Luke 15

1Nto mite pesyet ake, kukwa korurukikap mosoret ce caŋ oko piko co kicetay kwokorurukyikey ye kimite Yesu kulimnta ŋalekyi. 2Yoto kucec koŋunyŋuny Farasayek oko konetikap ntarastinek kumwoy kule, “Ŋerekyini cici piko ce kicetay oŋnkwomis wanak oko cekto!’’ 3Ntene kumwoci Yesu cek tyonkoconi kule, 4“Nteye ponto citake om akwek kecirekyi pokol akenke, oŋnkupot akenke om coto, puryo kot kupokokyini neto surukwenet cut tomonwokik sokol ok sokol oŋnkuwo kuceŋat nyo potot okoy kunyor? 5Nteye kanyor kuŋerec oŋnkunäm kukemer kat; 6ntowo kupun kanyi kukur coronutekyi oko latosyekyi, oŋnkumwoci kule, ‘Onte ceŋerec tokol wanak oko ani, omnye kwonyoru keciryenyu nye kukupot!’ 7Komwowok ani akwek kule, kuyunyoto mosiceŋerec om torot ye karenynkey cito akenke nye ponto miyotyo kupël piko ce toponec tomonwokik sokol ok sokol ce puryo kot kuroke kurenynkey.’’ 8Nto yec kule, “Ye ponto korket ake silinkinek taman, oŋnkupot akenke, kupuryo kot kupele tarit, oŋnkopuc koto, oŋnkuceny topon kot tokol okoy kunyor. 9Nteye kanyor, kukur kukwa wanak coronutekyi oko latosyekyi, oŋnkumwoci cek kule, ‘Onte ceŋerec tokol wanak oko ani, omnye kwonyoru silinkit nye kukupot!’ 10Komwowok ani akwek kule, kuyu nyoto mosukuŋerec malaykanikap Yiyintet ye karenynkey cito akenke nye ponto miyotyo.’’ 11Kutosyi Yesu kumwoy kule, “Kimite citake nye kiponto werikyi oyeny. 12Kumwoci werit nye miniŋ kwan kule, ‘Papa, ropkwo ani tukuk cecu.’ Yoto kupcici kwan werikyi tukway tukukwa. 13Nto om letutap pesyos ce ŋeri, koruruc werit nye miniŋ tukukyi oŋnkunomen kuwu koret ake nye low. 14Nteye kimite wuloto kuseret kowurta om aret nye miyat tukuk tokol. Nteyu kowo kwam kuwany tukuk tokol kunäm rupet nyewo koronoto, yoto kunäm pananiyantit lekwanato. 15Kuwo wokwiyis yisyet kaytap citap koronoto, kukoci nyo kuwo wokwokis nkururwenik om kanyi. 16Yoto kumac lekwanato kule ntayam sopiyoŋe perikap poroyonik ce kyome nkururwenik, ntene kupuryo ci nye kikoci neto kiy. 17Om letut kusot nkit om kasoteywekyi okoy kumwoy kule, ‘Ponto Papamwani pakasinek ce omisyi okoy kupiyoŋ oŋnkuŋet omik, kunyi karik kupokokyo ani rupet wuli! 18Kunyo mosaŋet oŋnkunomen awo wule mite Papamwani, oŋnkuwomwoci kule, Papa, kyawurte om wule mite Yiyintet oko om wule mite nyi. 19Kunyo puryo kot tokumisyino cekureno ani weriŋuŋ; yiya ani pate oyiku akenke om pakasinekuk!’ 20Yoto kuŋet kunomen kuwo kaytap Papanyi. Nteyu kito kumite wule low karik kupunto kaytap kwan, yoto kukäs kwan neto, nteye kotoköse kwan kurire oŋnkulapat kutoroc oŋnkuŋatut. 21Kumwoci weroto kwan kule, ‘Papa, kyawurte ani om wule mite Yiyintet oko om wule mite nyi, kunyo puryo kot tokumisyino ani cekureno weriŋuŋ.’ 22Kumwoci kwan mutworintenyi kule, ‘Osutu lakwar siret nye topon koromun oŋnkolokyi, oŋnkokoci komolilyet mornenyi, oŋnkolokyi, kweyonik kerenkokyi, 23oŋnkokweru yeyito nye yakway kwayeny kyam ceŋerec acek. 24Omnye kaco kusopot werimwani nye kikime, kikipot kunyi kotok.’ Yoto kucec kuŋerec cek tokol kwam sakwet. 25“Ntene kimite yoto werit nyewo mparen, nteye kimite kuconi karik kupun ka, kulim polotet oko tumnto. 26Yoto kukur mutworintet akenke oŋnkutepe kule, ‘Ŋal ne cu?’ 27Kumwoci mutworintet kule, ‘Kaco yeyaŋuŋ, kunyo kayeny Papaŋuŋ yeyito nye yakway omnye kaco yeyaŋuŋ kusopot.’ 28Ntene kunyer werit nyewo okoy kutay nye mowo koto orit. Kumiŋ kwan kuco saŋ oŋnkusaysay kumwoci kule, ‘Co ko orit!’ 29Kuwekyi werit nyewo kumwoci kwan kule, ‘Om kenyisyek tokol kyoyiwuŋ ani mutworyontit nye puryo kot otowuŋ ŋolyo mpo akenke, ntene puryo kot kono ani nyi mpo kucontet nye kayam aŋerec wanak oko coronutekwani. 30Kunyi kaco yawut weriŋuŋyi nye kikuseret tukukukyi kowurte koruk cemoronisyek kunyi keyeŋnkyi nyi neto yeyito nye yakway!’ 31Kuwekyi kwan kumwoci neto kule, ‘Wenyo, cepontekey acek oko nyi okokoy, kunyo cekukyi tukuk tokol ce oponte ani. 32Kunyo nyolyini ceŋerec acek wanak tokol, omnye kaco yeyaŋuŋ nyitenyi kikime kusopot, kikipot ntene kacenyoru neto yawut’.’’

will be added

X\