Luke 19

1Kuwo Yesu okoy kupunto Yeriko, nteye kimite kupunte kwenutap moŋet, 2kimite yoto citake nye cekure Sakayo nye kikorurukintetap mosoret nyewo, nye kimokoryo nye ponto tukuk ce caŋ. 3Yoto kusyem Sakayo kule akäs oŋnkono nye Yesu, ntene kipuryo komuc kot kukäs omnye kicaŋ piko oko yec nye kinwac neto. 4Yoto kulapat Sakayo kuwo taytap piko oŋnkuwokulany ketit mokoywet kule saŋet akäs, omnye kiweti Yesu wokupunte aranato. 5Ntowo kuco Yesu okoy ketit ŋony, kunyal parak oŋnkumwoci Sakayo kule, “Sakayo, reku co ŋony lakwar; omnye omöce ani woru kaŋuŋ pesyoni.’’ 6Kurek Sakayo kuco ŋony lakwar, oŋnkuŋerekyi Yesu koromun. 7Ntowo kukäs piko tokol kuyunyoto kucec koŋunyŋunyis kumwoy kule, “Kowo cici wokwek tontetap ci nye ponto miyotyo!’’ 8Kuyo Sakayo oŋnkuŋalal kumwoci Mokoryontet Yesu kule, “Om yuteyu yawut pakenke, mosopcici ani tukukwani pononik, nteye kyaperper olotu citake tokol oŋnkonumune kinyi, mosoyokyi aret amwan kucaŋit.’’ 9Kumwoci Yesu neto kule, “Kaco yawut pesyoni kosopet kayi. Omnye mpeneto cicitenyi kunye mucokoretap Apram. 10Omnye kico Weritap cito cokuceny oŋnkusop ce kipotyo.’’ 11Nteye kimite kulimntoy piko ŋalecato, kutosyikey Yesu kumwoci cek tyonkocet, omnye kikirikta neto yoto kupunto Yerusalem, oko omnye kisote piko kule mosukuco lakwar poytoyisyetap Yiyintet. 12Yoto kumwoy kule, “Kinomen mokoryontet ake kuwo koret ake nye low, sukuŋet wocikocine neto wuloto kamukeywek kwek Kinko oŋnkuweckey kuco ka. 13Nteyu mokunomen, kukur mutworikyi taman oŋnkukoci ci ake tokol om cekto silinkinek pokol, oŋnkumwoci kule, ‘Oyiyisye kamonkesyantit okoy aweckey ani.’ 14Ntene kitoye pikap korenyi cicoto, yoto kuyokto piko alak kupa kunam let wokumwayta kule, ‘Puryo kot ce cöme acek cico kwek Kinko nyinyacek!’ 15“Ntowo kuweckey cicoto kukocikoci neto kamukeywek kwek Kinko, kumwayta cekwer kukwa ye mite neto mutworik co kikocini neto pesanik, kule sukuŋet oŋnket latikap pesanik ce kinyor cekto om kamonkesyantit. 16Kuco nyepo tayta oŋnkumwoy kule, ‘Mokoryontet, kiyi silinkinekyekuk pokolu silinkinek alak elifut akenke.’ 17Kumwoci cicoto nyoto kule, ‘Kiyiy topon, yiku nyi mutworin nye topon! Kunyo omnye cikeneninkey om pesan ce tukusic, kunyo nyoru yawut kamukeywek ce mepayte moŋosyek taman.’ 18Kuco nyepo oyeny oŋnkumwoy kule, ‘Mokoryontet, kiyi silinkinekyekuk pokolu silinkinek alak pokolwokik mut.’ 19Kumwoci cicoto nyoto kule, ‘Mpenyi mepayte moŋosyek mut.’ 20Kuco ake oŋnkumwoy kule, ‘Mokoryontet, okyu silinkinekuk pokol ce kyakonor ani oyukyi siret. 21Omnye kyanyokoritu om wule mite nyi, omnye yiku nyi ci nye wuy, sute kiy nye puryo kot ku nyeŋuŋ, oŋnkikise mpo ce puryo kot kol nyi.’ 22Kumwoci cicoto nyoto kule, ‘Yiku nyi mutworin nye miyat! Mosoyiyisye ani ŋalekuk ce kwone kutiŋuŋ nkit oŋnkomütuŋ musankut! Ye kinket nyi kule, oyiku ani ci nye wuy, omnye osute kiy nye puryo kot ku nyenyu, oŋnkokise mpo ce kipuryo kot akol ani. 23Kunyo ye yunyo, omne simekonore nyi pesanikwani Penki? Omnye nto kwowecekey ani kwoceketwo kuponto latik.’ 