Mesewek kumwocin nkit kule, “Akany cipe okoy cepunte Peselekem, wocekäs kiyitenyi kakwiyakay nyi kokuporwec Mokoryontet.’’ 16Yoto kunomen mesewek kusartakey lakwar okoy wokunyor Mariyam oko Yosep oko lekwet nye kocimukontyi rapet nye omisye toka. 17Nteye kotoköse mesewek lekwet, kumwoci kutorci piko ŋalek tokol co kukumwoy Malayket ce nöme lekwanato. 18Kukite piko tokol ŋalek ce kumwoci mesewek. 19Ntene kusot Mariyam ŋalecato oŋnkuripe moyenyi. 20Yoto kuweckey mesewek kupecikey kutumoti kukostoy Yiyintet om ŋalek tokol ce kilim oŋnkukäs cekto, omnye kiyu tukuk ce kikäs wule kikimwoytoci malayket. 21Yoto ntowo kupunto pesyetap sisit, nye cewone lekwet cikoci cekure kaynet Yesu, kaynet nyo kikonu kumwoy malayket kutompo kot cesic neto. 22Ntowo kupunto pesyosyekap Yosep oko Mariyam kwiy ntasimnyet nyo kimwowu Moses, oŋnkwiyita sakwet nye kiceŋetune asis korketap tomono, yoto kusut cek lekwet kuwo Yerusalem wocikoci Mokoryontet. 23Kuyu wulo kicesilyo om ntarastinekap Mokoryontet kule, “Lekwa tokol nye poret oŋnkuwero nye kanyosyo kuyat moyetap kamet, misyini cikoci neto nyoto Mokoryontet.’’ 24Yoto kupa Yosep oko Mariyam wokukoyito mpo korosekwa kuyu wule cemoktoy om ntarastinekap Mokoryontet kule, “Cikoytoy swororok oyeny nto lekokap swororok oyeny.’’ 25Kimite citake nye kiminye Yerusalem nye kicekure kaynenyi Simiyon nye ki cito nye topon koromun nye kiyweye Yiyintet. Kimite neto kukonye pesyet nye cisope pikap Israel, oŋnkiponto Muyet Nyetilil. 26Kikikoporci Muyet Nyetilil neto kule puryo kot kume kutompo kot kukäs Ŋapanet Mokoryontet nyo kicekurto. 27Yoto kuntoci Muyet Nyetilil Simiyon kuco okoy kupun kotap Yiyintet orit, nteyu kowo kusut kwan oko kamet lekwet Yesu kuco kotap Yiyintet; sukuŋet ceyici ntasimnyet kuyu wulo moktoy ntarastinek. 28Kunäm Simiyon lekwet kunäme yewuniyekyi oŋnkukasta Yiyintet kumwoy kule: 29“Mokoryontet, yaste yawut mutworinteŋuŋ, kuwecikey om kalya, kuyu wulo kikurte nyi om ŋolyonteŋuŋ. 30Omnye kakäs konyekwani nkit kosopoteŋuŋ, 31kuyu wulo kiyiytoci taytap piko tokol, 32oŋnkwek lakweyet nye kweŋnkyini lamek areŋuŋ, oŋnkwek woyinto nyepo pikuk pikap Israel.’’ 33Kukite kwan oko kamet ŋalek ce komwoy Simiyon ce nömekey oko lekwanato. 34Yoto kusomnci Simiyon cekto kupeyok, oŋnkumwoci Mariyam kamet kule, “Kikwey Yiyintet lekwani kwek nyemo kwaranta, oŋnkusop piko ce caŋ om Israel, oŋnkwek neto pelutyet nye cone wule mite Yiyintet nye toye piko ce caŋ, 35sukuŋet kuŋoŋ kuparta kasoteywekwa ce wuŋotin. Nto om wule mite nyi, mosukurut mukuleyŋuŋ rotwet nye ŋatip.’’ 36Kimite mpo korko nye workoyo nye cekure kaynenyi Anna, ceptap Panuel nyepo aretap mpo Aser nye kicimüt ye kikokoniyo kuwany kenyisyek tisap kume santenyi. 37Yoto kopur nkit kumusuk okoy kwek cepyosya nye kiyosit koromun kuwany kenyisyek tomonwokik sisit ok amwan nye kipuryo kot kuŋete kupakakta kotap Yiyintet. Ntene kikwiyisyi yisyetap Yiyintet komoy oko pet; kikostoy oŋnkusome oŋnkukire omik. 38Om yoto pakenke kuco tay oŋnkucec kukasta Yiyintet kuŋalal ŋalek ce nömekey oko lekwanato kumwoci piko tokol ce kikonye pesyet nye mokusope Yiyintet Yerusalem. 39Nteyu kowo kuwany cekto kwiy tukuk tokol ce mwowu ntarastinekap Mokoryontet, kuweckey cek kupa moŋemwa Nasaret om koretap Kalilaya. 40Kuner lekwet Yesu kunyor swamet oko ŋomnonet oŋnkukoci Yiyintet neto kupeyok. 41Kipeti kwan oko kamet om kenyit ake tokol Yerusalem ye pesyetap sakwetap Keytayet. 42Nteye kiponto Yesu kenyisyek taman ok oyeny, kupa cek tokol oko kamwa sakwet Yerusalem kuyu wule yunto sakwanato. 43Nteyu kowo kupok pesyosyekap sakwet, kunomen cekto kupa ka, ntene kuŋetune werit Yesu Yerusalem nye kipuryo kot kunkete kwan oko kamet. 44Kisote cekto kule tos mite Yesu luketap piko alak om panta. Kupa cekto pesyonoto kwimen; ntowo kwimen koret kucec cekto kucenye wule mite tilyonutekwa oko wule mite coronutekwa. 45Ntene kipuryo kot kunyor. Yoto kuweckey kwan oko kamet kupa Yerusalem wokuceŋat Yesu. 46Nteye kipesyetap somok kunyor cek Yesu kumite kotap Yiyintet, kukepur kwenutap konetikap Yutayek kulimntoy ŋalek cemwowu konetik, oŋnkutepe Yesu cekto teputek. 47Kukite piko tokol ce kilime ŋomnonenyi oko wule kiwektoy ŋalek. 48Nteye kotoköse kwan oko kamet Yesu kukite koromun, kumwoci kamet neto kule, “Yeyonyu! Omne seyiyec acek nyi kuyu nyi? Kucisot cemuye acek oko kon, oŋnkyecenyiŋ koromun.’’ 49Kuwekyi Yesu kumwoci cekto kule, “Omne sacenya ani akwek? Puryo kot oŋnket akwek kule misyino ani opur kotap Papamwani?’’ 50Ntene kipuryo, kot kusik kunket kwan oko kamet kule komwoy Yesu ŋolyo ne. 51Yoto kunomen neto oko kamwa kuketitakey okoy kupunto Nasaret, oŋnkuwo wokuywey kamwa. Kunäme kamet ŋalecato moyenyi. 52Kutosyikey Yesu kuner oŋnkuŋomit, oŋnkunyor cömisyet om wule mite Yiyintet oko wule mite piko.

will be added

X\