Luke 18

1Yoto kumwoci Yesu cek tyonkocet sukuŋet kunet kule misyini kusome cek okokoy nye puryo kot kucostos. 2Kumwoy kule, “Kimite Ketintet ake nye kimite moŋet ake, nye kipuryo kot kuyweye Yiyintet oŋnkupuryo kot kuyweye ci tokol. 3Kumite mpo korket ake nye musuk moŋonoto nye kiconi wule mite ketintonoto pesyosyek tokol cokumwocini kule, ‘Müt musankut nyepo manta kulot cito nyo owosontyini ani.’ 4Kutoyis ketintet kunyo, ntene om letut kusot nkit kumwoy kule, ‘Nka kot puryo kot oyweyi ani Yiyintet, oŋnkupuryo kot oyweyi ci tokol, 5ntene om kayimatetap musukuni yimani okokoy, mosamüt musankut, sukuŋet komokuconi cokutaŋanya kwimen.’ ’’ 6Kumwoy Mokoryontet Yesu kule, “Olim pa wule mwoytoy ketintet nye puryo kot kwiye ŋalek cepo manta, 7kunyo puryo kot komuce ra Yiyintet komüt musankut kukalya pikyi co rircini neto kusome kakalyantet komoy oko pet? Muce pa neto kulileyankey nye puryo kot kukolyoy cekto? 8Komwowok ani akwek kule, mosukumüt Yiyintet musankut lakwar kuyunyoto kukalya cekto. Ntene yec, ye kaweckey pa Weritap cito, muce cokunyor koyenotet om koret?’’ 9Kumwoci Yesu tyonkoconi piko ce kisilekey cek nkit kule ciku toponec oŋnkunyil piko alak tokol. 10Kumwoci kule, “Kinomen piko oyeny kupa wokusom om kotap Yiyintet, akenke om picoto kunye Farasoyintet nto ake kunye korurukintetap mosoret. 11Kuyo Farasoyintet oŋnkusom nkit kumwoy kule, ‘Okostiŋ ani nyi, Ayi Yiyintet omnye puryo kot akerkeyekey ani oko piko alak tokol, ce cor, oŋnkuporisyi, oko co sakwayot, kuyu mpo korurukintoni po mosoret nyi mite yu. 12Opuri ani okire omik aret oyeny om sopitit akenke, oŋnkokoniŋ ani nyi akenke om taman cepo tukuk tokol ce onyoru!’ 13Ntene kuyoŋe korurukintetap mosoret ye low, nye kipuryo mpo kot kunyal torot, ntene kusyeckey teket oŋnkumwoy kule, ‘Ayi Yiyintet, kalya ani ci nye oponte miyotyo!’ ’’ 14Kumwoy Yesu kule, “Komwowok ani akwek kule, kiweckey kuwo kanyi cicitenyi korurukintetap mosoret kukakikalya neto miyotyonikyi ntene puryo kot kunyin ake Farasoyintet; omnye ci tokol nye sutekey kulaŋntankey nkit parak, mosicirekune neto nyoto, ntene ci tokol nye sutekey kurektokey nkit ŋony, mosicilaŋnta neto nyoto kuwoyit.’’ 15Kukwer piko alake lekokwa kukwa wule mite Yesu, kule sukuŋet kukemer neto yewuniyekyi metewokap lekocoto, nteye kotoköse konomik picoto kikweru lekokwa, kuyete kukerekta cek. 16Ntene kukur Yesu lekok kukwa wule mite neto, oŋnkumwoy kule, “Ayaste lekok kukwa wule omite ani! Monte ceyete, omnye po poytoyisyetap Yiyintet cekto ceyucutecu. 17Komwowok ani akwek kule, ci tokol nye puryo kot kunöme poytoyisyetap Yiyintet kuyu lekwa, kupuryo kot kumuce neto nyoto kot kowut orit.’’ 18Kutepe poytoyintet ake Yesu kule, “Konetintet nye topon, mosayiy ne ani ye sonyoru soponto nye mopoku?’’ Kumwoci Yesu cicoto kule, 19“Omne sekureno ani nyi nye topon? Puryo ci nye topon, ntene Yiyintet pate nkit nye topon. 