Luke 16

1Kumwoci Yesu konomikyi kule, “Kimite citake nye mokoryo nye kiponto ripintet nye kipoytoy tukukap cicoto mokoryo, yoto cemwoci piko alake cicoto mokoryo kule, ‘Wurtoy ripinteŋuŋ tukukuk.’ 2Kukur cicoto ripintenyi oŋnkumwoci kule, ‘Ŋal ne cu olimnciŋ ani nyi? Yitwo ani tukuk tokol co kweripe nyi! Omnye kemeyiku nyi yec ripin.’ 3Kumwoy ripintonoto nkit om moyenyi kule, ‘Mosayiy ne ani? Omnye kokunumuneno mokoryontenyu yisyetap ripset, kunyo puryo kot oponte swamet nye opotisye, oŋnkoliloni ye mosomote. 4Kumwoy kule, oŋnket kito nye mosayiy, sukuŋet ye kacinumuneno yisyetap ripset kuŋerekyo ani piko ye kowo korikwa.’ 5Yoto kukur ripintonoto ci ake tokol nye kiponto pesentap mokoryontenyi, oŋnkumwoci nyepo tayta kule, ‘Yociŋ nyi mokoryontemwani ata?’ 6Kumwoy nyo kule, ‘Ntepenik pokolwokik oyeny cepo mwayitap uto.’ Kumwoci nyo kule, ‘Oŋyi kartasiŋuŋ, pur ŋony lakwar oŋnkisil pokol pate.’ 7Nto ake kutepe kule, ‘Ntenyi ceyociŋ ata?’ Kumwoy nyo kule, ‘Kuniyanik cepo nkanuk sosom.’ Kumwoci nyo kule, ‘Oŋyi kartasiŋuŋ, sil tiptem oko mut pate.’ 8Kukasta mokoryontenyi ripintonoto puryo kot kupo manta omnye kikwiy kiy nyepo ŋomnon; omnye ŋomec pikap koroni om wule yiytoy tukuk ce nöme cekto kupël piko cepo lakweyet.’’ 9Kutosyi Yesu kumwoy kule, “Kunyo omwowok ani akwek kule, anäm coronutek om mokoryontitap tukuk ce miyotec cepo koret, nteye kapok coto, ceŋerekyok akwek akwa kayita nye ominye okokoy. 10Ci tokol nye cikenekey om tukuk ce tukusic, kunye cikenekey mpene nyoto om tukuk ce caŋ; nto ci nye puryo kot kwiye cepo manta om tukuk ce tukusic, kupuryo kot kwiye neto nyoto cepo manta om tukuk ce caŋ. 11Kunyo nteye puryo kot cimuce cikenenokey akwek ye morip mokoryontitap tukukap koret, ku ŋo nye muce kukenenokey akwek kukonok orip mokoryontit nyepo manta? 12Nteye puryo kot cikenenokey akwek om tukuk cepo citake, ku ŋo nye muce kukonok akwek tukuk ce cikwakwek nkit? 13“Puryo mutworin nye muce kwek mutworintetap mokorenik oyeny, omnye muce kusenker ake oŋnkucäm ake; nto muce kuywey ake oŋkunyil ake. Puryo koto muci akwek oyici yisyet Yiyintet oko mokoryontitap koret.’’ 14Yoto kulim Farasayek ŋalecato tokol, kucasekey cek Yesu omnye kicöme cek mokoryontit koromun. 15Kumwoci Yesu cek kule, “Akwek kuce oportoykey om konyekap piko kule oyiye ce toponec, ntene nkete Yiyintet mukuleywekwok orit, omnye tukuk co kostoy piko kule ponto latik, kuce tukuk ce puryo kot kuponto latik coto mpo kisic om konyekap Yiyintet. 16“Okoy kupun pesyosyekap Yowana, kimite yoto kwiyisyi ntarastinekap Moses oko ŋalekap workoyik, ntene kuceke yoto okoy pesyosyecu; cemite yawut cemwoytoy lokoywek ce toponec cepo poytoyisyetap Yiyintet. Kunyo mite ci tokol kutitire kule owut orit. 17Muce kupok wulin po torot oko ŋony, ntene puryo kot komukoktos mpo kisic kot cinum nyukutet akenke nyepo ntarastinek. 18“Ci nye kakwet korkenyi, oŋnkomüt ake kakwiy cito nyoto sakwayanat, nto ci nye kemüt korko nye kikwet santenyi, kakwiy mpo cito nyoto sakwayanat.’’ 19Kutosyikey Yesu kumwoy kule, “Kimite citake nye kimokoryo; nye kiloce sirok ce toponec corornec oko celelac, nye kiŋerekyinikey pesyosyek tokol om mokoryontinyi. 20Kimite mpo yec pananet ake nye cekure Lasaro, nye kiponto serkecok ce kinäm porto tokol, nye kicesutu kuco cokopure yepo kurketap mokoryontet. 21Kimöce Lasaro kule ntoyome sipiyoŋe omik ce kileleku kosuwune mesetap mokoryontonoto. Kikwoni mpo ŋokik yoto kwokumele serkecokyi. 22Yoto kume pananetkey, kusut malaykanik neto okoy kupunto komostap Apram om torot wule kimite sakwet. Yoto kume mpene mokoryontet, cemuy. 23Nteye kimite mokoryontet kapkompic kunyor taŋanyntap mwoninto, yoto kunyal torot okoy kukäs Apram kumite wule low, oko Lasaro nye kimite kepure yepo komosnyi. 24Yoto kukursyo kumwoy kule, ‘Papa, Apram kalya rirena ani, yoku Lasaro kuco cokowute walyitap mornenyi peko oŋnkutise ŋelyepmwani, omnye omite taŋanynta om wuli mite mayi loye!’ 25Ntene kumwoy Apram kule, ‘Wenyo, möce sot oŋnkinket kule, kinyoru nyi tukuk cepo soponto nye topon om soponŋuŋ tokol, kuyu wulo kinyor Lasaro tukuk cepo soponto nye miyat, ntene kunyo mite Lasaro yawut om wuli soponto nye topon, kunyo mite nyi taŋanynta. 26Kunyo kumite ŋalekyo yo, kunyi mite mwenet nye kiwo ŋony koromun nye mite kwenunyacek oko akwek, nye puryo kot kumuce kwoy kukwa wulo piko cekwone wuli ce mite acek, oŋnkupuryo kot kumuce kwoy kukwa wuli piko cekwone wulo omite akwek.’ 27Kumwoy cicoto kimokoryo kule, ‘Kunyo osomiŋ ani nyi Papa Apram kule, yokte Lasaro kuwo kaytap papamwani, 28omnye oponte ani mpo yeyamwani mut, kunyo kuwo neto oŋnkuwokusowu cek koromun mente kot kukwa mpecek wuli mite taŋanyntap mata!’ 29Kumwoy Apram kule, ‘Puryo kot kuyunyo, omnye ponto mpo yeyaŋuŋ Moses oko workoyik ce muce kumwoci ŋalek, kunyo misyini kulimnci cekto coto ŋalek.’ 30Ntene kumwoy cicoto kule, ‘Puryo kot kuyunyo, Papa Apram; omnye ye ketutune met citake oŋnkuwo wule mite cekto; mosukurenynkey.’ 31Ntene kumwoci Apram neto kule ‘Ye puryo kot komuce cek kot kulimnci Moses oko workoyik, kupuryo kot komuce mpo kucäm nka kot ketutune met citake.’ ’’

will be added

X\