24Kumwoci cicoto mokoryo piko ce kimite keyoŋ yoto kule, ‘Onumune cici silinkinek co pokol oŋnkokoci mutworintet nyo ponto silinkinek elifut akenke.’ 25Kumwoci picoto mokoryontemwa kule, ‘Mokoryontet, ponto cicitenyi silinkinek elifut akenke!’ 26Kuwec Yesu kumwoy kule, ‘Komwowok ani akwek kule, ci tokol nye ponto, mosicikoci neto nyoto kucaŋit, nto ci tokol nyo puryo kot kuponto, nka mpo co ponto, mocinumune neto coto. 27Nto wule mite punikwani cutecu kipuryo kot kucäm kule oyiku ani Kinko nyimwa, okweru kukwa yu oŋnkotil kupok om yu po taymwani!’ ’’ 28Nteyu kowo kumwoy Yesu ŋalecato okoy kuwany, kunomen kuntoci cekto kuwo Yerusalem. 29Ntowo kurikta Pesapake oko Pesaniya om tulwetap ketik ce cekure seituninek, kuyokto konomik oyeny, 30kumwoci kule, “Ape okoy opunte kayta nye mite taymwoŋ, nteye kowut kayata mosonyoru moyitap sikiryet nye ratat nye tompo kot kulany kuwete ci mpo akenke, atyac oŋnkokweru kuco yu. 31Nteye katepenak citake kule, ‘Omne satyac akwek sikiryoni?’ Omwoci kule, ‘Möce Mokoryontet.’ ’’ 32Kunomen picoto kociyoktoy kupa okoy wokunyor kiy ake tokol kumite kuyu wulo kokomwoci Yesu cekto. 33Nteye kimite kutyoce moyitap sikiryet, kutepe pikap sikiryet kule, “Omne satyac akwek moyitap sikiryet?’’ 34Kuwekyi kumwoci kule, “Möce Mokoryontet.’’ 35Yoto kukwer cek moytap sikiryet okoy wule mite Yesu oŋnkuyitoci sirokwa patayitap moyitap sikiryet, oŋnkulany kukonopci Yesu kopure parak. 36Nteye kimite neto kuweti koyito cek sirokwa aret. 37Ntowo kurikta Yesu Yerusalem, om aret nye rekune tulwetap ketik ce cekure seituninek, yoto kucec luketap konomik kukasta Yiyintet om ŋerekwek om polotetap tumnto nyewo om tukuk tokol cewoyec ce kikäs cek, kumwoy kule: 38“Kukoci Yiyintet kupeyok neto Kinko nye coni om kaynetap Mokoryontet! Kopur kalyet torot, oŋnkupur woyinto wule mite Yiyintet!’’ 39Yoto kumwoci Farasayek alake ce kipontokey piko Yesu kule, “Konetintet, mwoci konomikuk kusisio!’’ 40Kuwekyi Yesu kumwoci cek kule, “Komwowok ani akwek kule, ye kisisio cekto; mosukupol mpo rwontok.’’ 41Nteyu kowo kuco Yesu okoy kurik moŋet nyewo Yerusalem, nteye kutoköse kutopen, kurir kukalya kumwoy kule, 42“Nto kesowu nyi nket pesyoni pate kito nye sutu kalyet! Ntene puryo kot muci yawut kot käs omnye wuŋat om konyekuk! 43Omnye mosukupunto pesyosyek ce mosukutec punikuk totet komutuŋ nyi om komoswokik tokol. 44Mosukopuryetiŋ poku kule toŋ oko piko ce minyiŋ nyi orit, nye puryo kot kupokoktoy cek om wule mite nyi rwantet ake kumite rwantet ake parak. Omnye kipuryo kot sowu nyi oŋnkinket pesyet nye cone Yiyintet cokusopiŋ kosoruŋ nyi!’’ 45Yoto kowut Yesu kotap Yiyintet orit, oŋnkucec kukwet piko ce kimite kwolyoyisyi om orit, 46kumwoci cek kule, “Kicesil om silutekap Yiyintet kule, ‘Mosukwek komwani koto nye cesome.’ Kunyi kwawec akwek kwek kepenet nye wuŋekey corik!’’ 47Yoto kunetisye Yesu kotap Yiyintet pesyosyek tokol. Ntene kumac tisik cewoyec oko konetikap ntarastinek oko poyikap piko kule cepakäc neto. 48Ntene kipuryo kot kunyor cek wule mokwiyta, omnye kimite piko tokol kulimntoy ŋalekyi topon nye kipuryo kot kumöce kule nto cemuyte ŋolyo mpo akenke.

will be added

X\