Luke 14

1Nteye kipesyetap Sapat, kuwo Yesu wokwomis omik om kotap Farasoyintet ake nye kipoytoyin. Yoto kurip piko kukäs Yesu topon koromun. 2Kimite yoto po taytap Yesu citake nye kikokwa porto tokol. 3Yoto kuwekyikey Yesu Farasayek oko konetikap ntarastinek oŋnkutepe cek kule, “Cöme ra ntarastinek cisop cito ye pesyetap Sapat nto puryo?’’ 4Kusisio cek. Kunäm Yesu cicoto oŋnkusop oŋnkumwoci kuwecikey. 5Oŋnkumwoci cek kule, “Ye ponto citake om akwek werinyi nto yeyinyi oŋnkusuci kurumnco ye pesyetap Sapat, kupuryo kot kuweti lakwar wokocut ye pesyetap Sapat?’’ 6Yoto kupurune cekto kuwec ŋalecato. 7Nteyu kowo kukäs Yesu toyek ce kikweye oteputek ce tokunotin cepo tay, kumwoci neto piko tokol tyonkoconi kule, 8“Ye kokuriŋ citake sakwetap komütisyet, mente wopure otepto nye tokunot nyepo tay, omnye pesyet ake kokokukur cicoto kokuriŋ nyi citake nyewo kupëliŋ nyi kuco sakwanato. 9Mosukuco cicoto kokurok akwek tukway oŋnkucokumwowuŋ nyi kule, ‘Ŋetyi otepto cito nyi!’ Mosecurokisye nyi oŋnkiwo yec wepure otepto nyepo let! 10Ntene ye kocekuriŋ sakwet, iwo wepure otepto nye mite let, nteye kaco cito nyo kokuriŋ nyi, cokuŋetiŋ kumwowuŋ kule, ‘Corwenyu, co nyi yu po tay.’ Yoto nyoru nyi om yoto kayweyatet om wule mite piko co kopur tokol. 11Omnye ci tokol nye silekey kusutkey parak nkit, mosicirekune nyoto, nto ci tokol nyo yweyisyi kurektokey nkit, mosicilaŋnta nyoto.’’ 12Yoto kumwoci Yesu cicoto kokure neto cokwomis kanyi kule, “Ye kekur piko kukwa kwokwomis kaŋuŋ omikap pet, nto sakwa, mente okur pate mpo yeyaŋuŋ nto tilyonutekuk, nto latosyekuk ce mokoren, omnye mosukukuriŋ nyi cek sakwet ake kuyokuŋ. 13Mente ayiy kuyunyo, ye keyiy sakwet, kur pononik oko piko co kipok kerenkok, oko co mwolyos oko piko co koryotin; 14mesenyoru nyi kupeyok, omnye puryo kot kuponto cek picoto tukuk ce mokuyokuneniŋ nyi, ntene kuyokuŋ Yiyintet nyi om pesyet nyo ciŋete kotutune met piko ce toponec.’’ 15Nteyu kowo kulim ŋalecato citake nye kipontokey Yesu kwomisyi tokol om meset, kumwoci cicoto neto kule, “Ponto kupeyoy neto cito nyo mosukopur ŋony kwomis om poytoyisyetap Yiyintet!’’ 16Kumwoci Yesu cicoto kule, “Kimite citake nye kikwiyta sakwet, oŋnkukur toyek ce caŋ. 17Ntowo kupunto pesyetap sakwet, kuyokto cicoto mutworintenyi kuwo wokumwoci piko co kucekur kule, ‘Akwa, omnye kaceyiyta kiy ake tokol!’ 18Yoto kucec ci tokol om picoto kicekure kuŋalal kumwoy kito nye kakerekta neto maco. Kumwoy nyepo tayta kule, ‘Kwayal mparet kunyo misyini awo wakäs, kunyo osomiŋ kule kalya puryo kot aconi ani.’ 19Kumwoy ake kule, ‘Kwayal yeyik taman ce potisyi, kunyo omite oweti kule wasyemnte yeyicato, kunyo somiŋ kule kalya puryo kot aconi ani.’ 20Kumwoy ake kule, ‘Kutomütisyi korket, kunyo om ŋolyontonoto puryo kot aconi ani.’ 21Yoto kuwo mutworintet wokumwoci mokoryontenyi ŋalecato tokol, kunyer citap kayta, oŋnkumwoci mutworintenyi kule, ‘Iwo sartekey lakwar wulo po orustunwek kacatanik oko arosyek ce minkec cepo moŋet, oŋnkikweru kukwa yu piko co pononik oko co kipok kerenkok, oko co kikoryo, oko co mwolyos!’ 22Yoto lakwar kumwoy mutworintet kule, ‘Mokoryontet, kaceyiyta tokol co kemwowu nyi, ntene oŋnkutokupara koto.’ 23Yoto kumwoci mokoryontet mutworintet kule, ‘Iwo arosyek co mite koret saŋ oko kacatanik wekur piko kukwa, sukuŋet kunyiy piko komwani.’ 24Kunyo komwowok ani akwek kule, puryo mpo akenke om picoto kicekure nye muce kot kucemcem sakwemwani!’’ 25Nteye kimite piko ce caŋ kupeti kurupe Yesu, yoto kuwekyikey neto piko oŋnkumwoci kule, 26“Ye kaco citake tokol wule omite ani oŋnkupuryo kot kupciykey oko kwan oko kamet, oko korkenyi, oko lekokyi, oko mpo mutakwam, oko mpo cekwam, oŋnkutaykey kunyilkey neto nkit kupuryo kot komuce nyoto kwek konomintemwani. 27Nto citake tokol nye puryo kot komuce kukesen murtowontenyi oŋnkunama cepetekey oko ani kupuryo kot komuce nyoto kwek konomintemwani. 28Omnye ŋo om akwek nye ye möce kule atec koto nyewo koromun, nye puryo kot kunyosyi kopur ŋony oŋnkuyitis kule oponte pesanik ce ceyeme otekse kuwany koto. 29Nteye puryo kot kwiy kuyunyoto, muce kucec kutekso; nteye puryo kot kuwany koyoto, mosukurorici neto piko alak co kiköse cicoto ye kicec kuteksi. 30Muce kuŋalal piko cut kunyil cicoto kumwoy kule, ‘Kicec cici kutekso ntene puryo kot komuc kuwany konyi’ 31Nto Kinko ŋo nye ye möce kule woporye Kinket ake, nye puryo kot kunyosyi kupur ŋony oŋnkusot kule omuci ra woporye Kinket nyin om sikarekap poryet elifunek taman ce oponte oŋnkuponto nyin sikarekap poryet elifunek tiptem? 32Ye kakäs kule puryo kot omuci poryet, mosukuyokto piko kutorokta nyin tokumite wule low, oŋnkusom kumwoci kule, cesat kalyet pate. 33Kuyunyoto om wule omite akwek, puryo kot kumuce akenke om akwek akwek konomintemwani ye puryo kot kupakakta kwasta tukuk ce ponto.’’ 34“Topon misyontet, ntene ye komo kunomu, kupuryo kot kumite aret ake yec nye cimuce cewec kot kunom. 35Ye puryo kot konomu misyontet kupuryo kot kuroke cinure teŋek nto cekonor kwek nye cinure teŋek, ciswortoy pate. Kunyo ci nye ponto yitik ce limnte, roke kulimnta!’’

will be added

X\