Luke 17

1Kumwoci Yesu konomikyi kule, “Mosukutok tukuk ce noce kuwec piko kwiy miyotyet, ntene mite kwapi cito nyo sutu kwiyokis tukucoto! 2Roke cerotyi katitap cicoto rwantetap paka oŋnkyewirci ruretyet orit, kusir ye kotokyostoy cicoto kuwurta piko ce tinimnkec ceyucu kwiy miyotyo. 3Oripkey! Ye koyiwuŋ yeyaŋuŋ miyotyonik, polyi neto, nteye karenynkey kalye. 4Nteye koyiwuŋ nyi neto miyotyet aret tisap om pesyet akenke, oŋnkuco wule mite nyi aret tisap cokumwowu kule karenynkey, misyini kalye.’’ 5Kumwoci kiyokik Mokoryontet Yesu kule, “Toswec acek koyenet.’’ 6Kuwec Mokoryontet kumwoy kule, “Nto yunye oponte akwek koyenet nyewo kuyu kupuswontetap ketit nye cekure kalitarit, nto muci kot omwoci ketit mokoywet kule, ŋeyakisye kirinta nkit, oŋnkiwo wepite ruretyet, kulimwok akwek.’’ 7“Nteye ponto citake om akwek mutworintet nye potisyi nto nye okisyi kecirek, ye kacone mparen nto yecey, muci nyi pa mwoci kule, ‘Sorukey lakwar cepur ŋony oŋnkiyomisye?’ 8Puryo kot kuyunyo! Ntene mwocini nyi kule, ‘Yosye omikwani kiny kunyo, oŋnkipaya kot oyomisye oŋnkoyesye ani, nteye kawany, yomisye oŋnkiyesye nyi om letut!’ 9Kunyo puryo kot kumisyini cikasta mutworintonoto omnye kakwiy yisyet nye cemokyini kwiy? Puryo kot kuyunyoto? 10Kuyunyoto mpo akwek; ye kawany oyiy yisyet nye kucemokwok kule oyiy, omwowu kule, ‘Ciku acek mutwor ce puryo kot kuponto latik, omnye kukyiy yisyet nye kucemwowec kule ayiy.’ ’’ 11Nteye kiweti Yesu Yerusalem, kuwo kupunte kwenutap koretap Samariya oko Kalilaya. 12Ntowo kupun moŋet ake, kutuye neto piko taman ce kiponto mutyenkenik. Kuyoŋe picoto wule low, 13oŋnkukursyo kupol kumwoy kule, “Mokoryontet Yesu, rirenec acek!’’ 14Nteye kotoköse Yesu picoto kumwoci cek kule, “Ape woporcikey tisik.’’ Nteye kimite picoto kupeti om aran kusopco tokol. 15Ntowo kukäs akenke om picoto kule kosop, kuweckey kuco kutumon om kutit nyewo kukostoy Yiyintet. 16Kuco okoy cokoputyi yepo kerenkokap Yesu oŋnkukasta kumwoci kule, keyiy topon. Cicoto kunye ki Samariyantet. 17Yoto kuŋalal Yesu kumwoy kule, “Kopuryo kot cisop piko tokol ku taman, onto cut sokol? 18Puryo mpo akenke nye kaweckey kuco cokukasta Yiyintet, tos pate tontoni?’’ 19Kumwoci Yesu cicoto kule, “Ŋete yony, oŋnkiwecikey kokusopiŋ nyi koyeneŋuŋ.’’ 20Kutepe Farasayek alake Yesu kule, “Coni pesyo ne poytoyisyetap Yiyintet?’’ Kuwec Yesu kumwoy kule, “Puryo kot kuconi poytoyisyetap Yiyintet cekosonu ye coni. 21Puryo kot cimuce cemwoy kule, ‘Akäs oŋyi mite yu! Nto oŋyin mite yun!’ Omnye ŋalek cepo manta kucu kule, mitowune poytoyisyetap Yiyintet wule omite akwek.’’ 22Yoto kumwoci Yesu konomik kule, “Mosukuponto pesyet nye mosomac akwek kule nto cekäs akenke om pesyosyekap Weritap cito, ntene puryo kot omuci yoto kot okäs. 23Mosukumwowok akwek piko alake kule, ‘Akäs oŋyi mite yu! Nto akäs oŋyin mite yun!’ Monte cirway arup picoto. 24Kuyu wulo kweŋntoy kaweketap ilet koret parak kuceke tapan okoy tapan; kuyunyoto wule mosukwiytakey pesyetap Weritap cito. 25Ntene mosukunyosyo kutaŋany koromun, oŋnkutay neto pikap pintap pesyosyecu. 26Kuyu wule kiyunto om pesyosyekap Nuwa, kuyunyoto wule mosukwiytakey om pesyosyekap Weritap cito. 27Omnye kimite piko om pesyosyecoto kipo Nuwa, kwomisyi oŋnkuyesyi, kukesyi komüte moronik koruk oŋnkyimüte koruk okoy pesyet nyo kiwute Nuwa rapet, yoto kutumnkey peko oŋnkupakäc piko tokol. 28Mosukwiytakey mpo wule kiyunto koret om pesyosyekap Lot, ye kimite piko tokol kwomisyi, oŋnkukesyi komüte moronik koruk oŋnkuteksi korik. 29Nto om pesyet nye kiŋete Lot kuwete Sotom; kuropen mata oko rwontok ce loyotin om torot oŋnkupel kupakäc kwaranta piko tokol. 30Kunyo mosukwiytakey nyoto om pesyet nye ciŋoŋu cipor Weritap cito. 31“Om pesyosyecoto, ye mite citake konyi kisyek oŋnkumite tukukyi koto orit, kupuryo kot kuroke kurek oŋnkuwokunum tukucoto, kuyunyoto mpo om wule mite cito nye mite mparen, puryo kot kuroke kuweckey neto kuwo kanyi. 32Asot pa korketap Lot! 33Ci tokol nye möce kule osoru osop sopon nyi, kupote nyoto sopon nyi, nto ci tokol nyo kepot sopon nyi, mosukusor kusop nyoto sopon nyi. 34Om kwomowutap pesyonoto, mosicenyor piko oyeny ce koruy kwiririt akenke, cesut ake cepakakta ake, 35cenyor koruk oyeny ce ŋosye rwantet akenke, cesut ake cepakakta ake. 36[Cenyor piko alak oyeny kumite mparen, cesut akenke oŋnkyepakakta ake.]’’ 37Kutepe konomik Yesu kumwoci kule, “Mokoryontet, om ono?’’ Kuwec Yesu kumwoci cek kule, “Wule mite musto ku wuloto wule rurukyinikey motomwek.’’

will be added

X\