Luke 13

1Kimite pesyosyecoto piko alak ce kimwoci cek Yesu ŋalek ce nöme pikap Kalilaya, ce kipar Pilato kupok oŋnkulinyo korotikwa oko korosekwa ye kimite cek kukoyitoy korosekwa. 2Kuwekyi Yesu kumwoci cek kule, “Osoti akwek kule kiponto picoto miyotyonik kusir piko alak tokol ce kimite Kalilaya omnye kicitaŋany kuyunyoto? 3Puryo kot kuyunyo! Komwowok ani akwek kule, ye puryo kot arenynkey ayaste miyotyonikwok, mosoyaran opoku mpo akwek tokol kuyu wule kyaranta kupok picoto. 4Nto osoti akwek kule piko co ki taman ok sisit co kilulyi koto om Siloam kupakäc kupok kuce piko ce kilelotin kusir piko alak tokol ce kiminye Yerusalem? 5Puryo kot kuyunyo! Komwowok ani akwek kule ye puryo kot arenynkey ayaste miyotyonikwok, mosoyaran opoku mpo akwek kuyu wule kyaranta kupok picoto.’’ 6Kumwoci Yesu cek tyonkoconi kule, “Kiponto citake mokoywenyi nye kiwu rotinyi, kuco pesyet ake kule cakäs nto kukwiy omik, yoto puryo kot cokunyorta kiy. 7Kumwoci cicoto kopotintet kule, ‘Kenyitap somok nyi aconi ani kule cekäs omikap mokoywoni, ntene puryo kot onyortoy kiy; kunyo yep kulul! Omne sokowurta kwam teŋek pate?’ 8Kuwekyi kopotintet kumwoci cicoto kule, ‘Mokoryontet, yaste kopur kenyini pate okoy opotyi ani omutu oŋnkokoci puresik. 9Nteye kayiy omik om pesyosyek co kwoni; kunyol kutoponit nteye puryo, yep yoto kulul.’ ’’ 10Kimite Yesu kunetisyi ye kipesyetap Sapat om kotapkokwet ake. 11Kimite yoto korket ake nye kinäm oyinoto kumnyan kusyen kuwany kenyisyek taman ok sisit nye kiyim pate nye puryo kot komuce kot kuculkey mpo kisic. 12Ntowo kukäs Yesu korkonoto, kukur kuco ye mite neto oŋnkumwoci kule, “Cepyosyani, kacityaceniŋ nyi rewonoteŋuŋ!’’ 13Kukemer Yesu yewuniyekyi korkonoto, yoto pakenke kuŋet kuyo oŋnkuculkey oŋnkucec kukasta Yiyintet. 14Yoto kunerec nyewo nye poytoy kotapkok, omnye kisopis Yesu om pesyetap Sapat. Kumwoci cicoto piko kule, “Mite pesyosyek co lö co misyini ciyisye yisyonutek, kunyo okwoni kwocisopok om pesyosyecoto. Ntene monte cekwoni ye pesyetap Sapat.’’ 15Kuwekyi Mokoryontet kumwoci cicoto kule, “Akwek koperperoticu! Puryo kot kutyoce citake tokol om akwek yeyinyi nto sikiryenyi kutyace pewut ye pesyetap Sapat oŋnkukwer kuwo wokuye peko? 16Kunyo akäs pa korkoni nye mucokoretap Apram, nye kirat Setani neto kuwany kenyisyek taman ok sisit, kupuryo kot kumisyini cityokyi neto porokyi ye pesyetap Sapat?’’ 17Nteyu kowo kumwoy Yesu ŋalecato, kulilonis punikyi, ntene kuŋerec piko alake tokol om tukuk cepo kakitat ce kikwiye neto. 18Kumwoy Yesu kule, “Kerkey poytoyisyetap Yiyintet oko kiy ne? Mosoyuyite ani kiy ne? 19Kerkey oko kupuswontetap ketit nye cekure kalitarit nye kinäm citake oŋnkukol mparenyi, kupit okoy kuwoyit kwek ket nyewo, kukwa toritek kwokutec korikwa sarisyekap ketoto.’’ 20Kumwoy Yesu yec kule, “Mosoyuyite ani ne poytoyisyetap Yiyintet? 21Kerkey oko mumarek ce kinäm korket ake oŋnkutankwar oko pusyekap nkanuk cepo tepenik somok kukut kunyiy tokol.’’ 22Kunomen Yesu kuwo kupunte moŋosyek oko soŋwek kunetisyoti om pan nyi ye kiweti Yerusalem. 23Kutepe citake neto kule, “Mokoryontet, ŋeri so pate piko ce mocisop?’’ Kumwoci Yesu cek kule, 24“Otitir osyem koromun opunte kurket nye maric; omnye komwowok ani kule, caŋ piko ce mosukusyem kule ciwut orit, ntene puryo kot komuce cekto kot kowut. 25Ye kotepe kot kuŋet citap koto oŋnkuker kurkenyi, oŋnkoyoŋe akwek saŋ oŋnkokonykony kurket omwowu kule, ‘Mokoryontet, yotwec acek kurket!’ Mosukuwekwok kumwoy kule, ‘Puryo kot oŋnketok ani akwek, okwone ono?’ 26Yoto mosowec akwek omwowu kule, ‘Kikyomisyi acek wanak oko nyi, oŋnkinetisye nyi soŋwekyacek.’ 27Mosukuwekwok yec cicoto kumwowok kule, ‘Puryo kot oŋnketok ani akwek, okwone ono? Aŋete taymwani akwek cu oyiye ŋalek ce miyotec!’ 28Tya yoto nyun rirek oko nyiyetap kelak ye kokäs akwek Apram oko Isaka oko Yakopo oko workoyik kumite cek wule mite poytoyisyetap Yiyintet, oŋnkurok yec omite akwek kacekwetyok saŋ! 29Mosukukwane piko koŋasis oko raraktay oko makentany oko tö oŋnkwokopure yepo meset om poytoyisyetap Yiyintet. 30Kunyo möce okäs kule piko co mite yawut letut kuce mosukwokupoyit tayta, nto piko co mite yawut tayta kuce mosukwokupoyit letut.’’ 31Yoto pakenke kukwa Farasayek alake wule kimite Yesu oŋnkumwoci kule, “Ŋet wete wuli, nomen wecikey poninekuk, omnye möce Erote kule apakäciŋ nyi.’’ 32Kumwoci Yesu cek kule, “Ape womwoci mokoytina kule, ‘Mosakwet ani oyik oŋnkosop porwonik pesyoni oko pesyetap tun, nteye pesyetap somok awany yisyemwani.’ 33Ntene misyino awo poninekwani pesyoni oko pesyetap tun oko pesyetap koyin, omnye puryo kot komukoktos cepar kumeci workoyonto saŋ, nye puryo kot ku Yerusalem orit. 34Opo! Yerusalem! Yerusalem! Nyi nyi poköci workoyik, oŋnkiwire rwontok piko co kiciyok kukwa wule mite nyi, om aret ce tya ye kyamac ani kule oruruc lekokuk kukwa wule omite ani, kuyu wulo ruruktoy nkokyet lekokyi korurukyi kepepokyi orit, ntene toyisye nyi. 35Käs pa kacepokokwok komwoŋ kwek kiratya. Kunyo komwowok ani akwek kule, puryo kot toköso ani akwek okoy pesyet nye mosomwowu kule, ‘Ponto kupeyoy neto nye coni om kaynetap Mokoryontet.’ ’’

will be added

X\