20Nketi nyi ntarastinek mwowu kule, ‘Mente kot ayiy sakwayanat, mente kot apakäc ci. Mente kot acorsye, mente kot aŋalal mwiynan perperisye, ywey kon oko komet!’ ’’ 21Kuwec cicoto kumwoy kule, “Kyorip ani ntarastinecutecu tokol kuceke oyiku lekwa.’’ 22Ntowo kulim Yesu ŋalecato, kumwoci cicoto kule, “Mite kito akenke nye tokupotuŋ nyi, iwo weyalye tukuk tokol ce ponte oŋnkikoci pesanik pononik, mesenyoru mokoryontit om torot; oŋnkico ce nama cepetekey oko ani.’’ 23Nteye kotolime cicoto ŋalecato kunerec koromun, omnye kimokoryo nye kiponto tukuk ce caŋ. 24Yoto kukäs Yesu wule kanerekta cicoto, kumwoy kule, “Mokuwuy koromun om wule mite piko co mokoren ce ponto tukuk ce caŋ ye mokowut cekto poytoyisyetap Yiyintet! 25Lekit mpo kupunte Nkamiyet koŋntap sintanit kupël ye mokowut ci nye mokoryo poytoyisyetap Yiyintet.’’ 26Kutepe piko ce kilime ŋalecato Yesu kule, “Ŋo nyun cito nye muce cisop?’’ 27Kuwec Yesu kumwoy kule, “Tukuk ce puryo kot komukoktos om wule mite piko, komukoktos coto om wule mite Yiyintet.’’ 28Kumwoy Petero kule, “Käs pa! Kicepakakte acek korikyo oŋnkyekwa kwocinamiŋ cepetekey nyi.’’ 29Kumwoy Yesu kule, “Komwowok ani akwek ŋalek cepo manta kule, puryo ci nye ye kupakakta kanyi oko korket oko lekok, oko mpo yeyanyi, oko kamwa tokol, omnye karup neto poytoyisyetap Yiyintet, 30nye puryo kot kunyor ce caŋ kupëlis om pesyosyecu, oŋnkunyor soponto nye mopoku om pesyosyek co kwoni.’’ 31Kukwer Yesu tapan kiyokik taman ok oyeny, oŋnkumwoci kule, “Olim pa, cemite yawut cepeti celoŋntoy Yerusalem, wule mosukwitita ŋalek tokol cepo manta co kisile workoyik ce nöme Weritap cito. 32Mosicenäm neto oŋnkyikoci kunäm lamek ce mosukutaŋany, oŋnkucup, oŋnkuŋutyi; 33mosukupas oŋnkupar kume, ntene om letutap pesyosyek somok mosukotutune met.’’ 34Ntene kipuryo kot kusow konomik kunket om yoto ŋalecata, kiwuŋotin ŋaleca om wule mite cekto, kipuryo kot kusow kunket kule komwoy Yesu ŋal ne. 35Nteyu kowo kurikta Yesu Yeriko, kimite citake nye korat nye kipure aret tapan sukusomsi. 36Nteye kotolime cicoto korat piko ce kimite kupeti kutile om aran, kutep kule, “Key kulene?’’ 37Kumwoci piko neto kule, “Yesu nyo nyepo Nasaret nye mite kukeytoy.’’ 38Yoto kupol kukurto cicoto kumwoy kule, “Yesu Weritap Tauti! Rirena ani!’’ 39Kupolyi piko ce kimite kupeti om tay kumwoci cicoto kule kusis. Ntene kutosyikey kupol koromun kumwoy kule, “Weritap Tauti! Rirena ani!’’ 40Yoto kuyo Yesu oŋnkumwyta cekwer cicoto korat kuco ye mite neto. Nteyu kowo kuco kurik, kutepe Yesu neto kule, 41“Möce nyi kule oyiwuŋ ani ne?’’ Kumwoy cicoto kule, “Konetintet, omöce kule akäste yec.’’ 42Kumwoci Yesu cicoto kule, “Käste! Kakusopiŋ nyi koyeneŋuŋ.’’ 43Om yoto pakenke kusopco kukästa konyekyi. Kunamat cicoto kupetekey Yesu kukostoti Yiyintet. Nteye kotoköse piko tokol tukuk ce keyokis, kokasta tokol Yiyintet.

will be added

X\